ಸವಿಜ್ಞಾನ ಜನವರಿ - 2023 ರ ಲೇಖನಗಳು

 ಸವಿಜ್ಞಾನ ಜನವರಿ  - 2023 ರ ಲೇಖನಗಳು

Ø ಸಂಪಾದಕರ ಡೈರಿಯಿಂದ .....

Ø “ನಶಿಸುವ ಹಾದಿಯಲ್ಲಿ ವೈ ವರ್ಣತಂತು…” - ಡಾ. ಟಿ.ಎ. ಬಾಲಕೃಷ್ಣ ಅಡಿಗ. 

“DNA ಅಣುವಿನ ವಿಷ್ಕಾರದ ಹಿಂದಿನ ಸತ್ಯ”- ಶಶಿಕುಮಾರ್‌ 

“ಎದ್ದು ಬಂದನೇ ಹಿಮಮಾನವ?” - ಶ್ರೀ ಸುರೇಶ ಸಂಕೃತಿ 

“ ಕೇದಗೆಯ ವನದಾಗ,,,,.” ರಮೇಶ್‌ ವಿ ಬಳ್ಳಾ

“ಮಂಗಟ್ಟೆ : ಬದುಕಿಗೊಂದು ದಾರಿದೀಪ” - ಕೃಷ್ಣಚೈತನ್ಯ 

ವಿಸ್ಮಯ ವಿಜ್ಞಾನ - ಶ್ರೀನಿವಾಸ್‌.ಎ. ತುಮಕೂರು 

 ಪದಬಂಧ - 1 ವಿಜಯ ಕುಮಾರ್‌ ಹೆಚ್. ಜಿ.

Ø ವಿಜ್ಞಾನ ಒಗಟುಗಳು : ರಾಮಚಂದ್ರ ಭಟ್ ಬಿ.ಜಿ 

Ø ವ್ಯಂಗ್ಯ ಚಿತ್ರಗಳು - ಜಯಶ್ರೀ

Ø ಪ್ರಮುಖ ದಿನಾಚರಣೆಗಳು ಜನವರಿ 2023 

ಸಂಪಾದಕರ ಡೈರಿಯಿಂದ .....

 

ಸಂಪಾದಕರ ಡೈರಿಯಿಂದ .....

  ಹೊಸ ವರ್ಷ ಮತ್ತೆ  ಹೊಸ ಹಿಗ್ಗು ತಂದಿದೆ. ನಿಮ್ಮ ಪ್ರೀತಿ ಅಭಿಮಾನಗಳೊಂದಿಗೆ ಮುನ್ನಡೆಯುತ್ತಿರುವ ಸವಿಜ್ಞಾನ ಮೂರನೇ ವರ್ಷಕ್ಕೆ ಕಾಲಿಟ್ಟಿದೆ. ಅಂಬೆಗಾಲಿಡುತ್ತಾ ನಾಡಿನ ವಿಜ್ಞಾನಾಸಕ್ತರನ್ನು ಹೆಚ್ಚು ಹೆಚ್ಚು ತಲುಪುವ ಗುರಿಯೊಂದಿಗೆ ಮುಂದೆ ಸಾಗುತ್ತಿದ್ದೇವೆ.   ಈ ಸುಸಂದರ್ಭದಲ್ಲಿ ‘ಸವಿಜ್ಞಾನ’ ತಂಡದ ಎಲ್ಲ ಸದಸ್ಯರಿಗೆ, ಸಹೃದಯಿ ಲೇಖಕರಿಗೆ ‘ ಹಾಗೂ ಅಭಿಮಾನಿ ಓದುಗರಿಗೆ  ನನ್ನ ಅನಂತ ನಮನಗಳು ಹಾಗೂ 2023ನೇ ಕ್ಯಾಲೆಂಡರ್‌ ವರ್ಷದ ಹಾರ್ದಿಕ ಶುಭಾಶಯಗಳು.

ನಿಮ್ಮ ಮಿದುಳಿಗೆ, ಮನಸ್ಸಿಗೆ ಕೊಂಚ ಮುದ ನೀಡಲು ‘ಸವಿಜ್ಞಾನ’ದ ಜನವರಿ ತಿಂಗಳ ಸಂಚಿಕೆ ವೈವಿಧ್ಯಮಯ ಲೇಖನಗಳೊಂದಿಗೆ ನಿಮ್ಮ ಮುಂದಿದೆ.                                                                                           

ಈ ಸಂಚಿಕೆಯ ಪ್ರಮುಖ ಆಕರ್ಷಣೆಯಾಗಿ, “ನಶಿಸುವ ಹಾದಿಯಲ್ಲಿ ವೈ ವರ್ಣತಂತು…” ಎಂಬ ಲೇಖನವನ್ನು ಸವಿಜ್ಞಾನದ ಪ್ರಧಾನ ಸಂಪಾದಕರಾದ ಡಾ. ಟಿ.ಎ. ಬಾಲಕೃಷ್ಣ ಅಡಿಗರು ಬರೆದಿದ್ದಾರೆ. ಇತ್ತೀಚಿಗಿನ ಸಂಶೋಧನೆಗಳನ್ನಾಧರಿಸಿದ ಈ ಲೇಖನ ನಮ್ಮ ಭವಿಷ್ಯದ ಬಗ್ಗೆ ಆಲೋಚಿಸುವಂತೆ ಮಾಡುತ್ತದೆ. “DNA ಅಣುವಿನ ವಿಷ್ಕಾರದ ಹಿಂದಿನ ಸತ್ಯ”- ರೋಸಲಿಂಡಾ ಫ್ರಾಂಕ್ಲಿನ್‌ ರವರ ಪಾತ್ರದ ಕುರಿತ ಕಹಿ ಸತ್ಯದ ಬಗ್ಗೆ ಮಾಹಿತಿ ನೀಡಿದ್ದಾರೆ ಲೇಖಕ ಶಶಿಕುಮಾರ್‌ ಅವರು. “ಎದ್ದು ಬಂದನೇ ಹಿಮಮಾನವ?” ಎಂಬ ಲೇಖನದಲ್ಲಿ ಪಳೆಯುಳಿಕೆಯಿಂದ ಎದ್ದು ಬಂದ ಹಿಮ ಮಾನವನ ರೋಚಕ ಇತಿಹಾಸ ಘಟನೆಯನ್ನು ಬಿಚ್ಚಿಟ್ಟಿದ್ದಾರೆ ಲೇಖಕ ಶ್ರೀ ಸುರೇಶ ಸಂಕೃತಿ ಅವರು.  “ಕೇದಗೆ ವನದಾಗ,,,,.” ಲೇಖನದಲ್ಲಿ ಬಾಲ್ಯದ ನೆನಪುಗಳನ್ನು ಮೊಗೆಯುತ್ತಾ  ಕೇದಗೆಯ ಸುಗಂಧವನ್ನು ಹಬ್ಬಿಸಿದ್ದಾರೆ ಲೇಖಕ ರಮೇಶ, ವಿ, ಬಳ್ಳಾ ಅವರು. “ಮಂಗಟ್ಟೆ : ಬದುಕಿಗೊಂದು ದಾರಿದೀಪ” ಲೇಖನದ ಮೂಲಕ ಪಕ್ಷಿಗಳಿಂದ ನಾವು ಕಲಿಯಬಹುದಾದ ನೈತಿಕತೆಯ ಪಾಠವನ್ನು ಸೋದಾಹರಣವಾಗಿ ವಿವರಿಸಿದ್ದಾರೆ ಲೇಖಕ ಕೃಷ್ಣಚೈತನ್ಯ ಅವರು. ಈ ಬಾರಿ ೩ನೇ ವರ್ಷಾಚರಣೆಯ ಪ್ರಯುಕ್ತ ವಿಸ್ಮಯ ವಿಜ್ಞಾನ ಎಂಬ ಹೊಸ ಸ್ಥಿರಶೀರ್ಷಿಕೆಯೊಂದನ್ನು ಆರಂಭಿಸುತ್ತಿದ್ದು, ಸ್ನೇಹಿತರಾದ ಶ್ರೀನಿವಾಸ್‌.ಎ. ತುಮಕೂರು ಅವರು ನಿರ್ವಹಿಸಿಕೊಡಲಿದ್ದಾರೆ.    

    ಇವೆಲ್ಲದರ ಜೊತೆಗೆ, ಎಂದಿನಂತೆ ಶಾಲೆಗಳಲ್ಲಿ ಮಕ್ಕಳಲ್ಲಿ ಜಾಗೃತಿ ಮೂಡಿಸಲು ಸಹಾಯಕವಾಗುವಂತೆ ಜನವರಿ ತಿಂಗಳಿನ ಪ್ರಮುಖ ದಿನಾಚರಣೆಗಳ ಬಗ್ಗೆ ಮಾಹಿತಿ ನೀಡಿದೆ. ವಿಜ್ಞಾನಕ್ಕೆ ಸಂಬಂಧಿಸಿದ ನಮ್ಮ ಸ್ಥಿರ ಅಂಕಣರಚನೆಯಗಳಾದ, ಪದಬಂಧ, ಒಗಟುಗಳು ಹಾಗೂ ವ್ಯಂಗ್ಯ ಚಿತ್ರಗಳು ಎಂದಿನಂತೆ ನಿಮ್ಮನ್ನು ರಂಜಿಸಲಿವೆ. ಸಂಚಿಕೆಯ ಎಲ್ಲ ಲೇಖನಗಳನ್ನು ಹಾಗೂ ಅಂಕಣಗಳನ್ನು ಓದಿ, ದಯವಿಟ್ಟು ನಿಮ್ಮ ಪ್ರತಿಕ್ರಿಯೆಯನ್ನು ಬ್ಲಾಗ್‌ನಲ್ಲಿ ದಾಖಲಿಸಿ. ವಿಜ್ಞಾನದಲ್ಲಿ ಹೆಚ್ಚಿನ ಆಸಕ್ತಿ ಮೂಡಿಸಲು ಓದುಗರಾಗಿ, ಲೇಖಕರಾಗಿ ನಮ್ಮೊಂದಿಗೆ ಕೈ ಜೋಡಿಸುವ ನಿರೀಕ್ಷೆಯೊಂದಿಗೆ  ವಂದನೆಗಳೊಂದಿಗೆ  

ರಾಮಚಂದ್ರಭಟ್‌ ಬಿ.ಜಿ.

ಸಂಪಾದಕರು 

( ಪ್ರಧಾನ ಸಂಪಾದಕರ ಪರವಾಗಿ )

ನಶಿಸುವ ಹಾದಿಯಲ್ಲಿ Y ವರ್ಣತಂತು, ಮಾನವ ಜನಾಂಗದ ವಿನಾಶಕ್ಕೆ ದಾರಿಯೇ ?

 ನಶಿಸುವ ಹಾದಿಯಲ್ಲಿ Y ವರ್ಣತಂತು

ಮಾನವ ಜನಾಂಗದ ವಿನಾಶಕ್ಕೆ ದಾರಿಯೇ ?

ಬಹುತೇಕ ಉನ್ನತ ಜೀವಿಗಳಲ್ಲಿ, ಅದರಲ್ಲಿಯೂ ಏಕಲಿಂಗಿ ಪ್ರಾಣಿಗಳಲ್ಲಿ ಗಂಡು ಮತ್ತು ಹೆಣ್ಣು ಜೀವಿಗಳು ಭಿನ್ನವಾಗಿದ್ದು, ನಿರ್ದಿಷ್ಟ ಗುಣ ಲಕ್ಷಣಗಳಲ್ಲಿ ವ್ಯತ್ಯಾಸಗಳನ್ನು ಹೊಂದಿರುತ್ತವೆ. ಹೀಗಾಗಿ, ಹೆಣ್ಣು ಮತ್ತು ಗಂಡು ಜೀವಿಗಳನ್ನು ಅವುಗಳ ಬಾಹ್ಯ ಲಕ್ಷಣಗಳಿಂದಲೇ ಗುರುತಿಸಬಹುದು. ಈ ನಿರ್ದಿಷ್ಟ ವ್ಯತ್ಯಾಸಗಳಿಗೆ ಕಾರಣವಾಗುವ ವಂಶವಾಹಿಗಳು (ಜೀನ್) ಆ ಜೀವಿಗಳ ಒಟ್ಟು ವಂಶವಾಹಿಗಳ ಸಮೂಹವಾದ ಜೀನೋಮ್ (genome) ನ ಒಂದು ಜೊತೆ ವರ್ಣತಂತುಗಳಲ್ಲಿ ಮಾತ್ರ ಕಂಡುಬರುತ್ತವೆ. ಈ ವರ್ಣತಂತುಗಳನ್ನು ಲಿಂಗ ವರ್ಣತಂತುಗಳು (sex chromosomes) ಎಂದು ಕರೆಯಲಾಗುತ್ತದೆ. ಉಳಿದ ಎಲ್ಲ ಜೋಡಿ ವರ್ಣತಂತುಗಳನ್ನು ಕಾಯ ವರ್ಣತಂತುಗಳು (somatic chromosomes) ಎಂದು ಕರೆಯಲಾಗುತ್ತದೆ.

ಸ್ತನಿ ಪ್ರಾಣಿಗಳಲ್ಲಿ ಯಗ್ಮಜವು (zygote) ಗಂಡಾಗಿ ಬೆಳೆಯುವುದೇ ಅಥವಾ ಹೆಣ್ಣಾಗಿ ಬೆಳೆಯುವುದೇ ಎಂಬುದನ್ನು ನಿರ್ಣಯಿಸುವುದು ಅದರಲ್ಲಿರುವ ಜೋಡಿ ಲಿಂಗ ವರ್ಣತಂತುಗಳ ಸಂಯೋಜನೆ. ಯುಗ್ಮಜದಲ್ಲಿ X ಮತ್ತು X ಎಂಬ ಎರಡು ಲಿಂಗ ವರ್ಣತಂತುಗಳಿದ್ದಲ್ಲಿ, ಅದು ಹೆಣ್ಣು ಜೀವಿಯಾಗಿ ಬೆಳೆಯುತ್ತದೆ. ಬದಲಿಗೆ, X ಮತ್ತು Y ಎಂಬ ಎರಡು ಲಿಂಗ ವರ್ಣತಂತುಗಳಿದ್ದರೆ, ಆ ಯಗ್ಮಜವು ಗಂಡು ಜೀವಿಯಾಗಿ ಬೆಳೆಯುತ್ತದೆ. ಇದು ಲಿಂಗ ನಿರ್ಣಯದಲ್ಲಿ ಈ ವರ್ಣತಂತುಗಳ ಪಾತ್ರ. ಈ ರೀತಿಯ ಲಿಂಗ ನಿರ್ಣಯವನ್ನು XX - XY ವಿಧಾನದ ಲಿಂಗ ನಿರ್ಣಯ ಎಂದು ಕರೆಯಲಾಗುತ್ತದೆ. ಮಾನವರಲ್ಲಿಯೂ ಇದೇ ರೀತಿಯ ಲಿಂಗ ನಿರ್ಣಯ ಪ್ರಕ್ರಿಯೆ ನಡೆಯುತ್ತದೆ.

ಚಿತ್ರ 1. XX - XY ವಿಧಾನದ ಲಿಂಗ ನಿರ್ಣಯ

ಲಿಂಗ ನಿರ್ಣಯದಲ್ಲಿ Y ವರ್ಣತಂತುವಿನ ಪಾತ್ರವೇನು?

ಮಾನವರಲ್ಲಿ X ವರ್ಣತಂತುವಿಗಿಂತ Y ವರ್ಣತಂತು ಗಾತ್ರದಲ್ಲಿ ಚಿಕ್ಕದಿದೆ. ಆಷ್ಟೇ ಅಲ್ಲ, ಒಟ್ಟು ಡಿ ಎನ್ ಎ ಸಂಯೋಜನೆಯಲ್ಲಿಯೂ ಭಿನ್ನವಾಗಿದೆ. X ವರ್ಣತಂತುವಿನಲ್ಲಿ ಸುಮಾರು 900 ಗುರುತಿಸಲಾದ ವಂಶವಾಹಿಗಳಿದ್ದರೆ, Y ವರ್ಣತಂತುವಿನಲ್ಲಿ ಕೇವಲ 55 ವಂಶವಾಹಿಗಳಿವೆ ! ಜೊತೆಗೆ, ಯಾವುದೇ ಆನುವಂಶೀಯ ಸಂಕೇತಗಳನ್ನು ಹೊಂದಿಲ್ಲದ, ಪುನಾರವರ್ತನೆಯಾಗುವ ಅನುಕ್ರಮಣಿಕೆ ಹೊಂದಿರುವ ಡಿ.ಎನ್.ಎ. ಇದೆ. ಈ 55 ವಂಶವಾಹಿಗಳಲ್ಲಿ ಭ್ರೂಣದಲ್ಲಿ ಗಂಡು ಲಕ್ಷಣಗಳು ಬೆಳೆಯಲು ಕಾರಣವಾಗುವ ಮುಖ್ಯ ವಂಶವಾಹಿಯೂ ಇದೆ. ಗರ್ಭಧಾರಣೆಯಾದ ಸುಮಾರು 12 ವಾರಗಳ ನಂತರ ಈ ಮುಖ್ಯ ವಂಶವಾಹಿಯು ವೃಷಣಗಳ ಬೆಳವಣಿಗೆಗೆ ಪೂರಕವಾಗಿರುವ ಇತರ ವಂಶವಾಹಿಗಳನ್ನು ಪ್ರೇರೇಪಿಸುತ್ತದೆ. ಭ್ರೂಣದಲ್ಲಿ ಬೆಳೆದ ವೃಷಣವು ಟೆಸ್ಟೋಸ್ಟೀರೋನ್ ಮತ್ತಿತರ ಪೂರಕ ಹಾರ್ಮೋನುಗಳನ್ನು ಸ್ರವಿಸುವ ಮೂಲಕ ಭ್ರೂಣವು ಪೂರ್ಣ ಪ್ರಮಾಣದ ಗಂಡು ಶಿಶುವಾಗಿ ಬೆಳೆಯಲು ಅನುವು ಮಾಡಿಕೊಡುತ್ತದೆ.

ಚಿತ್ರ 2. X ಮತ್ತು Y ವರ್ಣತಂತುಗಳು

Y ವರ್ಣತಂತುವಿನಲ್ಲಿರುವ ಈ ಮುಖ್ಯ ವಂಶವಾಹಿಗೆ 1990ರಲ್ಲಿ SRY (sex region on Y) ಎಂದು ಹೆಸರಿಸಲಾಯಿತು. ಕಾಯ ವರ್ಣತಂತುವೊಂದರಲ್ಲಿ ಇರುವ SOX 9 ಎಂಬ ವಂಶವಾಹಿಯಲ್ಲಿ ಒಂದು ಆನುವಂಶೀಯ ಪಥಮಾರ್ಗವನ್ನು (pathway) ಇದು ಪ್ರೇರೇಪಿಸುತ್ತದೆ. ಈ ಪಥಮಾರ್ಗವು ಬಹುತೇಕ ಕಶೇರುಕ ಪ್ರಾಣಿಗಳಲ್ಲಿ ಗಂಡಿನ ಲಕ್ಷಣಗಳು ಬೆಳೆಯಲು ಅತ್ಯಂತ ಅವಶ್ಯವಾಗಿದೆ.

ಈ ಒಂದು ವ್ಯವಸ್ಥೆ ವಿಕಾಸಗೊಂಡದ್ದು ಹೇಗೆ ?

ಆಸ್ಟ್ರೇಲಿಯಾದಲ್ಲಿ ಕಂಡುಬರುವ ಪ್ಲಾಟಿಪಸ್ (ಮೊಟ್ಟೆ ಇಡುವ ಪ್ರಾಚೀನ ಸ್ತನಿ) ಪ್ರಾಣಿಗಳಲ್ಲಿ ಲಿಂಗ ವರ್ಣತಂತುಗಳ ಕಾರ್ಯ ಶೈಲಿ ಬೇರೆಯೇ ರೀತಿ ಇದ್ದು, ಹಕ್ಕಿಗಳಲ್ಲಿರುವ ವ್ಯವಸ್ಥೆಯನ್ನು ಹೋಲುತ್ತದೆ. ಇಲ್ಲಿ X ಮತ್ತು Y ವರ್ಣತಂತುಗಳು ಇತರ ಕಾಯ ವರ್ಣತಂತುಗಳಂತೆ ಸಮರೂಪಿಯಾಗಿಯೇ ಇರುತ್ತವೆ. ಅವುಗಳಲ್ಲಿನ ವಂಶವಾಹಿ ಸಂಯೋಜನೆಯೂ ಒಂದೇ ರೀತಿ ಇರುತ್ತದೆ. ಹೀಗಾಗಿ, ಮಿಲಿಯನ್ ಗಟ್ಟಲೆ ವರ್ಷಗಳ ಹಿಂದೆ ಎಲ್ಲ ಸ್ತನಿ ಪ್ರಾಣಿಗಳ X ಮತ್ತು Y ವರ್ಣತಂತುಗಳು ಇತರ ಕಾಯ ವರ್ಣತಂತುಗಳಂತೆಯೇ ಇದ್ದಿರಬಹುದು ಎಂದು ಅಂದಾಜಿಸಲಾಗಿದೆ.

ಅಂದರೆ, ಪ್ಲಾಟಿಪಸ್ ನಿಂದ ಮಾನವನವರೆಗಿನ ವಿಕಾಸದ ನಡುವಿನ ಸುಮಾರು 166 ಮಿಲಿಯನ್ ವರ್ಷಗಳ  ಅವಧಿಯಲ್ಲಿ  Y ವರ್ಣತಂತು 900 - 55 = 845 ವಂಶವಾಹಿಗಳನ್ನು  ಕಳೆದುಕೊಂಡಿದೆ ! ಈ ಲೆಕ್ಕದಲ್ಲಿ, ಅಂದಾಜು ಪ್ರತಿ ಒಂದು ಮಿಲಿಯನ್ ವರ್ಷಕ್ಕೆ 5 ವಂಶವಾಹಿಗಳನ್ನು ಕಳೆದುಕೊಂಡಿದೆ  ಎನ್ನುತ್ತಾರೆ ವಿಜ್ಞಾನಿಗಳು. ಇದೇ ರೀತಿಯ ಪ್ರಕ್ರಿಯೆ ಮುಂದುವರೆದಲ್ಲಿ, Y ವರ್ಣತಂತುವಿನಲ್ಲಿ ಈಗ  ಉಳಿದಿರುವ 55 ವರ್ಣತಂತುಗಳೂ ಕ್ರಮೇಣ ನಶಿಸಿ ಹೋಗಬಹುದು  ಎಂಬುದು ವಿಜ್ಞಾನಿಗಳ ಅಂದಾಜು !

ತನ್ನಲ್ಲಿ ಈಗ ಉಳಿದಿರುವ 55 ವಂಶವಾಹಿಗಳನ್ನು ಕಳೆದುಕೊಂಡು, Y ವರ್ಣತಂತು ಸಂಪೂರ್ಣವಾಗಿ ನಶಿಸಿಹೋಗುವ ಸಾಧ್ಯತೆಗೆ ತಗುಲಬಹುದಾದ ಅವಧಿಯ ಬಗ್ಗೆ ವಿಜ್ಞಾನಿಗಳಲ್ಲಿ ಒಮ್ಮತವಿಲ್ಲ. ಅದು ಕೆಲವು ಸಾವಿರಗಳಿಂದ ಹಲವು ಮಿಲಿಯನ್ ಗಳಷ್ಟು ವರ್ಷ ತೆಗೆದುಕೊಳ್ಳಬಹುದು ಎಂದು ವಿವಿಧ ರೀತಿಯ ಅಂದಾಜುಗಳಿವೆ. ಮೇಲೆ ಹೇಳಲಾದ ಲೆಕ್ಕಾಚಾರದಲ್ಲಿ ಅದಕ್ಕೆ ಕನಿಷ್ಟ 11 ಮಿಲಿಯನ್ ವರ್ಷಗಳಾದರೂ ಬೇಕು !

ಒಂದು ಸಮಾಧಾನಕರ ಸಂಗತಿಯೆಂದರೆ, ಇಲಿಗಳ (rodents) ಕುಟುಂಬಕ್ಕೆ ಸೇರಿದ ಎರಡು ಬಗೆಯ ಸ್ತನಿಗಳಲ್ಲಿ Y ವರ್ಣತಂತು ಈಗಾಗಲೇ ನಶಿಸಿದ್ದರೂ, ಅವುಗಳಲ್ಲಿ ಗಂಡು ಜೀವಿಗಳು ಇನ್ನೂ ಬದುಕುಳಿದಿರುವುದು ! ಪೂರ್ವ ಯುರೋಪ್ ನಲ್ಲಿ ಕಂಡುಬರುವ ಮೋಲ್ ವೋಲ್(mole voles - Eg : Ellobius) ಗಳಲ್ಲಿ ಮತ್ತು ಜಪಾನ್ ನಲ್ಲಿ ಕಂಡುಬರುವ ಮುಳ್ಳಿಲಿಗಳ(spiny rats - Eg : Tokudaia) ಕೆಲ ಪ್ರಬೇಧಗಳಲ್ಲಿ SRY ವಂಶವಾಹಿಯಷ್ಟೇ ಅಲ್ಲ, Y ವರ್ಣತಂತು ಕೂಡಾ ಪೂರ್ತಿ ನಶಸಿಹೋಗಿದೆ. X ವರ್ಣತಂತು ಹಾಗೇ ಉಳಿದಿದೆ.

ಚಿತ್ರ 3. ಮೋಲ್ ವೋಲ್ -  Ellobius

ಚಿತ್ರ 4. ಮುಳ್ಳಿಲಿ - Tokudaia

ಜಪಾನಿನ ಹೊಕೈಡೋ ವಿಶ್ವವಿದ್ಯಾಲಯದ ವಿಜ್ಞಾನಿ ಅಸಾಟೋ ಕುರೋಯಿವ (Asato Kuroiwa)  ಎಂಬಾಕೆ ಮೂರು ಪ್ರಬೇಧದ ಮುಳ್ಳಿಲಿಗಳ  ಮೇಲೆ ನಡೆಸಿದ ಸಂಶೋಧನೆ ಕೆಲವು ಕುತೂಹಲಕಾರಿ  ಅಂಶಗಳನ್ನು ಹೊರಹಾಕಿದೆ. ಆತಂಕಿತ ಪ್ರಬೇಧಗಳ ಪಟ್ಟಿಯಲ್ಲಿರುವ ಈ ಇಲಿಗಳಲ್ಲಿ ಸಾಮಾನ್ಯವಾಗಿ Y ವರ್ಣತಂತುಗಳ ಮೇಲೆ ಕಂಡುಬರುವ ಬಹುತೇಕ ವಂಶವಾಹಿಗಳು ಇತರ ಕಾಯ ವರ್ಣತಂತುಗಳಿಗೆ ಸ್ಥಳಾಂತರಗೊಂಡಿದ್ದುವು. ಆದರೆ, SRY ವಂಶವಾಹಿ ಬೇರೆ ಯಾವ ವರ್ಣತಂತುವಿನಲ್ಲಿಯೂ ಕಂಡುಬರಲಿಲ್ಲ ! ಅಲ್ಲದೆ, ಗಂಡು ಜೀವಿಗಳ ಜೀನೋಮ್ ನಲ್ಲಿ SRY ನ ಕೆಲವು ನಿರ್ದಿಷ್ಟ ಅನುಕ್ರಮಣಿಕೆಗಳು ಕಂಡುಬಂದವು. ಗಂಡು ಜೀವಿಗಳಲ್ಲಿ  ಮಾತ್ರ ವರ್ಣತಂತು 3 ರಲ್ಲಿರುವ ಮುಖ್ಯ ಲಿಂಗ ನಿರ್ಣಯ ವಂಶವಾಹಿ SOX 9 ನಲ್ಲಿ ಕೆಲವು ಸೂಕ್ಷ್ಮ ವ್ಯತ್ಯಾಸಗಳು ಗೋಚರಿಸಿದುವು. ಸುಮಾರು 17000 ನೈಟ್ರೋಜನ್ ಬೇಸ್ ಜೋಡಿಗಳಿರುವ ಸಣ್ಣ ತಾಣವೊಂದು ಪುನರಾವರ್ತನೆಯಾಗಿರುವುದು ಕಂಡುಬಂತು. ಈ ಸಣ್ಣ ತುಣುಕು, SRY ಗೆ ಪೂರಕವಾಗಿ SOX 9 ವಂಶವಾಹಿಯನ್ನು ಪ್ರೇರೇಪಿಸುತ್ತದೆ. ಆದರೆ, ಹೆಣ್ಣು ಜೀವಿಗಳ ಜೀನೋಮ್ ನಲ್ಲಿ ಇಂಥ ತಾಣಗಳು ಕಂಡು ಬರಲಿಲ್ಲ. ಈ ರೀತಿಯದೇ ವ್ಯತ್ಯಾಸ ಮೋಲ್ ವೋಲ್ ಗಳಲ್ಲಿಯೂ ಇದೆಯೇ ಎಂಬ ಬಗ್ಗೆ ಯಾವುದೇ ನಿರ್ದಿಷ್ಟ ಮಾಹಿತಿ ಇಲ್ಲ.

ಮಾನವ ಜನಾಂಗವೇ ವಿನಾಶವಾಗುವುದೇ ?

ಒಂದು ವೇಳೆ Y ವರ್ಣತಂತು ಪೂರ್ತಿ ನಶಿಸಿಹೋದಲ್ಲಿ ಮಾನವ ಜನಾಂಗದ ಭವಿಷ್ಯ ಏನು ? ಎಂಬ ಚರ್ಚೆ ಈಗ ಪ್ರಾರಂಭವಾಗಿದೆ. ಕೆಲವು ಬಗೆಯ ಹಲ್ಲಿಗಳಲ್ಲಿ (ಉದಾ : ಆಸ್ಪೆಡೋಸೆಲಿಸ್ - Aspedoscelis) ಹಾಗೂ ಹಾವುಗಳಲ್ಲಿ (ಉದಾ : ಟೈಫ್ಲೀನಾ - Typhlina ) ಗಂಡು ಜೀವಿಗಳೇ ಇಲ್ಲ ! ಇಲ್ಲಿ ಹೆಣ್ಣು ಜೀವಿ ಇಡುವ ಮೊಟ್ಟೆಗಳು ನಿಷೇಚನವಿಲ್ಲದೆ ಅನಿಷೇಕ ಜನನ (parthenogenesis) ಪ್ರಕ್ರಿಯೆಯ ಮೂಲಕ ಹೆಣ್ಣು ಜೀವಿಗಳಾಗಿಯೇ ಬೆಳೆಯುತ್ತವೆ. ಅಂದರೆ, ಈ ಪ್ರಬೇಧಗಳಲ್ಲಿ ಸಂಪೂರ್ಣ ಸ್ತ್ರೀ ಸಾಮ್ರಾಜ್ಯ !. ಇಂಥದ್ದೇ ಒಂದು ಬೆಳವಣಿಗೆ ಮಾನವನಲ್ಲಿಯೂ ಸಾಧ್ಯವೇ ? ಎಂಬುದು ಈಗಿರುವ ಕುತೂಹಲದ ಪ್ರಶ್ನೆ. ವಿಜ್ಞಾನಿಗಳ ಪ್ರಕಾರ ಇದು ಸಾಧ್ಯವಿಲ್ಲ ಏಕೆಂದರೆ, ಮಾನವರಲ್ಲಿ ಕನಿಷ್ಟ 30 ನಿರ್ಣಾಯಕ, 'ಅಚ್ಚೊತ್ತಿದ' ವಂಶವಾಹಿಗಳು ತಂದೆಯಿಂದ ಪುರುಷಾಣುವಿನ ಮೂಲಕ ಬಂದಾಗ ಮಾತ್ರ ಅಭಿವ್ಯಕ್ತಿಗೊಳ್ಳುವ ಸಾಮರ್ಥ್ಯ ಪಡೆಯುತ್ತವೆ. ಹೀಗಾಗಿ, ಸಮರ್ಥ ಸಂತಾನೋತ್ಪತ್ತಿಗೆ ಪುರುಷಾಣುಗಳು ಅತ್ಯಗತ್ಯ. Y ವರ್ಣತಂತು ಪೂರ್ತಿವಿನಾಶವಾಗಲಿದೆ ಎಂದರೆ, ಅದು ಮಾನವ ಜನಾಂಗದ ಅಂತ್ಯವೇ ಎಂದು ಅಂದಾಜಿಸಬೇಕಾಗುತ್ತದೆ !

ಮೇಲಿನ ಸಂಶೋಧನೆ ಒಂದು ಪರ್ಯಾಯ ಸಾಧ್ಯತೆಯನ್ನು ತೊರಿಸಿಕೊಟ್ಟಿದೆ. ಅದೇನೆಂದರೆ, ಮುಂದೆ ಮಾನವರಲ್ಲಿ ಲಿಂಗ ನಿರ್ಣಯಕ್ಕಾಗಿಯೇ ಬೇರೊಂದು ವಂಶವಾಹಿ ವಿಕಾಸಗೊಳ್ಳುವ ಸಾಧ್ಯತೆ !  ಆದರೆ, ಅದರ ಬೆನ್ನಲ್ಲೇ ಹಲವು ಆತಂಕಗಳೂ ಸೃಷ್ಟಿಯಾಗುವ ಭಯವೂ ಇದೆ. ವಿಶ್ವದ ವಿವಿಧ ಭಾಗಗಳಲ್ಲಿ ಒಂದಕ್ಕಿಂತ ಹೆಚ್ಚು ಇಂಥ ವಂಶವಾಹಿಗಳು ವಿಕಾಸಗೊಂಡರೆ ಏನಾಗಬಹುದು?

ಅಂಥ ಸಂದರ್ಭದಲ್ಲಿ, ಲಿಂಗ ವರ್ಣತಂತುಗಳ ನಡುವಿನ ಈ 'ಸ್ಪರ್ಧೆ' ಯಿಂದಾಗಿ ಹೊಸ ಮಾನವ ಪ್ರಬೇಧಗಳ ಉದಯವಾಗಿ ಅವುಗಳು ಪ್ರತ್ಯೇಕೀಕರಣಕ್ಕೆ (isolation) ಒಳಗಾಗುವ ಸಾಧ್ಯತೆಯೂ ಇದೆ ! ಮುಳ್ಳಿಲಿಗಳಲ್ಲಿ ಮತ್ತು ವೋಲ್ ಗಳಲ್ಲಿ ನಡೆದಿರುವುದು ಇಂಥದ್ದೇ ಒಂದು ಪ್ರಕ್ರಿಯೆ.

ಅಂದರೆ, ಊಹಿಸಿ ನೋಡಿ. ಸುಮಾರು 11 ಮಿಲಿಯನ್ ವರ್ಷಗಳ ನಂತರ ಭೂಮಿಯ ಮೇಲೆ ಒಂದೋ ಮಾನವರೇ ಇರುವುದಿಲ್ಲ ಅಥವಾ ವಿವಿಧ ಬಗೆಯ ಲಿಂಗ ನಿರ್ಣಯ ವ್ಯವಸ್ಥೆ ಹೊಂದಿರುವ ವಿಭಿನ್ನ ಪ್ರಬೇಧಗಳ ಮಾನವರು ಕಂಡು ಬರಬಹುದು !

ಆಧಾರ :

https://www.newscientist.com/article/2348800-a-rat-without-a-y-chromosome-could-be-a-glimpse-of-our-genetic-future/

https://www.sciencealert.com/the-y-chromosome-is-slowly-vanishing-a-new-sex-gene-could-be-the-future-of-men

DNA ಅಣುವಿನ ರಚನೆಯ ಆವಿಷ್ಕಾರದ ಹಿಂದಿರುವ ಸತ್ಯ

 DNA ಅಣುವಿನ ರಚನೆಯ ಆವಿಷ್ಕಾರದ ಹಿಂದಿರುವ ಸತ್ಯ

DARK LADY OF DNA - ROSALIND FRANKLIN

ವೈದ್ಯಕೀಯ ಕ್ಷೇತ್ರದಲ್ಲಿ ಮಹಿಳೆಯರನ್ನು ಸುತ್ತುವರೆದಿರುವ ವಿವಾದಗಳು ಹೊಸದೇನಲ್ಲ, ಬ್ರಿಟಿಷ್ ರಸಾಯನಶಾಸ್ತ್ರಜ್ಷೆ ಮತ್ತು ಸಂಶೋಧಕಿ, ರೊಸಾಲಿಂಡ್ ಫ್ರಾಂಕ್ಲಿನ್‌ ರವರ ಸಂಶೋಧನೆಯು ಇಲ್ಲಿಯವರೆಗಿನ ಸಂಶೋಧನೆಯಲ್ಲಿ ಅತ್ಯಂತ ವಿವಾದಾತ್ಮಕವೆಂದು ಪರಿಗಣಿಸಲಾಗಿದೆ. 

ಡಾ. ಫ್ರಾಂಕ್ಲಿನ್‌ರ ಜೀವನ ಮತ್ತು ಕೆಲಸವನ್ನು ಅವರ ಬಹುತೇಕ ಪುರುಷ ಸಹೋದ್ಯೋಗಿಗಳು ಟೀಕಿಸಿದರು. ಜೀವದ ನೀಲನಕಾಶೆ ಎನಿಸಿದ, ಜೀವಿಗಳ ಆನುವಂಶೀಯ ವಸ್ತುವಾದ ಡಿಎನ್‌ಎ ದ್ವಿಸುರುಳಿ ರಚನೆಯ ಆವಿಷ್ಕಾರದ ಗೌರವದಲ್ಲಿ ಸಿಂಹಪಾಲು ರೋಸಾಲಿಂಡ್‌ ಫ್ರಾಂಕ್ಲಿನ್‌ ರವರಿಗೇ ಸಲ್ಲಬೇಕು. ನಾನೀಗ ಹೇಳ ಹೊರಟಿರುವುದು ಡಿಎನ್‌ಎ ದ್ವಿಸುರುಳಿ ಮಾದರಿಯ ಆವಿಷ್ಕಾರದ ಖ್ಯಾತಿಯ ಸತ್ಯಾಸತ್ಯತೆ. 

ಡಾ.ಫ್ರಾಂಕ್ಲಿನ್ ಅವರು ಕೇಂಬ್ರಿಡ್ಜ್ ವಿಶ್ವವಿದ್ಯಾನಿಲಯದ ನ್ಯೂನ್‌ಹ್ಯಾಮ್ ಮಹಿಳಾ ಕಾಲೇಜಿನಲ್ಲಿ ಭೌತಶಾಸ್ತ್ರ ಮತ್ತು ರಸಾಯನಶಾಸ್ತ್ರವನ್ನು ಅಧ್ಯಯನ ಮಾಡುವ ಮೂಲಕ ತಮ್ಮ ಪ್ರಭಾವಶಾಲಿ ವೃತ್ತಿಜೀವನವನ್ನು ಪ್ರಾರಂಭಿಸಿದರು. ಕಾರ್ಬನ್ ಮತ್ತು ಗ್ರ್ಯಾಫೈಟ್ ಮೈಕ್ರೋಸ್ಟ್ರಕ್ಚರ್‌ಗಳನ್ನು ವಿಶ್ಲೇಷಿಸುವ ಬ್ರಿಟಿಷ್ ಕೋಲ್ ಯುಟಿಲೈಸೇಶನ್ ರಿಸರ್ಚ್ ಅಸೋಸಿಯೇಷನ್ ​​(BCURA) ಗಾಗಿ ಅವರು ಕೆಲಸ ಮಾಡಿದರು.

ಹಲವಾರು ವರ್ಷಗಳ ನಂತರ, ಡಾ. ಫ್ರಾಂಕ್ಲಿನ್ ಅವರು ಟರ್ನರ್ ಮತ್ತು ನೆವಾಲ್ ಫೆಲೋಶಿಪ್ ಪಡೆದರು

ಮತ್ತು ಲಂಡನ್‌ನ ಕಿಂಗ್ಸ್ ಕಾಲೇಜಿನಲ್ಲಿ ಜಾನ್ ಟಿ. ರಾಂಡಾಲ್ ಅವರ ಜೈವಿಕ ಭೌತಶಾಸ್ತ್ರ ಘಟಕವನ್ನು ಸೇರಿದರು. ಆರಂಭದಲ್ಲಿ X-ಕಿರಣ ಸ್ಫಟಿಕಶಾಸ್ತ್ರದ ಘಟಕವನ್ನು ರಚಿಸುವ ಕಾರ್ಯವನ್ನು ಹೊಂದಿದ್ದರು. ನಂತರ ರೋಸಾಲಿನ್‌ ಫ್ರಾಂಕ್ಲಿನ್‌ ರವರು ತಮ್ಮ ಸಂಶೋಧನೆಯ ಗಮನವನ್ನು DNAಯ ಆಣ್ವಿಕ ರಚನೆಯತ್ತ ಮುಂದುವರಿಸಿದರು. DNA ಯ ಡಬಲ್ ಹೆಲಿಕ್ಸ್ ರಚನೆಯ ಆವಿಷ್ಕಾರಕ್ಕೆ ಅವರ ಅಧ್ಯಯನಗಳು ಮಹತ್ವದ ತಿರುವು ನೀಡಿದವು. ಗಮನಾರ್ಹವಾದ ಅಂಶವೆಂದರೆ ಜೀವದ ಮೂಲವನ್ನು ಹುಡುಕಲು ಈ ಆವಿಷ್ಕಾರವು ವಿಜ್ಞಾನಿಗಳಿಗೆ ಅವರಲ್ಲಿದ್ದ ಹಲವು ಸಂಶಯಗಳಿಗೆ ಪರಿಹಾರವನ್ನೊದಗಿಸಿತು. 

ಫ್ರಾಂಕ್ಲಿನ್‌ ರವರು ಡಿಎನ್‌ಎ ದ್ವಿಸುರುಳಿ ರಚನೆಯ ಅಧ್ಯಯನಕ್ಕೆ ಎಕ್ಸ್‌ರೇ ಕ್ರಿಸ್ಟಲೋಗ್ರಫಿ ತಂತ್ರವನ್ನು ಸಂಶೋಧಿಸಿದರು. ಅದನ್ನು ಫೋಟೋ-51 ಎಂದು ಕರೆಯಲಾಗಿದೆ. ಅವರು ಸಂಶೋಧಿಸಿದ ದಿನಗಳಲ್ಲಿ ತಾವು ಆವಿಷ್ಕರಿಸಿರುವ ಈ ರಚನೆ ಮುಂದೆ ಇಷ್ಟೊಂದು ಪ್ರಖ್ಯಾತಿ ಹೊಂದಬಹುದೆಂಬ ಯಾವುದೇ ಕಲ್ಪನೆಯೂ ಅವರಿಗೆ ಇರಲಿಲ್ಲ. ಕರ್ತವ್ಯ ನಿಷ್ಟೆ ಮತ್ತು ತನ್ನ ಸಂಶೋಧನೆಯಲ್ಲಿದ್ದ ಬದ್ಧತೆಯುಳ್ಳ ಫ್ರಾಂಕ್ಲಿನ್‌ರವರು ತಮ್ಮ ಸಹೋದ್ಯೋಗಿಗಳಿಂದ ಅವಗಣನೆಗೊಳಗಾದರು ಎನ್ನುವುದೇ ಐತಿಹಾಸಿಕ ವ್ಯಂಗ್ಯ. 

ಡಿಎನ್‌ಎ ಅಣುವಿನ ರಚನೆಯ ಬಗೆಗಿನ ಸಂಶೋಧನೆಯು ಸಾಕಷ್ಟು ಮುಂದುವರಿಯಿತು. ಫ್ರಾಂಕ್ಲಿನ್‌ರವರ

ಸಂಶೋಧನಾ ಸಂಸ್ಥೆಯ ಸಹಾಯಕ ಮುಖ್ಯಸ್ಥರಾಗಿದ್ದಂತಹ ವಿಲ್ಕಿನ್ಸ್‌ ರವರಿಗೆ ಫ್ರಾಂಕ್ಲಿನ್‌ರವರು ಸಂಶೋಧಿಸಿದ ಡಿಎನ್‌ಎ ದ್ವಿಸುರುಳಿ ಮಾದರಿಯ ಮಾಹಿತಿ ಬಗ್ಗೆ ತಿಳಿಯಿತು. ವಿಲ್ಕಿನ್ಸ್‌ ರವರು ಪ್ರಾರಂಭದಲ್ಲಿ ಫ್ರಾಂಕ್ಲಿನ್‌ರವರನ್ನು ತಮ್ಮ ಜೊತೆ ಡಿಎನ್‌ಎ ಸಂಶೋಧನೆಯ ಬಗ್ಗೆ ಕಾರ್ಯನಿರ್ವಹಿಸಲು ಕೇಳಿಕೊಂಡರು.  ಆದರೆ ಸಂಸ್ಥೆಯ ಮುಖ್ಯಸ್ಥರ ಆದೇಶದ ಮೇರೆಗೆ ಅವರು ಇವರ ಜೊತೆ ಕೆಲಸ ಮಾಡಲು ಸಾಧ್ಯವಾಗಲಿಲ್ಲ. 

ಮುಂದಿನ ದಿನಗಳಲ್ಲಿ ವಿಲ್ಕಿನ್ಸ್‌ರವರು ಫ್ರಾಂಕ್ಲಿನ್‌ರವರ ಕಾರ್ಯವನ್ನು ಹೆಗೋ ಫ್ರಾಂಕ್ಲಿನ್‌ ರವರಿಗೆ ಗೊತ್ತಿಲ್ಲದಂತೆ ಪಡೆದು ಸಂಶೋಧನೆಯನ್ನು ತಮ್ಮ ಇತರೆ ಸ್ನೇಹಿತರಾದ ಜೆ.ಡಿ. ವ್ಯಾಟ್ಸನ್‌ ಮತ್ತು ಫ್ರಾನ್ಸಿಸ್‌ ಕ್ರಿಕ್‌ ರವರ ಜೊತೆ ಮುಂದುವರಿಸುತ್ತಾರೆ. ಈ ವಿಷಯ ಫ್ರಾಂಕ್ಲಿನ್‌ರವರಿಗೆ ತಿಳಿಯುವುದೇ ಇಲ್ಲ. 

1958ರಲ್ಲಿ ರೋಸಾಲಿಂಡ್‌ ಫ್ರಾಂಕ್ಲಿನ್‌ರವರು ಅನಾರೋಗ್ಯ ಹೊಂದಿ ಅಂಡಾಶಯದ ಕ್ಯಾನ್ಸರ್‌ನಿಂದ ಮೃತರಾಗುತ್ತಾರೆ. ಅವರ ಮರಣಾನಂತರ ಡಿಎನ್‌ಎ ರಚನೆಯ ಮೇಲಿನ ಸಂಶೋಧನೆಯನ್ನು ಈ ಮೂರು ಸ್ನೇಹಿತರು ಮುಂದುವರಿಸುತ್ತಾರೆ. ಜೀವಿಗಳ ಪ್ರತಿಯೊಂದು ಲಕ್ಷಣಗಳು ಡಿಎನ್‌ಎ ರಚನೆಯ ಮೇಲೆಯೇ ಅವಲಂಬಿತವಾಗಿದೆ ಎನ್ನುವುದನ್ನು ಇವರ ಸಂಶೋಧನೆಯು ಸಾಬೀತುಪಡಿಸುತ್ತದೆ.

ಇವರುಗಳ ಈ ಸಂಶೋಧನೆಯು 1962ರಲ್ಲಿ ವೈದ್ಯಕೀಯ ಮತ್ತು ಶರೀರ ಶಾಸ್ತ್ರಕ್ಕೆ ಕೊಡಲಾಗುವ ನೊಬೆಲ್‌ ಪಾರಿತೋಷಕವನ್ನು ಗಳಿಸುತ್ತದೆ. ಇಲ್ಲಿ ಡಿಎನ್‌ಎ ದ್ವಿಸುರುಳಿ ಮಾದರಿಯ ಆವಿಷ್ಕಾರಕ್ಕೆ ನೊಬೆಲ್‌ ಪಾರಿತೋಷಕ ಬಂದಿತು ಎನ್ನುವ ಸಂತೋಷಕ್ಕಿಂತ, ದ್ವಿಸುರುಳಿ ರಚನೆಯ ಆವಿಷ್ಕಾರದ ಮೂಲಕ್ಕೆ ಕಾರಣವಾದ ರೋಸಾಲಿಂಡ್‌ ಫ್ರಾಂಕ್ಲಿನ್‌ರವರನ್ನು ಎಲ್ಲಿಯೂ ಕೂಡ ಪರಿಗಣಿಸಲಿಲ್ಲ ಎನ್ನುವುದು ವಿಷಾದನೀಯ.

ಡಾ. ಫ್ರಾಂಕ್ಲಿನ್‌ರ ಡಿಎನ್‌ಎ ಸಂಶೋಧನೆಯು ನೊಬೆಲ್‌ಗೆ ಅರ್ಹವಾಗಿದೆ ಎಂದು ವ್ಯಾಪಕವಾಗಿ ಭಾವಿಸಲಾಗಿದ್ದರೂ, ಅವರು ಹೆಚ್ಚಾಗಿ ಕಡೆಗಣಿಸಲ್ಪಟ್ಟರು, ಆಕೆಯ ಜೀವನಚರಿತ್ರೆ ರಚಿಸಿದ ಬ್ರೆಂಡಾ ಮ್ಯಾಡಾಕ್ಸ್ ರವರು ಅವರನ್ನು "ದಿ ಡಾರ್ಕ್ ಲೇಡಿ ಆಫ್ ಡಿಎನ್‌ಎ" ಎಂದು ಕರೆದರು. ಸಹೋದ್ಯೋಗಿಯಾದ ವಿಲ್ಕಿನ್ಸ್‌ರವರ ಅವಹೇಳನಕಾರಿ ಉಲ್ಲೇಖವು ‍ಫ್ರಾಂಕ್ಲಿನ್‌ರವರ ಕೊಡುಗೆಯನ್ನು ಕತ್ತಲೆಯಲ್ಲಿ ಇರಿಸಿತು. ಸಂಶೋಧನಾ ಕ್ಷಿತಿಜದ ಉತ್ಕ್ರಾಂತಿ ಎನಿಸಿದ ದ್ವಿಸುರುಳಿ ರಚನೆಯ ಹಿಂದಿನ ‍ಫ್ರಾಂಕ್ಲಿನ್‌ರವರ ಸಂಶೋಧನಾ ಶ್ರಮವನ್ನು ಪುರುಷ ಪ್ರಧಾನ ಸಮಾಜವು ಮನ್ನಿಸಲಿಲ್ಲ. ಧುವತಾರೆಯಂತೆ ಮಿನುಗಬೇಕಿದ್ದ ಡಾ. ಫ್ರಾಂಕ್ಲಿನ್‌ರವರಿಗೆ ಯಾವುದೇ ಗೌರವ ನೀಡಲಿಲ್ಲ- ಆದರೆ ನಂತರ ಒಬ್ಬರು ಫ್ರಾಂಕ್ಲಿನ್‌ರವರು ರಸಾಯನಶಾಸ್ತ್ರಕ್ಕಾಗಿ ನೊಬೆಲ್‌ಗೆ ಅರ್ಹರು ಎಂದು ಸೂಚಿಸಿದರೂ, ಮರಣೋತ್ತರ ನಾಮನಿರ್ದೇಶನಗಳೂ ಆಗಲಿಲ್ಲ.

ಫ್ರಾಂಕ್ಲಿನ್ ಅವರ ಜೀವನವನ್ನು ಅನಾರೋಗ್ಯ ತಿಂದು ಹಾಕದೇ ಇದ್ದಿದ್ದರೆ, ಬಹುಷಃ ಅವರ ಸಂಶೋಧನೆಗಳು ಔಷಧ-ವಿಜ್ಞಾನದಲ್ಲಿ ಮಹಾಕಾಂತಿಯನ್ನೇ ಉಂಟುಮಾಡುತ್ತಿದ್ದವು ಎಂಬುದರಲ್ಲಿ ಸಂದೇಹವಿಲ್ಲ. ಅವರ ಅದ್ಭುತ ವೃತ್ತಿಜೀವನವು ಇನ್ನೂ ಸಂಪೂರ್ಣವಾಗಿ ಅನಾವರಣಗೊಳ್ಳದಿದ್ದರೂ ಲಂಡನ್‌ನ ವಿಲ್ಲೆಸ್ಡೆನ್ ಯಹೂದಿ ಸ್ಮಶಾನದಲ್ಲಿರುವ ಡಾ. ಫ್ರಾಂಕ್ಲಿನ್ ಅವರ ಸಮಾಧಿಯ ಮೇಲಿನ ಫಲಕದಲ್ಲಿ ಡಿ ಎನ್‌ ಎ ಅಣುವಿನ ರಚನೆಯ ಸಂಶೋಧನೆಯಲ್ಲಿ ಅವರ  ಪಾತ್ರವನ್ನು ಸ್ಮರಿಸಲಾಗಿದೆ.

ಕೃಪೆ: ಆಟೋಬಯೋಗ್ರಫಿ ಆಫ್‌ ಬ್ರೆಂಡನ್‌ ಮೆಡಾಕ್ಸ್‌.

 

ಸಂಗ್ರಹ ಮತ್ತು ಅನುವಾದ: 

ಶಶಿಕುಮಾರ್‌ ಬಿ.ಎಸ್. 

ವಿಜ್ಞಾನ ಶಿಕ್ಷಕರು. 

ಸರ್ಕಾರಿ ಪ್ರೌಢಶಾಲೆ, ಎಲೆಕ್ಯಾತನಹಳ್ಳಿ, 

ನೆಲಮಂಗಲ ತಾ. ಬೆಂಗಳೂರು ಗ್ರಾ,ಜಿಲ್ಲೆ.- 562111. 

ದೂ: 9900276979