ಇವಳು ಮೇರಿಯಲ್ಲ, ಟೈಫಾಯಿಡ್ ಮಾರಿ!

ಇವಳು ಮೇರಿಯಲ್ಲ, ಟೈಫಾಯಿಡ್ ಮಾರಿ!

ಲೇಖಕರು : ಡಾ|| ಎಂ.ಜೆ. ಸುಂದರ್ ರಾಮ್

ನಿವೃತ್ತ ಪ್ರಾಣಿಶಾಸ್ತ್ರ ಪ್ರಾಧ್ಯಾಪಕರು 

    

ನ್ಯೂಯಾರ್ಕ್‌ನಲ್ಲಿ ಚಾರ್ಲ್ಸ್ ಹೆನ್ರಿ ವಾರೆನ್ ಎಂಬ ಅತಿ ಶ್ರೀಮಂತ ವ್ಯಾಪಾರಿ ಇದ್ದ. ಇವನು 1906ರಲ್ಲಿ ಹತ್ತಿರದ ದ್ವೀಪದಲ್ಲಿ ತಾತ್ಕಾಲಿಕವಾಗಿ ವಿಶ್ರಾಂತಿದಾಮವೊಂದನ್ನು ಬಾಡಿಗೆಗೆ ಪಡೆದು, ತನ್ನ ಹನ್ನೊಂದು ಸದಸ್ಯರ ವಿಶಾಲ ಪರಿವಾರ ಸಮೇತ ಮೋಜು, ವಿಶ್ರಾಂತಿಗಾಗಿ ಆಗಮಿಸಿದನು. ತನ್ನ ಪರಿವಾರಕ್ಕೆ ತಿಂಡಿ ತಿನಿಸು, ಊಟೋಪಚಾರಗಳನ್ನು ಪೂರೈಸಲು ಮೇರಿ ಮಾಲನ್ (Mary Mallon) ಎಂಬ ಅಡುಗೆಯವಳನ್ನೂ ಜೊತೆಗೆ ಕರೆದೊಯ್ದಿದ್ದನು. ಕೆಲವು ದಿನ ಎಲ್ಲರೂ ತಿಂದು ತೇಗಿ, ಸಂತೋಷದಿಂದ ಕಾಲ ಕಳೆದರು. ನಂತರ, ವಾರೆನ್‌ನ ಮಗಳಿಗೆ ಟೈಫಾಯಿಡ್ ಬಂದು ಹಾಸಿಗೆ ಹಿಡಿದಳು. 4-5 ದಿನಗಳ ನಂತರ ಮತ್ತೊಬ್ಬ ಮಗಳಿಗೂ ಟೈಫಾಯಿಡ್ ಸೋಂಕಿತು. ಕ್ರಮೇಣ ಮನೆಯ ತೋಟಗಾರನೂ ಟೈಫಾಯಿಡ್‌ನಿಂದ ನರಳಲಾರಂಭಿಸಿದ. ಇದೇ ರೀತಿ ಆ ಪರಿವಾರದ ಆರು ಮಂದಿಗೆ ಟೈಫಾಯಿಡ್ ತಗುಲಿ, ಹಾಸಿಗೆ ಹಿಡಿದರು.

ಟೈಫಾಯಿಡ್ ರೋಗ ಕಲುಷಿತ ಆಹಾರ ಅಥವಾ ನೀರಿನ ಮೂಲಕ ಹರಡುವುದನ್ನು ತಿಳಿದಿದ್ದ ಆ ಮನೆಯ ಮಾಲೀಕನಿಗೆ ಕಳವಳ ಪ್ರಾರಂಭವಾಯಿತು. ತನ್ನ ಮನೆಗೆ ಬಾಡಿಗೆಗೆ ಬಂದ ಕುಟುಂಬದಲ್ಲಿ ಈ ರೀತಿ ಇಷ್ಟೊಂದು ಜನ ರೋಗಕ್ಕೊಳಗಾದರೆಂಬ ವಿಷಯ ತಿಳಿದರೆ ಮುಂದೆ ತನ್ನ ಮನೆಗೆ ಬಾಡಿಗೆದಾರರು ಬರಲಾರರೆಂದು ಹೆದರಿ, ಕೂಡಲೇ ಈ ರೋಗದ ಮೂಲವನ್ನು ಶೋಧಿಸಲು ಪರಿಣತನೊಬ್ಬನನ್ನು ಕರೆಸಿದನು. ಕೊಳಾಯಿ, ತೊಟ್ಟಿ, ಬಚ್ಚಲುಮನೆ, ಶೌಚಾಲಯ ಮುಂತಾದ ನೀರು ಬರುವ, ತಂಗುವ ಎಲ್ಲ ಮೂಲಗಳನ್ನೂ ಕೂಲಂಕಷವಾಗಿ ತಪಾಸಣೆ ನಡೆಸಲಾಯಿತು. ಅವೆಲ್ಲವೂ ಸರಿಯಾಗಿಯೇ ಇರುವಂತೆ ಕಂಡುಬಂದವು. ಟೈಫಾಯಿಡ್ ಹರಡಲು ಇವು ಯಾವುದೂ ಕಾರಣವಾಗಿರಲಿಲ್ಲ. ಇದರಿಂದ ಸಮಾಧಾನಗೊಳ್ಳದ ಮಾಲೀಕ ಇದಕ್ಕೆ ಸರಿಯಾದ ಕಾರಣವರಿಯಲು ಟೈಫಾಯಿಡ್ ಬಗ್ಗೆ ವಿಶೇಷ ಅನುಭವವಿದ್ದ ಜಾರ್ಜ್ ಸೋಪರ್ (George Soper) ಎಂಬ ಸಿವಿಲ್ ಇಂಜಿನಿಯರ್‌ನನ್ನು ನೇಮಿಸಿದನು.

ಸೋಪರ್ ತಮ್ಮ ಪತ್ತೇದಾರಿ ಕೆಲಸವನ್ನು ಪ್ರಾರಂಭಿಸಿದರು. ಆ ಪರಿವಾರದಲ್ಲಿ ಟೈಫಾಯಿಡ್ ಕಾಣಿಸಿಕೊಂಡ ಸುಮಾರು ಮೂರು ವಾರಗಳ ತರುವಾಯ ಮೇರಿ ತನ್ನ ಕೆಲಸ ಬಿಟ್ಟು ಹೋದಳು. ಮನೆಯಲ್ಲಿನ ಎಲ್ಲವನ್ನೂ ಸೂಕ್ಷ್ಮವಾಗಿ ಗಮನಿಸಿದ ಸೋಪರ್‌ಗೆ ಏಕೋ ಮೇರಿಯ ಮೇಲೆ ಸಂದೇಹ ಬಂದಿತು. ಅವಳ ಔದ್ಯೋಗಿಕ ಚರಿತ್ರೆಯ ಜಾಡು ಹಿಡಿದು ಹೊರಟರು.

ಐರ್ಲೆಂಡ್‌ನಲ್ಲಿ ಹುಟ್ಟಿದ ಮೇರಿ, 1883ರಲ್ಲಿ, ತನ್ನ 15ನೇ ವಯಸ್ಸಿನಲ್ಲಿ ಅಮೆರಿಕಕ್ಕೆ ವಲಸೆಬಂದು, ಅಲ್ಲಿ ಶ್ರೀಮಂತ ಕುಟುಂಬಗಳನ್ನೇ ಹುಡುಕಿ ಅಡುಗೆಯವಳಾಗಿ ಕೆಲಸ ಮಾಡುತ್ತಿದ್ದಳು. 1900ರಿಂದ 1907ರ ವರೆಗೆ ಅವಳು ನ್ಯೂಯಾರ್ಕ್‌ನಲ್ಲಿ ಏಳು ಕುಟುಂಬಗಳಲ್ಲಿ ಅಡುಗೆಯವಳಾಗಿ ಕೆಲಸ ಮಾಡಿದ್ದಳು.

1900ರಲ್ಲಿ, ಅವಳು ಕೆಲಸಕ್ಕೆ ಸೇರಿದ ಎರಡು ವಾರಗಳಲ್ಲಿ ಆ ಮನೆಯವರಿಗೆ ಟೈಫಾಯಿಡ್ ರೋಗ ತಗುಲಿತ್ತು. 1901ರಲ್ಲಿ ಅವಳು ಸೇರಿದ್ದ ಮತ್ತೊಂದು ಕುಟುಂಬದಲ್ಲಿ ಎಲ್ಲ ಸದಸ್ಯರೂ ಟೈಫಾಯಿಡ್‌ನಿಂದ ಪೀಡಿತರಾಗಿದ್ದು, ಒಬ್ಬರು ಸತ್ತಿದ್ದರು. ಆ ಮನೆಯನ್ನೂ ಬಿಟ್ಟು ಅವಳು ಮತ್ತೊಂದು ಮನೆ ಸೇರಿದಳು. ಆ ಮನೆಯ 8 ಸದಸ್ಯರಲ್ಲಿ 7 ಸದಸ್ಯರು ಟೈಫಾಯಿಡ್‌ನಿಂದ ನರಳಿದರು. 1906ರಲ್ಲಿ ಆ ಮನೆಯನ್ನೂ ಬಿಟ್ಟು, ಮೇರಿ ಮತ್ತೊಂದು ಮನೆ ಸೇರಿದಳು. 11 ಜನವಿದ್ದ ಆ ಮನೆಯಲ್ಲಿ 10 ಜನ ಟೈಫಾಯಿಡ್‌ನಿಂದ ನರಳಿ ಆಸ್ಪತ್ರೆ ಸೇರಿದರು. ಆ ಮನೆಯನ್ನೂ ಬಿಟ್ಟು, ಕೊನೆಗೆ, ಮೇರಿ ವಾರೆನ್ ಅವರ ಮನೆ ಸೇರಿದ್ದಳು. ಹೀಗೆ, ಅವಳು ಕೆಲಸ ಮಾಡಿದ ಏಳು ಮನೆಗಳಲ್ಲೂ ಟೈಫಾಯಿಡ್ ಅವಳನ್ನು ಹಿಂಬಾಲಿಸಿಕೊಂಡು ಬಂದಿರುವುದು ಗೋಚರಿಸಿತು. ಆ ತಾಣಗಳಲ್ಲಿ ಒಟ್ಟು 22 ಜನ ಟೈಫಾಯಿಡ್‌ನಿಂದ ನರಳಿದ್ದು, ಬಾಲಕಿಯೊಬ್ಬಳು ಸತ್ತಿದ್ದ ವಿಷಯ ಸೋಪರ್‌ಗೆ ತಿಳಿದುಬಂದಿತು.

ಮೇರಿ ಇದುವರೆಗೂ ಒಮ್ಮೆಯೂ ಟೈಫಾಯಿಡ್‌ನಿಂದ ನರಳಿರಲಿಲ್ಲವೆಂಬುದೂ ಸೋಪರ್‌ಗೆ ತಿಳಿದುಬಂದಿತು. ಆದರೂ ಅವಳ ರಕ್ತ, ಮಲಮೂತ್ರಗಳ ತಪಾಸಣೆ ಮಾಡಿ, ತನ್ನ ಸಂಶಯವನ್ನು ನಿವಾರಿಸಿಕೊಳ್ಳಬೇಕಾಗಿತ್ತು. ಈ ತಪಾಸಣೆಯಿಂದ ಮೇರಿ ಟೈಫಾಯಿಡ್ ರೋಗಕಾರಕಗಳ ವಾಹಕಳಾಗಿರಬಹುದೆಂಬ ಸಂಶಯವನ್ನು ನಿವಾರಿಸಿಕೊಳ್ಳಬೇಕಾಗಿತ್ತು. ಇದಕ್ಕಾಗಿ, ಮೇರಿ ಇರುವೆಡೆಯನ್ನು ಪತ್ತೆಮಾಡಬೇಕಾಗಿತ್ತು. 

1907ನೇ ಇಸವಿಯಲ್ಲಿ, ಸೋಪರ್ ಅವರ ಬಡಾವಣೆಯಲ್ಲಿ ಯಾರಿಗೋ ಟೈಫಾಯಿಡ್ ರೋಗ ಸೋಂಕಿರುವ ಸುದ್ದಿ ಸೋಪರ್‌ಗೆ ಗೊತ್ತಾಯಿತು. ವಿಚಾರಣೆ ನಡೆಸಿದಾಗ, ಆ ಮನೆಯಲ್ಲಿ ಇಬ್ಬರಿಗೆ ಟೈಫಾಯಿಡ್ ಸೋಂಕಿರರುವುದು ಕಂಡುಬಂದಿತು. ಮನೆಯ ಕೆಲಸದವಳು ಹಾಸಿಗೆ ಹಿಡಿದಿದ್ದಳು. ಮನೆಯೊಡೆಯನ 25-26 ವಯಸ್ಸಿನ ಮಗಳು ನರಳುತ್ತಿದ್ದಳು. ಇವಳಿಗೆ ರೋಗ ತೀವ್ರವಾಗಿ, ಎರಡು ದಿನಗಳ ನಂತರ ಸಾವನ್ನಪ್ಪಿದ್ದಳು. ಇವಳನ್ನು ಶುಶ್ರೂಷೆ ಮಾಡುತ್ತಿದ್ದ ನರ್ಸ್‌ಗೆ ರೋಗ ಸೋಂಕಿತು. ಇದನ್ನು ಕೇಳಿದ ಸೋಪರ್‌ಗೆ ಬೇಸರವಾಯಿತು. ಅದೇ ಸಮಯದಲ್ಲಿ ಸೋಪರ್‌ಗೆ ಮಿಂಚಿನಂತೆ ಮತ್ತೊಂದು ಸುದ್ದಿ ಬಂದಿತು. ಮೇರಿಯನ್ನು ಹೋಲುವ ಹೊಸ ಅಡುಗೆಯವಳು ಕೆಲವೇ ದಿನಗಳ ಹಿಂದೆ ಆ ಮನೆಗೆ ಕೆಲಸಕ್ಕೆ ಸೇರಿದ್ದಳೆಂಬ ಆ ಸುದ್ದಿ ಸೋಪರ್ ರ ಕುತೂಹಲ ಕೆರಳಿಸಿತು.

ಸೋಪರ್ ಕೂಡಲೇ ಆ ಮನೆಗೆ ಹೋಗಿ, ಅವಳೊಡನೆ ತನ್ನ ಪರಿಚಯ ಮಾಡಿಕೊಂಡು, ತಾವು ಬಂದ ಉದ್ದೇಶವನ್ನು ಪ್ರಸ್ತಾಪಿಸಿದರು. ಅವಳು ಟೈಫಾಯಿಡ್ ರೋಗಕಾರಕಗಳನ್ನು ಹೊತ್ತು, ಅವನ್ನು ಇತರರಿಗೆ ಹರಡುತ್ತಿರಬಹುದೆಂಬ ಸಂಶಯವಿರುವುದರಿಂದ ಅವಳ ಮಲ ಮೂತ್ರಗಳನ್ನು ಪರೀಕ್ಷಿಸಬೇಕಾಗುತ್ತದೆಂದೂ, ಅದಕ್ಕೆ ಅವಳ ಸಹಕಾರ ಬೇಕೆಂದೂ ತಿಳಿಸಿದರು. ಇದನ್ನು ಕೇಳುತ್ತಿದ್ದಂತೆ, ಸಿಟ್ಟಿನಿಂದ ಕೆಂಡಾಮಂಡಲವಾದ ಮೇರಿ, ಕೈಗೆ ಸಿಕ್ಕ ಸೌಟನ್ನು ಎತ್ತಿಕೊಂಡು ಸೋಪರ್‌ರನ್ನು ಬಡಿಯಲು ನುಗ್ಗಿದಳು. ಗಾಬರಿಗೊಂಡ ಸೋಪರ್ ಅಲ್ಲಿಂದ ಪರಾರಿಯಾದರು!

ಆದರೆ ಸೋಪರ್ ಛಲ ಬಿಡಲಿಲ್ಲ. ನ್ಯೂಯಾರ್ಕ್ ಆರೋಗ್ಯ ಇಲಾಖೆಯ ಮುಖ್ಯಸ್ಥ ಹರ್ಮನ್ ಬಿಗ್ಸ್ (Herman Biggs) ಗೆ ತಮ್ಮ ಸಂಶಯ ಮತ್ತು ಸಂಶೋಧನೆಯನ್ನು ವಿವರಿಸಿದರು. ಬಿಗ್ಸ್ ಈ ಒಗಟನ್ನು ಬಿಡಿಸುವ ಜವಾಬ್ದಾರಿಯನ್ನು ಜೋಸೆಫೈನ್ ಬೇಕರ್ ಎಂಬ ವೈದ್ಯರಿಗೆ ವಹಿಸಿದರು. ಬೇಕರ್ ಮೇರಿಯನ್ನು ಕಂಡಾಗ ಅವಳು ಅವರೊಡನೆ ಮಾತನಾಡಲು ನಿರಾಕರಿಸಿದಳು. ಬೇಕರ್ ಐವರು ಪೊಲೀಸ್ ಅಧಿಕಾರಿಗಳ ಸಹಾಯದಿಂದ ಅವಳನ್ನು ಬಲವಂತವಾಗಿ ಆಂಬುಲೆನ್ಸ್‌ನಲ್ಲಿ ಹೊತ್ತು ಆಸ್ಪತ್ರೆಗೆ ಸಾಗಿಸಲು ಸಿದ್ಧತೆ ನಡೆಸಿದರು. ಇದನ್ನರಿತ ಮೇರಿ ಬೇಕರ್‌ರನ್ನೂ ಸೌಟಿನಿಂದ ಹೊಡೆಯಲು ಮುನ್ನುಗ್ಗಿದಳು. ಕ್ಷಣಕಾಲ ತಬ್ಬಿಬ್ಬಾದ ಬೇಕರ್ ಸುಧಾರಿಸಿಕೊಳ್ಳುವ ಮೊದಲೇ ಮೇರಿ ಅಲ್ಲಿಂದ ಅದೃಶ್ಯಳಾಗಿದ್ದಳು! ಹುಡುಕಿದಾಗ, ಮನೆಯ ಹೊರಗೆ, ಬೇಲಿಯ ಕೆಳಗೆ ಅವಿತುಕೊಂಡಿದ್ದದ್ದು ಕಂಡುಬಂದಿತು. ಅವಳನ್ನು ಹಿಡಿದು ಆಂಬುಲೆನ್ಸ್‌ನೊಳಗೆ ದಬ್ಬಿ, ಆಸ್ಪತ್ರೆಗೆ ಕರೆದೊಯ್ದರು.

ತನಗೆ ಇದುವರೆಗೂ ಒಮ್ಮೆಯೂ ಟೈಫಾಯಿಡ್ ತಗುಲಿಲ್ಲವೆಂತಲೂ, ತಾನು ಆರೋಗ್ಯವಾಗಿರುವುದಾಗಿಯೂ ವಾದಿಸಿದ ಮೇರಿ, ತನ್ನನ್ನು ಅನವಶ್ಯಕವಾಗಿ ಪರೀಕ್ಷೆಗೊಳಪಡಿಸುತ್ತಿರುವುದಾಗಿ ಬೇಕರನನ್ನು ದೂರಿದಳು. ಆದರೆ ಆಸ್ಪತ್ರೆಯ ಸಂಶೋಧನೆಯಲ್ಲಿ, ಅವಳ ಮಲದಲ್ಲಿ ಟೈಫಾಯಿಡ್ ರೋಗಾಣುಗಳು ಪ್ರತ್ಯಕ್ಷವಾಗಿದ್ದವು!

ಮೇರಿಯ ಮಲದಲ್ಲಿ ಟೈಫಾಯಿಡ್ ರೋಗಾಣುಗಳು ಪತ್ತೆಯಾದೊಡನೆ, ಅವಳನ್ನು ಐಸೊಲೇಷನ್ ಆಸ್ಪತ್ರೆಗೆ ಸೇರಿಸಲಾಯಿತು. ಸುಮಾರು ಎರಡು ವರ್ಷಗಳ ವರೆಗೆ ಪ್ರತಿ ವಾರವೂ ಅವಳ ಮಲಪರೀಕ್ಷೆ ನಡೆಸಲಾಯಿತು. 163 ಸ್ಯಾಂಪಲ್‌ಗಳ ಪೈಕಿ 120 ಸ್ಯಾಂಪಲ್‌ಗಳಲ್ಲಿ ಟೈಫಾಯಿಡ್ ರೋಗಾಣುಗಳು ಗೋಚರಿಸಿದವು. ಇವನ್ನು ದೇಹದಲ್ಲಿ ಹೊತ್ತಿದ್ದೂ ಅವಳಿಗೆ ರೋಗ ಸೋಂಕದಿದ್ದುದು ವೈದ್ಯರಿಗೆ ಆಶ್ಚರ್ಯವನ್ನುಂಟುಮಾಡಿತು. ವಾಹಕರು ತಮ್ಮ ಕೈಗಳನ್ನು ಸ್ವಚ್ಛವಾಗಿ ತೊಳೆದುಕೊಳ್ಳದಿದ್ದರೆ ರೋಗಕಾರಕಗಳು ಇವರ ಮೂಲಕ ಆಹಾರವನ್ನು ಸೇರಿ, ರೋಗವನ್ನು ಹರಡಬಲ್ಲವೆಂದು ಸಂಶೋಧನೆಗಳ ಮೂಲಕ ಗೊತ್ತಾಯಿತು. ಮೇರಿ ಮಲವಿಸರ್ಜನೆಯ ನಂತರ ತನ್ನ ಕೈಗಳನ್ನು ಸ್ವಚ್ಛವಾಗಿ ತೊಳೆದುಕೊಳ್ಳುತ್ತಿರಲಿಲ್ಲವೆಂಬುದು ಕಂಡುಬಂದಿತು. ಇಂತಹ ಅಶುದ್ಧ ಅಡುಗೆಯವರ ಮೂಲಕ ರೋಗಾಣುಗಳು ಆಹಾರವನ್ನು ಸೇರಿ, ಅದರ ಮೂಲಕ ರೋಗ ಹರಡುವ ಸಾಧ್ಯತೆಯಿರುವುದನ್ನು ವೈದ್ಯರು ಕಂಡುಹಿಡಿದರು.

ಮೂರು ವರ್ಷಗಳ ಕಾಲ (1907-1910) ದೂರದ ದ್ವೀಪದ ಐಸೊಲೇಷನ್ ಆಸ್ಪತ್ರೆಯಲ್ಲಿ ತಂಗಿದ್ದ ಮೇರಿಗೆ ಸ್ವಾತಂತ್ರ್ಯ ಬೇಕಾಗಿತ್ತು. ತನ್ನನ್ನು ಒಬ್ಬ ಅಪರಾಧಿಯಂತೆ ಕಾಣುತ್ತಿರುವುದನ್ನು ಮೇರಿ ಪ್ರಶ್ನಿಸಿದಳು. ತಾನು ಇನ್ನೆಂದೂ ಅಡುಗೆ ಮಾಡುವುದಿಲ್ಲವೆಂದು ಲಿಖಿತವಾಗಿ ಒಪ್ಪಿಕೊಂಡರೆ ಅವಳನ್ನು ಬಿಡುಗಡೆ ಮಾಡುವುದಾಗಿ ನ್ಯಾಯಾಲಯ ತಿಳಿಸಿತು. ಅದೇ ರೀತಿ, ತಾನು ಇನ್ನೆಂದೂ ಅಡುಗೆ ಕೆಲಸ ಮಾಡುವುದಿಲ್ಲವೆಂದೂ, ತನ್ನನ್ನು ಸಂಪರ್ಕಿಸಿದವರಿಗೆ ರೋಗ ಹರಡದಂತೆ ಸ್ವಚ್ಛತೆಯಿಂದ ವರ್ತಿಸುವ ಮುಂಜಾಗ್ರತಾ ಕ್ರಮಗಳನ್ನು ತಾನು ಅಳವಡಿಸಿಕೊಳ್ಳುವುದಾಗಿಯೂ ಮೇರಿ ಮುಚ್ಚಳಿಕೆ ಪತ್ರ ಬರೆದುಕೊಟ್ಟು ಹೊರಬಂದಳು.

ಅವಳ ಬಿಡುಗಡೆಯಾಗಿ 5 ವರ್ಷಗಳ ನಂತರ ಆಸ್ಪತ್ರೆಯೊಂದರಲ್ಲಿ ಮತ್ತೆ ದಿಢೀರನೆ ಟೈಫಾಯಿಡ್ ಭುಗಿಲೆದ್ದಿತ್ತು. 25 ರೋಗಿಗಳು ನರಳಿ, ಅವರಲ್ಲಿ ಇಬ್ಬರು ಮೃತಪಟ್ಟರು. ಆಸ್ಪತ್ರೆಯ ಆಡಳಿತ ಮಂಡಳಿ ಕೂಡಲೇ ವಿಚಾರಣೆ ನಡೆಸಿತು. ಆಗ, ಆಸ್ಪತ್ರೆಗೆ ಹೊಸದಾಗಿ ಕೆಲಸಕ್ಕೆ ಸೇರಿದ್ದ ಮಿಸ್ ಬ್ರೌನ್ ಎಂಬ ಅಡುಗೆಯವಳ ಕೊಳಕುತನವೇ ರೋಗ ಹರಡಲು ಕಾರಣವೆಂದು ವಿಚಾರಣೆಯಿಂದ ತಿಳಿದು ಬಂದಿತು. ಬ್ರೌನ್‌ಳನ್ನು ಕರೆಸಿ, ಹೆಚ್ಚಿನ ಮಾಹಿತಿಗಾಗಿ ಪ್ರಶ್ನಿಸಿದಾಗ ಅವಳೇ ಮೇರಿ ಎಂದು ಗೊತ್ತಾಯಿತು! ತನ್ನ ಹೆಸರನ್ನು ಬದಲಿಸಿಕೊಂಡು ಮತ್ತೆ ಅಡುಗೆ ಕೆಲಸದಲ್ಲಿ ತೊಡಗಿಕೊಂಡಿರುವುದಾಗಿ ತಪ್ಪೊಪ್ಪಿಕೊಂಡ ಅವಳನ್ನು ಕೂಡಲೇ ಮತ್ತೊಮ್ಮೆ ಐಸೊಲೇಷನ್ ಆಸ್ಪತ್ರೆಗೆ ರವಾನಿಸಲಾಯಿತು! ಈ ಸಲ ಅವಳು ಅಲ್ಲಿ 23 ವರ್ಷಗಳ (1915-1938) ಕಾಲ ಜೀವಿಸಿದಳು. ಒಟ್ಟಿಗೆ ಮೇರಿ 26 ವರ್ಷಗಳ ದೀರ್ಘಕಾಲ ಐಸೊಲೇಷನ್ ಆಸ್ಪತ್ರೆಯಲ್ಲಿ ಕಾಲ ಕಳೆದಿದ್ದಳು. ಇದಕ್ಕೆ ಮುಂಚೆ ಅವಳಿಂದ ಒಟ್ಟಿಗೆ 47 ಮಂದಿಗೆ ಟೈಫಾಯಿಡ್ ರೋಗ ಸೋಂಕಿದ್ದು, ಅವರಲ್ಲಿ ಮೂವರು ಸತ್ತಿದ್ದರು!