ಒಗಟು ಜೂನ್ 2025
ರಚನೆ : ಬಿ.ಜಿ.ರಾಮಚಂದ್ರ ಭಟ್
೧. ನಾ ಕುಂಚವಿಲ್ಲದ , ಈ ಜಗದ ಚಿತ್ರಕಾರ,
ತೇಜ ಪುಂಜವ ಒಡೆದಿರೇ ಬಣ್ಣಗಳ
ಸೌಂದರ್ಯವೇ ಎಲ್ಲ.
ವಾತಾವರಣದಲ್ಲಿ ತಿರುಗಿ, ಆಗಸವ ಬೆಳಗುವೆ,
ನಾನಿದ್ದರೇ ನೀ ನೋಡುವೆ ಜಗದ ಅಂದವ
ಓ ಚತುರ ಹೇಳಬಲ್ಲೆಯಾ ನನ್ನ ಗುರುತ?
೨. ನಾನೊಂದು ಶಕ್ತಿಯ ಕಣ, ಅಗೋಚರ ನಾ !!!
ಪರಮಾಣುವಿನ ಒಡಲೇ ನನ್ನ ತಾಣ
ಜಗಕೆ ಬೆಳಕು ಕೊಡಬಲ್ಲೆ, ವಿಜ್ಞಾನದ ಕಣ್ಣಿಗೆ ಕಾಣಬಲ್ಲೆ,
ಆದರೆ ನೀ ನನ್ನ ಸೆರೆ ಹಿಡಿಯಲಾರೆ
ಐನ್‌ಸ್ಟೀನರ ನೋಬಲ್‌ ಬಹುಮಾನದಲ್ಲೂ
ಇತ್ತು ನನ್ನದೇ ಕರಾಮತ್ತು
ಸುಳಿವರಿತು ಹೇಳಬಲ್ಲಿರೇ ನನ್ನ ಹೆಸರು?
೩. ಭೂಮಿಯ ಒಡಲೊಳಗೆ ಹೂತು ಹೋಗಿರುವೆ ,
ಕಾಲದ ಒಡಲಿನಿಂದ, ತಿರೆಯ ಇತಿಹಾಸವ ತೋರಬಲ್ಲೆ.
ಕಠಿಣ ಶಿಲೆಯಾಗಿ ಕಾಲದ ಕತೆಯ ಹೇಳುತ್ತಿರುವೆ,
ವಿಕಾಸದ ಸಾಕ್ಷಿಯಾಗಿ ಉಳಿದಿರುವೆ
ಸುಳಿವರಿತು ಒಡೆಯ ಬಲ್ಲೆಯಾ ಈ ಒಗಟ?
೪. ನಾನು ಜೀವಿಯ ಪಾಲಿನ ಅಗೋಚರ ರಕ್ಷಕ ಕೋಶ,
ರೋಗಾಣುಗಳ ವಿರುದ್ಧ ಹೋರಾಡುವುದೇ ನನ್ನ ಕಸುಬು.
ಧಮನಿಗಳಲ್ಲೇ ರುಧಿರ ಸಂಚಾರ, ಶತ್ರುವಿಗೆ ಕಾಲನಾಗುವೆ,
ಆಕಾರದಲ್ಲೋ ಅಮೀಬಾದಂತಿರುವೆ
ಬಣ್ಣವಿಲ್ಲದ ನನ್ನ ನೀ ಗುರುತಿಸಬಲ್ಲೆಯಾ?
೫. ನಿಸರ್ಗದಲಿ ಚಕ್ರೀಯವಾಗಿ ಸುತ್ತುವೆ, ಆದರೂ ಚಕ್ಕಡಿಯಲ್ಲ,
ಜೀವಿಗಳ ದೇಹಕ್ಕೆ ನಾನೇ ಆಧಾರ ಧಾತು
ವಜ್ರ ದೇಹಿಯಾಗಬಲ್ಲೆ ಮೃದುವಾಗಿಯೂ
ಇರಬಲ್ಲೆ
ಉರಿದುರಿದು ಭೂತಾಪ ಏರಿಸ ಬಲ್ಲೆ
ಪ್ರಕೃತಿಯ ಸಮತೋಲನದಲ್ಲೂ ನಾನಿರುವೆ.
ನೀರು, ಗಾಳಿ, ಸಸ್ಯಗಳೊಂದಿಗೆ ಸೇರಿ ಜೀವಿಗೋಳವ ಕಟ್ಟುವೆ,
ಒಗಟೊಡೆದು ನನ್ನ ರಹಸ್ಯವ ವಿವರಿಸಬಲ್ಲೆಯಾ ನೀನು?
