ಸವಿಜ್ಞಾನ: ನೀರ ಒಲೆ !!!

ನೀರ ಒಲೆ !!!

ವಿಜಯಕುಮಾರ್‌ ಹುತ್ತನಹಳ್ಳಿ.

ಸಹ ಶಿಕ್ಷಕರು.

ಸ.ಪ್ರೌ.ಶಾಲೆ. ಕಾವಲ್‌ ಭೈರಸಂದ್ರ.

ಬೆಂಗಳೂರು ಉತ್ತರ ವಲಯ – 3.

ಕಟ್ಟಿಗೆ ಒಡೆದು ಒಲೆ ಉರಿಸುತ್ತಿದ್ದ ಕಾಲ ಒಂದಿತ್ತು, ಕೈಗಾರಿಕೀಕರಣ, ನಗರೀಕರಣದ ಫಲವಾಗಿ ಮರಗಳೇ ಮಾಯವಾಗುತ್ತಿರುವಾಗ ಇಂದು ಅದು ಸಾಧ್ಯವೂ ಅಲ್ಲ, ಸಾಧುವೂ ಅಲ್ಲ. ಏಕೆಂದರೆ ಕಟ್ಟಿಗೆ ಉರಿಸುವುದು ಮಾಲಿನ್ಯಕಾರಿ,ಜಾಗತಿಕ ತಾಪಮಾನಕ್ಕೂ ಕಾರಣವಾಗುತ್ತದೆ, ಆದ್ದರಿಂದ ನಾವು ಇಂದು ಅಸಾಂಪ್ರದಾಯಿಕ, ಪರಿಸರ ಸ್ನೇಹಿ ಇಂಧನಗಳನ್ನು ಹುಡುಕಿಕೊಳ್ಳಬೇಕಿದೆ. ಈ ದಿಸೆಯಲ್ಲಿ ಹಗಲಿರುಳು ಪ್ರಯೋಗಗಳಲ್ಲಿ ತೊಡಗಿಕೊಂಡಿರುವ ವಿಜ್ಞಾನಿಗಳಿಗೆ ಹೊಸ ಸಾಧ್ಯತೆಯಾಗಿ ಕಂಡದ್ದು ಸಮುದ್ರದ ನೀರು. ಏನು ? ನೀರನ್ನು ಇಂಧನವಾಗಿ ಬಳಸುವುದೆ ? ಎಂದು ಆಶ್ಚರ್ಯಪಡಬೇಡಿ. ಹೌದು ಇನ್ನು ಮುಂದೆ ನೀರನ್ನು ಒಡೆದು ಒಲೆ ಉರಿಸಲು ಸಂಶೋಧನೆಗಳು ಮುಂದುವರೆಯುತ್ತಿವೆ.

ನಮಗೆಲ್ಲಾ ತಿಳಿದಿರುವಂತೆ ನೀರು ಅಂದರೆ H₂O ಹೈಡ್ರೋಜನ್ ಮತ್ತು ಆಕ್ಸಿಜನ್‌ ಎಂಬ ಎರಡು ಅನಿಲಗಳು 2:1 ರ ಅನುಪಾತದಲ್ಲಿ ಸಂಯೋಗಗೊಂಡು ಆಗಿರುವ ಒಂದು ಸಂಯುಕ್ತವಸ್ತು. ಇದರಲ್ಲಿನ ಹೈಡ್ರೋಜನ್‌ ಒಂದು ದಕ್ಷ ದಹನಶೀಲ ವಸ್ತು. ಸಮುದ್ರದ ನೀರಿನ ಬಗ್ಗೆ water water everywhere ! but no water to drink. ಎಂಬ ಒಂದು ಪ್ರಸಿದ್ಧ ಮಾತಿದೆ. ಹೀಗೆ ಹೇರಳವಾಗಿ ದೊರೆಯುವ ಸಮುದ್ರದ ನೀರು ಕುಡಿಯಲು ಯೋಗ್ಯವಲ್ಲದಿದ್ದರೂ ಹೈಡ್ರೋಜನ್‌ ಆಕರವಾಗಿ ಉಪಯೋಗವಾಗಲಿ ಎಂಬುದು ವಿಜ್ಞಾನಿಗಳ ಆಶಯ.

https://blogger.googleusercontent.com/img/b/R29vZ2xl/AVvXsEj_WiAMaxkC9YlLfAuPs83HO87hJgddHbUG2m36noeuPRo9MajELaFSUWQX2TCEudM4y8hTDvM6PIM0_49xv6gVvtLh8VEhSGy9CMPt0RLyKTk7OTxu7y9sm8IW0zEbLP8AWaRiSKe6GYVb/s1600/wave.PNG

ಅದಕ್ಕಾಗಿ ಆಸ್ಟ್ರೇಲಿಯಾ ಯೂನಿವರ್ಸಿಟಿ ಆಫ್‌ ವೊಲಾಂಗ್‌ ಗಾಂಗ್‌ ನ ಆಸ್ಟ್ರೇಲಿಯನ್‌ ರೀಸರ್ಚ್‌ ಕೌನ್ಸಿಲ್‌ ಸೆಂಟರ್‌ ಆಫ್‌ ಎಕ್ಸಲೆನ್ಸ್‌ ಫಾರ್‌ ಎಲೆಕ್ಟ್ರೋಮಟೀರಿಯಲ್‌ ಸೈನ್ಸ್‌ (ACES) ನ ವಿಜ್ಞಾನಿಗಳು ಪ್ರಯೋಗ ನಡೆಸಿ ಯಶಸ್ವಿಯಾಗಿದ್ದಾರೆ. ಪ್ರಸ್ತುತ ತಂತ್ರಜ್ಞಾನದಲ್ಲಿ ಸಮುದ್ರದ ನೀರನ್ನು ರಾಸಾಯನಿಕವಾಗಿ ವಿಭಜಿಸಲು ಹೆಚ್ಚಿನ ಶಕ್ತಿಯ ಅಗತ್ಯವಿದೆ ಅಲ್ಲದೆ ಅದು ವಿಷಕಾರಿ ಕ್ಲೋರೀನ್‌ ಅನಿಲವನ್ನು ಉಪ ಉತ್ಪನ್ನವಾಗಿ ನೀಡುತ್ತದೆ.ಆದರೆ (ACES) ನ ವಿಜ್ಞಾನಿಗಳು ಬೆಳಕಿನ ಸಹಾಯದಿಂದ ಕೆಲಸಮಾಡುವ ವೇಗವರ್ಧಕಗಳನ್ನು ಬಳಸಿ ಕಡಿಮೆ ಶಕ್ತಿಯಿಂದ ನೀರನ್ನು ವಿಭಜಿಸಿ ಹೈಡ್ರೋಜನ್‌ ಅನಿಲವನ್ನು ನೀಡಬಲ್ಲ ತಂತ್ರಜ್ಞಾನವನ್ನು ಕಂಡುಹಿಡಿದಿರುವುದು ಅವರ ಹೆಗ್ಗಳಿಕೆ.

ಆಶ್ಚರ್ಯವೆಂದರೆ ವಿಜ್ಞಾನಿಗಳಿಗೆ ಈ ದಾರಿ ತೋರಿಸಿರುವುದೂ ಪ್ರಕೃತಿಯೇ. ಹೇಗೆಂದರೆ ಸಸ್ಯಗಳಲ್ಲಿನ ಪತ್ರಹರಿತ್ತು ದ್ಯುತಿಸಂಶ್ಲೇಷಣಾ ಕ್ರಿಯೆಯಲ್ಲಿ ಇದೇ ರೀತಿ ನೀರನ್ನು ವಿಭಜಿಸಿಕೊಂಡೇ ಆಹಾರವನ್ನು ತಯಾರಿಸುವುದು.ಹಾಗಾಗಿ ವಿಜ್ಞಾನಿಗಳೂ ಕೂಡ ಅದೇ ರೀತಿ ಕೃತಕ ಕ್ಲೋರೋಫಿಲ್ (ಪತ್ರಹರಿತ್ತು) ನ್ನು ವಾಹಕ ಪ್ಲಾಸ್ಟಿಕ್‌ ಹಾಳೆಗಳ ಮೇಲೆ ಬಳಸಿ ನೀರನ್ನು ವಿಭಜಿಸಿ ಹೈಡ್ರೋಜನ್‌ ಪಡೆಯುವ ಮೊದಲ ಹಂತದ ಕಾರ್ಯದಲ್ಲಿ ಯಶಸ್ವಿಯಾಗಿದ್ದಾರೆ.

ಈ ಸಂಶೋಧಕ ತಂಡದ ಪ್ರಮುಖ ವಿಜ್ಞಾನಿಗಳಾದ ಪ್ರೊ.ಜುನ್‌ ಚೆನ್‌ ಮತ್ತು ಗೆರ್ರಿ ಸ್ವೀಗರ್‌ ರವರ ಪ್ರಕಾರ ಈ ರೀತಿಯ ಕೃತಕ ಪ್ಲಾಸ್ಟಿಕ್‌ ಹಾಳೆಗಳನ್ನು ತಯಾರಿಸುವುದು, ಇಂದು ವ್ಯಾಪಕವಾಗಿ ಬಳಕೆಯಲ್ಲಿರುವ ಅರೆವಾಹಕಗಳ ತಯಾರಿಕೆಗಿಂತಲೂ ಸುಲಭವಂತೆ. ಮತ್ತು ಒಮ್ಮೆ ಸಮುದ್ರದ ನೀರನ್ನು ಹೀಗೆ ಸುಲಭವಾಗಿ ವಿಭಜಿಸಲು ಸಾಧ್ಯವಾದರೆ ಅದರಿಂದ ಇನ್ನೂಅನೇಕ ಉಪಯೋಗಗಳನ್ನು ಪಡೆಯುವುದು ಸಾಧ್ಯ ಎಂಬುದು ಅವರ ಆಭಿಪ್ರಾಯ.

ಹಾಗಾಗಿ ಕೃತಕ ಎಲೆಗಳಂತಹ ಉಪಕರಣಗಳು ಇನ್ನು ಮುಂದೆ ಹೈಡ್ರೋಜನ್ ಅನಿಲದ ಪ್ರಮುಖ ಉತ್ಪಾದಕಗಳಾಗಿ ಬಳಕೆಗೆ ಬಂದರೆ ಆಶ್ಚರ್ಯವಿಲ್ಲ. ಈ ವಿಧಾನದಲ್ಲಿ ಕೇವಲ 5 ಲೀಟರ್‌ ಸಮುದ್ರದ ನೀರಿನಿಂದ ಒಂದು ಸಣ್ಣ ಕುಟುಂಬದ ಒಂದು ದಿನದ ಅನಿಲವನ್ನು ಸುಲಭವಾಗಿ ಪಡೆಯಬಹುದು ಅಥವಾ ಒಂದು ಎಲೆಕ್ಟ್ರಿಕ್‌ ಕಾರನ್ನು ಒಂದು ದಿನ ಆರಾಮವಾಗಿ ಓಡಿಸಬಹುದು. ಹಾಗಾಗಿ ನೀರಿನಿಂದ ಬೆಂಕಿ ಪಡೆಯುವುದು ಇನ್ನು ಮುಂದೆ ಯಕ್ಷಿಣಿಯಲ್ಲ.