ಸವಿಜ್ಞಾನ

 ಮೈಕ್ರೋ ಜಗತ್ತಿನ ಮ್ಯಾಕ್ರೋ ಚಿತ್ರಣ.

ಲೇಖಕರು:  ಕೃಷ್ಣ ಸುರೇಶ

    ಛಾಯಗ್ರಹಣ ದುಬಾರಿಯಾದರೂ ಒಂದು ಒಳ್ಳೆಯ ಹವ್ಯಾಸ. ಜೀವನದ ಒಂದು ರಸಮಯ ಕ್ಷಣವನ್ನು ಶಾಶ್ವತವಾಗಿ ದಾಖಲಿಸುವ ಛಾಯಗ್ರಹಣವು ಕಲಿಯಲು ಮತ್ತು ಕಲಿತದ್ದನ್ನು ನಿರಂತರವಾಗಿ ಬೆಳೆಸಿಕೊಂಡು ಹೋಗಲು ನಿಷ್ಟೆ, ಪರಿಶ್ರಮ ಮತ್ತು ತಾಳ್ಮೆಯನ್ನು ಬೇಡುವ ಒಂದು ಶಾಸ್ತ್ರವೆಂದರೆ ತಪ್ಪಲ್ಲ.   ಲ್ಯಾಂಡ್‌ ಸ್ಕೇಪ್‌, ಭಾವಚಿತ್ರ, ಪ್ರವಾಸ, ಸ್ಮಾರಕಗಳು,  ಕ್ಯಾಡಿಡ್‌ ಛಾಯಾಗ್ರಹಣ, ವನ್ಯಮೃಗ ಛಾಯಾಗ್ರಹಣ, ಅಸ್ಟ್ರೋಫೋಟೋಗ್ರಫಿ, ಪತ್ರಿಕಾ ಛಾಯಗ್ರಹಣ ಹೀಗೆ ಹಲವಾರು ವಿಧಗಳಲ್ಲಿ ಇದನ್ನು ವಿಂಗಡಿಸ ಬಹುದು.ನಮ್ಮ ಬರಿಗಣ್ಣಿಗೆ ಸ್ಪಷ್ಟವಾಗಿ ಕಾಣದ ಸೌಂದರ್ಯವನ್ನು ಸೂಕ್ಷ ವಸ್ತುಗಳ ಜಗತ್ತು ಹೊಂದಿರುತ್ತದೆ. ಸಸ್ಯದ  ಸಣ್ಣ ಭಾಗಗಳು, ಹೂಗಳು, ಪಾಚಿ, ಕೀಟಗಳು, ಸೂಕ್ಷ್ಮಾಣು ಜೀವಿಗಳು ಮುಂತಾದವುಗಳನ್ನು  ಕ್ಯಾಮರಾದಲ್ಲಿ ಸೆರೆ ಹಿಡಿಯುವ ಕಲೆಯೇ ಮ್ಯಾಕ್ರೋ ಫೋಟೋಗ್ರಫಿ. ಛಾಯಾಗ್ರಹಣದಲ್ಲಿ   ಸಬ್ಜೆಕ್ಟ್‌ ಅಂದರೆ ನಾವು ಸೆರೆಹಿಡಿಯಲು ಹೊರಟಿರುವ ದೃಶ್ಯದ ಸಂಯೋಜನೆಯಲ್ಲಿ ಅಪರ್ಚರ್‌ ( ಕ್ಯಾಮರಾದ ಕಿಂಡಿ), ಷಟರ್‌ ಸ್ಪೀಡು ಮತ್ತು ಐ ಎಸ್‌ ಒ,  ಇವು ಗುಣಮಟ್ಟವನ್ನು ನಿರ್ಧರಿಸುವ ಬಹಳ ಮುಖ್ಯವಾದ ಅಂಶಗಳು. ಷಟರ್‌ ಸ್ಪೀಡ್‌ ಕಡಿಮೆ ಇದ್ದು ವಸ್ತು ಚಲನೆಯಲ್ಲಿದ್ದರೆ ಚಿತ್ರವು ಮಂಜು ಮಂಜಾಗುತ್ತದೆ (Motion blur). ಜಲಪಾತದಿಂದ ನೀರು ದುಮ್ಮಕ್ಕಿ ಇಳಿಯುವ ದೃಶ್ಯವನ್ನು ಉದ್ದೇಶಪೂರ್ವಕವಾಗಿ ಕಡಿಮೆ ಷಟರ್‌ ಸ್ಪೀಡಿನಲ್ಲಿ ಚಿತ್ರೀಕರಿಸಿದರೆ ಅದು ಹಾಲಿನ ಧಾರೆಯಂತೆ ಚಿತ್ರದಲ್ಲಿ ಮೂಡುತ್ತದೆ. ಹಾಗೆಯೆ ರಾತ್ರಿ ಕಾಲದಲ್ಲಿ ವಾಹನ ದಟ್ಟಣೆಯ ಚಿತ್ರೀಕರಿಸಿದರೆ ರಸ್ತೆಯ ಎಡಕ್ಕೆ ಕೆಂಪು ಗೆರೆಗಳು ಮತ್ತು ಬಲ ಬದಿಯಲ್ಲಿ ಬಳಿಯ ಗೆರೆಗಳಂತೆ ಚಿತ್ರಿತವಾಗಿ ಚಲನೆಯನ್ನು ಬಿಂಬಿಸುತ್ತದೆ. ಇದೇ ದೃಶ್ಯವನ್ನು ವೇಗದ ಷಟರ್‌ ಸ್ಪೀಡಿನಲ್ಲಿ ಚಿತ್ರೀಕರಿಸಿದರೆ, ಎಡಬದಿಯಲ್ಲಿ ವಾಹನಗಳು ಮತ್ತು ಅವುಗಳ ಹಿಂದಿನ ಕೆಂಪು ದೀಪಗಳು ಹಾಗೆಯೇ ಬಲಬದಿಯಲ್ಲಿ ವಾಹನಗಳು ಅವುಗಳ ಹೆಡ್‌ ಲೈಟುಗಳು ನಮ್ಮ ಕಣ್ಣಿಗೆ ಸ್ಥಿರವಾಗಿರುವಂತೆ ಸ್ಪಷ್ಟವಾಗಿ ಚಿತ್ರಿತವಾಗುತ್ತದೆ. ಕ್ಯಾಮರಾ ಕಿಂಡಿ ದೊಡ್ಡದಾದಷ್ಟು ಹೆಚ್ಚು ಬೆಳಕು ಕ್ಯಾಮರವನ್ನು ಪ್ರವೇಶಿಸುತ್ತದೆ. ಕಡಿಮೆ ಬೆಳಕು ಇರುವೆಡೆ ಇದು ಸಹಾಯಕ. ಆದರೆ ಹೆಚ್ಚಿನ ಬೆಳಕಿನಲ್ಲಿ  ಕಿಂಡಿಯ ಗಾತ್ರ ಕಿರಿದಾಗಿರಬೇಕು. 

 ಬದಲಿಗೆ ದೊಡ್ಡದಾಗಿದ್ದರೆ ದೃಶ್ಯದ ರಸಲ್ಯೂಷನ್‌ ಕಡಿಮೆಯಾಗುತ್ತದೆ. ದತ್ತ ಬೆಳಕಿನಲ್ಲಿ ಕಿಂಡಿಯ ಗಾತ್ರ ಅತಿಯಾದರೆ ದೃಶ್ಯವು ವೈಟ್ವಾಷ್‌ ಆಗಿ ಏನೂ ಗೋಚರಿಸದ ಬಿಳಿ ಗೋಡೆಯಂತಾಗುತ್ತದೆ.  ಹೆಚ್ಚಿನ ISO ಕಡಿಮೆ ಬೆಳಕಿನಲ್ಲಿದೃಶ್ಯವನ್ನು  ಹೆಚ್ಚು ಬೆಳಕಿನಲ್ಲಿ ತೆಗೆದಂತೆ ಚಿತ್ರಿಕರಿಸುವುದಕ್ಕೆ ಸಹಾಯಕವಾಗುತ್ತದೆ. ಆದರೆ ಎದ್ದು ಕಾಣುವ ಗೋಚರ ಕಣಗಳ ಕಾರಣದಿಂದಚಿತ್ರದ ಗುಣಮಟ್ಟ ಕುಗ್ಗುತ್ತದೆ.   ಇದರ ಜೊತೆ ಜೊತೆಗೆ, ವೈಟ್‌ ಬಾಲೆನ್ಸ್, ಬ್ರಾಕೆಟ್ಟಿಂಗ್‌, ಡೇಲೈಟ್‌ ಅಡ್ಜಸ್ಟಮೆಂಟು, ಡೈನಾಮಿಕ್‌ ರೇಂಜು, ಪೋಕಸ್‌ ಪಾಯಿಂಟ್‌, ಇವೆಲ್ಲದರ ಅಂದಾಜು ಮತ್ತು ಮೂಡ್‌, ಕಾಲ,‌ ದೇಶ ಮತ್ತು   ದೃಶ್ಯವನ್ನು ಅವಲಂಬಿಸಿ ನಿರ್ಧರಿಸುವ  ಸಾಮರ್ಥ್ಯ ಛಾಯಾಗ್ರಾಹಕನಿಗೆ ಇರಬೇಕಾಗುತ್ತದೆ.

ಮ್ಯಾಕ್ರೋ ಫೋಟೋಗ್ರಫಿ ಮಾಡಲು ಬೇಕಾದ ಪರಿಕರಗಳಲ್ಲಿ ಮೊದಲನೆಯದು ಉತ್ತಮವಾದ ಕ್ಯಾಮರಾ. ಈ ದಿನಗಳಲ್ಲಿ ಮಾರುಕಟ್ಟೆಯಲ್ಲಿ ಸಿಗುವ ಕ್ಯಾಮರಾಗಳು ಅತ್ಯಂತ ದುಬಾರಿಯಾದರೂ ಬಳಸಲು ಅತಿ ಸುಲಭ. ಇಂದು DSLR (Digital Single Lens Refelex) ಕ್ಯಾಮರಾಗಳ ಸಾಮ್ರಾಜ್ಯ ಮುಗಿಯುತ್ತಾ ಬಂದು Mirrorless Digital Camera ಗಳು ಮಾರುಕಟ್ಟೆಗೆ ಲಗ್ಗೆ ಇಟ್ಟಿರುವ  ಕಾಲ. DSLRಗಳಿಗೆ ಹೋಲಿಸಿದರೆ Mirrorless Digital Cameraಗಳು ತೂಕ ಕಡಿಮೆ ಮತ್ತು ಹೆಚ್ಚು ಫೀಚರುಗಳನ್ನು ಹೊಂದಿವೆ. ಡಿಜಿಟಲ್‌ ಕ್ಯಾಮರಾಗಳನ್ನು ಸದ್ಯಕ್ಕೆ ಕ್ರಾಪಡು ಸೆನ್ಸಾರ್ ಕ್ಯಾಮರ ಮತ್ತು ಫುಲ್‌ ಫ್ರೇಮ್‌ ಸೆನ್ಸಾರ್  ಕ್ಯಾಮರ ಎಂದು ವಿಂಗಡಿಸಬಹುದು. ಇದರಲ್ಲಿ ಎರಡನೆಯ ಬಗೆಯದು ಹೆಚ್ಚು ವಿಸ್ತಾರವಾದ ಸೆನ್ಸಾರ್ ಅಥವಾ ತೆರೆ ಹೊಂದಿರುತ್ತದೆ. ಫುಲ್‌ ಫ್ರೇಮ್ ಸೆನ್ಸಾರ್ಗಳಲ್ಲಿ ೨೪. ಮೆಗಾ ಪಿಕ್ಸೆಲ್‌ ಮತ್ತು ೪೩.೮ ಮೆಗಾ ಪಿಕ್ಸೆಲ್‌ ಸೆನ್ಸಾರ್ ಗಳ ಆಯ್ಕೆಯೂ ಇದೆ.  ಒಂದು ಉತ್ತಮ ಕ್ಯಾಮರಾದ ಜೊತೆಗೆ ಅದನ್ನು ನಾವು ಯಾವ ಬಗೆಯ ಛಾಯಾಗ್ರಹಣಕ್ಕೆ ಬಳಸುತ್ತೇವೆ ಎಂಬುದನ್ನು ಅನುಸರಿಸಿ ಮಸೂರ (Lens) ಗಳನ್ನು ಕೊಳ್ಳಬೇಕಾಗುತ್ತದೆ. ವನ್ಯಮೃಗ ಅಥವಾ ಕ್ರೀಡೆಗಳ ಛಾಯಗ್ರಹಣಕ್ಕೆ ಟೆಲಿ ಜೂಮ್‌ ಲೆನ್ಸ್ ಇರಲೇಬೇಕು. ಒಂದು ಒಳ್ಳೆಯ  ಟೆಲಿ ಜೂಮ್‌ ಲೆನ್ಸ್‌ನ ಬೆಲೆ ಹೇಳಬೇಕೆಂದರೆ ಉದಾಹರಣೆಗೆ ನಿಕಾನ್ ೧೮೦-೬೦೦ ಮಿಮೀ ಲೆನ್ಸಿಗೆ ೧,೪೮,೦೦೦ದಿಂದ ೧,೬೮,೦೦೦ ರೂಪಾಯಿಗಳ ಬೆಲೆಯಿದೆ. ಬಹುಉಪಯೋಗಿ ನಿಕಾನ್‌ ೨೪-೭೦ ಮಿಮೀ F/೨.೮ S ಲೆನ್ಸಿನ ಬೆಲೆ ಕೇವಲ ೧,೬೮,೦೦೦ ರೂಪಾಯಿಗಳು! ಇನ್ನೂ ಮ್ಯಾಕ್ರೋ ಫೋಟೋಗ್ರಫಿಗೆ ಮೀಸಲಾದ ಮ್ಯಾಕ್ರೋ ಲೆನ್ಸುಗಳು ಕ್ಯಾಮರಾದ ಸೆನ್ಸಾರ್ ಮೇಲೆ  ಅತ್ಯಂತ ಸೂಕ್ಷ್ಮವಾದ ವಸ್ತುಗಳ ಪ್ರತಿಬಿಂಬವನ್ನು ೧:೧ ಅನುಪಾತದಲ್ಲಿ ಮೂಡಿಸುವುದರಿಂದ ಅವುಗಳ ಅತ್ಯಂತ ಸ್ಪಷ್ಟ ಚಿತ್ರಗಳನ್ನು ಸೆರೆಹಿಡಿಯಲು ಸಹಕರಿಸುತ್ತವೆ. ಮ್ಯಾಕ್ರೋ ಲೆನ್ಸುಗಳ ಬೆಲೆಯೂ ಕೂಡ ಇಷ್ಟೇ ದುಬಾರಿಯಾಗಿರುತ್ತವೆ. ಕೆಲವು ಸನ್ನಿವೇಶಗಳಲ್ಲಿ ಟೆಲಿ ಜೂಮ್‌ ಲೆನ್ಸು ಬಳಸಿಯೂ ಮ್ಯಾಕ್ರೋ ಚಿತ್ರೀಕರಣವನ್ನು ಮಾಡಬಹುದು. ನೀವು ಮ್ಯಾಕ್ರೋ ಫೋಟೋಗ್ರಫಿಯನ್ನು  ಆರಂಭಿಸಬೇಕೆಂದು ಯೋಚಿಸಿರುವಿರಾದರೆ ದುಬಾರಿ ಬೆಲೆಯ ಮ್ಯಾಕ್ರೋ ಲೆನ್ಸ್ಗಗಳನ್ನು ಕೊಂಡು ಆರಂಭಿಸಬೇಕೆಂದೇನು ಇಲ್ಲ.  ನೀವು ಈ ಹೊಸ ಪ್ರಯೋಗವನ್ನು ಮಾಡುವುದಾದರೆ ನಿಮ್ಮ ಬಳಿಯಿರುವ ೧೮-೫೫ಮಿಮೀ ಕಿಟ್‌ ಲೆನ್ಸ್ ಅಥವಾ ೫೦ ಮಿಮೀ ಅಥವಾ ಯಾವುದೇ ಪ್ರೈಮ್‌ ಲೆನ್ಸಿನಿಂದಲೇ ಆರಂಭಿಸಬಹುದು.  ನಿಮ್ಮ ಲೆನ್ಸಿಗೆ ಹೊಂದಾಣಿಕೆಯಾಗುವ ಕ್ಲೋಸಪ್‌ ಫಿಲ್ಟರನ್ನು ಕೊಂಡು ತಂದು ಅದನ್ನು ನಿಮ್ಮ ಲೆನ್ಸಿಗೆ ಅಳವಡಿಸಿ ಮ್ಯಾಕ್ರೋ ಫೋಟೋಗ್ರಫಿ ಮಾಡಬಹುದು. ರೆನಾಕ್ಸ್‌ ಇಲ್ಲವೇ ನಿಸಿ ಬ್ರಾಂಡಿನಂತಹ ಅನೇಕ ಮ್ಯಾಕ್ರೋ ಫಿಲ್ಟರುಗಳು ಮಾರುಕಟ್ಟೆಯಲ್ಲಿ ದೊರೆಯುತ್ತದೆ.  ಈ ವಿಧಾನದಿಂದ ಕ್ರಿಸ್ಪಾಗಿ, ಸ್ಪಷ್ಟವಾಗಿ ಇರುವ ಮ್ಯಾಕ್ರೋ ಚಿತ್ರಗಳನ್ನು ತೆಗೆಯುವುದು ಕಷ್ಟಸಾಧ್ಯ. ಇನ್ನಷ್ಟು ಅಗ್ಗದ ವಿಧಾನದಲ್ಲಿ ಆರಂಭಿಕ ಮ್ಯಾಕ್ರೋ ಫೋಟೋಗ್ರಾಫರಗಳು ಬಹಳ ಕಡಿಮೆ ಖರ್ಚಿನಿಂದ ತಮ್ಮ ಕಿಟ್‌ ಲೆನ್ಸನ್ನೆ ಮ್ಯಾಕ್ರೋ ಲೆನ್ಸಾಗಿ ಪರಿವರ್ತಿಸಿ ಮ್ಯಾಕ್ರೋ ಚಿತ್ರಗಳನ್ನು ತೆಗೆಯಬಹುದು.  ನಿಮಗೆ ಅದರಲ್ಲಿ ಅಭಿರುಚಿ ಮೂಡಿತೆಂದರೆ ವೃತ್ತಿಪರತೆಯಿಂದ  ಮುಂದುವರೆದು ಮ್ಯಾಕ್ರೋ ಲೆನ್ಸುಗಳನ್ನು ಕೊಂಡು ಮತ್ತಷ್ಟು ಉತ್ತಮವೆನಿಸಿದ ಚಿತ್ರಗಳನ್ನು ತೆಗೆಯಬಹುದು.

ನಿಮ್ಮ ಕ್ಯಾಮರಾದೊಂದಿಗೆ ಬಂದಿರುವ ಕಿಟ್ ಲೆನ್ಸಿನ‌ ರಚನೆಯನ್ನು ನೀವು ಗಮನಿಸಿದರೆ ಅದರ ಹಿಂದಿನ ತುದಿಯಲ್ಲಿ  ಕ್ಯಾಮರಾಗೆ ಲೆನ್ಸನ್ನು ಜೋಡಿಸಿ ಲಾಕ್‌ ಮಾಡುವ  ಲೆನ್ಸ್ ಅಡಾಪ್ಟರ್‌ ಇರುತ್ತದೆ.  ಲೆನ್ಸಿನ ಮುಂದಿನ ತುದಿಯಲ್ಲಿ ಒಂದು ಫಿಲ್ಟರ್‌ ತ್ರೆಡ್ ಇರುತ್ತದೆ.    ಈ ತ್ರೆಡ್ಡಿನ ಅಳತೆಗೆ ಸರಿಯಾಗಿ  ಹೊಂದುವ ರಿವರ್ಸ್‌ ರಿಂಗ್‌ ಒಂದನ್ನು ನೀವು ಖರೀದಿಸಿ ನಿಮ್ಮ ಕಿಟ್‌ ಲೆನ್ಸಗೆ ಅದನ್ನು ಅಳವಡಿಸಿದರೆ ನಿಮ್ಮ ಲೆನ್ಸಿಗೆ ಮತ್ತೊಂದು ಲೆನ್ಸ್ ಅಡಾಪ್ಟರ್ ದೊರೆಯುತ್ತದೆ. ಈಗ ನಿಮ್ಮ ಕ್ಯಾಮರಾದ ಲೆನ್ಸನ್ನು  ಈ ಹೊಸ ರಿಂಗ್‌ ಅಡಾಪ್ಟರಿನ ಸಹಾಯದಿಂದ ಹಿಂದೆ ಮುಂದಾಗಿ ಕ್ಯಾಮರಾಗೆ ಜೋಡಿಸಿದರೆ ಈ ವ್ಯವಸ್ಥೆಯು ಮ್ಯಾಕ್ರೋ ಲೆನ್ಸಾಗಿ  ಕೆಲಸಮಾಡುತ್ತದೆ!
ಸೊಳ್ಳೆ ಮತ್ತು ಅದರ ಪ್ಯೂಪ

    

ಕಿಟ್‌ ಲೆನ್ಸನಲ್ಲಿ ಕಿಂಡಿ (Aperture) ಯನ್ನು  ಹೆಚ್ಚು ಮತ್ತು ಕಡಿಮೆ ಮಾಡುವ ಮೂಲಕ ಕ್ಯಾಮರದ ಪರದೆಯ ಮೇಲೆ ಬೀಳಬೇಕಾದ ಬೆಳಕಿನ ಪ್ರಮಾಣವನ್ನು ನಿಯಂತ್ರಿಸುವ ವ್ಯವಸ್ಥೆ ಇರುತ್ತದೆ. ಬೆಳಕಿನ ಕಿಂಡಿ  ಚಿಕ್ಕದಾದಷ್ಟು ಪರದೆಯ ಮೇಲೆ ಬೀಳುವ ಬೆಳಕಿನ ಪ್ರಮಾಣ ಕಡಿಮೆ ಮತ್ತು  ಅಲ್ಲಿ ಮೂಡುವ ದೃಶ್ಯವು ಹೆಚ್ಚು ಸ್ಪಷ್ಟವಾಗುತ್ತಾ ಹೋಗುತ್ತದೆ. ಆಧುನಿಕ ಕ್ಯಾಮರಾಗಳಲ್ಲಿ ಅಪರ್ಚರನ್ನು ಸ್ವಯಂಚಾಲಿತವಾಗಿ ಕ್ಯಾಮರಾದ ಯಾಂತ್ರಿಕತೆ ನಿಯಂತ್ರಿಸುವ ವ್ಯವಸ್ಥೆ ಇರುತ್ತದೆ. ಜೊತೆಗೆ ನಾವೇ ಲೆನ್ಸಿನಲ್ಲಿ ಅಳವಡಿಸಿರುವ  ಉಂಗುರಾಕೃತಿಯ ತಿರುಪನ್ನು ತಿರುಗಿಸುವುದರ ಮೂಲಕ ನಿಯಂತ್ರಿಸುವ ಆಯ್ಕೆಯು ಕೆಲವು ಲೆಂಸುಗಳಲ್ಲಿರುತ್ತದೆ.  ನಾವು ಲೆನ್ಸನ್ನು ರಿವರ್ಸ್‌ ರಿಂಗ್‌ ಸಹಾಯದಿಂದ ಹಿಂದು ಮುಂದಾಗಿ ಕ್ಯಾಮರಾಗೆ ಜೋಡಿಸಿದಾಗ ಉಂಟಾಗುವ ಒಂದು ತೊಡಕು ಎಂದರೆ ಕ್ಯಾಮರಾವನ್ನು ಲೆನ್ಸಿಗೆ ಜೋಡಿಸುವ ವಿದ್ಯುತ್‌ಸಂಪರ್ಕ ಏರ್ಪಡುವುದಿಲ್ಲ. ಹೀಗಾಗಿ ಲೆನ್ಸನ್ನು ಆಟೋಫೋಕಸ್‌ ಮುಂತಾಗಿ ಕ್ಯಾಮರಾದ ಯಾಂತ್ರಿಕತೆ ಮೂಲಕ ನಿಯಂತ್ರಿಸುವ ವ್ಯವಸ್ಥೆಯೂ  ಕಾರ್ಯನಿರ್ವಹಿ.ಸುವುದಿಲ್ಲ. 

ಇಂತ ಕ್ಯಾಮರದಲ್ಲಿ ಷಟರ್‌ ಸ್ಪೀಡ್‌,ISO ಮುಂತಾದವುಗಳನ್ನು ನಿಯಂತ್ರಿಸಬಹುದಾದರೂ ಅಪರ್ಚರನ್ನು,ಕಂಪನ (Vibration Reduction) ಗಳನ್ನು ನಿಯಂತ್ರಿಸಲಾಗದು.

 

2 mm ಇರುವೆ ಜಗತ್ತು

ಇಂತಲ್ಲಿ ಲೆನ್ಸಿನಲ್ಲಿ ಅಪರ್ಚರನ್ನು ನಿಯಂತ್ರಿಸುವ ತಿರುಪು ಇದ್ದರೆ ಅದನ್ನು ತಿರುಗಿಸಿ ಅಪರ್ಚರನ್ನು ನಮಗೆ ಬೇಕಾದ ಗಾತ್ರಕ್ಕೆ ಇರಿಸಿಕೊಳ್ಳಬಹುದು.  ಅದು ಇಲ್ಲದಿದ್ದರೆ ಲೆನ್ಸಿನಲ್ಲಿರುವ ಅಪರ್ಚರನ್ನು ನಿಯಂತ್ರಿಸುವ ಲಿವರ್‌ಗೆ ಒಂದು ಅಂಚಿ ಕಡ್ಡಿಯನ್ನು ಅಳವಡಿಸಿದರೆ  ಮ್ಯಾಕ್ರೋ ಫೋಟೋಗ್ರಫಿಗೆ ಅಪೇಕ್ಷಣೀಯವಾದಷ್ಟು (f/̆̆೧೧ ಮತ್ತು  f/೨೨ ನಡುವೆ ) ಅಪರ್ಚರನ್ನು ನಾವು ನಿಗದಿಗೊಳಿಸಬಹುದು.   ಹಾಗೂ  ಸ್ಟಾಂಡ್‌ಗೆ ಕ್ಯಾಮರ ಅಳವಡಿಸಿ  ಮತ್ತು  ರಿಮೋಟ್‌ ಬಳಸಿ ಕ್ಲಿಕ್ ಮಾಡುವುದರಿಂದ  ಕ್ಯಾಮರಾದ ಕಂಪನವನ್ನು ತಡೆಯಬಹುದು.(ಎಚ್ಚರಿಕೆ: ಉತ್ತಮ ಗುಣಮಟ್ಟದ ಮತ್ತು ನಿಮ್ಮ ಲೆನ್ಸಿಗೆ ಕರಾರುವಕ್ಕಾದ ರಿವರ್ಸ್‌ ರಿಂಗ್‌ ಕೊಳ್ಳುವುದು ಬಹಳ ಮುಖ್ಯ ಕಳಪೆ ಮಾಲನ್ನು ಕೊಂಡು ಕ್ಯಾಮರಾದ ;ಲೆನ್ಸ್ ಹೋಲ್ಡರ್‌ ಮತ್ತು‌ ನಿಮ್ಮ ಲೆನ್ಸ್‌ ಎರಡನ್ನೂ ಹಾಳು ಮಾಡಿಕೊಳ್ಳದಿರಿ!)

	ಡೇಮ್ಸ್‌ ಫ್ಲೈ	ನಿದ್ರಿಸುತ್ತಿರುವ ಡ್ರಾಗನ್‌ ಫ್ಲೈ

 

 

ಮ್ಯಾಕ್ರೋ ಫೋಟೋಗ್ರಫಿಗೆ ಕ್ಯಾಮರಾ ಮತ್ತು ಲೆನ್ಸ್‌ ರೆಡಿ !!! ಆದರೆ ಬೆಳಕು?! ಹವ್ಯಾಸಿ ಫೋಟೋಗ್ರಾಫರಗಳು ಬೆಳಕನ್ನು ಅಭ್ಯಾಸ ಮಾಡುವ ವಿದ್ಯಾರ್ಥಿಗಳು ಎನ್ನುವ ಒಂದು ಮಾತಿದೆ. ಬೇಳಕಿನ ವಿನ್ಯಾಸದಿಂದಲೇ ಹೆಸರುವಾಸಿಯಾದ ವಿ ಕೆ ಮೂರ್ತಿಯವರಂತಹ ಅನೇಕ ಫೋಟೋಗ್ರಾಫರ್‌ ಮಹನೀಯರಿದ್ದಾರೆ. ಹಗಲಿನಲ್ಲಿ ಹೊರಾಂಗಣದಲ್ಲಿ ನೈಸರ್ಗಿಕ ಬೆಳಕನ್ನು ಬಳಸಿಕೊಳ್ಳಬಹುದು. ಇರುವ ಲಭ್ಯ     ಬೆಳಕಿನಲ್ಲಿ ಸರಿಯಾದ ISOಹೊಂದಿಸಿ ಚಿತ್ರೀಕರಣ ಮಾಡಬಹುದು. ವಸ್ತುವಿಗೆ ತುಂಬಾ ಸಮೀಪದಲ್ಲಿ ಕ್ಯಾಮರವನ್ನು ಇರಿಸಿ ಮ್ಯಾಕ್ರೋ ಚಿತ್ರೀಕರಣ ಮಾಡಬೇಕಾಗುವುರಿಂದ ಫ್ಲಾಷನ ಗುರಿಗಿಂತ ಲೆಂಸ್‌ ವಸ್ತುವಿಗೆ ಸಮೀಪವಿರುತ್ತದೆ. ಹೀಗಾಗಿ ಎಷ್ಟೋ ಸಲ ಕ್ಯಾಮರಾಗೆ ಜೋಡಿಸಿದ  ಫ್ಲಾಷ್‌ನ ಬೆಳಕು ವಸ್ತುವಿನ ಮೇಲೆ ಕೇಂದ್ರೀಕರಿಸದೆಯೇ ಹೋಗತ್ತದೆ. ಇಲ್ಲವೇ ಲೆನ್ಸಿನ ನೆರಳು ವಸ್ತುವಿನ ಮೇಲೆ ಬೀಳುತ್ತಿರುತ್ತದೆ. ಆದ್ದರಿಂದ ಫ್ಲಾಷ್ ಬಳಸುವುದಾದರೆ ಫ್ಲಾಷ್‌ ಸ್ಪ್ರೆಡ್ಡರುಗಳನ್ನು ಬಳಸಿಕೊಳ್ಳಬಹುದು. ಕ್ಯಾಮರಾಗೆ ರಿಮೋಟ್‌ ಅಳವಡಿಸಿ ನಮಗೆ ಅಗತ್ಯವಾದ ಕೋನದಲ್ಲಿ ಮತ್ತು ಅಂತರದಲ್ಲಿ ಫ್ಲಾಷ್‌ ಇರಿಸಿ ಚಿತ್ರೀಕರಿಸಬಹುದು.

 

ನಮ್ಮ ಸುತ್ತಲಿನ  ಪರಿಸರದಲ್ಲಿಯೇ ಲೆಕ್ಕವಿಲ್ಲದಷ್ಟು  ಅಗತ್ಯವಾದ ಸಬ್ಜೆಕ್ಟಗಳು ಇರುವುದಾದರೂ ಮ್ಯಾಕ್ರೋ ಫೋಟೋಗ್ರಫಿಯು ಅಂದುಕೊಂಡಷ್ಟು ಸುಲಭದ ಕೆಲಸವಲ್ಲ. ಪ್ರಕೃತಿಯನ್ನು ಸೂಕ್ಷ್ಮವಾಗಿ ಗಮನಿಸುವ ಮನೋಭಾವ, ತಾಳ್ಮೆ ಪರಿಶ್ರಮ, ಅನ್ವೇಷಣೆಯ ಗುಣಗಳು ಬಹಳ ಅಗತ್ಯವೆಂದು ಪ್ರತ್ಯೇಕವಾಗಿ ಹೇಳಬೇಕಾಗಿಲ್ಲ. ಹೂಗಳು, ಕೀಟಗಳು, ಜೇಡಗಳು ಮುಂತಾದ ಸಂದಿಪದಿಗಳು,ಪಾಚಿ ಮುಂತಾದ ಸೂಕ್ಷ್ಮಾಣು ಜೀವಿಗಳು ಇವುಗಳನ್ನು ಅವುಗಳ ನೈಸರ್ಗಿಕ ಪರಿಸರದಲ್ಲಿ ಚಿತ್ರೀಕರಿಸುವುದು
ಉತ್ತಮ. ಯಾವುದೆ ಪ್ರಾಣಿ, ಪಕ್ಷಿ,  ಕೀಟ, ಚಿಟ್ಟೆ, ಸೂಕ್ಷ್ಮಾಣು ಜೀವಿ ಎಲ್ಲದಕ್ಕೂ ಪ್ರಕೃತಿಯಲ್ಲಿ ನಮ್ಮಂತೆ ಬದುಕುವ ಹಕ್ಕಿರುತ್ತದೆ.  ನಮ್ಮ ಹವ್ಯಾಸಕ್ಕಿಂತ ಅವುಗಳ ಬದುಕು ಅಮೂಲ್ಯವೆನ್ನುವುದನ್ನು ಮನಸ್ಸಿನಲ್ಲಿರಿಸಿಕೊಳ್ಳುವುದು ಉತ್ತಮ. ಅವುಗಳನ್ನು ಹಿಡಿಯುವುದು, ಹಿಡಿದು ಹಿಂಸಿಸಿ ಚಿತ್ರಿಕರಿಸುವುದು ಅನೈತಿಕ, ಅಮಾನವೀಯ ಮತ್ತು ಕಾನೂನುಬಾಹಿರ. ನಾವು ಚಿತ್ರೀಕರಿಸುವ ವಸ್ತು ಅವು ಏನೇ ಅಗಿರಲಿ ಪ್ರಕೃತಿಯಲ್ಲಿ ಒಂದು ಅಪರೂಪದ ಮಾದರಿ ಇದ್ದರೂ ಇರಬಹುದು, ಆದ್ದರಿಂದ ಅವುಗಳನ್ನು ಅವುಗಳ ಪಾತ್ರ ನಮಗಿಂತ ಹೆಚ್ಚಿನದಾಗಿರುತ್ತದೆ.  ಅವುಗಳ  ಪಾಡಿಗೆ ಬಿಟ್ಟು ಅವುಗಳಿಗೆ ತೊಂದರೆ ಆಗದಂತೆ ಗೌರವ ಭಾವದಿಂದ ಚಿತ್ರೀಕರಿಸುವುದು ಒಳ್ಳೆಯದು. ಚಿತ್ರೀಕರಣದ ವೇಳೆ ನಮ್ಮ ಸುರಕ್ಷತೆಯೂ ಬಹಳ ಮುಖ್ಯ.

ಕೀಟಗಳು ಮುಂತಾದವುಗಳಿಂದ ಆಗುವ ದಾಳಿ, ಕಡಿತಗಳಿಂದ ನಮ್ಮನ್ನು ನಾವು ಸುರಕ್ಷಿತವಾಗಿರಿಸಿಕೊಳ್ಳಲು ಅಗತ್ಯ ಕ್ರಮಗಳನ್ನು ವಹಿಸುವುದು ಸಹ ಅತಿ ಮುಖ್ಯ.  ಪ್ರಾಣಿಗಳ, ಪಕ್ಷಿ, ಕೀಟಗಳ ಸ್ವಭಾವ ವರ್ತನೆ, ಜೀವನ ಕ್ರಮದ ಅಲ್ಪವಾದರೂ ಅರಿವು ವನ್ಯಜೀವಿ ಛಾಯಗ್ರಾಹಕನಿಗೆ ಇರಬೇಕಾದ ಕನಿಷ್ಟ ಅರ್ಹತೆಯಾಗಿರುತ್ತದೆ. ಜೊತೆಗೆ ಅಪಾರವಾದ ತಾಳ್ಮೆಯೂ ಬಹಳ ಮುಖ್ಯ. 

       ಕಲಾವಿದನ ಕುಂಚದಿಂದ ಮೂಡಿದ ಚಿತ್ರ ಕಲೆಯನ್ನಾಗಲಿ, ಛಾಯಗ್ರಾಹಕನಿಂದ ಚಿತ್ರತವಾದ ಚಿತ್ರವನ್ನಾಗಲಿ  ನೋಡಿ ಪ್ರಶಂಸಿಸಲು ನೋಡುಗನಿಗೆ ಕೆಲವು ಮೂಲಭೂತ ವಿಚಾರಗಳು ತಿಳಿದಿದ್ದರೆ ಉತ್ತಮ. ಅಂದ  ಮೇಲೆ ಛಾಯಾಗ್ರಾಹಕನೂ ಛಾಯಾಗ್ರಹಣದ  ನಿಯಮಗಳಿಗೆ ಅನುಸಾರವಾಗಿ  ಚೌಕಟ್ಟನ್ನು ಹಾಕಿಕೊಂಡು  ಚಿತ್ರೀಕರಣ ಮಾಡಬೇಕಾದ್ದು ಅಪೇಕ್ಷಣೀಯ ಎಂದಾಯಿತು. ಆ ನಿಯಮಗಳಲ್ಲಿ ಮೊದಲನೆಯದು ಮೂರನೇ ಒಂದರ ನಿಯಮ. ನಾವು ತೆಗೆಯಬೇಕಾದ ಛಾಯಚಿತ್ರದ ಚೌಕಟ್ಟನ್ನು ಅಡ್ಡವಾಗಿ ಮೂರು ಭಾಗಗಳು

 

  

ಪಾಚಿಯ ಮೊಗ್ಗಿನ ಚಿತ್ರ: ಮೂರನೇ ಒಂದರ ನಿಯಮ ( Rule of  1th third)

ಮತ್ತು ಉದ್ದನಾಗಿ ಮೂರು ಭಾಗಗಳಾಗಿಸಿ ಚೌಕಟ್ಟಿನ  ಮೂರನೆಯ ಒಂದು ಭಾಗದಲ್ಲಿ ಚಿತ್ರದ  ಮುಖ್ಯ ವಸ್ತು ಇರುವಂತೆ  ಕ್ಲಿಕ್ಕಿಸುವುದರಿಂದ ಚಿತ್ರಕ್ಕೆ ಸಮತೋಲನ ದೊರೆತು ಮುಖ್ಯ ವಸ್ತುವಿನ ಮಹತ್ವ ಹೆಚ್ಚುತ್ತದೆ.

 ಮುನ್ನೆಡೆಸುವ ರೇಖೆಗಳು ( Leading Lines)

ಎರಡನೆಯದು ಮುನ್ನೆಡೆಸುವ ರೇಖೆಗಳು. ನಾವು ನೋಡುವ ಯಾವುದೇ ದೃಶ್ಯವನ್ನು ಗಮನಿಸಿದರೆ ಅದರಲ್ಲಿನ ರಸ್ತೆಯ ಅಂಚುಗಳು, ರೈಲು ರಸ್ತೆಯ ಕಂಬಿಗಳು, ಹೊಲದ ಬದುಗಳು, ಬೆಟ್ಟಗುಡ್ಡಗಳ ಅಂಚುಗಳು-ತುದಿಗಳು, ಮರಳುಗಾಡಿನ  ದಿಣ್ಣೆಗಳು, ಮೋಡದ ಅಂಚುಗಳು, ಸೂರ್ಯ, ಬೆಳಕಿನ  ಕಿರಣಗಳು, ಬೀದಿಯ ಅಂಚುಗಳು ಮುಂತಾದವುಗಳು ಚಿತ್ರದಲ್ಲಿ ಗೆರೆಗಳನ್ನು ಮೂಡಿಸುತ್ತವೆ. ನಮಗೆ ತಿಳಿಯದಂತೆಯೆ ಈ ಗೆರೆಗಳು ನಮ್ಮ ಕಣ್ಣುಗಳನ್ನು ಚಿತ್ರದ ಮುಖ್ಯ ಅಥವಾ  ಆಕರ್ಷಕ ವಸ್ತುವಿನ ಕಡೆಗೆ  ಪದೇ ಪದೇ ಸೆಳೆಯುತ್ತವೆ.  ಇದು   ಒಂದು ರೀತಿಯ ಬಲವಾದ ಮತ್ತು ಆಳವಾದ ಚಲನೆಯನ್ನು  ಮೂಡಿಸುವುದರಿಂದ ನೋಡುಗನ ನೋಟವನ್ನು ಮುಖ್ಯ ವಸ್ತುವಿನ ಕಡೆಗೆ ಸೆಳೆಯುತ್ತದೆ.

     ಮೂರನೆಯದು ಫೆಬನಾಚಿ ಸುರಳಿ . ಕೆಲವು ಚಿತ್ರಗಳನ್ನು ನೋಡುತ್ತಿದ್ದರೆ ನಮ್ಮ ಕಣ್ಣುಗಳು ನಮಗೆ ಅರಿವಿಲ್ಲದಂತೆಯೆ ಚಿತ್ರದ ಒಂದು ಯಾವುದೋ ಕೇಂದ್ರ ಭಾಗದಿಂದ ಆರಂಭಿಸಿ ಸುರಳಿಯಂತೆ ಸುತ್ತುತ್ತಾ ಚಿತ್ರವನ್ನು ಸ್ಕಾನ್‌ ಮಾಡುತ್ತಾ ಪದೇ ಪದೇ ತನ್ನಷ್ಟೆ ತಾನೆ ಚಿತ್ರದ ಒಳಗೆ ಸೆಳೆದುಕೊಂಡು ಹೋಗುತ್ತದೆ.  ಫೆಬನಾಚಿ ಸುರಳಿಗೆ ಇಂತಹ ಚಿತ್ರಗಳು ಉದಾಹರಣೆಯಾಗುತ್ತವೆ.

 

 ಹಾಗೆ ನೋಡಿದರೆ ನಾವು ದಿನ ನಿತ್ಯ ಮೊಬೈಲ್‌ ಫೋನ್‌ ಹಿಡಿದು  ಯಾವುದೇ ನಿಯಮವನ್ನು ಪಾಲಿಸದೇ ತೆಗೆದ  ಫೋಟೋಗಳು  ಎಲ್ಲವೂ ಕಲಾಕೃತಿಗಳಾಗುವುದಿಲ್ಲವೇ? ಹಾಗಂತ ಹೇಳಲಾಗದು, ಸಾಧಾರಣ ಕ್ಯಾಮರದಲ್ಲಿ ಅಚಾನಕ್ಕೆ ಕ್ಲಿಕ್ಕಿಸಿದ ಅನೇಕ ಛಾಯಾಚಿತ್ರಗಳು ಕಲಾಕೃತಿಗಳಾಗಿ ಉಳಿದಿರುವ  ಉದಾಹರಣೆಗಳು ಅನೇಕ ಇವೆ.. ಉತ್ತಮವೆನಿಸಿದ ಕ್ಯಾಮರದಲ್ಲಿ ನೂರಾರು ಚಿತ್ರಗಳನ್ನು ತೆಗೆದರೂ ಅವುಗಳಲ್ಲಿ ಕಲಾಕೃತಿಗಳಾಗುವುದಿರಲಿ ಸಾಧಾರಣ ಚಿತ್ರಗಳು ಅನ್ನಿಸುವುದು ಒಂದೋ ಎರಡೋ. ಅಂತಿರುವಾಗ  ನಾನು  ಚಿತ್ರಸಿರುವ ಅಂತಹ ಸಾವಿರಗಟ್ಟಳೆ  ಚಿತ್ರಗಳು ನನ್ನ  ಟ್ರಾಶ್‌ ಬಿನ್ನಿನಲ್ಲಿವೆ!!!