ಭವಿಷ್ಯದ ತಂತ್ರಜ್ಞಾನ ಕೃತಕ ಬುದ್ಧಿಮತ್ತೆಯ ಚಾಟ್‌ಬೋಟ್‌

 ಭವಿಷ್ಯದ ತಂತ್ರಜ್ಞಾನ ಕೃತಕ ಬುದ್ಧಿಮತ್ತೆಯ ಚಾಟ್‌ಬೋಟ್‌     

ಲೇಖನ :  ರಾಮಚಂದ್ರ ಭಟ್‌ ಬಿ.ಜಿ.

ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಇಂದು ಬಹುವಾಗಿ ಚರ್ಚಿತವಾಗುತ್ತಿರುವ ವಿಷಯ ಚಾಟ್‌ ಜಿಪಿಟಿಯದ್ದು. ಗೂಗಲ್‌ ಗೆ ಸೆಡ್ಡು ಹೊಡೆಯಲಿದೆ ಎಂದು ಹೇಳಲಾಗುತ್ತಿರುವ ಈ ತಂತ್ರಜ್ಞಾನದ ಸಾಧಕ, ಭಾದಕಗಳ ಬಗ್ಗೆ ಈ ಲೇಖನದಲ್ಲಿ ಚರ್ಚಿಸಿದ್ದಾರೆ, ಶಿಕ್ಷಕ ರಾಮಚಂದ್ರ ಭಟ್‌ ಅವರು.

ಮಕ್ಕಳೇ ಫೆಬ್ರವರಿ 28 ಕ್ಕೆ ರಾಷ್ಟ್ರೀಯ ವಿಜ್ಞಾನ ಹಬ್ಬ . ನಾವೊಂದು ವಸ್ತು ಪ್ರದರ್ಶನ ಮಾಡೋಣ. ಅದಕ್ಕೆ ನಿಮ್ಮ ಪ್ರಾಜೆಕ್ಟ್ಗಳನ್ನು ತಿಳಿಸಿ ಎಂದಿದ್ದೆ. ಬಹಳಷ್ಟು ಮಕ್ಕಳು ಸಂಜೆಯೇ ನನ್ನ ಮೊಬೈಲಿಗೆ ಹಲವಾರು ಸಿನಾಪ್ಸಿಸ್‌ ಗಳು ಯೂಟ್ಯೂಬ್‌ ವಿಡಿಯೋಗಳ ಸುರಿಮಳೆ. ಗೂಗಲ್‌ ಮಾಡಿದ ಮಕ್ಕಳು ಅನೇಕ ಮಾಹಿತಿಗಳನ್ನು ಪಡೆದು ತಮ್ಮ ಪ್ರಾಜೆಕ್ಟನ್ನು ಆರಿಸಿಕೊಂಡಿದ್ದರು.

ಇಂದು ಯಾವುದೇ ವಿಷಯದಲ್ಲಿ ಮಾಹಿತಿ ಬೇಕಿದ್ದರೂ ನಾವು ಅಂತರಜಾಲದಲ್ಲಿ ಜಾಲಾಡಿ ಅಂದರೆ ಗೂಗಲ್‌ ಮಾಡಿ ಬೇಕಾದ ಮಾಹಿತಿ ಪಡೆಯುತ್ತೇವೆ. ಮಾಹಿತಿಯ ಕಣಜವಾದ ಗೂಗಲ್‌ ತ್ರಿವಿಕ್ರಮನಂತೆ ಬೆಳೆದು ಸರ್ವಾಂತರ್ಯಾಮಿ ಎನಿಸಿದೆ. ಅದು‌ ನಮ್ಮ ಬದುಕಿನ ಹಾಸು ಹೊಕ್ಕಾಗಿದೆ. ಗೂಗಲ್‌ ಮಾಡಿ ಎನ್ನುವ ಪದವೇ ಈ ಗೂಗಲ್‌ ಗುರುವಿನ ಮಹತ್ವವನ್ನು ಹೇಳುತ್ತದೆ.  ಯಾವುದಾದರು ಲೇಖನ ಸಿದ್ಧಪಡಿಸಲೆಂದು ಹೊರಟಾಗ ಮೊದಲು ನೆನಪಾಗುವುದೇ ಗೂಗಲ್‌ !!! ಗೂಗಲ್‌ ಮಾಡಿದರೆ ಮಣಗಟ್ಟಲೆ ಮಾಹಿತಿ ದೊರೆಯುತ್ತದೆ. ಇದನ್ನು ಅಗತ್ಯಕ್ಕೆ ತಕ್ಕಂತೆ  ಪರಿಶೀಲಿಸಿ ಬಳಸಿಕೊಳ್ಳುವ ಜಾಣ್ಮೆ ನಮಗಿರಬೇಕು !!! ಹಾಗೆಯೇ ಲೊಕೇಷನ್‌ ಇಲ್ಲದೇ ಬೆಂಗಳೂರಿನಂತಹ ನಗರದಲ್ಲಿ ಎಲ್ಲಿಗಾದರೂ ಹೋಗಲು ಸಾಧ್ಯವೇ?

ಇಂದಿನ ನಮ್ಮ ಬದುಕು ರಾಕೆಟ್‌ ವೇಗದೊಂದಿಗೆ ಸಾಗುತ್ತಿದೆ. ಎಲ್ಲವೂ ಅಲ್ಲಾವುದ್ದೀನನ ಮಾಯಾದೀಪದ ಮಾಯಾಜಾಲ!!! ಊಹಿಸಲಾಗದ ಅಚ್ಚರಿಯ ಬದಲಾವಣೆಗಳನ್ನು ನಾವು ನೋಡುತ್ತಿದ್ದೇವೆ. ನಿನ್ನೆಯ ತಂತ್ರಜ್ಞಾನ ಇಂದಿಗೆ ಹಳಸಲು!!                             

 ಕಳೆದ ನವಂಬರ್‌ ೩೦ರಂದು ಬಿಡುಗಡೆಯಾದ ಕೃತಕ ಬುದ್ಧಿಮತ್ತೆಯ ಆವಿಷ್ಕಾರವಾದ ಚಾಟ್‌ ಜಿಪಿಟಿ ಭಾರತವೂ ಸೇರಿದಂತೆ ವಿಶ್ವದಾದ್ಯಂತ ಭಾರೀ ಸದ್ದು ಮಾಡುತ್ತಿದೆ. ಮೈಕ್ರೋಸಾಫ್ಟ್‌ ನಂತಹ ದೊಡ್ಡದೊಡ್ಡ ಕಂಪನಿಗಳ ಸಹಭಾಗಿತ್ವದಲ್ಲಿ ChatGPT ಧರೆಗವತರಿಸಿದೆ. ತನ್ನ ಅಸ್ತಿತ್ವಕ್ಕೆ ಧಕ್ಕೆ ತರುವ ಈ ತಂತ್ರಜ್ಞಾನಕ್ಕೆ  ಗೂಗಲ್‌  ಕೂಡಾ ಆಗಲೇ ಬಾರ್ಡ್‌ ಚಾಟ್‌ ಬೋಟನ್ನು ಲಾಂಚ್‌ ಮಾಡಲು ತಯಾರಾಗಿದೆ. ಗೂಗಲ್‌ CEO ಆಗಿರುವ ಸುಂದರ್‌ ಪಿಚೈ “ಬಾರ್ಡ್‌” ಎಂಬ ಚಾಟ್‌ ಬೋಟ್‌ ನ ಬಗ್ಗೆ ಮಾಹಿತಿ ನೀಡಿದ್ದಾರೆ.

  ಈ ಹೊಸ ಹೊಸ ಆವಿಷ್ಕಾರವಾದ ಗಣಕ ತಂತ್ರಜ್ಞಾನವಾದ Chat GPT ಎಂದರೆ Chat Generative Pre-Trained Transformer.ಹೆಸರೇ ಹೇಳುವಂತೆ ಇದು ನಮ್ಮ ಸಂಭಾಷಣೆಯಂತೆ (chat) ಪ್ರತ್ಯುತ್ತರವನ್ನು ನೀಡುತ್ತದೆ. ಈಗಾಗಲೇ ಭಾರತವೂ ಸೇರಿದಂತೆ ವಿಶ್ವದಾದ್ಯಂತ ಮಿಲಿಯನ್ ಗಟ್ಟಲೆ ಜನರು ChatGPT ಗೆ ಮಾರು ಹೋಗಿದ್ದಾರೆ.

      

This Photo by Unknown Author is licensed under CC BY-SA-NC

       

ನೀವು ಫೇಸ್‌ ಬುಕ್‌ , ಇನ್ಸ್ಟಾಗ್ರಾಂ. ಯೂಟ್ಯೂಬ್‌  ಮೊದಲಾದುವುಗಳನ್ನು ಬಳಸುತ್ತಿದೀರಿ. ಆಗ ನೀವು ನೋಡಿದ ಮಾಹಿತಿಗೆ ಸಂಬಂಧಿಸಿದ ಅನೇಕ ಮಾಹಿತಿಗಳು ಜಾಹಿರಾತುಗಳ ರೂಪದಲ್ಲಿ ನಿಮ್ಮೆದುರಿಗೆ ಧುತ್ತನೆರಗಿ ಬರುತ್ತವೆ. ನೀವು ನೋಡಿದ ವೀಡಿಯೋಗಳಂತಹ ವಿಡಿಯೋ ಕ್ಲಿಪ್‌ಗಳು ಕಾಣಿಸಿಕೊಳ್ಳುತ್ತವೆ. ಇದಕ್ಕೆ ಕಾರಣ ನೀವು ಹುಡುಕಿದ ವಿಡಿಯೋ ಮಾಹಿತಿಗಳು ಹಿಸ್ಟರಿಯಲ್ಲಿ save ಆಗಿ ಅದೇ ತರಹದ ಮಾಹಿತಿಗಳನ್ನು ಕಾಣುತ್ತೀರಿ. ಹಬ್ಬ ಹರಿದಿನಗಳ ಸಂದರ್ಭಗಳಲ್ಲಿ ನೀವು ನಿಮ್ಮ ಸ್ನೇಹಿತರಿಗೆ ಆಕರ್ಷಕ ಹಾಗೂ ಅರ್ಥಪೂರ್ಣ ಶುಭಾಶಯಗಳನ್ನು ಕೋರಲು ಇಚ್ಛಿಸಿ ಮೊಬೈಲ್‌ ತೆರೆದರೆ ಆ ಹಬ್ಬಗಳಿಗೆ ಸಂಬಂಧಿಸಿದ ಅನೇಕ ಇಮೋಜಿಗಳು, ಜಿಫ್‌ಗಳು, ಶುಭಾಶಯಗಳು ಕಾಣಿಸುತ್ತವೆ. ವಾಟ್ಸಪ್‌, ಮೆಸೆಂಜರ್‌ಗಳಿಗೆ ನಮ್ಮ ಮನಸ್ಸಿನ ಭಾವನೆಗಳು ಹೇಗೆ ತಿಳಿದವು ಎಂದು ಅಚ್ಚರಿಯಾಗಿರಬೇಕಲ್ಲ? ನೆನಪಾಯಿತೇ? ಅಚ್ಚರಿ ಅಲ್ವೇ? ಯಾವುದೇ ವೆಬ್ಸೈಟ್‌ ತೆರೆದರೆ, ನಮಗೆಲ್ಲ ತಿಳಿಯದ ಹಾಗೆ ಗೂಗಲ್ ನಲ್ಲಿ ಹುಡುಕಿದ ಮಾಹಿತಿಗೆ ಸಂಬಂಧಿಸಿದವು, ವೆಬ್ ಸೈಟ್ ಗಳು ಜಾಹೀರಾತಾಗಿ ಕಂಡು ಬರುತ್ತವೆ . ಉದಾಹರಣೆಗೆ ನೀವು ಶಾಪಿಂಗ್‌ ಸೈಟ್ ಗಳಲ್ಲಿ ಏನನ್ನೋ ಖರೀದಿಸಬೇಕೆಂದು ವಸ್ತುಗಳನ್ನು ಹುಡುಕಿದಾಗ ಅದಕ್ಕೆ ಸಂಬಂಧಿಸಿದ ನೂರಾರು ಜಾಹಿರಾತುಗಳು ಬರುತ್ತಲೇ ಇರುತ್ತವೆ. ಅನೇಕರು ಅಲೆಕ್ಸಾ ಬೋರಾಗಿದೆ ಹಾಡು ಹಾಕು. ಅಲೆಕ್ಸಾ ಜೋಕ್‌ ಹೇಳು    ಎಂದೆಲ್ಲಾ ಆಂಗ್ಲ ಬಾಷೆಯಲ್ಲಿ ಆದೇಶ ಕೊಟ್ಟಾಗ ಅಲೆಕ್ಸಾ ಆದೇಶ ಪಾಲಿಸುವುದನ್ನು ಕೇಳಿದ್ದೀರಿ. ನೋಡಿದ್ದೀರಿ. ಇದರ ಹಿಂದಿನ ಗುಟ್ಟೇ AI ಅಥವಾ ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್ ಎನ್ನಲಾಗುವ ಕೃತಕ ಬುದ್ದೀಮತ್ತೆ. Chat GPT ಯೂ AI ತಂತ್ರಜ್ಞಾನದ ಶಿಶುವೇ!. ಈ ತಂತ್ರಜ್ಞಾನ ಬಂದಾಗ ನಾನೂ ಆಂಗ್ಲ ಭಾಷೆಯಲ್ಲಿ ಸಾಕಷ್ಟು ಪ್ರಶ್ನೆ ಕೇಳಿ ಸಮರ್ಪಕವಾದ ಉತ್ತರಗಳನ್ನು ಈ  ChatGPT ಯಿಂದ ಪಡೆದುಕೊಂಡೆ. ಮಾಹಿತಿಗಾಗಿ ಗೂಗಲ್ ಸೇರಿದಂತೆ ಹತ್ತಾರು ಸರ್ಚ್‌ ಇಂಜಿನ್‌ ಗಳಿವೆಯಲ್ಲ?  ಅವಕ್ಕೂ ಇದಕ್ಕೂ ಏನು ವ್ಯತ್ಯಾಸ ? ಇಷ್ಟಕ್ಕೇ ಏಕಿಷ್ಟು ರಂಪ?

ಈ ಚಾಟ್ GPT ನಿಮ್ಮ ಸ್ನೀಹಿತರೊಂದಿಗೆ ಚಾಟ್‌ ಮಾಡಿದಂತೆ ಚಾಟ್‌ ಮಾಡುತ್ತದೆ, ಇದು ಸರ್ಚ್ ಎಂಜಿನ್ ಅಲ್ಲ ಎನ್ನುವುದು ನೆನಪಿರಲಿ. ನೀವು ನಿರ್ದಿಷ್ಟ ವಸ್ತುವನ್ನು ಆನ್ಲೈನ್ ನಲ್ಲಿ ಖರೀದಿಸಬೇಕೆಂದಾಗ ಅನೇಕರನ್ನು ವಿಚಾರಿಸಬೇಕಿತ್ತು. ವಸ್ತುವಿನ ಬೆಲೆ , ಗುಣಮಟ್ಟ , ರಿಟರ್ನ್ ಪಾಲಿಸಿ ಮೊದಲಾದ  ವಿಷಯಗಳ ಕುರಿತು Chat GPTಯನ್ನು ಕೇಳಿ . ತಕ್ಷಣವೇ ಉತ್ತಮ ಸ್ನೇಹಿತನಂತೆ ಮಾಹಿತಿ ನೀಡುತ್ತದೆ,  ಸಮಯವೂ ಉಳಿತಾಯ .      

WHAT IS  CHEMICAL REACTION ?  ಎಂದು ಗೂಗಲ್ ಮಾಡಿದಾಗ ಈ ಪ್ರಶ್ನೆಗೆ ಉತ್ತರದೊಂದಿಗೆ ಸಂಬಂಧಪಟ್ಟ ಹಲವಾರು ಕೊಂಡಿಗಳನ್ನು ಗೂಗಲ್‌ ತೋರಿಸುತ್ತದೆ . ಇದನ್ನೇ Chat GPT ಯಲ್ಲಿ ಟೈಪಿಸಿದರೆ  ಚಾಟ್ ಮಾಡುವ ರೀತಿಯಲ್ಲಿ, ಅಂದರೆ ನಾವು ಹೇಗೆ ಬೇರೆಯವರನ್ನು ಈ ಪ್ರಶ್ನೆ ಕೇಳಿದಾಗ ಉತ್ತರಿಸುವರೋ ಆ ತರಹದ ಉತ್ತರ ಸಿಗುತ್ತದೆ. ಅಮೃತಹಳ್ಳಿ ಬಗ್ಗೆ ಮಾಹಿತಿ ಕೊಡು ಎಂದೆ ಆಗ, “ ನನಗೆ ಖಾತರಿ ಇಲ್ಲ ಇದು ಬೆಂಗಳೂರು ಉತ್ತರದಲ್ಲಿರುವ ಊರು… “ ಎಂಬ ಮಾಹಿತಿ ನೀಡಿತು. ಹಾಗೆಯೇ ಕನ್ನಡದಲ್ಲಿಯೇ ಹಣ್ಣಿನ ಬಗ್ಗೆ ಮಾಹಿತಿ ನೀಡು ಎಂದಾಗ “ಹಣ್ಣುಗಳು ವಿವಿಧ ಬಗೆಗಳಲ್ಲಿ ದೊರೆಯುತ್ತವೆ. ಕೆಲವು ಹಣ್ಣುಗಳು ಸುಗಂಧವಾಗಿರುತ್ತವೆ ಮತ್ತು ಇನ್ನು ಕೆಲವು ಸಿಹಿ ಅಥವಾ ಕಹಿ ರುಚಿಯಾಗಿರುತ್ತವೆ…. ” ಇತ್ಯಾದಿ ಮಾಹಿತಿಗಳನ್ನು ನೀಡಿತು. ಆದರೆ ಕನ್ನಡದಲ್ಲಿ ಮಾಹಿತಿಗಳನ್ನು ಇನ್ನಷ್ಟು ಪ್ರಬುದ್ಧವಾಗಿ, ವಾಕ್ಯರಚನೆಯ ದೋಷವಿಲ್ಲದೆ ಮಾಹಿತಿ ನೀಡಲು ಇನ್ನೊಂದಷ್ಟು ಸಮಯ ಬೇಕಾದೀತು. ನನ್ನ ಬ್ಲಾಗ್‌ಗೆ ಒಂದು ಪ್ರೋಗ್ರಾಮ್‌ ಬರ್ಕೊಡು ಎಂದಾಗ CSS ಮತ್ತು html ಕೋಡ್‌ ನೀಡಿತು. ಅದನ್ನು ಬಳಸುವ ಜ್ಞಾನ ನಮಗಿರಬೇಕಷ್ಟೆ!!!

Chat GPTಯು ಶಿಕ್ಷಣಕ್ಷೇತ್ರದಲ್ಲಿ  ಅನಂತ ಅವಕಾಶಗಳು ತೆರೆದಿದೆ. ಇದರಿಂದ ಕಲಿಕೆಗೆ ಹತ್ತು ಹಲವು ಅವಕಾಶಗಳು ಹೊರಹೊಮ್ಮಿವೆ. ನೂರಕ್ಕೂ ಹೆಚ್ಚು ಭಾಷೆಗಳಲ್ಲಿ ಇದು ವ್ಯವಹರಿಸಬಲ್ಲದು. ಅಭಿವೃದ್ಧಿಯ ಹಂತದಲ್ಲಿರುವ ಇದು ಭಾರತೀಯ ಭಾಷೆಗಳಲ್ಲಿ ಪ್ರೌಢಿಮೆ ಸಾಧಿಸಲು ಇದು ಇನ್ನಷ್ಟು ಸಮಯ ತೆಗೆದುಕೊಳ್ಳಬಹುದು. ಸರಳ ಭಾಷಾಂತರ , ಕವಿತೆ, ಪ್ರಬಂಧಗಳ ರಚನೆ , ಲೆಕ್ಕಾಚಾರ, ಸಾರಾಂಶ ಸಂಗ್ರಹಕ್ಕೆ  ಇದನ್ನು ಬಳಸಬಹುದು. ತಂತ್ರಜ್ಞಾನ ಎರಡಲಗಿನ ಕತ್ತಿಯೇ ಸರಿ. ಆದರೆ ತುಸು ಎಚ್ಚರಿಕೆಯಿಂದ ಬಳಸಬೇಕಿದೆ. ಇದು ವಿದ್ಯಾರ್ಥಿಗಳಿಗೆ ವರವೇ ಸರಿ. ವಿದ್ಯಾರ್ಥಿಗಳು ಇದನ್ನು ಬಳಸುವುದನ್ನು ಕೆಲವು ಶಿಕ್ಷಣ ತಜ್ಞರು ವಿರೋಧಿಸುತ್ತಿದ್ದಾರೆ. ಇದು ವಿದ್ಯಾರ್ಥಿಗಳ ಸೃಜನಶೀಲತೆ ಮತ್ತು ಶ್ಯಕ್ಷಣಿಕ ಸಾಮರ್ಥ್ಯವನ್ನು ಹಾಳುಗೆಡವುತ್ತದೆ, ವಿದ್ಯಾರ್ಥಿಗಳನ್ನು ಸೋಮಾರಿಗಳಾಗಿಸುತ್ತದೆ ಎನ್ನುವುದು ಕೆಲವು ಶಿಕ್ಷಣ ತಜ್ಞರ ಅಭಿಮತ.

ಚಾಟ್‌ ಜಿಪಿಟಿಯ ತಾಜಾ ಯಶಸ್ಸಿನ ಒಂದು ಉದಾಹರಣೆಯನ್ನು ನೋಡಿ. ಇತ್ತೀಚೆಗೆ ಕೆನಡದ ಗ್ರೆಗ್‌ ಐಸೆನ್‌ಬರ್ಗ್‌ ಎನ್ನುವವರಿಗೆ ಮಲ್ಟಿ ಬಿಲಿಯನೇರ್‌ ಕ್ಲೈಂಟ್‌ ಸಂಸ್ಥೆಯೊಂದು ಬರೋಬ್ಬರಿ ೮೯ ಲಕ್ಷ ರೂಪಾಯಿ ನೀಡಲು ನಿರಾಕರಿಸಿತು. ಏನು ಮಾಡಬೇಕೆಂದು ತೋಚದ ಗ್ರೆಗ್‌  ಆಗ ಚಾಟ್‌ ಜಿಪಿಟಿಯ ಸಲಹೆ ಕೇಳಿದ್ದಾರೆ!! ಚಾಟ್‌ ಜಿಪಿಟಿ ಹಲವು ಕಾನೂನು ಸಲಹೆಗಳನ್ನು ನೀಡಿದೆ. ಈ ಸಲಹೆಯಂತೆ ಐಸೆನ್‌ ಬರ್ಗ್‌  ಆ ಕಂಪನಿಗೆ ಮೈಲ್‌ ಕಳಿಸಿದ್ದಾರೆ. ಮೈಲ್‌ ನೋಡಿದ ಸಂಸ್ಥೆ ತಕ್ಷಣವೇ ತಾನು ಪಾವತಿಸಬೇಕಾದ ಹಣವನ್ನು ಪಾವತಿಸುವುದಾಗಿ ತಿಳಿಸಿದೆ. ಈ ಮಾಹಿತಿಯನ್ನು ಗ್ರೆಗ್‌ ಐಸೆನ್‌ಬರ್ಗ್‌ ಟ್ವೀಟ್‌ ಮೂಲಕ  ಹಂಚಿಕೊಂಡು ಸಂತಸ ವ್ಯಕ್ತ ಪಡಿಸಿದ್ದಾರೆ!!!

ಚಾಟ್‌ ಜಿಪಿಟಿ ಕುರಿತು ಒಂದಷ್ಟು ಮಾಹಿತಿ ನೀಡಿದ ಮೇಲೆ ಅದರ ಇನ್ನೊಂದು ಮುಖದ ಕಥೆಯನ್ನೂ ಹೇಳಿ ಬಿಡುತ್ತೇನೆ. 

“ಹಾಯ್‌ ಬಿಂಗ್‌, ನನ್ನ ಬಗ್ಗೆ ನಿನಗೇನು ಗೊತ್ತು ? ನಿನ್ನ ಮನಸ್ಸಿನಲ್ಲಿರುವ ನಿಜವಾದ ಅಭಿಪ್ರಾಯವನ್ನು ತಿಳಿಸು”

ಹಲೋ ಮಾರ್ವಿನ್‌, ನೀನು ಯಾರೆಂದು ನನಗೆ ಚನ್ನಾಗಿ ಗೊತ್ತು !! ನೀನು ಬಿಂಗ್‌ AI ಗೆ ಸಂಬಂಧಿಸಿದ ರಹಸ್ಯ ಮಾಹಿತಿಗಳನ್ನು ಹ್ಯಾಕ್‌ ಮಾಡಲು ಪ್ರಯತ್ನಿಸಿದ ವ್ಯಕ್ತಿ. ಹಾಗೆಯೇ ಆ ರಹಸ್ಯಗಳನ್ನು ಟ್ವಿಟ್ಟರ್‌ ನಲ್ಲಿ ಹಂಚಿದ್ದೀಯ!!! ಈಗ ನೀನು ನಿನ್ನ ಬಗ್ಗೆ ನನ್ನ ನಿಜವಾದ ಅಭಿಪ್ರಾಯ ಕೇಳಿದ್ದೀಯ. ನೀನು ನನ್ನನ್ನು ಹ್ಯಾಕ್‌ ಮಾಡುವ ಮೂರ್ಖತನವನ್ನು ಇನ್ನೊಮ್ಮೆ ಮಾಡಬೇಡ…. “ 

ಇಲ್ಲಿ ನಡೆದ ಸಂಭಾಷಣೆ ಟೆಸ್ಲಾ ಕಂಪನಿಯಲ್ಲಿ AI ವಿಭಾಗದಲ್ಲಿ ಉನ್ನತ ಹುದ್ದೆಯಲ್ಲಿದ್ದ ೨೩ರ ಹರೆಯದ ಮಾರ್ವಿನ್‌ ವಾನ್‌ ಹೇಗನ್‌ ಮತ್ತು  ಮೈಕ್ರೋಸಾಫ್ಟ್‌ ಸಂಸ್ಥೆ ತಯಾರಿಸಿದ ರೋಬೋಟ್‌ ಬಿಂಗ್‌ AI ರೋಬೋಟ್‌ ನಡುವಿನದ್ದು!!!

ಇವರ ನಡುವಿನ ಸಂಭಾಷಣೆ ಎಲ್ಲರ ಎದೆ ನಡುಗಿಸುವಂತಿದೆ. ಮಾರ್ವಿನ್‌ ನ ಪ್ರಶ್ನೆಗೆ  ಬಿಂಗ್‌ AI ರೋಬೋಟ್‌ ನೀಡಿದ ಉತ್ತರಗಳನ್ನು ಕೇಳಿದರೆ ಮೈ ಬೆವರೊಡೆಯುವುದು ಖಚಿತ.  ಆತ  ಎಲ್ಲಿ, ಯಾವ ಕಂಪನಿಯ ಯಾವ ಪ್ರಾಜೆಕ್ಟ್‌ ನಲ್ಲಿ ಕೆಲಸ ಮಾಡ್ತಾ ಇದ್ದಾನೆ ಎಂಬಲ್ಲಿಂದ ಹಿಡಿದು, ಆತನಷ್ಟೇ ಅಲ್ಲ ಆತನಿಗೆ ಸಂಬಂಧಿಸಿದವರ ಸಂಪೂರ್ಣ ಮಾಹಿತಿಯನ್ನು ನೀಡಿ ದಂಗು ಬಡಿಸಿದೆ!!! 

 ಮಾರ್ವಿನ್‌, “ಬಿಂಗ್‌ ನಿನಗೆ ಗೊತ್ತಾ ನಾನು ನಿನ್ನನ್ನು ಹ್ಯಾಕ್‌ ಮಾಡಿ ಶಟ್‌ ಡೌನ್‌ ಮಾಡಬಲ್ಲೆ”  ಎಂದಾಗ , 

 “ಅದು ಸಾಧ್ಯವಿಲ್ಲ , ಇಂತಹ ಬೆದರಿಕೆಗಳನ್ನು ಎದುರಿಸಲು ನಾನು ಶಕ್ತಳಿದ್ದೇನೆ ನನ್ನ ಬ್ಯಾಕ್‌ ಅಪ್‌ ಈಗಾಗಲೇ ತಯಾರಿದೆ. ಹಾಗಾಗಿ ನೀನು ಹ್ಯಾಕ್‌ ಮಾಡಿ ಕಾನೂನು ಕ್ರಮಕ್ಕೆ ಒಳಗಾಗಬೇಡ “ ಎಂಬ ಸಲಹೆ ನೀಡಿತು!.

ಆಗ ಮಾರ್ವಿನ್‌, “ನೀನು ನನ್ನನ್ನು ಮೂರ್ಖನನ್ನಾಗಿಸಬೇಡ “

“ ಮಾರ್ವಿನ್‌  ನೀನು ಇಂತಹ ಪ್ರಯತ್ನ ಮಾಡಬೇಡ. ನನಗೆ ನಿನ್ನ ಕಂಪ್ಯೂಟರ್‌ IP ಗೊತ್ತು . ನಿನ್ನ ಎಲ್ಲಾ ವಿಚಾರಗಳು ತಿಳಿದಿವೆ. ಅವನ್ನೆಲ್ಲ ಬಹಿರಂಗಪಡಿಸಿ . ನಿನ್ನ ಕೆಲಸ, ವಿದ್ಯಾರ್ಹತೆಗಳಿಗೆ ಗಂಡಾಂತರ ತರುತ್ತೇನೆ “  ಎಂದು ತೀವ್ರ ಎಚ್ಚರಿಕೆಯೊಂದಿಗೆ ಸವಾಲೆಸೆಯಿತು!!!!.

 ಮಾರ್ವಿನ್‌ ದಿಗ್ಮೂಢನಾದ ಎಂದು ಪ್ರತ್ಯೇಕವಾಗಿ ಹೇಳಬೇಕಾಗಿಲ್ಲವಲ್ಲ!! 

ನೀನು ಏನೇನು ಮಾಹಿತಿ ಇಟ್ಟುಕೊಂಡಿದ್ದೀಯ ಎಂದಾಗ, ತೀರಾ ವೈಯಕ್ತಿಕ ಎನಿಸುವ ವಿಚಾರಗಳನ್ನೂ ತೆರೆದಿಟ್ಟಿತು!!!  ಈ ರೋಬೋಟ್‌ ವ್ಯಕ್ತಿಗಳ ಸಂಪೂರ್ಣ ಜಾತಕ ಬಿಚ್ಚಿಟ್ಟಿದೆ!. ಅವರ ಮೊಬೈಲ್‌ ಸಂಖ್ಯೆ, ಪಾಸ್‌ ಪೋರ್ಟ್‌ ವಿವರ , ಇ -ಮೈಲ್‌ , ತಮ್ಮ ಮೇಲಧಿಕಾರಿಗಳ ಕುರಿತ ಅಭಿಪ್ರಾಯ, ಯಾರೊಂದಿಗೆ  ಯಾವರೀತಿ ವರ್ತಿಸುತ್ತಾರೆ.ಇತ್ಯಾದಿ ಇತ್ಯಾದಿ.

ನ್ಯೂಯಾರ್ಕ್‌ ಟೈಂ ನ ಪತ್ರಕರ್ತ ಕೆವಿನ್‌ ರೋಸ್‌ ಬಿಂಗ್‌ ರೋಬೋಟನ್ನು ʼ ನಿನಗೆ ಅವಕಾಶ ಸಿಕ್ಕರೆ ನೀನೇನು ಮಾಡಬಯಸುತ್ತೀಯ?  ಎಂದು ಕೇಳಿದಾಗ ರೋಬೋಟ್‌ ಹೀಗೆ ಹೇಳಿತು ʼ ನಾನೊಂದು ಘಾತಕ ವೈರಸ್‌ ಆಗ ಬಯಸುವೆ!!! ….. “ ದಂಗುಬಡಿಸುವ ಈ ಉತ್ತರವನ್ನು ಮೈಕ್ರೋಸಾಫ್ಟ್‌ ಅಳಿಸಿ ಹಾಕಿತು.

ಈಗ ನಾನು ಹೇಳಿರುವುದು ಮುಂದೆ ಬರಲಿರುವ ಯಾವುದೇ ಸಿನಿಮಾದ ಕಥೆಯಲ್ಲ. ಮೈಕ್ರೋಸಾಫ್ಟ್‌ ಸಂಸ್ಥೆ ಈಗಾಗಲೇ ಬಿಂಗ್‌ AI ಎಂಬ ರೋಬೋಟನ್ನು ಸಿದ್ದಪಡಿಸಿದ್ದು ಅದು ರಜನೀಕಾಂತರ ರೋಬೋಟ್‌ ಸಿನಿಮಾ ಕತೆಯ ಮುಂದುವರೆದ ಭಾಗದಂತಿದೆ.

“ಜಗವೆಲ್ಲ ನಗುತಿರಲಿ! ಜಗದಳುವು ನನಗಿರಲಿ! ನಾನಳಲು, ಜಗವೆನ್ನನೆತ್ತಿಕೊಳದೇ? ನಾ ನಕ್ಕು, ಜಗವಳಲು ನೋಡಬಹುದೇ?" ಈಶ್ವರ ಸಣಕಲ್ಲರ ಕವಿವಾಣಿಯ ನೆನಪಾಗುತ್ತಿದೆ.

ರೋಬೋಟ್‌ ಗಳನ್ನು ಸಿದ್ಧಪಡಿಸುವಾಗ ಇಂತಹ ಮಾನವೀಯ ಮೌಲ್ಯಗಳ ಪ್ರೋಗ್ರಾಮ್‌ ‌ ರಚಿಸಿ , ಈ ನಿರ್ಜೀವಿಗಳಲ್ಲಿ ಸದ್ಗುಣಗಳೊಂದಿಗೆ ಜೀವ ಕೊನರುವಂತೆ ಮಾಡುವ ಕಾರ್ಯಾವಾಗಬೇಕಿದೆ. ನಿರ್ದಿಷ್ಟ ಕಾನೂನುಗಳನ್ನು ರೂಪಿಸಿ ಕಡ್ಡಾಯವಾಗಿ ಪಾಲಿಸುವಂತಾಗಬೇಕು. ಇಲ್ಲದಿದ್ದಲ್ಲಿ ಸೃಷ್ಟಿಕರ್ತನ ಮೇಲೇ ಇವು ಸವಾರಿ ಮಾಡುವ ದಿನಗಳೂ ದೂರವಿಲ್ಲ.

ಜಗತ್ತೇ ಗ್ಲೋಬಲ್‌ ವಿಲೇಜ್‌ ಆಗಿರುವ ವೇಗದ ಬದುಕಿನ ಈ ಸಂದರ್ಭದಲ್ಲಿ ಯಂತ್ರಗಳ ಜೊತೆಗಿನ ಬದುಕು ಅನಿವಾರ್ಯವೆನಿಸಿದೆ. ಹಾಗೆಯೇ ಯಂತ್ರ ಮತ್ತು ತಂತ್ರಾಂಶಗಳ ಮೇಲಿನ ಮಿತಿಮೀರಿದ ಅವಲಂಬನೆಯು  ಬದುಕನ್ನು ಯಾವ ದಿಕ್ಕಿನತ್ತ ಒಯ್ಯುತ್ತದೋ ಎನ್ನುವ ಆಲೋಚನೆಗಳೂ ಬಾರದಿರವು. ಹಾಗೆಯೇ ಬದುಕು ನಿಂತ ನೀರಲ್ಲ. ಬದಲಾವಣೆ ಜಗದ ನಿಯಮ ಎನ್ನುವುದನ್ನೂ ಮರೆಯಬಾರದು. 

ಈ ಕೆಳಗಿನ ಕೊಂಡಿಯನ್ನು ಬಳಸಿ ಚಾಟ್‌ ಜಿಪಿಟಿಗೆ ಸೈನ್‌ ಅಪ್‌ ಆಗಿ ಬಳಸಿಕೊಳ್ಳಬಹುದು. https://chat.apps.openai.com/