ಸವಾಲಿಗೆ ಸವಾಲ್– ನೀನಾ……

ಸವಾಲಿಗೆ ಸವಾಲ್– ನೀನಾ…… 

                                                                                                          ಲೇಖಕಿ:  ಚಂದ್ರಕಲಾ. ಆರ್.‌  ಗಣಿತಶಿಕ್ಷಕಿ

ಕರ್ನಾಟಕಪಬ್ಲಿಕ್‌ ಶಾಲೆ,  

ಕೊಡಿಗೆಹಳ್ಳಿ, ಬೆಂಗಳೂರುಉತ್ತರ ವಲಯ-4.

ಅತ್ಯಂತ ಕಿರಿಯ ವಯಸ್ಸಿನಲ್ಲಿಯೇ ತಮ್ಮ ಅಸಾಧಾರಣ ಪ್ರತಿಭೆಯಿಂದ ಅಂತರರಾಷ್ಟ್ರೀಯ ಮನ್ನಣೆ ಗಳಿಸಿರುವ ಗಣಿತಜ್ಞೆ ಪ್ರೊ. ನೀನಾಗುಪ್ತಾ ಅವರನ್ನು ವಿಶ್ವ ಮಹಿಳಾ ದಿನಾಚರಣೆಯ ಸಂದರ್ಭದಲ್ಲಿ ʼಸವಿಜ್ಞಾನʼದ ಓದುಗರಿಗೆ ಪರಿಚಯಿಸುತ್ತಿದ್ದಾರೆ ಶಿಕ್ಷಕಿ ಚಂದ್ರಕಲಾ ಅವರು

          ಹಿಂದಿನ ಲೇಖನದಲ್ಲಿ– ಭಾರತ ಸಂಜಾತ ಗಣಿತಶಾಸ್ತ್ರಜ್ಞೆ ಭಾಮ ಶ್ರೀನಿವಾಸನ್ ಬಗ್ಗೆ ನನ್ನ ಲೇಖನ ಓದಿದ ಕೆಲವು ವಿದ್ಯಾರ್ಥಿಗಳು, ಅಬ್ಬಾ! ಗಣಿತ ಕ್ಷೇತ್ರದಲ್ಲಿ ಮಹಿಳೆಯರೂ ಇದ್ದಾರಲ್ಲಾ ಎಂದುಸಮಾಧಾನಪಟ್ಟರೆ, ಕೆಲವರು, ಭಾರತ ಸಂಜಾತೆಯರು ಇರಲಿ ಮಿಸ್, ಭಾರತದಲ್ಲಿಯೇ ಯಾರೂ ಇಲ್ಲವೇ? ಎಂದು ಕೇಳಿದರು. ಯಾಕಿಲ್ಲ? ಜ್ಞಾನಕ್ಕೆ ಯಾವುದೇ ದೇಶ, ಭಾಷೆ,  ಸ್ಥಳ, ಕಾಲದ ಹಂಗಿಲ್ಲ. ಇದಕ್ಕೆ ಭಾರತವೂ ಹೊರತಲ್ಲ. ಈ ನಿಟ್ಟಿನಲ್ಲಿ ಚಿಂತಿಸಿದಾಗ, ಭಾರತದ ಒಂದು ಅಪ್ರತಿಮ, ಅಸಾಧಾರಣ, ಯುವ ಪ್ರತಿಭೆಯನ್ನು, ಅಂದರೆ – ಗಣಿತಜ್ಞೆಯನ್ನು ನಿಮಗೆ ಪರಿಚಯ ಮಾಡಿಕೊಡಬೇಕು ಎನಿಸಿತು.

                ಅವರು ಯಾರಪ್ಪ! ಅಂತ ಯೋಚಿಸುತ್ತಿದ್ದೀರಾ?

 ಇವರು ಕೇವಲ 39 ವರ್ಷದ ಮಹಿಳೆ. ಓದುಗರಲ್ಲಿ ಕೆಲವರು ಓ ನನಗಿಂತ ಚಿಕ್ಕವರು! ಅಂತ ಅಚ್ಚರಿ ಪಡುತ್ತಾ ಇದ್ದೀರಿ ಅಲ್ವಾ?  ಆದರೆ, ಅವರು ಮಾಡಿದ್ದು ಒಂದು ಅಪರೂಪದ ಸಾಧನೆ. ಸುಮಾರು 70 ವರ್ಷಗಳಿಂದ ಸೈದ್ಧಾಂತಿಕ ಭೌತಶಾಸ್ತ್ರ ಮತ್ತು ಗಣಿತ (Theoretical Physics and Mathematics) ಕ್ಷೇತ್ರದಲ್ಲಿ ಸವಾಲಾಗಿ ಉಳಿದಿದ್ದಂಥ zariski cancellation problem ಗೆ ಪರಿಹಾರವನ್ನು ಸೂಚಿಸಿದ ಶ್ರೇಯ ಈಕೆಗೆ ಸಲ್ಲುತ್ತದೆ.

ಇವರೇ ನಮ್ಮ ನೀನಾಗುಪ್ತ. ಪ್ರೊಫೆಸರ ನೀನಾಗುಪ್ತ International Centre for Theoretical Physics- Italy ವತಿಯಿಂದ  ರಾಮಾನುಜನ್‌ ಪ್ರಶಸ್ತಿ ಪಡೆದ ಯುವ ಗಣಿತಶಾಸ್ತ್ರಜ್ಞೆ.

ಇವರು ಜನಿಸಿದ್ದು 1984 ರಲ್ಲಿ, ಕೊಲ್ಕತ್ತಾದ ಒಂದು ಸಾಧಾರಣ ಪರಿವಾರದಲ್ಲಿ. ನೀನಾರಿಗೆ ಚಿಕ್ಕಂದಿನಿಂದಲೇ ಗಣಿತದಲ್ಲಿ ಅಪಾರ ಆಸಕ್ತಿ ಇತ್ತು. ತಂದೆಯೊಡನೆ ಗಣಿತದ ಒಗಟುಗಳನ್ನು ಬಿಡಿಸುವುದೆಂದರೆ ಇವರಿಗೆ ಇನ್ನಿಲ್ಲದ ಪ್ರೀತಿ. ಪ್ರತಿಭಾವಂತೆಯಾಗಿದ್ದ ಈಕೆ, ಈಗಿನ ಎಲ್ಲಾ ಮಕ್ಕಳಂತೆ ತನ್ನ ವೃತ್ತಿಯ ಕೋರ್ಸ್ ಆಯ್ಕೆ ಮಾಡಿಕೊಳ್ಳುವಾಗ ಇಂಜಿನಿಯರಿಂಗ್ ಅಥವಾ ಮೆಡಿಕಲ್‌ ತೆಗೆದುಕೊಳ್ಳಬೇಕೇ ? ಇಲ್ಲ, ಮೂಲ ವಿಜ್ಞಾನದ ಅಧ್ಯಯನ ಮುಂದುವರೆಸಬೇಕೆ ?ಎಂಬ ಸವಾಲು ಎದುರಾಯಿತು. ಈ ದ್ವಂದ್ವಕ್ಕೆ ಉತ್ತರಿಸಿದ್ದು ಇವರ ಹೃದಯ ಮತ್ತು ಸೆಳೆದದ್ದು ಮೂಲ ವಿಜ್ಞಾನ - ಗಣಿತ. ಹಾಗಾಗಿ, ಸೇರಿದ್ದು B. Sc honors mathematics, Bethune ಕಾಲೇಜ್, ಕೊಲ್ಕತ್ತಾ. 2006 ರಲ್ಲಿ.  ಇಲ್ಲಿಂದ ಗಣಿತದಲ್ಲಿ ಪದವಿ ಪಡೆದ ನಂತರ 2008 ರಲ್ಲಿ ಇವರು ಗಣಿತದಲ್ಲಿಯೇ ತಮ್ಮ ಸ್ನಾತಕೋತ್ತರ ಪದವಿಯನ್ನು Indian statistical Institute- ಕೊಲ್ಕತ್ತಾದಿಂದ ಪಡೆದರು. ನಂತರ ಮುಂದಿನ ಕೇವಲ ಎರಡೇ ವರ್ಷಗಳಲ್ಲಿ ತಮ್ಮ Ph.D ಪದವಿಯನ್ನು Commutative Algebra ಎಂಬ ವಿಷಯದ ಮೇಲಿನ ಪ್ರೌಢ ಪ್ರಬಂಧಕ್ಕಾಗಿ ಪಡೆದರು.

 ಪದವಿ ಪಡೆಯುವ ಸಂದರ್ಭದಲ್ಲಿಯೇ ಇವರಿಗೆ ಅಲ್ಲಿಯವರೆಗೂ ಯಾರೂ ಬಿಡಿಸದ ಸವಾಲಾಗಿದ್ದ “Zariski cancellation problem” ನಲ್ಲಿ ಇವರಿಗೆ ಅತೀವ ಆಸಕ್ತಿ ಮೂಡಿತು. ಅದನ್ನು ಬಿಡಿಸುವ ಮನಸ್ಸು ಮಾಡಿದರು. ಆದರೆ, ಇವರ ಗುರುಗಳಾದ ಅಮರ್ತ್ಯದತ್ತರಿಂದ ದೊರೆತ ಮಾರ್ಗದರ್ಶನದಂತೆ ಮೊದಲು Ph.D ಕಡೆಗೆ ಗಮನಹರಿಸಿ ಆ ಪದವಿಯನ್ನು ಪಡೆದರು. ಆದರೆ, ಅವರ ನಿದ್ದೆಗೆಡಿಸುತ್ತಿದ್ದದ್ದು ಮಾತ್ರ Zariski cancellation problem. ಇದನ್ನು ಅವರದೇ ಮಾತುಗಳಲ್ಲಿ ಅರ್ಥಮಾಡಿಕೊಳ್ಳುವುದಾದರೆ,

 a X x  = a X y   ಆದರೆ   a =  y 

 ಓ ! ಅರ್ಥ ಮಾಡಿಕೊಳ್ಳುವುದು ತುಂಬಾ ಸುಲಭ .ಅನಿಸುತ್ತದೆ ಅಲ್ಲವೇ?

a ಏನಾದರೂ ಸೊನ್ನೆ ಆದರೆ?? (if a = 0)

 ನಾವಂದುಕೊಂಡಂತೆ x =y ಆಗುವುದಿಲ್ಲ. ಹಾಗಾಗಿ, ನಾವು ಎಚ್ಚರಿಕೆಯಿಂದ ಇರಬೇಕು.

 ಅದರಲ್ಲೂ ಇವರು ಅಧ್ಯಯನ ಮಾಡುತ್ತಿರುವುದು Algebraic Number Theory ಯಲ್ಲಿ ಬರುವ  Rings ಮತ್ತು  Groups ಇತ್ಯಾದಿಗಳ ಬಗ್ಗೆ, ಮೂರಕ್ಕಿಂತ ಹೆಚ್ಚು ಆಯಾಮಗಳ ಬಗ್ಗೆ. ( about multi dimensions in space and universe ). ಅವರೇ ಹೇಳುವಂತೆ,

" If you have cylinders over 2 geometric structures  that have similar forms. Can one conclude that the original base structures have similar forms? "

 ಅಂದರೆ, ಯಾವುದಾದರೂ ಒಂದೇ ತೆರೆನಾದ ರೇಖಾ ಗಣಿತೀಯ ಸಂರಚನೆಗಳ (Structures) ಮೇಲೆ ಸಿಲಿಂಡರ್‌ಗಳು ಇದ್ದರೆ, ಮೂಲ ಸಂರಚನೆಯು ಒಂದೇ ಆಗಿದೆ ಎಂದು ತೀರ್ಮಾನಿಸಲು ಸಾಧ್ಯವೇ? ಈ ರೀತಿಯ ಸಮಸ್ಯೆಗಳಿಗೆ ಪರಿಹಾರ ಸೂಚಿಸಬಹುದಾದ ಗಣಿತ ಸಮಸ್ಯೆಗಳನ್ನು ಬಿಡಿಸುವುದರಲ್ಲಿ ನೀನಾಗುಪ್ತ ತೊಡಗಿಸಿಕೊಂಡರು. ತಾವು ಕಂಡುಕೊಂಡಂಥ ಪರಿಹಾರವನ್ನು ಗುರುಗಳೊಂದಿಗೆ ಹಂಚಿಕೊಂಡರು.

ಧನ ಆಯಾಮಗಳಿಗೆ ಈವರೆಗೂ ಬಿಡಿಸಲಾಗದ ಸಮಸ್ಯೆ ಆದಂಥ Zariski cancellation problem ಗೆ ಪರಿಹಾರ ಕಂಡುಹಿಡಿದ ಮೊದಲಿಗರಾದರು. ಇವರ ಈ ಅಧ್ಯಯನವು String theory ಯಂಥ ಅನೇಕ ಸೈದ್ಧಾಂತಿಕ ಭೌತ ಪರಿಕಲ್ಪನೆಗಳಿಗೆ ಪುಷ್ಟಿ ನೀಡುವುದಾಗಿದ್ದು ಬಹಳ ಮಹತ್ವವನ್ನು ಪಡೆದಿದೆ.

ಈಗಲೂ ಇವರ ಅಧ್ಯಯನ ಮತ್ತು ಅಧ್ಯಾಪನ ಈ ಕೆಳಗಿನ ಕ್ಷೇತ್ರಗಳಲ್ಲಿ ನಡೆಯುತ್ತಿದೆ.

•  Commutative Algebra
•  Affine Algebraic Geometry

 ಇವರ ಈ ಸಾಧನೆಗಳಿಗಾಗಿ ಅನೇಕ ಪ್ರಶಸ್ತಿಗಳು ಇವರನ್ನು ಅರಸಿಬಂದಿವೆ.

2013 ರಲ್ಲಿ ಸರಸ್ವತಿ ಕೌಶಿಕ್‌ ಮೆಡಲ್ TIFR ( Tata Institute of Fundamental Research) ವತಿಯಿಂದ.

2014 ರಲ್ಲಿ ಯುವ ವಿಜ್ಞಾನಿ ಪುರಸ್ಕಾರ Indian National Science Academy ಯಿಂದ.

2019 ರಲ್ಲಿ ಶಾಂತಿ ಸ್ವರೂಪ ಭಟ್ನಾಗರ್‌ ಪ್ರಶಸ್ತಿ.

2022 ರಲ್ಲಿ ಭಾರತ ಸರ್ಕಾರದಿಂದ ನಾರಿಶಕ್ತಿ ಪುರಸ್ಕಾರ.

2022 ರಲ್ಲಿ ರಾಮಾನುಜನ್‌ ಪುರಸ್ಕಾರ.

ರಾಮಾನುಜನ್‌ ಪ್ರಶಸ್ತಿಯನ್ನು ಪಡೆದ ಮೂರನೆಯ ಭಾರತೀಯರು ಮತ್ತು ಎರಡನೆಯ ಮಹಿಳೆ ಎಂಬ ಹೆಗ್ಗಳಿಕೆಗೆ ಪ್ರೊಫೆಸರ್‌ ನೀನಾಗುಪ್ತ ಪಾತ್ರರಾಗಿದ್ದಾರೆ. ಇನ್ನೊಂದು ವಿಶೇಷವೆಂದರೆ ಈ ಪ್ರಶಸ್ತಿಯನ್ನು 45 ವರ್ಷಕ್ಕಿಂತ ಚಿಕ್ಕಪ್ರಾಯದ ಗಣಿತಜ್ಞರಿಗೆ ಮಾತ್ರ ನೀಡಲಾಗುತ್ತದೆ.

ಇವೇ ಅಲ್ಲದೆ 2022ರಲ್ಲಿ ಇವರನ್ನು International Congress of  Mathematicians (ಅಂತರರಾಷ್ಟ್ರೀಯ ಗಣಿತಶಾಸ್ತ್ರಜ್ಞರ ಸಮ್ಮೇಳನ) ದಲ್ಲಿ ತಮ್ಮ ವಿಚಾರವನ್ನು ಮಂಡಿಸಲು ಆಹ್ವಾನಿಸಲಾಗಿತ್ತು.

  ಇಂಥ ಅಪ್ರತಿಮ ಪ್ರತಿಭೆ ಪ್ರೊಫೆಸರ್ ನೀನಾಗುಪ್ತ ಪ್ರಸ್ತುತ Indian statistical Institute ನಲ್ಲಿ ಗಣಿತ ವಿಭಾಗದ ಪ್ರಾಧ್ಯಾಪಕರಾಗಿದ್ದಾರೆ. ತಮ್ಮ ಸಂಶೋಧನೆಯನ್ನು ಮುಂದುವರೆಸುತ್ತಿದ್ದಾರೆ……ಇಂಥ ಅಪ್ರತಿಮ ಪ್ರತಿಭೆ ನಮ್ಮೆಲ್ಲರಿಗೂ ಸ್ಫೂರ್ತಿ. ಇವರು ಇನ್ನೂ ಹೆಚ್ಚಿನದನ್ನು ಸಾಧಿಸಲಿ ಎಂದು ನಾವೆಲ್ಲರೂ ಆಶಿಸೋಣ……………….

 

ವಿಜ್ಞಾನ ಕ್ಷೇತ್ರಕ್ಕೆ ನಾರಿ ಶಕ್ತಿಯ ದೀವಿಗೆ.

 

ವಿಜ್ಞಾನ ಕ್ಷೇತ್ರಕ್ಕೆ ನಾರಿ ಶಕ್ತಿಯ ದೀವಿಗೆ.

 ಲೇಖಕರು,    ಬಿ.ಎನ್.ರೂಪ,  ಸಹಶಿಕ್ಷಕರು ,

 ಸರ್ಕಾರಿ ಉರ್ದು ಮತ್ತು ಆಂಗ್ಲ ಪ್ರೌಢಶಾಲೆ ಗೋರಿಪಾಳ್ಯ,

                                                                                 ಬೆಂಗಳೂರು ದಕ್ಷಿಣ ತಾಲ್ಲೂಕು-2.                                 

ವಿಜ್ಞಾನದ ವಿವಿಧ  ಕ್ಷೇತ್ರಗಳಲ್ಲಿ ಗಣನೀಯ ಕೊಡುಗೆ ನೀಡಿರುವ ಅನೇಕ ಭಾರತೀಯ ಮಹಿಳಾ ವಿಜ್ಞಾನಿಗಳ ಬಗ್ಗೆ ನಮಗೆ ಮಾಹಿತಿಯೇ ಇಲ್ಲ. ಅಂಥ ಹನ್ನೊಂದು ಮಂದಿ ಮಹಿಳಾ ವಿಜ್ಞಾನಿಗಳ ಹೆಸರಿನಲ್ಲಿ ಈಗ ಕೇಂದ್ರ ಸರ್ಕಾರ ಪೀಠಗಳನ್ನು ಸ್ಥಾಪಿಸಿ ಅವರನ್ನು ಸ್ಮರಿಸುತ್ತಿದೆ. ಈ ಸಂದರ್ಭದಲ್ಲಿ ಈ ಮಹಿಳಾ ವಿಜ್ಞಾನಿಗಳ ಕಿರು ಪರಿಚಯ ಮಾಡಿಕೊಡುತ್ತಿದ್ದಾರೆ, ಶಿಕ್ಷಕಿ ಭಿ.ಎನ್‌ ರೂಪಾ ಅವರು

    ವಿಜ್ಞಾನ ಕ್ಷೇತ್ರದಲ್ಲಿ ಮಹಿಳೆಯರು ಅತ್ಯುನ್ನತ ಸ್ಥಾನಕ್ಕೆ ಏರುವುದು ಸುಲಭದ ಮಾತಲ್ಲ. ಮಹಿಳೆಯಾಗಿ ತನ್ನ ವೈಯುಕ್ತಿಕ ಕರ್ತವ್ಯಗಳ ಜೊತೆಗೆ ಪ್ರಯೋಗಾಲಯಗಳಲ್ಲಿ ಗುದ್ದಾಡುತ್ತಲೇ ಮೆಟ್ಟಲೇರಬೇಕಾದ ಸ್ಥಿತಿ ಈಗಲೂ ಅನೇಕ ಕಡೆ ಇದೆ.  ನಮಗೆ ತಿಳಿದಿರುವ ಹಾಗೆ ಎಲ್ಲಾ ಕ್ಷೇತ್ರಗಳಲ್ಲಿ ಪುರುಷ ಪ್ರಧಾನ ವ್ಯವಸ್ಥೆ ಇರುವುದು ನಿಜ. ಅಲ್ಲಿ ಚಲನಶೀಲತೆ ತುಂಬಲು ಈ ರೀತಿಯ ಬದಲಾವಣೆ ಅಗತ್ಯ. ಸಿ ವಿ ರಾಮನ್, ಮೇಘನಾದ ಸಹಾ ,  ಎ.ಪಿ.ಜೆ ಅಬ್ದುಲ್ ಕಲಾಂ ಅವರಂಥ ಮಹಾನ್ ವಿಜ್ಞಾನಿಗಳ ಅಮೂಲ್ಯ ಕೊಡುಗೆಗಳ ಬಗ್ಗೆ ನಮಗೆ ತಿಳಿದಿದ್ದರೂ, ನಮ್ಮಲ್ಲಿ ಅನೇಕರಿಗೆ ವಿಜ್ಞಾನ ಕ್ಷೇತ್ರದಲ್ಲಿ ಭಾರತೀಯ ಮಹಿಳೆಯರ ಕೊಡುಗೆಗಳ ಬಗ್ಗೆ ಹೆಚ್ಚಿನ ಮಾಹಿತಿ ತಿಳಿದಿಲ್ಲ. ವಿಜ್ಞಾನ ಕ್ಷೇತ್ರದಲ್ಲಿ ಅನೇಕ ಭಾರತೀಯ ಮಹಿಳೆಯರು ಉನ್ನತವಾದ ಕೊಡುಗೆಗಳನ್ನು ನೀಡಿ ವೈಜ್ಞಾನಿಕ ಕ್ಷೇತ್ರಗಳಲ್ಲಿ ಸಂಶೋಧನೆ ನಡೆಸಿ, ಅಭಿವೃದ್ಧಿ ಹೊಂದಲು ಚುಕ್ಕಾಣಿ ಹಿಡಿದು ಮುನ್ನಡೆಸಿರುವ ಬಗ್ಗೆ ನಮ್ಮ ಭಾರತದ ಪ್ರಜೆಗಳೆಲ್ಲರೂ ಹೆಮ್ಮೆ ಪಡಲೇಬೇಕು.

 ಇತ್ತೀಚಿನ ವರ್ಷಗಳಲ್ಲಿ ವಿಜ್ಞಾನ ಕ್ಷೇತ್ರದಲ್ಲಿ ಮಹಿಳೆಯರಿಗೆ ಕೇಂದ್ರ ಸರ್ಕಾರ ಹೆಚ್ಚಿನ ಪ್ರೋತ್ಸಾಹ ನೀಡುತ್ತಿರುವುದು ಗಮನಾರ್ಹ. ಅಂತರಾಷ್ಟ್ರೀಯ ಮಹಿಳಾದಿನ ಹಾಗೂ ರಾಷ್ಟ್ರೀಯ ವಿಜ್ಞಾನ ದಿನದ ಹೊಸ್ತಿಲಿನಲ್ಲಿ ಶ್ರೀ ನರೇಂದ್ರಮೋದಿ ಅವರ ನೇತೃತ್ವದ ಕೇಂದ್ರ ಸರ್ಕಾರವು ನಮ್ಮ ದೇಶಾದ್ಯಂತ ಇರುವ 11 ಪ್ರಮುಖ ವೈಜ್ಞಾನಿಕ ಸಂಸ್ಥೆಗಳಲ್ಲಿ ಭಾರತೀಯ ಮಹಿಳಾ‌ ವಿಜ್ಞಾನಿಗಳ ಹೆಸರಿನ ಪೀಠವನ್ನು ಸ್ಥಾಪಿಸಲು ಮುಂದಾಗಿದೆ. ವಿಜ್ಞಾನ ಕ್ಷೇತ್ರದಲ್ಲಿ ಅದ್ಭುತ ಸಾಧನೆಯನ್ನು ತೋರಿಸಿದಂಥ ಅದ್ವಿತೀಯ ಮಹಿಳೆಯರನ್ನು ಪ್ರೇರೆಪಿಸಲು ಪ್ರೋತ್ಸಾಹಿಸಲು ಸಬಲೀಕರಣಗೊಳಿಸಲು ವಿವಿಧ ಕ್ಷೇತ್ರಗಳಲ್ಲಿ ಸಾಧನೆ ಮಾಡುತ್ತಿರುವ ಮಹಿಳಾ ಸಂಶೋಧಕರಿಗೆ ಸೂಕ್ತ ಮನ್ನಣೆ ನೀಡಲು 11 ಪೀಠಗಳನ್ನು ಸ್ಥಾಪಿಸಲು ಕೇಂದ್ರ ಸರ್ಕಾರ ಸಜ್ಜಾಗಿದೆ. ಮುಂದಿನ ದಿನಗಳಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಮಹಿಳೆಯರು ಮತ್ತು ಯುವತಿಯರು STEM ಕ್ಷೇತ್ರಗಳಲ್ಲಿ ಹೆಚ್ಚಿನ ಸಂಖ್ಯೆಯ ಭಾಗವಹಿಸುವಿಕೆಯನ್ನು ಎದುರು ನೋಡುವಂತೆ ಮಾಡಿದೆ.

ಈ ಹಿನ್ನೆಲೆಯಲ್ಲಿ, ನಮ್ಮ ಭಾರತದ ಕೆಲವು ಹೆಮ್ಮೆಯ  ಮಹಿಳಾ ವಿಜ್ಞಾನಿಗಳ ಯಶೋಗಾಥೆಯನ್ನು ಹಂಚಿಕೊಳ್ಳಲು ನನಗೆ ಹೆಮ್ಮೆಯೆನಿಸುತ್ತಿದೆ. ಈ ನಾರೀಮಣಿಯರ ವಿವರಗಳು ಈ ಕೆಳಗಿನಂತಿದೆ,

 

ಚಿತ್ರಕೃಪೆ  : ವಿಜ್ಞಾನ ಸಚಿವಾಲಯದ ಫೋಟೋಗಳು

1.ಅರ್ಚನಾ ಶರ್ಮಾ (16 ಫೆಬ್ರವರಿ 1932- 14 ಫೆಬ್ರವರಿ 2008 ) - 

ಅರ್ಚನಾ ಶರ್ಮಾ ಅವರು ಬಿಕಾನೆರ್‌ನಲ್ಲಿ ರಸಾಯನ ಶಾಸ್ತ್ರ ಪ್ರಾಧ್ಯಾಪಕರಾಗಿದ್ದ, ಶಿಕ್ಷಣ ತಜ್ಞ ಎನ್.ಪಿ. ಮುಖರ್ಜಿಯವರ ಕುಟುಂಬದಲ್ಲಿ ಜನಿಸಿದರು. ಇವರು ಆರಂಭಿಕ ಶಿಕ್ಷಣವನ್ನು ರಾಜಸ್ಥಾನದಲ್ಲಿ, ನಂತರ ಬಿಎಸ್ಸಿ, ಎಂಎಸ್ಸಿ, ಮಾಡಿದ ನಂತರ 1951 ರಲ್ಲಿ ಕಲ್ಕತ್ತಾ ವಿಶ್ವವಿದ್ಯಾಲಯದಲ್ಲಿ ಸಸ್ಯಶಾಸ್ತ್ರದ ವಿಭಾಗದಲ್ಲಿ ತಮ್ಮ PhD ಪೂರ್ಣಗೊಳಿಸಿದರು. ಜೀವಕೋಶ ತಳಿಶಾಸ್ತ್ರ, ಮಾನವ ತಳಿಶಾಸ್ತ್ರ ಮತ್ತು ಪರಿಸರದಿಂದಾಗುವ ಉತ್ಪರಿವರ್ತನೆಯಲ್ಲಿ ಪರಿಣಿತಿ ಪಡೆದರು. ಕಲ್ಕತ್ತಾ ವಿಶ್ವವಿದ್ಯಾಲಯದಿಂದ ಡಿ.ಎಸ್ಸಿ ಪಡೆದ ಎರಡನೇ ಮಹಿಳೆ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು.

ಸಂತಾನೋತ್ಪತ್ತಿ ಮಾಡುವ ಜಾತಿ ಹಾಗೂ ವಿಧಗಳ ಅಧ್ಯಯನ,  ವಯಸ್ಕ ನ್ಯೂಕ್ಲಿಯಸ್‌ಗಳಲ್ಲಿ ಕೋಶವಿಭಜನೆಯ ಪ್ರಚೋದನೆ, ಸಸ್ಯಗಳಲ್ಲಿನ ವಿಭಿನ್ನ ಅಂಗಾಂಶಗಳಲ್ಲಿ ಪಾಲಿಟೆನಿಕಾರಣ, ಹೂಬಿಡುವ ಸಸ್ಯಗಳ ಕೋಶ ವರ್ಗೀಕರಣ ಮತ್ತು ನೀರಿನಲ್ಲಿ ಆರ್ಸೆನಿಕ್‌ ಅಂಶದ ಪರಿಣಾಮಗಳು, ಇವು ವ್ಯಾಪಕವಾಗಿ ಗುರುತಿಸಲ್ಪಟ್ಟ ಅರ್ಚನಾ ಅವರ ಕೊಡುಗೆಗಳಲ್ಲಿ ಕೆಲವು.

 

2.ಎಡವಲತ್ ಕಕ್ಕಟ್ ಜಾನಕಿ ಅಮ್ಮಾಳ್( 4 ನವೆಂಬರ್ 1897- 7 ಫೆಬ್ರವರಿ 1984)-

ದಿವಾನ್‌ ಬಹದ್ದೂರ್‌ ಎಡವಲತ್‌ ಕಕ್ಕಟ್‌ ಕೃಷ್ಣನ್ ಹಾಗೂ ದೇವಿ ಕುರುವಾಯಿ ಅವರ ಮಗಳಾಗಿ ತಲಶ್ಶೇರಿಯಲ್ಲಿ ಜನಿಸಿದ ಜಾನಕಿ ಅಮ್ಮಾಳ್ ಅವರು ಸಸ್ಯತಳಿ, ಜೀವಕೋಶ ತಳಿಶಾಸ್ತ್ರ ಮತ್ತು ಫೈಟೊ ಜಿಯೋಗ್ರಫಿಯ ಕ್ಷೇತ್ರದಲ್ಲಿ ಕೆಲಸ ಮಾಡಿದ ಸಸ್ಯಶಾಸ್ತ್ರಜ್ಞರಾಗಿದ್ದರು. ಅವರ ಅತ್ಯಂತ ಗಮನಾರ್ಹ ಸಂಶೋಧನೆ ಎಂದರೆ ಕಬ್ಬು ಮತ್ತು ಬಿಳಿ ಬದನೆ ಕುರಿತು ನಡೆಸಿದ ಅಧ್ಯಯನಗಳು.

ಡಾ. ಜಾನಕಿ ಅಮ್ಮಾಳ್ ಭಾರತದ ಮೊದಲ ಮಹಿಳಾ ಸಸ್ಯಶಾಸ್ತ್ರಜ್ಞೆ ಎಂಬ ಹೆಗ್ಗಳಿಕೆಗೆ ಪಾತ್ರರಾದವರು.. 1913 ರಲ್ಲಿ ಅಮೆರಿಕದಲ್ಲಿ ಸಸ್ಯಶಾಸ್ತ್ರದಲ್ಲಿ ಡಾಕ್ಟರೇಟ್ ಪದವಿಯನ್ನು ಪಡೆದ ಮೊದಲ ಭಾರತೀಯ ಮಹಿಳೆ. ರಾಷ್ಟ್ರೀಯ ಹಾಗೂ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಮಹಿಳೆಯರಲ್ಲಿ ಸಾಕ್ಷರತೆಯು ಶೇಕಡಾ ಒಂದಕ್ಕಿಂತ ಕಡಿಮೆ ಇದ್ದ ಸಂದರ್ಭದಲ್ಲಿ ಮೇರು ಸಾಧನೆಯನ್ನು ಮಾಡಿದಂತಹ ಮಹಿಳೆ ಇವರು. 1924ರಲ್ಲಿ ಅಮೆರಿಕದಲ್ಲಿ ಮಿಚಿಗನ್ ವಿಶ್ವವಿದ್ಯಾಲಯದಲ್ಲಿ ಸಸ್ಯ ಜೀವವಿಜ್ಞಾನದ ಬಗ್ಗೆ ಸಂಶೋಧನೆ ನಡೆಸಿದರು.

ಅವರು ಭಾರತದ ಹವಾಮಾನಕ್ಕೆ ಸೂಕ್ತವಾದ ಕಬ್ಬಿನ ಬೆಳೆಗಳನ್ನು ಅಭಿವೃದ್ಧಿ ಪಡಿಸಲು ತಮ್ಮ ಪರಿಣತಿಯನ್ನು ಬಳಸಿದರು. ಜಾನ್ ಇನ್ಸ್ಸ್ಟಿಟ್ಯೂಟ್ನಲ್ಲಿ ಕೆಲಸ ಮಾಡಲು ಇಂಗ್ಲೆಂಡ್ ಗೆ  ತೆರಳಿದಾಗ ಅಲ್ಲಿ ಅವರು ಕ್ರೋಮೋಸೋಮ್ ಅಟ್ಲಾಸ್ ಆಫ್‌ ಕಲ್ಟಿವೇಟೆಡ್‌ ಪ್ಲಾಂಟ್ಸ್‌ ಎಂಬ ಪುಸ್ತಕದ ಸಹ ಲೇಖಕರಾಗಿದ್ದರು.

ರಾಯಲ್‌ ಹಾರ್ಟಿಕಲ್ಚರಲ್ ಸೊಸೈಟಿಯಲ್ಲಿ, ಕೊಲ್ಚಿಸಿನ್ ಎಂಬ ರಾಸಾಯನಿಕ ಬಳಸಿಕೊಂಡು ಸಸ್ಯಗಳನ್ನು ಹೇಗೆ ವೇಗವಾಗಿ ಬೆಳೆಯುವುದು ಎಂಬ ಬಗ್ಗೆ ಇವರು ಅಧ್ಯಯನ ಮಾಡಿದರು. ಇವರ ಕೊಡುಗೆಗಳನ್ನು ಸ್ಮರಿಸಿ, ಮ್ಯಾಗ್ನೋಲಿಯಾ ಸಸ್ಯದ ಒಂದು ಪ್ರಭೇದ ಮತ್ತು ಹೈಬ್ರಿಡ್‌ ಗುಲಾಬಿಯ ಸಸ್ಯ ಪ್ರಭೇದವೊಂದಕ್ಕೆ  ಇವರ ಹೆಸರನ್ನು ಇಡಲಾಗಿದೆ. ದೇಶದಲ್ಲಿ ಬರಗಾಲದ ಸರಣಿಯ ನಂತರ, ಆಹಾರ ಉತ್ಪಾದನೆಯನ್ನು ಹೆಚ್ಚಿಸಲು ಸಹಾಯ ಮಾಡಲು ತಮ್ಮ ಜ್ಞಾನವನ್ನು ಒದಗಿಸುವಂತೆ ಪ್ರಧಾನಮಂತ್ರಿ ಮಾಡಿದ ಕೋರಿಕೆಯ ಮೇರೆಗೆ ಅವರು ಭಾರತಕ್ಕೆ ಮರಳಿದರು.  ಹೆಚ್ಚು ಆಹಾರವನ್ನು ಬೆಳೆಯುವ ಪ್ರಯತ್ನದಲ್ಲಿ ದೇಶದಲ್ಲಿ ನಡೆಯುತ್ತಿರುವ ಅರಣ್ಯ ನಾಶವನ್ನು ಅವರು ವಿರೋಧಿಸಿದರು. ಅವರು ಸ್ಥಳೀಯ ಸಸ್ಯಗಳ ಸಂರಕ್ಷಣೆಗಾಗಿ ವಕೀಲರಾದರು ಮತ್ತು ಜಲ ವಿದ್ಯುತ್‌ ಯೋಜನೆಯಿಂದ ಸೈಲೆಂಟ್‌ ವ್ಯಾಲಿಯನ್ನು ಉಳಿಸುವಲ್ಲಿ ಯಶಸ್ವಿಯಾದರು. ಉಳಿಸಿದರು. ಇದು ಈಗ ಒಂದು ಪ್ರಮುಖ ರಾಷ್ಟ್ರೀಯ ಉದ್ಯಾನವನವಾಗಿದೆ.

3. ದರ್ಶನ್‌ ರಂಗನಾಥನ್ (4 ಜೂನ್ 1941 - 4 ಜೂನ್ 2001) -

ದರ್ಶನ್‌ ರಂಗನಾಥನ್ ಅವರು ದೆಹಲಿಯಲ್ಲಿ ವಿದ್ಯಾವತಿ ಮಾರ್ಕನ್ ಮತ್ತು ಶಾಂತಿಸ್ವರೂಪ್ ದಂಪತಿಗಳಿಗೆ ಜನಿಸಿದರು.  ದೆಹಲಿಯಲ್ಲಿ ಅವರ ವಿದ್ಯಾಭ್ಯಾಸದ ನಂತರ ಪಿ.ಎಚ್ಡಿ ಪದವಿಯನ್ನು ದೆಹಲಿ ವಿವಿಯಲ್ಲಿ‌ ಪಡೆದರು. 1967 ರಲ್ಲಿ ದೆಹಲಿ ವಿಶ್ವವಿದ್ಯಾನಿಲಯದಲ್ಲಿ ರಸಾಯನಶಾಸ್ತ್ರದಲ್ಲಿ ಮೊದಲ ಉಪನ್ಯಾಸಕರಾಗಿ ನೇಮಕಗೊಂಡರು. ಅವರು ದೆಹಲಿಯ ಮಿರಾಂಡಾ ಕಾಲೇಜಿನಲ್ಲಿ ರಸಾಯನ ಶಾಸ್ತ್ರ ವಿಭಾಗದ ಮುಖ್ಯಸ್ಥರಾಗಿ ಸೇವೆ ಸಲ್ಲಿಸಿದರು. ರಾಯಲ್ ಸೊಸೈಟಿಯಿಂದ  ಸಂಶೋಧನಾ ಫೆಲೋಶಿಪ್ಅನ್ನು ಪಡೆದರು. ಇವರು ಸಾವಯವ ರಸಾಯನಶಾಸ್ತ್ರಜ್ಞರಾಗಿದ್ದು, "ಪ್ರೋಟೀನ್‌ ಫೋಲ್ಡಿಂಗ್ನಲ್ಲಿನ ಪ್ರವರ್ತಕ ಕೆಲಸ" ಸೇರಿದಂತೆ  ಜೈವಿಕ-ಸಾವಯವ ರಸಾಯನ ಶಾಸ್ತ್ರದಲ್ಲಿ ಅವರ ಸಂಶೋಧನೆಗೆ ಹೆಸರು ಪಡೆದರು.   

ದರ್ಶನ್‌ ರಂಗನಾಥನ್‌ ಪ್ರಯೋಗಾಲಯದಲ್ಲಿ ನೈಸರ್ಗಿಕವಾಗಿ ಸಂಭವಿಸುವ ಜೈವಿಕ ಪ್ರತಿಕ್ರಿಯೆಗಳನ್ನು ಮರುಸೃಷ್ಟಿಸುವಲ್ಲಿ ಪರಿಣಿತಿ ಹೊಂದಿದ್ದರು. ರಸಾಯನಶಾಸ್ತ್ರದಲ್ಲಿ ಮುಖ್ಯವಾದ ರಚನಾತ್ಮಕ ಪ್ರೋಟೀನ್ ಗಳು ಮತ್ತು ಇತರ ನ್ಯಾನೊ ರಚನೆಗಳನ್ನು ವಿನ್ಯಾಸಗೊಳಿಸುವಲ್ಲಿ ವಿಶೇಷ ಪರಿಣಿತಿ ಹೊಂದಿದ್ದರು.

 

 

4.ಅಸೀಮಾ ಚಟರ್ಜಿ (23ಸೆಪ್ಟೆಂಬರ್1917-22ನವೆಂಬರ್2006) –

ಅಸೀಮಾ ಚಟರ್ಜಿಯವರು ಪಶ್ಚಿಮ ಬಂಗಾಳದಲ್ಲಿ ಜನಿಸಿದರು. ಕೊಲ್ಕತ್ತಾದಲ್ಲಿ ಬೆಳೆದ ಇವರು ಬಹಳ ಬುದ್ಧಿವಂತ ವಿದ್ಯಾರ್ಥಿನಿಯಾಗಿದ್ದರು. ಶಾಲೆಯನ್ನು ಮುಗಿಸಿ, ಕೊಲ್ಕತ್ತಾ ವಿಶ್ವವಿದ್ಯಾಲಯದ ಸ್ಕಾಟಿಶ್‌ ಚರ್ಚ್‌ ಕಾಲೇಜಿನಲ್ಲಿ ರಸಾಯನಶಾಸ್ತ್ರ  ವಿಷಯದಲ್ಲಿ ಆನರ್ಸ ಪದವಿ ಪಡೆದರು.

ಅಸಿಮಾ ಚಟರ್ಜಿ ಒಬ್ಬ ಸಾವಯವ ರಸಾಯನ ಶಾಸ್ತ್ರಜ್ಞರಾಗಿದ್ದು,  ಫೈಟೋಮೆಡಿಸಿನ್ ಕ್ಷೇತ್ರದಲ್ಲಿ ಅಪಾರ ಕೊಡುಗೆ ನೀಡಿದ್ದಾರೆ. ಮಲೇರಿಯಾವಿರೋಧಿ ಕಿಮೊಥೆರಪಿ ಮತ್ತು ಆಂಟಿ-ಎಪಿಲೆಪ್ಸಿ ಔಷಧಿಗಳ ಅಭಿವೃದ್ಧಿಯಲ್ಲಿನ ಇವರ ಕೊಡುಗೆಗಳಿಂದ  ಖ್ಯಾತಿಯನ್ನು ಹೊಂದಿದ್ದಾರೆ. ಇವರು ಭಾರತೀಯ ಉಪಖಂಡದಲ್ಲಿ ಕಂಡುಬರುವ ಔಷಧೀಯ ಸಸ್ಯಗಳ ಮೇಲೆ ವ್ಯಾಪಕವಾದ ಸಂಶೋಧನೆ ನಡೆಸಿದರು.  ಜೀವಕೋಶಗಳ ಬೆಳವಣಿಗೆಯನ್ನು  ತಡೆಯಲು ಕೀಮೋಥೆರಪಿಯಲ್ಲಿ ಬಳಸಲಾಗುವ ಆಲ್ಕಲಾಯಿಡ್ ಗಳ ಮೇಲೆ ಅವರು ಸುಮಾರು ಅರ್ಧ ಶತಮಾನದವರೆಗೆ ಕೆಲಸ ಮಾಡಿದರು.

 

  5. ಇರಾವತಿ ಕರ್ವೆ (15 ಡಿಸೆಂಬರ್ 1905- 11 ಆಗಸ್ಟ್ 1970 )-

ಇರಾವತಿ ಅವರು ಈಗಿನ ಮಯನ್ಮಾರ್ (ಆಗಿನ ಬರ್ಮ) ದೇಶದಲ್ಲಿ ಶ್ರೀಮಂತ ಚಿತ್ಪಾವನಾ ಬ್ರಾಹ್ಮಣ ಕುಟುಂಬದಲ್ಲಿ ಜನಿಸಿದರು. ಅವರ ತಂದೆ ಗಣೇಶ ಹರಿಕರ್ಮಾರ್ಕರ್‌ರವರು ಹತ್ತಿ ಕಂಪೆನಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದರು. ಇರಾವತಿಯವರು ಪುಣೆಯಲ್ಲಿ ವಸತಿ ಶಾಲೆಯಲ್ಲಿ ಪ್ರಾಥಮಿಕ ವಿದ್ಯಾಭ್ಯಾಸ ಮಾಡಿ, ನಂತರ ಖ್ಯಾತ ಫರ್ಗುಸನ್‌ ಕಾಲೇಜಿನಲ್ಲಿ ತತ್ವಶಾಸ್ತ್ರ ಕಲಿತರು.

ಇರಾವತಿ ಕರ್ವೆ ಒಬ್ಬ ಪ್ರಸಿದ್ಧ ಶಿಕ್ಷಣ ತಜ್ಞೆ, ಲೇಖಕಿ ಮತ್ತು ಮಾನವಶಾಸ್ತ್ರಜ್ಞೆ. ಭಾರತದಲ್ಲಿ ಆಗಿನ್ನೂ ಮಾನವಶಾಸ್ತ್ರ ಎಂಬ ವಿಷಯವು ಶೈಶವಾವಸ್ಥೆಯಲ್ಲಿದ್ದಾಗ ಅದರಲ್ಲಿ ಸಾಧನೆ ಮಾಡಿದ ಪ್ರಥಮ ಭಾರತೀಯ ಮಹಿಳೆ.

ಇವರು ಭಾರತದ ಮೊದಲ ಮಾನವಶಾಸ್ತ್ರಜ್ಞರಾಗಿದ್ದು, ಸಮಾಜಶಾಸ್ತ್ರವನ್ನೂ ಸಹ ಅಭ್ಯಸಿಸುತ್ತಿದ್ದರು. ವಪಳೆಯುಳಿಕೆಶಾಸ್ತ್ರ ಮಾನವ ಮಾಪನ, ಮತ್ತು ಸೀರಂ ಶಾಸ್ತ್ರ ಆಕೆಯ ಪರಿಣತಿಯಕ್ಷೇತ್ರ. ಇವರು ಮಹಿಳಾ ಶಿಕ್ಷಣದ ಪ್ರವರ್ತಕರಾಗಿದ್ದರು.

 

6.ಕದಂಬಿನಿ ಗಂಗೂಲಿ(18  ಜುಲೈ 1861 -   3 ಅಕ್ಟೋಬರ್ 1923 )-

ಬ್ರಹ್ಮಸಮಾಜದ ಸುಧಾರಕರಾದ ಬ್ರಜ ಕಿಶೋರ್‌ ಬಸು ಅವರ ಮಗಳಾಗಿ ಭಾಗಲ್ಪುರಾ, ಬಿಹಾರಿನಲ್ಲಿ ಕದಂಬಿನಿ  ಜನಿಸಿದರು. ಅವರ ಕುಟುಂಬ ಮೂಲತಃ ಈಗ ಬಾಂಗ್ಲಾದೇಶದಲ್ಲಿರುವ ಬಾರಿಸಲ್‌ ಪ್ರದೇಶದ ಚಾಂದ್ಸಿ ಎಂಬ ಊರಾಗಿತ್ತು.

ಕದಂಬಿನಿ ಗಂಗೂಲಿ ಮತ್ತು ಚಂದ್ರಮುಖಿ ಬಸು ಆಗಿನ ಭಾರತದ ಹಾಗು ಬ್ರಿಟಿಷ್‌ ಸಾಮ್ರಾಜ್ಯದಲ್ಲಿದ್ದ ಇಬ್ಬರೇ ಮಹಿಳಾ ಪದವಿಧರರು. ಕದಂಬಿನಿ ಗಂಗೂಲಿ ದಕ್ಷಿಣ ಏಷ್ಯಾದಲ್ಲಿ ಪಾಶ್ಚಾತ್ಯ ಮದ್ದಿನ ತರಬೇತಿ ಪಡೆದುಕೊಂಡ ಮೊದಲನೇ ಮಹಿಳಾ ವೈದ್ಯೆ . ಆನಂದಿ ಗೋಪಾಲ್ ಜೋಶಿ, ಇನ್ನೋರ್ವ ಭಾರತೀಯ ಮಹಿಳೆ. ಅದೇ ಸಮಯದಲ್ಲಿ (೧೮೮೬) ಅಮೆರಿಕಾದಲ್ಲಿ ವೈದ್ಯರಾಗಿ ಉತ್ತೀರ್ಣಗೊಂಡರು. ಇವರು ಆಧುನಿಕ ವೈದ್ಯಕೀಯ ಪದ್ಧತಿಯಲ್ಲಿ ಸೇವೆ ಸಲ್ಲಿಸುತ್ತಿದ್ದರು.

ಗಂಗೂಲಿಯವರು ಅನೇಕ ಬಗೆಯ ಪೂರ್ವಾಗ್ರಹ ಪೀಡಿತ ಮನಸ್ಥಿತಿ ಹಾಗೂ ತಾರತಮ್ಯತೆ ವಿರುದ್ಧವೂ ಹೋರಾಡಿದವರು. ಇವರು ವೈಯಕ್ತಿಕವಾಗಿ ಸ್ವತಂತ್ರವಾಗಿ ವೈದ್ಯಕೀಯ ಅಭ್ಯಾಸವನ್ನು ಮಾಡುತ್ತಿದ್ದರಲ್ಲದೆ ರಾಜಕೀಯ ವಲಯದಲ್ಲೂ ಸಕ್ರಿಯವಾಗಿ ತಮ್ಮನ್ನು ತೊಡಗಿಸಿಕೊಂಡಿದ್ದರು.

ಭಾರತ ದೇಶದ ಸ್ವಾತಂತ್ರ ಹೋರಾಟಗಾರ್ತಿಯಾಗಿ, ಉಪ್ಪಿನಸತ್ಯಾಗ್ರಹವನ್ನು, ಬ್ರಿಟಿಷ್ಆಳ್ವಿಕೆಯ ವಿರುದ್ಧವಾಗಿ ಸಭೆಗಳನ್ನು ಆಯೋಜಿಸಿದರು. 1906ರಲ್ಲಿ ಬಂಗಾಳದ ವಿಭಜನೆಯಾದ ನಂತರ ಕಲ್ಲಿದ್ದಲಿನ ಗಣಿಗಾರಿಕೆಯಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ಮಹಿಳಾ ಕಾರ್ಮಿಕರ ಸ್ಥಿತಿಯನ್ನು ಉತ್ತಮ ಪಡಿಸಲು ಹಗಲಿರುಳೆನ್ನದೆ ಶ್ರಮಿಸಿದರು.

 

7.ಅನ್ನಾಮಣಿ (23 ಆಗಸ್ಟ್ 1918  -16 ಆಗಸ್ಟ್ 2001)-

ಅನ್ನಾಮಣಿಯವರು ಕೇರಳ ಪೀರುಮೆಡು ಎಂಬಲ್ಲಿ ಜನಿಸಿದರು. ಇವರ ತಂದೆ ಸಿವಿಲ್ಇಂಜಿನೀಯರ್. ಒಟ್ಟು ಎಂಟು ಜನ ಮಕ್ಕಳಲ್ಲಿ ಅನ್ನಾಮಣಿಯವರು ಏಳನೇಯವರು. ಚಿಕ್ಕಂದಿನಿಂದಲೂ ಅವರು ತೀವ್ರ ತರದ ಓದುಗರಾಗಿದ್ದರು.

ಅನ್ನಾಮಣಿ ಒಬ್ಬ ಭಾರತೀಯ ಮಹಿಳಾ ಭೌತವಿಜ್ಞಾನಿ ಹಾಗು ಪವನಶಾಸ್ತ್ರ ವಿಜ್ಞಾನಿ.  ಇವರು ಭಾರತೀಯ ಪವನವಿಜ್ಞಾನ ಕ್ಷೇತ್ರದ ಸಂಶೋಧನೆಯಲ್ಲಿ ಮಹತ್ವದ ಕಾಣಿಕೆಯನ್ನು ಸಲ್ಲಿಸಿದ್ದಾರೆ.

ಪುಣೆಯಲ್ಲಿ ತಮ್ಮ ಸಂಶೋಧನೆ ಕೈಗೊಂಡ ಅನ್ನಾಮಣಿ. ಹವಾಮಾನ ಉಪಕರಣಗಳ ಕುರಿತು ಹಲವಾರು ಸಂಶೋಧನಾ ಪ್ರಬಂಧಗಳನ್ನು ಬರೆದಿದ್ದಾರೆ. ತರಬೇತಿಯ ಮೂಲಕ ಭೌತಶಾಸ್ತ್ರಜ್ಞರಾಗಿದ್ದರು. ಹವಾಮಾನಶಾಸ್ತ್ರದಲ್ಲಿ ಪರಿಣತಿಯನ್ನು ಪಡೆದರು ಮತ್ತು ಭಾರತೀಯ ಹವಾಮಾನ ಮೇಲ್ವಿಚಾರಣಾ ವ್ಯವಸ್ಥೆಗಳಲ್ಲಿ ಅದ್ಭುತ ಬದಲಾವಣೆಗಳನ್ನು ಮಾಡಿದರು.

ಸೌರ ವಿಕಿರಣವನ್ನು ಪ್ರಮಾಣೀಕರಿಸಿದ ರೇಖಾಚಿತ್ರಗಳನ್ನು ಅಳೆಯಲು ಇವರು ಕೇಂದ್ರಗಳ ಜಾಲವನ್ನು ಸ್ಥಾಪಿಸಿದರು. ಗಾಳಿಯ ವೇಗ ಮತ್ತು ಸೌರಶಕ್ತಿಯನ್ನು ಅಳೆಯುವ ಉಪಕರಣಗಳನ್ನು ತಯಾರಿಸಲು ಕಾರ್ಯಾಗಾರಗಳನ್ನು ಹಮ್ಮಿಕೊಂಡರು ಮತ್ತು ಓಝೋನ ಪದರವನ್ನು ಅಳೆಯಲು ಉಪಕರಣವನ್ನುಅಭಿವೃದ್ಧಿಪಡಿಸಿದರು.

 

8.ರಾಜೇಶ್ವರಿ ಚಟರ್ಜಿ (24 ಜನವರಿ 1922 -  3  ಸೆಪ್ಟೆಂಬರ್  2010)-

ರಾಜೇಶ್ವರಿಯವರು  ಮೈಸೂರಿನ ಹತ್ತಿರದ ನಂಜನಗೂಡಿನಲ್ಲಿ. ಅವರ ತಂದೆ ಬಿ ಎಂ ಶಿವರಾಮಯ್ಯ, ನಂಜನಗೂಡಿನಲ್ಲಿ ವಕೀಲರಾಗಿ ಕೆಲಸ ಮಾಡುತ್ತಿದ್ದರು.

ರಾಜೇಶ್ವರಿ ಒಬ್ಬ ಕನ್ನಡತಿ ವಿಜ್ಞಾನಿ ಮತ್ತು ಶಿಕ್ಷಣತಜ್ಞೆ. ಇವರು ಕರ್ನಾಟಕದ ಮೊತ್ತ ಮೊದಲ ಮಹಿಳಾ ಎಂಜಿನಿಯರ್, ಮಾತ್ರವಲ್ಲ ಭಾರತೀಯ ವಿಜ್ಞಾನಮಂದಿರದ ಇಂಜಿನೀಯರಿಂಗ್‌ ವಿಭಾಗಕ್ಕೆ ನೇಮಕವಾದ ಮೊತ್ತ ಮೊದಲ ಮಹಿಳಾ ಉದ್ಯೋಗಿಯಾಗಿದ್ದರು. ಭಾರತೀಯ ವಿಜ್ಞಾನಸಂಸ್ಥೆಯಲ್ಲಿ ಪ್ರಾಧ್ಯಾಪಕರಾಗಿ ಕೆಲಸ ಮಾಡಿದರು. ಇವರು ಎಲೆಕ್ಟ್ರಿಕಲ್‌ ಕಮ್ಯುನಿಕೇಷನ್ ಎಂಜಿನಿಯರಿಂಗ್‌ ವಿಭಾಗದ ಮುಖ್ಯಸ್ಥರಾಗಿದ್ದರು. ಅವರ ಜೀವಿತಾವಧಿಯಲ್ಲಿ ಇವರು 20 ಪಿಎಚ್ಡಿ ವಿದ್ಯಾರ್ಥಿಗಳಿಗೆ ಮಾರ್ಗದರ್ಶನ ಮಾಡಿದ್ದಾರೆ. ಸುಮಾರು ನೂರಕ್ಕೂ ಸಂಶೋಧನಾ ಪತ್ರಿಕೆಗಳನ್ನು ಹಾಗೂ ಏಳು ಪುಸ್ತಕಗಳನ್ನು ಬರೆದಿದ್ದಾರೆ.

ರಾಜೇಶ್ವರಿ ಚಟರ್ಜಿಯವರು ತಮ್ಮ ಜೀವನವನ್ನು ವಿಜ್ಞಾನಕ್ಕೆಮುಡಿಪಾಗಿಟ್ಟಿದ್ದರು. 

9.ರಾಮನ ಪರಿಮಳಾ (ಜನನ 21 ನವೆಂಬರ್ 1948)

ಇವರು ಭಾರತದ ತಮಿಳುನಾಡಿನಲ್ಲಿ ಹುಟ್ಟಿ ಬೆಳೆದರು. ಶಾರದಾ ವಿದ್ಯಾಲಯ ಬಾಲಕಿಯರ ಪ್ರೌಢಶಾಲೆ ಮತ್ತು ಚೆನ್ನೈನ ಸ್ಟೆಲ್ಲಾ ಮಾರಿಸ್‌ ಕಾಲೇಜಿನಲ್ಲಿ ಓದಿದರು. ತಮ್ಮ ಎಂ.ಎಸ್ಸಿ. ಮದ್ರಾಸ್‌ ವಿಶ್ವವಿದ್ಯಾಲಯದಿಂದ (1970) ಮತ್ತು PhD ಮುಂಬೈ ವಿಶ್ವವಿದ್ಯಾಲಯದಿಂದ (1976)ಪದವಿಯನ್ನು ಪಡೆದಿದ್ದಾರೆ.

ರಾಮನ್‌ ಪರಿಮಳ ಈ ಪಟ್ಟಿಯಲ್ಲಿರುವ ಏಕೈಕ ಗಣಿತಶಾಸ್ತ್ರಜ್ಞೆ .ಬೀಜಗಣಿತಕ್ಕೆ ನೀಡಿದ ಕೊಡುಗೆಗಳಿಂದ ಹೆಸರುವಾಸಿಯಾಗಿದ್ದಾರೆ. ಈ ಕ್ಷೇತ್ರದಲ್ಲಿ ಪರಿಣತರನ್ನು ಅಚ್ಚರಿಗೊಳಿಸುವ ಚಲನೆಯಲ್ಲಿ ಅಫೈನ್‌ ಪ್ಲೇನ್‌ನಲ್ಲಿ ಉದಾಹರಣೆಯನ್ನು ಅವರು ಪ್ರದರ್ಶಿಸಿದ್ದಾರೆ. ಅವರು ಸಂಖ್ಯಾ ಸಿದ್ಧಾಂತ, ಬೀಜಗಣಿತ, ರೇಖಾಗಣಿತ ಮತ್ತು ಸ್ಥಳಶಾಸ್ತ್ರವನ್ನು ಬಳಸುವುದರಲ್ಲಿ ಅಪಾರ ಪರಿಣತಿ ಹೊಂದಿದ್ದಾರೆ.

ರಾಮನ್‌ ಪರಿಮಳ ಇವರು ಬೀಜಗಣಿತಕ್ಕೆ ನೀಡಿದ ಕೊಡುಗೆಗಳಿಗೆ ಹೆಸರುವಾಸಿ ಇವರು ಎಮೋರಿ ವಿಶ್ವವಿದ್ಯಾನಿಲಯದಲ್ಲಿ ಕಲೆ ಮತ್ತು ವಿಜ್ಞಾನದ ಗಣಿತಶಾಸ್ತ್ರದ ವಿಶೇಷ ಪ್ರಾಧ್ಯಾಪಕರಾಗಿದ್ದಾರೆ. ಹಲವು ವರ್ಷಗಳ ಕಾಲ, ಅವರು ಮುಂಬೈನ ಟಾಟಾ ಇನ್ಸ್ಟಿಟ್ಯೂಟ್ ಆಫ್‌ ಫಂಡಮೆಂಟಲ್‌ ರೀಸರ್ಚ್‌  (ಟಿಐಎಫ್ಆರ್) ಸಂಸ್ಥೆಯಲ್ಲಿ ಪ್ರಾಧ್ಯಾಪಕರಾಗಿದ್ದರು. ಇವರು 2019 ರಿಂದಇನ್ಫೋಸಿಸ್‌ ಫೌಂಡೇಷನ್‌ನ ಪ್ರಶಸ್ತಿಗಾಗಿ ಗಣಿತವಿಜ್ಞಾನದ ತೀರ್ಪುಗಾರರಾಗಿದ್ದಾರೆ ಮತ್ತು  2021-2022 ರ ಅಬೆಲ್‌ ಪ್ರಶಸ್ತಿಯ ಆಯ್ಕೆ ಸಮಿತಿಯಲ್ಲಿದ್ದಾರೆ.

 

10.ಬಿಭಾ ಚೌಧುರಿ (3 ಜುಲೈ 1913 - 2 ಜೂನ್ 1991)-

ಬಿಭಾ ಚೌಧುರಿ ಇವರು ಜನಿಸಿದ್ದು ಕೋಲ್ಕತ್ತಾದಲ್ಲಿ.  ಅವರ ತಂದೆ ಬಂಕು ಬಿಹಾರಿ ಚೌಧುರಿ ವೈದ್ಯರಾಗಿದ್ದರು. ಕಣ ಭೌತಶಾಸ್ತ್ರ ಹಾಗೂ ಕಾಸ್ಮಿಕ್‌ ಕಿರಣಗಳ ಮೇಲಿನ ಇವರ ಸಂಶೋಧನೆಗಳಿಗಾಗಿ ಇವರು ಹೆಸರುವಾಸಿಯಾಗಿದ್ದಾರೆ.

ತಮ್ಮ ಪ್ರಯೋಗಗಳಿಂದ ಪೈ-ಮೆಸಾನ್ ಎಂಬ ಹೊಸ ಉಪಪರಮಾಣು ಕಣದ ಆವಿಷ್ಕಾರಕ್ಕೆ ನಾಂದಿ ಹಾಡಿದ್ದಾರೆ. ಅವರು ಭೌತಶಾಸ್ತ್ರಜ್ಞ ದೆಬೇಂದ್ರ ಬೋಸ್ ಅವರ ಅಡಿಯಲ್ಲಿ ಕೆಲಸ ಮಾಡಿದರು. ಕಾಸ್ಮಿಕ್‌ ಕಿರಣಗಳ ಮೇಲೆ ಕಾರ್ಯನಿರ್ವಹಿಸಿದ, ನೋಬಲ್‌ ಪ್ರಶಸ್ತಿ ವಿಜೇತ ಪ್ಯಾಟ್ರಿಕ್‌ ಬ್ಲಾಕೆಟ್ ಅವರೊಂದಿಗೆ ಕೂಡ ಕೆಲಸಮಾಡಿದರು. ಭಾರತಕ್ಕೆ ಬಂದ ನಂತರ ಅವರು ಪರಮಾಣು ಭೌತಶಾಸ್ತ್ರ ಕ್ಷೇತ್ರದಲ್ಲಿ ಕೆಲಸ ಮಾಡಿದರು. ಹಳದಿ, ಬಿಳಿ ಕುಬ್ಜ ಆಕಾಶಕಾಯ HD 86081 ಗೆ ಇವರ ಕೊಡುಗೆಯ ಗೌರವಾರ್ಥವಾಗಿ ಬಿಭಾ ಎಂದು ಮರು ನಾಮಕರಣ ಮಾಡಲಾಗಿದೆ.

 11. ಕಮಲ ರಣದಿವ್ ( 8 ನವೆಂಬರ್ 1917-2001 )

ಕಮಲ್ ಅವರು ಪುಣೆಯಲ್ಲಿ ಜನಿಸಿದರು. ತಂದೆ ದಿನಕರ ದತ್ತಾತ್ರೇಯ ಸಮರ್ಥಂ ಮತ್ತು ತಾಯಿ ಶಾಂತಾಬಾಯಿ. ತಂದೆ ಫ಼ರ್ಗೂಸನ್‌ ಕಾಲೇಜಿನಲ್ಲಿ ಜೀವಶಾಸ್ತ್ರಜ್ಞರಾಗಿದ್ದರು. ಇವರು ಜೀವವೈದ್ಯಕೀಯ ಸಂಶೋಧಕರು, ಕ್ಯಾನ್ಸರ್‌ ಮತ್ತು ವೈರಸ್‌ಗಳ ನಡುವಿನ ಸಂಬಂಧದ ಸಂಶೋಧನೆಗೆ ಹೆಸರುವಾಸಿಯಾಗಿದ್ದಾರೆ. ಇವರು ಅಮೆರಿಕಾದ ಜಾನ್‌ ಹಾಪ್ಕಿನ್‌ ವಿಶ್ವವಿದ್ಯಾಲಯದಲ್ಲಿ ಅಂಗಾಂಶ ಕೃಷಿ ತಂತ್ರಜ್ಞಾನ ಅಭಿವೃದ್ಧಿಯ ಕ್ಷೇತ್ರದಲ್ಲಿ ಕೆಲಸ ಮಾಡಿದರು.

ಮುಂಬೈನಲ್ಲಿ ಜೀವಶಾಸ್ತ್ರದ ಪ್ರಾಯೋಗಿಕ ಪ್ರಯೋಗಾಲಯ ಮತ್ತು ಅಂಗಾಂಶಕೃಷಿ ಪ್ರಯೋಗಾಲಯವನ್ನು ಸ್ಥಾಪಿಸಲು ಅವರು ಭಾರತಕ್ಕೆ ಮರಳಿದರು. ಇವರು ಭಾರತೀಯ ಕ್ಯಾನ್ಸರ್‌ ಸಂಶೋಧನಾ ಕೇಂದ್ರದ ನಿರ್ದೇಶಕರಾಗಿಯೂ ಸೇವೆ ಸಲ್ಲಿಸಿದರು.

ಇವರು ಕ್ಯಾನ್ಸರ್‌ ಮತ್ತು ತಳಿಶಾಸ್ತ್ರದ ನಡುವಿನ ಸಂಬಂಧವನ್ನು ಕಂಡುಹಿಡಿಯಲು ಪ್ರಯೋಗಗಳನ್ನು ನಡೆಸಿದರು. ಇವರ ಕೆಲಸವು ಲ್ಯುಕೇಮಿಯಾ, ಸ್ತನ ಕ್ಯಾನ್ಸರ್‌ ಮತ್ತು ಅನ್ನನಾಳದ ಕ್ಯಾನ್ಸರ್‌ ನಂಥ ರೋಗಗಳ ಕಾರಣಕ್ಕೆ ನಾಂದಿ ಹಾಡಿತು. ಅವರು ಭಾರತೀಯ ಮಹಿಳಾ ವಿಜ್ಞಾನ ಸಂಘದ ಸ್ಥಾಪಕ ಸದಸ್ಯೆಯಾಗಿದ್ದರು. ೧೯೬೦ರಲ್ಲಿ ಭಾರತದ ಮೊದಲ ಅಂಗಾಂಶ ಕೃಷಿ ಪ್ರಯೋಗಾಲಯವನ್ನು ಭಾರತೀಯ ಕ್ಯಾನ್ಸರ ಸಂಶೋಧನಾ ಕೇಂದ್ರದಲ್ಲಿ(ಐ.ಸಿ.ಆರ್.ಸಿ) ಸ್ಥಾಪಿಸಿದರು.

 ‘ಹಿತ್ತಲಗಿಡಮದ್ದಲ್ಲ’ ಎನ್ನುವ ನಾಣ್ಣುಡಿಯಂತೆ ನಮ್ಮ ಭಾರತ ದೇಶದಲ್ಲಿ ಜನಿಸಿ, ಅತ್ಯುನ್ನತ ಸಾಧನೆಯನ್ನು ತೋರಿದಂಥ ಮಹಿಳಾಮಣಿಯರನ್ನು ಬಹುತೇಕ ಮರೆತಂತೆ ಆಗಿತ್ತು. ಆದರೆ, ಈಗ ನಮ್ಮ ಕೇಂದ್ರ ಸರ್ಕಾರವು ಇವರ ಹೆಸರಿನಲ್ಲಿ 11 ಪೀಠವನ್ನು ಸ್ಥಾಪಿಸಿರುವುದು ಅತ್ಯಂತ ಸ್ವಾಗತಾರ್ಹವಾಗಿದ್ದು, ಅತ್ಯಂತ ಹೆಮ್ಮೆಯ ಸಂಗತಿಯಾಗಿದೆ. ನಮಗೆ ವಿವಿಧ ರಾಷ್ಟ್ರಗಳಲ್ಲಿ ವಿವಿಧ ಕ್ಷೇತ್ರಗಳಲ್ಲಿ ಮೇರು ಸಾಧನೆಗೈದ ಮಹಿಳಾ ಸಾಧಕಿಯರ ಬಗ್ಗೆ ತಿಳಿದಿದೆ, ಆದರೆ ನಮ್ಮವರ ಬಗ್ಗೆ ನಮಗೇ ಪರಿಚಯವಿಲ್ಲ. ಈ ನಿಟ್ಟಿನಲ್ಲಿ ಈ ಲೇಖನ ಒಂದು ಸಣ್ಣ ಪ್ರಯತ್ನ.

ಈ ಸಾಧಕರಿಂದಾಗಿ ಮಹಿಳೆಯರಿಗೆ ಉತ್ತಮ ಅಡಿಪಾಯ ಹಾಕಿಕೊಟ್ಟಂತೆ ಆಗಿದೆ. ವಿವಿಧ ಕ್ಷೇತ್ರಗಳಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಮಹಿಳೆಯರಿಗೆ ಇವರೆಲ್ಲಾ ಉತ್ತಮ ಸ್ಫೂರ್ತಿ ಮತ್ತು ಪ್ರೇರಕರಾಗಿದ್ದಾರೆ. ಇವರ ಸಾಧನೆ, ಕಾರ್ಯಕ್ಷಮತೆ, ಹಾಗೂ ಕಾರ್ಯತತ್ಪರತೆಗೆ ನನ್ನದೊಂದು ದೊಡ್ಡ ನಮಸ್ಕಾರ.

 

 

ಪ್ರಕೃತಿ ಸೌಂದರ್ಯದ ಸೊಬಗು : ‘ಕಾಡಿನ ಬೆಂಕಿ’

ಪ್ರಕೃತಿ ಸೌಂದರ್ಯದ ಸೊಬಗು : ‘ಕಾಡಿನ ಬೆಂಕಿ’

ಲೇಖಕರು : ರಮೇಶ, ವಿ, ಬಳ್ಳಾ

                                                                                                    ಅಧ್ಯಾಪಕರು

 ಬಾಲಕಿಯರ ಸರ್ಕಾರಿ ಪ ಪೂ ಕಾಲೇಜು

 (ಪ್ರೌಢ) ಗುಳೇದಗುಡ್ಡ ಜಿ: ಬಾಗಲಕೋಟ

                                                                   9739022186

“ಫ್ಲೇಮ್‌ ಆಫ್‌ ದಿ ಫಾರೆಸ್ಟ್‌ʼ ಎಂದೇ ಜನಪ್ರಿಯವಾಗಿರುವ ಮುತ್ತುಗದ ಹೂಗಳ ಸೊಬಗನ್ನು ಮೆಚ್ಚದೇ ಇರಲು ಸಾಧ್ಯವೇ ? ಶಿವರಾತ್ರಿಯ ಆಗಮನದೊಂದಿಗೆ ತನ್ನ ಕೆಂಬಣ್ಣದ ಹೂಗಳೊಂದಿಗೆ ಆಕರ್ಷಿಸುವ ಮುತ್ತುಗದ ಮರ, ಹಲವು ರೀತಿಯಲ್ಲಿ ನಮ್ಮ ಸಂಪ್ರದಾಯದೊಂದಿಗೆ ಬೆರೆತು ಹೋಗಿದೆ.  ಈ ಮರಗಳ ಬಗ್ಗೆ ಉಪಯುಕ್ತ ಮಾಹಿತಿಯನ್ನು ಈ ಲೇಖನದಲ್ಲಿ ನೀಡಿದ್ದಾರೆ, ಶಿಕ್ಷಕ ರಮೇಶ್‌ ಬಳ್ಳಾ ಅವರು.

 

ನಿಸರ್ಗ ನಿಜಕ್ಕೂ ಸೋಜಿಗದ ಆಗರ. ಅದನ್ನು ಅರಿತುಕೊಳ್ಳುವುದೇ ಒಂದು ಅದ್ಭುತ ಅನುಭವ. ಪ್ರಕೃತಿ ಕಲ್ಲು, ಮುಳ್ಳು, ಹೂ, ಹಣು,್ಣ ಕಾಯಿ, ನೆಲ,ಜಲ, ಕಾಡು,ಕಣಿವೆ, ಹಚ್ಚ ಹಸಿರು ಗಿಡಮರಗಳನ್ನು ಹಾಸಿ ಜಗವೆಲ್ಲಾ ರಮಣೀಯವಾಗುವಂತೆ ಮಾಡಿದೆ. ಇಂತಹ ಶೃಂಗಾರಮಯ ಸೃಷ್ಠಿಯ ಸೊಬಗಿನಲ್ಲಿ ಬೆಂಕಿಯ ಬೆರಗು ಎದ್ದು ಕಾಣುತ್ತದೆ. ಹಾಂ ! ಇದೇನು ಬೆಂಕಿ ಸೌಂದರ್ಯ ಸೃಷ್ಠಿಸುವುದೇ ಎಂದು ಆಶ್ಚರ್ಯವಾಗಬಹುದು. ಆದರೆ ನಾ ಹೇಳ ಹೊರಟಿರೋ ಬೆಂಕಿ ನೀವಂದುಕೊಂಡಂತೆ ಉರಿಯುವ ಮತ್ತು ಕೆನ್ನಾಲಿಗೆ ಚಾಚುವ ಸುಡುವಗ್ನಿ ಅಲ್ಲ. ಇದು ನಮ್ಮ ಪ್ರಕೃತಿಯಲ್ಲಿ ಚೆಲುವು ತುಂಬುವ ʼಕಾಡಿನ ಬೆಂಕಿʼ. ಅದೇ ಸುಂದರ ಹೂ “ಫ್ಲೇಮ್ ಆಫ್ ದಿ ಫಾರೆಸ್ಟ್.”

ಫೆಬ್ರುವರಿ ತಿಂಗಳು ಬಂತೆಂದರೆ ಚಳಿಗಾಲ ಮುಗಿದು ಇನ್ನೇನು ಬೇಸಿಗೆಯ ಬಿಸಲಿಗೆ ಬೆವರುವುದು ಪ್ರಾರಂಭವಾಗುವ ಸಮಯ. ಹಸಿರೆಲ್ಲ ಕಳೆಗುಂದಿ ಬೋಳು ಬೋಳಾಗುವ ಹೊತ್ತು. ಹಾಗೇ ಇದೇ ತಿಂಗಳಲ್ಲಿ ಪ್ರಕೃತಿ ಒಂದು ರೀತಿಯಲ್ಲಿ ಬದಲಾವಣೆಗೆ ಅಣಿಯಾಗುವ ಕಾಲವನ್ನು ಎದುರು ನೋಡುತ್ತಿರುತ್ತದೆ. ನಮಗೆಲ್ಲಾ ಗೊತ್ತಿರುವ ಹಾಗೇ ಈ ಸಮಯಯದಲ್ಲೇ ಶಿವರಾತ್ರಿಯ ಜಪ ತಪಗಳು ಜೋರಾಗಿ ಜಗದೊಡೆಯ ಶಿವನ ಆರಾಧನೆ ಮುನ್ನಲೆಗೆ ಬರುತ್ತದೆ. ಆ ಶಿವನ ನೆಚ್ಚಿನ ಹೂವೆಂದೇ ಹೆಸರಾದ, ಮುತ್ತುಗದ ಮರದ ಈ ತಿಳಿ ಕೆಂಪು, ಕೇಸರಿ ವರ್ಣದ ಹೂಗಳು ಗೊಂಚಲು ಗೊಂಚಲಾಗಿ ಪ್ರಕೃತಿಯಲ್ಲಿ ಅರಳಲು ಪ್ರಾರಂಭಿಸುತ್ತವೆ. ಒಂದು ರೀತಿಯಲ್ಲಿ ಇವು ಸೃಷ್ಠಿಸುವ ಸೊಬಗು ಎಂತಹವರನ್ನು ಬೆರಗುಗೊಳಿಸದೇ ಇರಲಾರವು.

ಸಾಮಾನ್ಯವಾಗಿ ಮುತ್ತುಗದ ಮರ ಹೆಚ್ಚು ಪರಿಚಿತ. ಆದರೆ ಅದರ ಹೂ ಬಗ್ಗೆ ಯಾರೂ ಅಷ್ಟೊಂದು ತಲೆ ಕೆಡಿಸಿಕೊಳ್ಳುವುದಿಲ್ಲ. ಕಾಡುಮೇಡುಗಳಲ್ಲಿ ಸಾಮಾನ್ಯವಾಗಿ ಹುಲುಸಾಗಿ ಬೆಳೆಯುವ ಈ ಮರಗಳು ನಿಸರ್ಗ ತೊಟ್ಟ ಕೇಸರಿ ರುಮಾಲಿನಂತೆ ಹೂಗಳನ್ನು ಚಾಚಿ ಹಬ್ಬಿಸುತ್ತವೆ. ನೈಸರ್ಗಿಕವಾಗಿ ಎಲ್ಲೆಂದರಲ್ಲಿ ಬೆಳೆಯಬಹುದಾದ ಈ ಮರಗಳು ಕುರುಚಲು ಪ್ರದೇಶವನ್ನೂ ಸಹ ವಿಶಿಷ್ಟವಾಗಿ ಶೃಂಗಾರಗೊಳಿಸುತ್ತವೆ.

ಮುತ್ತುಗದ ಈ ಕಾಡಿನ ಹೂ, ಬೆಂಕಿಯ ಕೆನ್ನಾಲಿಗೆ ಚಾಚಿದಂತೆ ಕಂಗೊಳಿಸಿದ ಕಾರಣವೇನೋ ʼಪ್ಲೇಮ್ ಆಫ್ ದಿ ಫಾರೆಸ್ಟ್ʼ ಎನಿಸಿಕೊಂಡಿರಬಹುದು. ಇದರ ವೈಜ್ಞಾನಿಕ ಹೆಸರು ಬ್ಯುಟಿಯಾ ಮೊನೊಸ್ಪರ್ಮಾ (Butea monosperma). ಫ್ಯಾಬೇಸಿ ಕುಟುಂಬದ ಈ ಸುಂದರ ಹೂವಿನ ಮುತ್ತುಗದ ಮೂಲ ದಕ್ಷಿಣ ಏಷ್ಯಾದ ಉಷ್ಣ, ಸಮಶಿತೋಷ್ಣ ವಲಯ ಪ್ರದೇಶ. ಹಾಗೂ ಏಷ್ಯಾದ ಇತರ ಕೆಲ ಭಾಗಗಳಲ್ಲಿ ಇದು ಹೆಚ್ಚು ಕಂಡುಬರುವAತಹದ್ದು. ಇದರ ವ್ಯಾಪ್ತಿಯನ್ನು ಗುರುತಿಸುವುದಾದರೆ ಬಾಂಗ್ಲಾದೇಶ, ಭಾರತ, ನೇಪಾಳ, ಪಾಕಿಸ್ತಾನ, ಶ್ರೀಲಂಕಾ, ಮಯನ್ಮಾರ್, ಥೈಲ್ಯಾಂಡ್, ಕಾಂಬೋಡಿಯಾ, ಮಲೇಷಿಯಾ ಮುಂತಾದೆಡೆ ಪಸರಿಸಿದೆ. ಪಾಲಾಶ(ಸಂಸ್ಕೃತದಲ್ಲಿ), ಧಕ್ ಮರ, ಮುತ್ತಲ ಮರ ಎಂದು ಸಾಮಾನ್ಯವಾಗಿ ಕರೆಯಲ್ಪಡುವ ಇದನ್ನು ತೆಲುಗಿನಲ್ಲಿ ಮೋದುಗವೆಂದು, ತಮಿಳಿನಲ್ಲಿ ಕತ್ತುಮುರುಗವೆಂತಲೂ ಕರೆಯಲಾಗುತ್ತದೆ.

ಈ ಮಧ್ಯಮ ಗಾತ್ರದ ಮರ ನಮ್ಮ ಕಾಡಿನ ಭಾಗಗಳಲ್ಲಿ ಸಾಮಾನ್ಯವಾಗಿದ್ದರೂ, ಇತೀಚಿಗೆ ಕಾಡು ಕಡಿಮೆಯಾಗುತ್ತಿರುವ ಸಂದರ್ಭದಲ್ಲಿ ಅರಣ್ಯ ಇಲಾಖೆ ಎಲ್ಲೆಂದರಲ್ಲಿ ಉದ್ಯಾನ, ರಸ್ತೆ ಬದಿ, ದೇವಸ್ಥಾನ, ಶಾಲೆ ಕಾಲೇಜು ಮೈದಾನಗಳಲ್ಲಿ ಈ ಮರಗಳನ್ನು ಬೆಳೆಸುತ್ತಿರುವುದು ಕಂಡು ಬಂದಿದೆ. ಅಲ್ಲದೇ, ಹೊಲಗಳ ಬದುಗುಂಟ, ಕೆರೆ ಕಟ್ಟೆ ಹತ್ತಿರ, ಈ ಮರ 10 ರಿಂದ 15 ಮೀಟರ್ ಎತ್ತರಕ್ಕೆ ಬೆಳೆಯಬಲ್ಲದು. ಇದರ ತ್ರಿದಳಗಳ ಬಟ್ಟಲಾಕಾರದ ಸ್ವಲ್ಪ ದೊಡ್ಡ ಎಲೆಗಳು ಮರದಲ್ಲಿ ತುಂಬಿಕೊAಡಿರುತ್ತವೆ. ಜನವರಿ ತಿಂಗಳ ಹೊತ್ತಿಗೆ ಹೂ ಅರಳಲು ಪ್ರಾರಂಭಿಸುತ್ತಿದ್ದಂತೆ ಸ್ವಲ್ಪ ಸ್ವಲ್ಪವೇ ಎಲೆ ಉದುರಿಸಿ ಕಿತ್ತಳೆ ಕೆಂಪು ಬಣ್ಣದ 10 ರಿಂದ 12 ಸೆಂ ಮೀ ಉದ್ದದ ಹೂಗಳು ಗುಚ್ಛವಾಗಿ ರಾರಾಜಿಸುತ್ತವೆ. ಹೂಗಳು ಕೆಂಪುಕಿತ್ತಳೆ ಅಲ್ಲದೇ ಬಿಳಿ ಹಾಗೂ ಹಳದಿ ಹೂ ಬಿಡುವ ಮರಗಳೂ ಇವೆ. ಆದರೆ ಅವು ತುಂಬಾ ಅಪರೂಪ. ಎಪ್ರೀಲ್ ಜೂನ್‌ವರೆಗೆ ಕಾಯಿಗಳು ಹಣ್ಣಾಗಿ ಬಿರಿಯುತ್ತವೆ. ಬೀಜದಲ್ಲಿನ ಎಣ್ಣೆಯ ಅಂಶವು ಉಪಯುಕ್ತ ತೈಲವಸ್ತುವಾಗಿ ವಾಣಿಜ್ಯಕ ಮಹತ್ವ ಹೊಂದಿದೆ.

ಧಾರ್ಮಿಕವಾಗಿ ಮನ್ನಣೆ ಪಡೆದ ಈ ಮರದ ಭಾಗಗಳು ಪಾರಂಪರಿಕವಾಗಿ ಬಳಕೆಯಾಗುತ್ತಿವೆ. ಎಲೆಗಳು ಹೋಮ ಹವನದಲ್ಲಿ, ಪೂಜೆ ಆರಾಧನೆಯಲ್ಲಿ, ಬಹುಕಾಲ ನಮ್ಮಲ್ಲಿ ಬೆರೆತಿರುವುದು ಗೊತ್ತಿರುವ ಸಂಗತಿ. ಶಿವರಾತ್ರಿ ಶಿವನ ಆರಾಧಕರಿಗೆ ಈ ಹೂಗಳು ಬೇಕೆ ಬೇಕು. ಅವುಗಳಿಂದಲೇ ಅಂದಿನ ಶಿವನ ಅಲಂಕಾರ. ಈ ಮರದ ಪೌರಾಣಿಕ ಮಹತ್ವದ ಕಾರಣದಿಂದಲೇನೋ ಇದಕ್ಕೆ ಬ್ರಹ್ಮವೃಕ್ಷ, ದೇವಮರ ಎಂದೂ ಹೆಸರಿದೆ. ಸುಗ್ಗಿಕಾಲಕ್ಕೆ ಸಜ್ಜಾಗಿ ನಿಲ್ಲುವ ಈ ಹೂಗಳು ದವಸ ಧಾನ್ಯಗಳ ರಾಶಿ ಪೂಜೆಗೆ ಈ ಹೂ ಶ್ರೇಷ್ಠ ಎಂಬ ಭಾವನೆ ನಮ್ಮ ಹಳ್ಳಿ ಜನರಲ್ಲಿ ಮನೆ ಮಾಡಿದೆ. ಅದರೊಟ್ಟಿಗೆ ಹೂ ಬಿಡುವಿಕೆ ಆಧರಿಸಿ ಮುಂದಿನ ಮಳೆ ಬೆಳೆ ನಿರ್ಧರಿಸುವ ಪರಿಪಾಠವೂ ಚಾಲ್ತಿಯಲ್ಲಿದೆ.

ಬಾಳೆ ಎಲೆಯಂತೆ ಊಟದ ಎಲೆಗಳಾಗಿ ನಮ್ಮ ಹಿರಿಯರು ಬಹು ಹಿಂದಿನಿಂದ ಮುತ್ತುಗದ ಎಲೆಗಳನ್ನು ಬಳಸುತ್ತಾ ಬಂದಿರುವುದನ್ನು ನಾವು ನಿನ್ನೆ ಮೊನ್ನೆವರೆಗೂ ಕಂಡಿದ್ದೇವೆ. ಅಗಲ ಎಲೆಗಳನ್ನು ಒಂದೊಂದಾಗಿ ಜೋಡಿಸಿ ಸಣ್ಣ ಸಣ್ಣ ಕಡ್ಡಿಗಳಿಂದ ಚುಚ್ಚಿ ಹೆಣೆದು ಮಾಡುವ ಪತ್ರೋಳಿಗಳು ಪರಿಸರಸ್ನೇಹಿ ಹಾಗೂ ಆರೋಗ್ಯಕರ ಊಟವನ್ನು ಆಸ್ವಾದಿಸುವಂತೆ ಮಾಡುತ್ತಿದ್ದುದು ಸುಳ್ಳಲ್ಲ. ಬದಲಾದ ಜೀವನ ಶೈಲಿ ಹಾಗೂ ನಮ್ಮ ಈ ಅವಸರದ ಬದುಕು ಎಲ್ಲವನ್ನು ಮರೆಸಿದೆ. ಆದರೂ ಅಲ್ಲಲ್ಲಿ ದೇವಸ್ಥಾನ, ಕೆಲ ಹೊಟೇಲ್‌ಗಳಲ್ಲಿ ಪ್ರಸಾದ ಹಾಗೂ ತಿಂಡಿಗಾಗಿ ಈಗಲೂ ಇವುಗಳ ಚಿಕ್ಕ ಚಿಕ್ಕ ಎಲೆ, ತಟ್ಟೆಗಳನ್ನು ಬಳಕೆ ಮಾಡುತ್ತಿರುವುದು ಕಂಡು ಬರುತ್ತದೆ.

ಹೂ, ತೊಗಟೆ, ಅಂಟು, ಬೀಜಗಳೆಲ್ಲವೂ ಒಂದೊಂದು ಮಹತ್ವ ಹೊಂದಿದ್ದು ಆಯುರ್ವೇದದಲ್ಲಿ ಔಷಧಿಯಾಗಿ ಬಳಸಲ್ಪಡುತ್ತವೆ. ಮುತ್ತುಗದ ಹೂಗಳನ್ನು ಒಣಗಿಸಿ ಪುಡಿ ಮಾಡಿ ಚರ್ಮದ ಆರೋಗ್ಯಕ್ಕೆ ಹಾಗೂ ರಕ್ಷಣೆಗೆ ಶಿಫಾರಸ್ಸು ಮಾಡಲಾಗುತ್ತದೆ. ಬೀಜಗಳಿಂದ ತಯಾರಿಸಲಾದ ಔಷಧಿಯಿಂದ ಹೊಟ್ಟೆಯಲ್ಲಿನ ಜಂತುಹುಳುಗಳನ್ನು ನಾಶ ಮಾಡಬಹುದು. ದೇಹದ ಗಾಯಕ್ಕೆ ಈ ಮರದ ಯಾವುದೇ ಭಾಗಗಳನ್ನು ಕುಟ್ಟಿ ಅರಿದು ಲೇಪನ ಮಾಡುವುದರಿಂದ ಗುಣಪಡಿಸಬಹುದು. ವಾತ ಪಿತ್ತ, ಕಫ, ತ್ರಿವಿಧ ಕಾಯಿಲೆಗಳನ್ನು ಸಹ ಮುತ್ತುಗದ ಮರದ ಸಹಾಯದಿಂದ ಗುಣಪಡಿಸಲು ಸಾಧ್ಯ ಎಂದು ಆಯುರ್ವೇದ ಹೇಳಿದೆ.

ಮಲೆನಾಡು ಭಾಗದ ಸೌಂದರ್ಯವನ್ನು ಹೆಚ್ಚಿಸಿದ್ದ ಈ ಮುತ್ತುಗದ ಮರ ಹೂ ಈಗ ಬಯಲು ಸೀಮೆಗೂ ವ್ಯಾಪಿಸಿದ ಪರಿ ನೋಡಿದರೆ ಆಶ್ಚರ್ಯವೆನಿಸುತ್ತದೆ. ಕರ್ನಾಟಕದ ಬೀದರ್ ಕಲಬುರ್ಗಿಯಿಂದ ಹಿಡಿದು ಎಲ್ಲೆಂದರಲ್ಲಿ ನಿಸರ್ಗವನ್ನು ಅಂದಗೊಳಿಸಿದೆ. ಬದಲಾದ ಸನ್ನಿವೇಶದಲ್ಲಿ ಜನರ ಆಸಕ್ತಿ ಅಭಿರುಚಿಗಳು ಕೂಡ ಸಸ್ಯಪಾಲನೆ, ಹಸಿರು ಅಲಂಕಾರದತ್ತ ವಾಲಿದ ಪ್ರಯುಕ್ತ ಈ ಹೂ ವಿಜೃಂಭಿಸುತ್ತಿದೆ. ಪ್ರಕೃತಿ ಇದರಿಂದಾಗಿ ಅಂದವಾಗಿ ಸಿಂಗಾರಗೊಂಡಿದೆ.

ಆಹಾ! ಅಂಡಮಾನ್‌ ಪ್ರವಾಸ

 

ಆಹಾ! ಅಂಡಮಾನ್‌ ಪ್ರವಾಸ

                                                        ಲೇಖಕಿ : ಶ್ರೀಮತಿ ನಾಗವೇಣಿ.ಬಿ ಸಹಶಿಕ್ಷಕಿ, CBZ

KPS ಬಸವನಗುಡಿ. ಬೆಂಗಳೂರು ದ.ವ-1

ಭಾರತದ ಭಾಗವೇ ಆಗಿದ್ದರೂ ತನ್ನ ವಿಶಿಷ್ಟ ಪರಿಸರದಿಂದ ಭಿನ್ನವಾಗಿ ಗೋಚರಿಸುವ ಅಂಡಮಾನ್‌ – ನಿಕೋಬಾರ್‌ ದ್ವೀಪಗಳ ಸಮುಚ್ಚಯವು ಐತಿಹಾಸಿಕವಾಗಿಯೂ ಪ್ರಸಿದ್ಧಿ ಪಡೆದ ತಾಣ. ಅಲ್ಲಿಗೆ ಪ್ರವಾಸ ಹೋಗಿ ಬಂದ ತಮ್ಮ ಸುಂದರ ಅನುಭವವನ್ನು ಈ ಲೇಖನದಲ್ಲಿ ಹಂಚಿಕೊಂಡಿದ್ದಾರೆ, ಶಿಕ್ಷಕಿ ಶ್ರೀಮತಿ ಬಿ.ನಾಗವೇಣಿ

ನಾನು ಮತ್ತು ನನ್ನ ಪರಿವಾರ ಅಂಡಮಾನ್‌ ಪ್ರವಾಸ ಹೋಗಲು ತೀರ್ಮಾನಿಸಿ, ಒಂದು ಶುಭದಿನ ಹೊರಟು ನಿಂತೆವು. ಹೋಗುವ ಮೊದಲು ಅದೊಂದು ದ್ವೀಪ, ನಮ್ಮ ದೇಶದ ಒಂದು ಭಾಗ ಅನ್ನೋದನ್ನು ಬಿಟ್ಟು ಬೇರೇನೂ ನನಗೆ ಅಷ್ಟಾಗಿ ತಿಳಿದಿರಲಿಲ್ಲ.

ಬೆಂಗಳೂರಿಂದ ಅಂಡಮಾನ್‌ನ ರಾಜಧಾನಿಯಾದ ಪೋರ್ಟ್‌ಬ್ಲೇರ್‌ಗೆ ವಿಮಾನಯಾನದಲ್ಲಿ ತಲುಪಿದೆವು. ಅಲ್ಲಿ ತಲುಪಿದ ಮೇಲೆ ತಿಳಿಯಿತು, ಅಂಡಮಾನ್‌- ನಿಕೋಬಾರ್‌ ಅನೇಕ ದ್ವೀಪಗಳ ಸಮುಚ್ಛಯವೆಂದು.  ಅಂಡಮಾನ್‌ನ ಕೆಲವು ದ್ವೀಪಗಳು ಹಾಗೂ ನಿಕೋಬಾರ್‌ ದ್ವೀಪಕ್ಕೆ ಸರಕಾರದ ಅನುಮತಿ ಇಲ್ಲದೇ ಹೋಗಲು ಸಾಧ್ಯವಿಲ್ಲ. ಏಕೆಂದರೆ, ಕೆಲವು ದ್ವೀಪಗಳು ಮಾನವರಹಿತ ಹಾಗೂ ಸ್ಥಳೀಯ ಆದಿವಾಸಿಗಳು (indigenous tribes) ಇರುವುದರಿಂದ, ನಾಗರಿಕ ಮಾನವರ ಸಂಪರ್ಕ ಇರುವುದಿಲ್ಲ. ಹಾಗಾಗಿ, ಕೆಲವು ದ್ವೀಪಗಳು ಮಾತ್ರ ಪ್ರವಾಸಿ ತಾಣಗಳು. 

 

ಅಂಡಮಾನ್‌ ಉರಿಬಿಸಿಲಿನ ಪ್ರದೇಶ. ಅಲ್ಲಿ ಸ್ಥಳೀಯರಿಗಿಂತ ಪ್ರವಾಸಿಗರೇ ಹೆಚ್ಚಿನ ಪ್ರಮಾಣದಲ್ಲಿ ಕಂಡುಬರುತ್ತಾರೆ. ಸಮುದ್ರವು ದಟ್ಟ/ಕಡು ನೀಲಿ ಬಣ್ಣದಲ್ಲಿರುತ್ತದೆ. ಅಷ್ಟೊಂದು ಅಗಾಧ ಸಮುದ್ರವಿದ್ದರೂ ಖಾದ್ಯ ಯೋಗ್ಯ ಮೀನುಗಳು ಇಲ್ಲ, ಕೃಷಿ ಇಲ್ಲ, ಮಣ್ಣು ವ್ಯವಸಾಯಕ್ಕೆ ಯೋಗ್ಯವಿಲ್ಲ. ಪ್ರತಿ ಎರಡು ದಿನಕ್ಕೆ ಚೆನ್ನೈ ಮತ್ತು ಬಂಗಾಳದಿಂದ ಕಾರ್ಗೋ ಹಡಗುಗಳ  ಮೂಲಕ ಅಲ್ಲಿಗೆ ಆಹಾರ ಸರಬರಾಜಾಗುತ್ತದೆ.

ದಿನ ಶುರುವಾಗುವುದು ಬೆಳಿಗ್ಗೆ 4 ಗಂಟೆಗೆ ಹಾಗೂ ಮುಗಿಯುವುದು ಸಂಜೆ 6 ಗಂಟೆಗೆ. ಅದು ಭಾರತದ ಭಾಗವಾದರೂ, ಭಾರತದ ಕಾಲಮಾನ ಅನುಸರಿಸಿದರೂ ನಮ್ಮ ಮುಖ್ಯ ಭಾಗದಿಂದ ಬಹಳ ದೂರವಿದೆ. ಆದ್ದರಿಂದ ಸೂರ್ಯೋದಯ ಹಾಗೂ ಸೂರ್ಯಾಸ್ತ ಬೇಗ ಆಗುತ್ತದೆ.

ಅನೇಕ ಸಮುದ್ರದ ಆಟಗಳಾದ Scuba Diving, Snorkeling, Under sea walk, glass bottom boat rides, ಮುಂತಾದುವು ಮುದನೀಡುತ್ತವೆ. 

ಇನ್ನು ಸಮುದ್ರದ ತಳ, ಅಬ್ಬಾ ! “ಬಹುರತ್ನಾನಿ ವಸುಂಧರಾ”  ಜಲರಾಶಿಯ ಸೌಂದರ್ಯ ಬಣ್ಣಿಸಲಾಗದು. ವಿಧ, ವಿಧ ಬಣ್ಣದ ಪಚ್ಚೆ, ಮುತ್ತು, ಹವಳಗಳು , ವಿವಿಧ ಗಾತ್ರದ ಮತ್ತು ಬಹು ಬಣ್ಣದ ಜಲಚರ ಜೀವಿಗಳನ್ನುನೋಡುವುದುಒಂದು ಸುಂದರ ಅನುಭವ! ಬೆಲೆಬಾಳುವ ನೀಲಿ ಹರಳುಗಳ ಇರುವಿಕೆಯಿಂದ ನೀರುಕಡು ನೀಲಿಯಾಗಿ ಗೋಚರಿಸುತ್ತದೆ.

  

ಉಬ್ಬರವಿಳಿತಗಳ ನಡುವೆ ಬಹಳ ವ್ಯತ್ಯಾಸ ಕಂಡುಬರುತ್ತದೆ. ಉಬ್ಬರವಿದ್ದಾಗ ನೀರಿನ ಅಲೆಗಳು ರಸ್ತೆಯ ವರೆಗೂ ಬರುಯ್ಯವೆ. ಇಳಿತವಿದ್ದಾಗ ಎಷ್ಟೋ ದೂರದವರೆಗೆ ಸಮುದ್ರದಲ್ಲಿ ನಡೆಯಬಹುದು.

ಕೆಲವು ಬೀಚ್‌ಗಳಲ್ಲಿ ಬಿಳಿ ಬಣ್ಣದ ಮರಳು. ಹ್ಯಾವ್‌ಲಾಕ್‌ ದ್ವೀಪದ ಬೀಚ್‌ನಲ್ಲಿ ರಾತ್ರಿ ಹೊತ್ತು ಡಯಾಟಮ್ ಗಳ ಇರುವಿಕೆಯಿಂದಾಗಿ, ಸಮುದ್ರ ಸುಂದರವಾಗಿ ಚಿನ್ನದಂತೆ ಹೊಳೆಯುವುದನ್ನು ನೋಡಬಹುದು.

ರಾಸ್‌ಐಲ್ಯಾಂಡ್‌ ಎಂಬ ಪುಟ್ಟದ್ವೀಪ ಪೋರ್ಟ್‌ಬ್ಲೇರ್‌ನ  ಪಕ್ಕದಲ್ಲಿದ್ದು, ಅಲ್ಲಿ ಯಾವುದೇ ಜನವಾಸವಿಲ್ಲ. ಪ್ರವಾಸಿಗರು ಮಾತ್ರ ಹೋಗಿಬರಬಹುದು. ಅಲ್ಲಿ ಪಾಳುಬಿದ್ದ ಕಟ್ಟಡಗಳಿವೆ ಮತ್ತು ಸದ್ಯಕ್ಕೆ ಅದು ನೌಕಾಪಡೆಗೆ ಸೇರಿದ್ದಾಗಿದೆ. ಅಲ್ಲಿನ ನೈಸರ್ಗಿಕ ಪರಿಸರದಲ್ಲಿ ಮೊಲಗಳು, ಮತ್ತು  ಜಿಂಕೆಗಳು, ಹೇರಳವಾಗಿವೆ.

ಈ ದ್ವೀಪದ ಮಹತ್ವವೆಂದರೆ, ಇದು ಅರ್ಧಚಂದ್ರಾಕೃತಿಯ ರೂಪದಲ್ಲಿದ್ದು, ಸುನಾಮಿಯಂಥ ಪ್ರಕೃತಿ ವಿಕೋಪಗಳಿಂದ ಪೋರ್ಟ್‌ಬ್ಲೇರ್‌ಗೆ ಯಾವುದೇ ಅನಾಹುತ ಸಂಭವಿಸುವುದಿಲ್ಲ.

ಜಪಾನ್‌ ಮತ್ತು ಬ್ರಿಟೀಷ್‌ ಇಂಡಿಯಾ ನಡುವೆ ಯುದ್ಧವಾದಾಗ, ರಾಸ್‌ಐಲ್ಯಾಂಡ್‌ ಮತ್ತು ಪೋರ್ಟ್‌ಬ್ಲೇರ್‌ ಅನ್ನು ಜಪಾನೀಯರು ಆಕ್ರಮಿಸಿದ್ದರು. ಅಲ್ಲೀಗ, ಬಾಂಬ್‌ ಹಾಕಿರುವ ಸ್ಥಳ ಈಗಲೂ ಇದೆ. ಆಹಾರ ಕೊರತೆಯಿಂದಾಗಿ ಜಪಾನೀಯರು ಈ ಐಲ್ಯಾಂಡ್‌ ತೊರೆದರು.

ಬೀಚ್‌ ಎಂದಾಕ್ಷಣ ತೆಂಗಿನಮರ ಸಹಜವಾಗಿ ನೆನಪಾಗುತ್ತದಲ್ಲವೇ? . ಅಲ್ಲಿ ಎಳೆನೀರು ಹೇರಳವಾಗಿದ್ದು, ಬಳಕೆಯಾಗದೇ ಹೆಚ್ಚುವರಿಯಾಗಿ ಹಾಳಾಗುವುದು. ಇಲ್ಲಿ ಅತೀ ಕಡಿಮೆ ಬೆಲೆಯಲ್ಲಿ ಅತೀದೊಡ್ಡ ಎಳೆನೀರನ್ನು ಹೊಟ್ಟೆತುಂಬ ಕುಡಿಯಬಹುದು!.

    ಸ್ಕೂಬಾ ಡೈವಿಂಗ್‌ ಹೋಗುವ ಮೊದಲು 15ನಿಮಿಷ ನೀರಿನೊಳಗೆ ಉಸಿರಾಡುವುದು ಹೇಗೆ?, ಆಕ್ಸಿಜನ್‌ ಟ್ಯಾಂಕ್‌ ಹೇಗೆ ಉಪಯೋಗಿಸುವುದು?. ಹ್ಯಾಂಡ್‌ ಸಿಗ್ನಲ್‌ ಹೇಗೆ ಬಳಸುವುದನ್ನುಎಂಬುದನ್ನು ಹೇಳಿಕೊಡಲಾಗುತ್ತದೆ. ನುರಿತ ಈಜುಗಾರರು ನಮ್ಮನ್ನು ಸಮುದ್ರದೊಳಗೆ 20 ಅಡಿ ಕರೆದುಕೊಂಡು ಹೋಗುತ್ತಾರೆ.  ಅಲ್ಲಿಯ ಅನುಭವ ಹೇಳತೀರದು. ಅಗಾಧ ಸಮುದ್ರದ ಮಧ್ಯ ಮಾನವ ಎಷ್ಟು ಶೂನ್ಯ, ನಿರುಪಯೋಗಿ ಹಾಗೂ ನಿಸ್ಸಹಾಯಕ ಎಂದು ಅನಿಸುತ್ತದೆ. ನೀರೊಳಗಿನ ಅತೀವ ನಿಶ್ಯಬ್ಧ ಭಯಮೂಡಿಸುತ್ತದೆ  ಹಾಗೂ ಎದೆ ಬಡಿತ ಜೋರಾಗುವುದು ಆ ಒಂದು  ಅನುಭವ ಮರೆಯಲು ಅಸಾಧ್ಯ. 

ಅನೇಕ ವಿದಧ, ಅನೇಕ ಬಣ್ಣದ,  ಮೀನುಗಳು ಜಲಸಸ್ಯಗಳು, ಅತ್ಯದ್ಭುತ ಹವಳ, ಮುತ್ತುಗಳ ನೈಜದರ್ಶನ ಅವರ್ಣನೀಯ!

ಸ್ಕೂಬಾ ಡೈವಿಂಗ್‌ ಅಸಾಧ್ಯವೆನಿಸಿದರೆ ಸ್ನೋರ್ಕ್ಲಿಂಗ್‌ ಮಾಡಬಹುದು. ಅದರಲ್ಲಿ ಆಳಕ್ಕೆ ಹೋಗದಿದ್ದರೂ ಸಮುದ್ರದ ಮೇಲ್ಮೈಯಿಂದ ಸಮುದ್ರವನ್ನು ನೋಡುವ ಅವಕಾಶ. ಅದೂ ಕೂಡಾ ಅತ್ಯದ್ಭುತ ಅನುಭವ.

ಇದೆಲ್ಲದರ ನಡುವೆ ಐತಿಹಾಸಿಕ ಸ್ಥಳಗಳನ್ನು, ಮುಖ್ಯವಾಗಿ ಕಾಲಾಪಾನಿ ಜೈಲಿಗೆ  ಭೇಟಿ, ವಸ್ತುಸಂಗ್ರಹಾಲಯ ವೀಕ್ಷಣೆಯು ನಡೆಯಿತು Zonal anthropological museumನ ವೈಶಿಷ್ಟ್ಯವೆಂದರೆ ಅನೇಕ ವಿಧದ ಸಸ್ಯ ಮತ್ತು ಪ್ರಾಣಿ ಪ್ರಭೇದಗಳ ಮಾದರಿಗಳನ್ನು ಇಲ್ಲಿ ವೀಕ್ಷಿಸಬಹುದಾಗಿದೆ. ಅಂಡಮಾನ್‌ ನಿಕೋಬಾರ್‌ ಜನಾಂಗದವರ, ಅಲ್ಲಿನ ಬುಡಕಟ್ಟಿನ ಇತಿಹಾಸ ಮತ್ತು ವೈಜ್ಞಾನಿಕ ಬೆಳವಣಿಗೆ ಹಾಗೂ ಜೀವನ ಶೈಲಿಯ ಬಗ್ಗೆ ಸಂಪೂರ್ಣ ಮಾಹಿತಿ ತಿಳಿದುಕೊಳ್ಳಬಹುದು.

ಹಿಂದಿರುಗುತ್ತಾ Government authorised  ಅಂಗಡಿಗಳಲ್ಲಿ   Pearls ಮತ್ತು Corals ನ್ನು ಖರೀದಿಸಬಹುದು. ಅಂಡಮಾನ್‌ ನಿಕೋಬಾರ್‌ ದ್ವೀಪ ಅಸಂಖ್ಯಾತ ಪ್ರಭೇದದ ಔಷಧೀಯ ಸಸ್ಯಗಳ ಹಾಗೂ ಜೈವಿಕ ಸಂಪನ್ಮೂಲಗಳ ಕಣಜವಾಗಿದ್ದು ಸರ್ಕಾರ ಅವುಗಳನ್ನು ಸಂರಕ್ಷಿಸಲು ಅನೇಕ ರೀತಿಯ ಕ್ರಮಗಳನ್ನು ತೆಗೆದುಕೊಂಡಿದೆ. ಆದ್ದರಿಂದ  ಕೆಲವೇ ದ್ವೀಪಗಳಿಗೆ ಮಾತ್ರ  ಪ್ರವೇಶ ಒದಗಿಸಿದೆ. ಸಮುದ್ರದಿಂದ ಯಾವುದೇ ಸಂಪತ್ತನ್ನು ತರಲು ಅವಕಾಶ ಇಲ್ಲದಿರುವುದೇ ಅಂಡಮಾನ್‌ ಇಂದಿಗೂ ಸುಸ್ಥಿತಿಯಲ್ಲಿರಲು ಕಾರಣ.

ಇನ್ನುSnake island ಎಂಬ ದ್ವೀಪದಲ್ಲಿ ಜನರಿಲ್ಲ. ಏಕೆಂದರೆ ಇಲ್ಲಿ 40 ಬಗೆಯ ಹಾವುಗಳ ಪ್ರಭೇದಗಳಿವೆ. ಅದರಲ್ಲಿ ಕೆಲವು  ಈ  ಐಲ್ಯಾಂಡ್‌  ಬಿಟ್ಟು ಜಗತ್ತಿನಲ್ಲಿ ಎಲ್ಲೂ ಇಲ್ಲ.

4-5 ದಿನಗಳ ನನ್ನ ಈ ಪ್ರವಾಸ ಜೀವನದ ಕಹಿಯನ್ನೆಲ್ಲಾ ಮರೆಸಿತು. ಹಿಂದಿರುಗುವಾಗ ಮತ್ತೊಮ್ಮೆ ಇವೆಲ್ಲವನ್ನೂ ಅನುಭವಿಸುವ ಮಹದಾಸೆಯೊಂದಿಗೆ  ಈ ಪದ್ಯಬರೆಯಲು ಮನಸಾಯಿತು.

ಅಂಡಮಾನ್‌ ಅಂಡಮಾನ್‌

ಅಂಡಮಾನ್‌ ಪ್ರವಾಸ | ಆಗುವುದೆಂದುಕೊಂಡೆ ಪ್ರಯಾಸ | ಇರಲಿಲ್ಲ ಯಾವುದೇ ಆಯಾಸ | ಈಗ ಮನದಾಳದಲ್ಲಿರುವುದು ಸಂತಸ ||   ಉರಿಬಿಸಿಲಿರಬಹುದೆಂದುಕೊಂಡೆ | ಊಟ ಸೇರದೆಂದುಕೊಂಡೆ | ಎಲ್ಲಿ ನೋಡಿದರೂ ಸಮುದ್ರವೋ | ಏನೀ ಸುಂದರ ಪ್ರಪಂಚವೋ ||   ಕವಡೆ ಕಪ್ಪೆಚಿಪ್ಪುಗಳು | ಬಣ್ಣ ಬಣ್ಣದ ಮೀನುಗಳು | ಹವಳದ ದ್ವೀಪದ ಸೊಬಗನ್ನು | ಹೇಗೆ ಹೊಗಳಲಿ ಎಲ್ಲವನು !   ಜಲಚರಗಳಲಿನ ಆನಂದ | ಜಲಕ್ರೀಡೆಗಳಲಿನ ವಿನೋದ | ಜಲರಾಶಿಯಲ್ಲಡಗಿದ ಐಶ್ವರ್ಯ | ಚಕಿತಗೊಳಿಸುವ ಆ ಸೌಂದರ್ಯ | ಆಹಾ !ಏನೀ ಆಶ್ಚರ್ಯ | ಆಹಾ !ನೆನಪಿನ ಮಾಧುರ್ಯ | ಆಹಾ !ಅಂಡಮಾನ್‌ ಅಂಡಮಾನ್‌ || ಒಳ್ಳೆಯ ಸವಿನುಡಿಗಳನಾಡುತ | ಓದಿದ ಪದಗಳ ನೆನೆಯುತ | ಅಂದದ ಅಂಡಮಾನ್‌ ಪ್ರವಾಸದ ಮಜವ | ಆಹಾ !ಮುಗಿಸಿಬಂದ ಆ ಅನುಭವವ ||