“ಜೀವಿಗಳ ಜೀವಾಮೃತ ಹಾಲು” ~ಹಾಲು ಕುಡಿದು ಆರೋಗ್ಯವಂತರಾಗಿರಿ.

  “ಜೀವಿಗಳ ಜೀವಾಮೃತ ಹಾಲು” ~ಹಾಲು ಕುಡಿದು ಆರೋಗ್ಯವಂತರಾಗಿರಿ. 

✍️ಲೇಖನ :

ಬಸವರಾಜ ಎಮ್ ಯರಗುಪ್ಪಿ 

ಸಾ.ಪೊ ರಾಮಗೇರಿ, ಲಕ್ಷ್ಮೇಶ್ವರ ತಾಲೂಕು 

ಜಿಲ್ಲಾ ಗದಗ, ದೂರವಾಣಿ 9742193758 

ಮಿಂಚಂಚೆ basu.ygp@gmail.com.

ನವ್ಹಂಬರ 26 ರಾಷ್ಟ್ರೀಯ ಹಾಲು ದಿನ. ತನ್ನಿಮಿತ್ತ ವಿಶೇಷ ಲೇಖನ.

“ನಮ್ಮ ಈ ಗ್ರಹದಲ್ಲಿ ತಾಯಿಯ ಹಾಲಿಗೆ ಸಮಾನವಾಗಿ ಬರುವ ಏಕೈಕ ವಸ್ತು ತೆಂಗಿನ ಹಾಲಾಗಿದೆ” ಎಂದು ಡಿಕ್ ಗ್ರೆಗೊರಿ ಹೇಳಿದ ಮಾತು ನೆನಪಿಗೆ ಬಂತು. ಹಾಲು, ಹುಟ್ಟಿದ ಕೂಸಿನಿಂದ ಹಿಡಿದು ಮಾನವ ಜೀವನದ ಕೊನೆಯವರೆಗೂ ಅವಶ್ಯಕವಾಗಿರುವ ಪೌಷ್ಟಿಕಾಂಶವನ್ನು ಹೊಂದಿರುವ ದ್ರವ ರೂಪದ “ಸಮತೋಲಿತ ಆಹಾರ” ಎಂದರೆ ತಪ್ಪಾಗಲಾರದು. ಉತ್ತಮ ಆರೋಗ್ಯಕ್ಕಾಗಿ ಹಾಲು ಪಡೆಯಿರಿ, ಕುಡಿಯಿರಿ & ಸಾಮರ್ಥ್ಯ ಗಳಿಸಿರಿ. ಇದೊಂದು ಸಂಪೂರ್ಣವಾಗಿ ಆಕರ್ಷಕವಾದ ಪಾನೀಯವಾಗಿದೆ. ನಮ್ಮ ದೇಶದಲ್ಲಿ ಹೆಚ್ಚಿನವರು ಹಾಲು ಕುಡಿಯಲು ಇಷ್ಟಪಡುತ್ತಾರೆ. ಕೆಲವರು ಚಹಾ/ಕಾಫಿ, ಬೂಷ್ಟ, ಬೊರ್ನವಿಟಾದೊಂದಿಗೆ ಹಾಲು ಕುಡಿದರೆ, ಮತ್ತೆ ಕೆಲವರು ಹಾಲಿನಲ್ಲಿ ಅರಿಶಿನವನ್ನು ಮಿಶ್ರಣ ಮಾಡಿ ಮನೆಮದ್ದಾಗಿ ಪ್ರತಿನಿತ್ಯ ಸೇವಿಸುತ್ತಾರೆ. ಹೀಗೆ ಒಂದಲ್ಲ ಒಂದು ರೀತಿಯಲ್ಲಿ ಪ್ರತಿನಿತ್ಯ ಹಾಲಿನ ಮೊರೆ ಹೋಗುವವರೇ ಹೆಚ್ಚು. ಹಾಗಾಗಿ ಹಾಲು ಮತ್ತು ಡೈರಿ ಉತ್ಪನ್ನಗಳ ಸೇವನೆಯಿಂದ ಜನರಿಗೆ ಆಗುವ ಪ್ರಯೋಜನಗಳನ್ನು ಉತ್ತೇಜಿಸಲು ಭಾರತದಾದ್ಯಂತ  ಅದರ ಪ್ರಯೋಜನಗಳ ಬಗ್ಗೆ ಅರಿವು ಮೂಡಿಸಲು ಹಾಗೂ ರಾಷ್ಟ್ರ ಮಟ್ಟದಲ್ಲಿ ಕ್ಷೀರ ಕ್ರಾಂತಿಗೆ ನಾಂದಿ ಹಾಡಿದ ಭಾರತದ ”ಕ್ಷೀರ ಕ್ರಾಂತಿಯ ಪಿತಾಮಹ ಡಾ.ವರ್ಗೀಸ್ ಕುರಿಯನ್ ಅವರ ಜನ್ಮದಿನವನ್ನು ಸ್ಮರಣೀಯವಾಗಿಸಲು ಪ್ರತಿವರ್ಷ ನವೆಂಬರ್ 26ರಂದು “ರಾಷ್ಟ್ರೀಯ ಹಾಲಿನ ”ದಿನವನ್ನಾಗಿ ಆಚರಿಸಲಾಗುತ್ತದೆ.

ಇಂದು ಭಾರತದ ಹಾಲು ಉತ್ಪಾದನಾ ಕ್ಷೇತ್ರದಲ್ಲಿ ಸ್ಮರಣೀಯ ದಿನ. ರಾಷ್ಟ್ರ ಮಟ್ಟದಲ್ಲಿ ಕ್ಷೀರ ಕ್ರಾಂತಿಗೆ ನಾಂದಿ ಹಾಡಿದ ದಿನ.ಭಾರತೀಯ ಡೈರಿ ಸಂಘವು 2014ರಲ್ಲಿ ಮೊದಲ ಬಾರಿ ರಾಷ್ಟ್ರೀಯ ಕ್ಷೀರ ದಿನವನ್ನು ಆಚರಿಸಲು ಮುಂದಾಯಿತು. 2014ರ ನವೆಂಬರ್ 26ರಂದು ಮೊದಲ ಬಾರಿ ರಾಷ್ಟ್ರೀಯ ಕ್ಷೀರ ದಿನ ಆಚರಿಸಿದ್ದನ್ನು ಇಲ್ಲಿ ಸ್ಮರಿಸಬಹುದು.

ಹಾಗೆಯೇ ರಾಷ್ಟ್ರೀಯ ಹಾಲು ದಿನಾಚರಣೆ ಅಲ್ಲದೆ, ವಿಶ್ವದಾದ್ಯಂತ ಪ್ರತೀ ವರ್ಷ ಜೂನ್ 01 ರಂದು "ವಿಶ್ವ ಹಾಲಿನ” ದಿನವನ್ನಾಗಿ ಸಹ ಆಚರಿಸಲಾಗುತ್ತಿದೆ.

ಕುರಿಯನ್ ಅವರು ಹೈನು ಉದ್ಯಮಕ್ಕೆ ಶ್ರಮಿಸಿದ್ದಾರೆ. ದೇಶವು ಅಧಿಕ ಹಾಲು ಉತ್ಪಾದಕ ಕೇಂದ್ರಗಳನ್ನು ಹೊಂದಿ, ಸ್ವಾವಲಂಬಿಯಾಗಬೇಕು ಎಂಬುದು ಈ ದಿನದ ಮುಖ್ಯ ಉದ್ದೇಶವಾಗಿದೆ. ಕುರಿಯನ್ ಅವರು ಅಮುಲ್ ಮಾದರಿ ಹೈನುಗಾರಿಕೆ, ಹೊನಲು ಕಾರ್ಯಾಚರಣೆ ಆರಂಭಿಸಿದ್ದು, ಇದು ಭಾರತದಲ್ಲಿ ಯಶಸ್ವಿಯಾಯಿತು. ಈ ಮೂಲಕ ಗ್ರಾಮೀಣ ಹೈನುಗಾರಿಕೆ ಕ್ಷೇತ್ರವೂ ಅಭಿವೃದ್ಧಿ ಪಥದತ್ತ ಸಾಗಿತು. ಹೀಗಾಗಿ ಕುರಿಯನ್ ಅವರು "ರಾಷ್ಟ್ರೀಯ ಕ್ಷೀರ ಕ್ರಾಂತಿಯ ಪಿತಾಮಹ" ಎಂದು ಕರೆಸಿಕೊಂಡರು.

ಭಾರತವು ಕೃಷಿ ರಾಷ್ಟ್ರವಾಗಿರುವುದರಿಂದ, ಇದು ದೇಶದ ಪ್ರಮುಖ ಆಹಾರಗಳಲ್ಲಿ ಒಂದಾಗಿದೆ ಎಂದು ಪರಿಗಣಿಸಿರುವುದರಿಂದ ಈ ದಿನವು ಇನ್ನೂ ಹೆಚ್ಚಿನ ಪ್ರಾಮುಖ್ಯತೆಯನ್ನು ಹೊಂದಿದೆ ಎಂದು ಹೇಳಲಾಗುತ್ತದೆ.ವಿಶ್ವದಲ್ಲಿಯೇ ಹಾಲು ಉತ್ಪಾದನೆಯಲ್ಲಿ ಭಾರತ ಮೊದಲ ಸ್ಥಾನದಲ್ಲಿದೆ. ದೇಶದಲ್ಲಿ ಕರ್ನಾಟಕ ಎರಡನೇ ಸ್ಥಾನದಲ್ಲಿದ್ದು,  ಇದಕ್ಕೆ ಉತ್ತಮ ಗುಣಮಟ್ಟದ ಹಾಲಿನ ಡೈರಿಗಳ ಉತ್ಪನ್ನಗಳೇ ಕಾರಣ ಎಂದು ಹೇಳಲಾಗುತ್ತಿದೆ.”ಡಾ.ವರ್ಗೀಶ್ ಕುರಿಯನ್” ಅವರ ನಿರಂತರ ಪರಿಶ್ರಮದ ಫಲವಾಗಿ ಭಾರತ ಹೈನುಗಾರಿಕೆಯಲ್ಲಿ ಮೊದಲ ಸ್ಥಾನದಲ್ಲಿದೆ.ಲಾಲ್ ಬಹದ್ದೂರ್ ಶಾಸ್ತ್ರಿ ಅವರ ಕನಸನ್ನು ನನಸು ಮಾಡುವ ನಿಟ್ಟಿನಲ್ಲಿ  ಭಾರತದ ಡಾ.ವರ್ಗೀಸ್ ಕುರಿಯನ್ ಅವರು ಅವಿರತವಾಗಿ ಶ್ರಮಿಸಿದ್ದಾರೆ. ಅವರು, ಹಾಲು ಮತ್ತು ಹಾಲಿನ ಉತ್ಪನ್ನಗಳ ಮಹತ್ವವನ್ನು ಜನಸಾಮಾನ್ಯರಿಗೆ ಅದರಲ್ಲಿಯೂ ಯುವಜನತೆ ಮತ್ತು ಮಕ್ಕಳಿಗೆ ತಿಳಿಸುವ ನಿಟ್ಟಿನಲ್ಲಿ ಅವರು ಕ್ಷೀರ ಉದ್ಯಮಕ್ಕೆ ಅಪಾರ ಕೊಡುಗೆ ನೀಡಿದ್ದಾರೆ. 

#ಕ್ಷೀರ ಕ್ರಾಂತಿಯು ಮೂರು ಹಂತಗಳಲ್ಲಿ ನಡೆಯಿತು.

1)ಈ ಹಂತವು 1970-1980 ರ ನಡುವೆ ನಡೆಯಿತು ಮತ್ತು 10 ನಗರಗಳಲ್ಲಿ 18 ಹಾಲಿನ ಶೆಡ್‌ಗಳಲ್ಲಿ ಡೈರಿ ಸಹಕಾರ ಸಂಘಗಳನ್ನು ಸ್ಥಾಪಿಸುವ ಗುರಿಯನ್ನು ಹೊಂದಿತ್ತು. ಈ ಶೆಡ್‌ಗಳನ್ನು ಮಹಾನಗರ ಮಾರುಕಟ್ಟೆಗೆ ಸಂಪರ್ಕಿಸುವ ಗುರಿ ಹೊಂದಲಾಗಿತ್ತು.

2) ಈ ಹಂತದಲ್ಲಿ, ಹಾಲಿನ ಮಳಿಗೆಗಳು 290 ನಗರ ಮಾರುಕಟ್ಟೆಗಳು ಮತ್ತು 136 ಹಾಲಿನ ಶೆಡ್‌ಗಳಿಗೆ ಹೆಚ್ಚಿದವು. ಸುಮಾರು 4,250,000 ಹಾಲು ಉತ್ಪಾದಕರು ಭಾರತದಲ್ಲಿ ಅನೇಕ ಸಹಕಾರಿಗಳಲ್ಲಿ ಹರಡಿಕೊಂಡಿದ್ದಾರೆ.

3)ಈ ಹಂತವು ಹಾಲಿನ ಪ್ರಮಾಣವನ್ನು ಹೆಚ್ಚಿಸಲು ಮೂಲಸೌಕರ್ಯವನ್ನು ಬಲಪಡಿಸಿತು.

#ಹಾಲಿನ ಪ್ರಯೋಜನಗಳು:

ಹಾಲು ಕುಡಿಯುವುದರಿಂದ ಆರೋಗ್ಯ ಸುಧಾರಣೆಯಾಗುತ್ತದೆ. ಹಾಲು ಪೋಷಕಾಂಶಗಳಿಂದ ಕೂಡಿದೆ. ಹಾಲಿನಿಂದ ಮಾನವ ಶರೀರದ ಬೆಳವಣೆಗೆ ಹಾಗೂ ದೈನಂದಿನ ಕಾರ್ಯ ಚಟುವಟಿಕೆಗಳಿಗೆ ಬೇಕಾಗುವ ಎಲ್ಲಾ ಪೋಷಕಾಂಶಗಳು ಸಿಗುತ್ತವೆ. 

*ಹಾಲು ದೇಹದಲ್ಲಿನ ರೋಗ ನಿರೋಧಕ ಶಕ್ತಿ  ಹೆಚ್ಚಿಸುತ್ತದೆ. 

*ಹಾಲಿನಿಂದ ಅನೇಕ ಉತ್ಪನ್ನಗಳನ್ನು ತಯಾರಿಸಬಹುದು.ಮುಖ್ಯವಾಗಿ ಮೊಸರು, ಮಜ್ಜಿಗೆ, ಬೆಣ್ಣೆ, ತುಪ್ಪ, ಚೀಸ್, ಪನ್ನೀರ್, ಪೇಡ, ಕುಂದಾ ಸೇರಿದಂತೆ ಅನೇಕ ಪದಾರ್ಥಗಳನ್ನು ಉತ್ಪಾದಿಸಿ ಪ್ರಯೋಜನ ಪಡೆಯಬಹುದು.

*ಹಾಲಿನಲ್ಲಿ ಸಸಾರಜನಕ, ಪ್ರೋಟಿನ್, ಜಿಡ್ಡು, ಸಕ್ಕರೆ ಮತ್ತು ಪಿಷ್ಟ-ಕಾರ್ಬೋಹೈಡ್ರೇಟ್, ಲವಣಗಳು, ಮಿನರಲ್, ಜೀವಸತ್ವಗಳು ಹಾಗೂ ನೀರಿನಾಂಶ ಇರುತ್ತದೆ.

*ಡೈರಿ ಉದ್ಯಮವು ಆರ್ಥಿಕ ಪ್ರಗತಿ, ಪೋಷಣೆ, ಸುಸ್ಥಿರತೆ ಮತ್ತು ಜೀವನಾಧಾರ ಅವಕಾಶಗಳಿಗೆ ಸಹಾಯ ಮಾಡುತ್ತದೆ.

*ಹಾಲು ಮೂಳೆಗಳ ಆರೋಗ್ಯಕ್ಕೆ ಪ್ರಯೋಜನಕಾರಿಯಾಗಿದೆ. 

*ಮಕ್ಕಳಲ್ಲಿ ಮೂಳೆ ಮತ್ತು ಹಲ್ಲುಗಳ ಬೆಳವಣೆಗೆಗೆ ಸಹಾಯ ಮಾಡುತ್ತದೆ.

*ಇದು ಭಾರತದಲ್ಲಿ ಹಾಲು ಉತ್ಪಾದನೆಯನ್ನು ಹೆಚ್ಚಿಸಲು ಸಹಾಯ ಮಾಡಿತು

*ಈ ಉಪಕ್ರಮವು ಗ್ರಾಮೀಣ ಆದಾಯವನ್ನು ಹೆಚ್ಚಿಸುತ್ತದೆ.

*2016-17ರಲ್ಲಿ ಭಾರತವು ವಿಶ್ವದಲ್ಲೇ ಅತಿ ಹೆಚ್ಚು ಹಾಲು ಉತ್ಪಾದಕ ರಾಷ್ಟ್ರವಾಗಿ ಹೊರ ಹೊಮ್ಮಿದೆ.

ಒಟ್ಟಾರೆಯಾಗಿ ಹಾಲು ಒಂದು ಪರಿಪೂರ್ಣವಾದ ಆಹಾರ.ಮಾನವ ಶರೀರದ ಬೆಳವಣಿಗೆಗೆ ಹಾಗೂ ದೈನಂದಿನ ಕಾರ್ಯ ಚಟುವಟಿಕೆಗಳಿಗೆ ಅವಶ್ಯವಿರುವ ಎಲ್ಲ ಪೋಷಕಾಂಶಗಳು ಹಾಲಿನಲ್ಲಿವೆ.ಜೀವನವನ್ನು ಉಳಿಸಿಕೊಳ್ಳಲು ಅಗತ್ಯವಾದ ಮೂಲಭೂತ ವಸ್ತುಗಳಲ್ಲಿ ಒಂದು ಸೂರ್ಯನ ಬೆಳಕು, ಇನ್ನೊಂದು ಹಾಲು.ಹಾಗಾಗಿ ಹಾಲು ಹುಟ್ಟಿದ ಮಗುವಿನಿಂದ ವೃದ್ಧರವರೆಗೆ ದೈನಂದಿನ ಜೀವನದಲ್ಲಿ ಅವಶ್ಯಕವಾಗಿರುವ ಪೌಷ್ಟಿಕಾಂಶವನ್ನು ಹೊಂದಿರುವ ಸಮತೋಲಿತ ಆಹಾರ ಎನ್ನಬಹುದು.  “ಹಾಲು ಕುಡಿ ಚಡ್ಡು ಹೊಡಿ” ಅಂತ ಶಾಲೆಗಳಲ್ಲಿ  ಹೇಳುತ್ತಿದ್ದ ಘೋಷಣೆ ಹಾಲಿನ ಮಹತ್ವವನ್ನು ಅವಾಗಲೇ ನಾವು ತಿಳಿದುಕೊಂಡಿದ್ವಿ. ಈಗಲೂ  ಸಹ ಸರ್ಕಾರಿ ಶಾಲೆಗಳಲ್ಲಿ ಕ್ಷೀರಭಾಗ್ಯ ಯೋಜನೆಯಡಿ ಮಕ್ಕಳಲ್ಲಿ ಅಪೌಷ್ಟಿಕತೆ ನಿವಾರಣೆಗೆ ಸರ್ಕಾರಗಳು ಹಾಲು ನೀಡುತ್ತಾ ಬಂದಿವೆ.ಆದ್ದರಿಂದ  ಸರ್ಕಾರಕ್ಕೆ ನನ್ನದೊಂದು ಸಲಾಮ. 

ಕೊನೆಯ ಮಾತು:

"ದಿನಕ್ಕೆ ಒಂದು ಲೋಟ ಹಾಲು ವೈದ್ಯರನ್ನು ದೂರವಿಡುತ್ತದೆ".