ಒಗಟುಗಳು ಸೆಪ್ಟಂಬರ್‌

 ಒಗಟುಗಳು

ಶಂಕುಗಳಿವೆ ನನ್ನಲ್ಲಿ ನಾ ಪ್ರಾಣಿಯಲ್ಲ

 ಸೂಜಿಗಳು ನನ್ನಲ್ಲಿವೆ ಆದರೂ ನಾ ದರ್ಜಿಯಲ್ಲ

 ಸೂಚಿಪರ್ಣಗಳಿದ್ದರೂ ಪರ್ಣಪಾತಿಗಳಲ್ಲ

ಬೀಜಗಳಿದ್ದರೂ ಹಣ್ಣುಗಳಿಲ್ಲದ ಸಸ್ಯವರ್ಗ ನಾ

 ಸುಳಿವ ಹಿಡಿದು ನನ್ನ ಹುಡುಕಿ ಓ ಜಾಣ ಜಾಣೆಯರೆ

 ನಾ ವೈದ್ಯನಲ್ಲ ಆದರೂ ನೋವಿಲ್ಲದ ಶಸ್ತ್ರ ಚಿಕಿತ್ಸೆ ಮಾಡಬಲ್ಲೆ,

 ನಾ ಆಭರಣ ಪ್ರಿಯನಲ್ಲ ಆದರೂ ಮೈತುಂಬಾ ಉಂಗುರಗಳ ಸಿಂಗಾರ 

 ರಕ್ತ ಹೀರಬಲ್ಲೆ ಆದರೆ ನಾ ತಿಗಣೆಯಲ್ಲ

 ಹೆಪ್ಪುಗಟ್ಟದಂತೆ ಮಾಡಿ ರಕ್ತ ಸರಾಗವಾಗಿ ಹೀರಬಲ್ಲೆ

 ರೈತನ ಮಿತ್ರನೂ ನನ್ನ ವಂಶಜನೆ 

 ಈ ಸುಳಿವು ಹಿಡಿದು ನನ್ನ ಕಂಡುಹಿಡಿ ಓ ಮನುಜ !!!

 ಇದಕ್ಕೂ ಕನಿಷ್ಠ ತಾಪವಿರದು 

ಇದೇ ಅನಿಲದ ಗಾತ್ರ ಶೂನ್ಯ ಮಾಡಬಲ್ಲ  ತಾಪ

 ಚಾರ್ಲ್ಸ್ ನಿಯಮಕ್ಕೂ ತಾಪದ ಏಕಮಾನಕ್ಕೂ ಇದೆ ಸಹ ಸಂಬಂಧ

 ವಿವರಿಸಿ ಹೇಳಬಲ್ಲಿರೇ ನನ್ನ ಕಥೆಯ?

 ಆಮ್ಲ ಪ್ರತ್ಯಾಮ್ಲಗಳ ಸಂಗಮ ನಾ

 ಬೇಕಿಂಗ್ ಸೋಡಾ ತಯಾರಿಕೆಯಲು ನಾ ಹುಟ್ಟಿ ಬರುವೆ 

ಕಾಸಿದಿರೋ ನೀರಾಗದೆ  ಅನಿಲವಾಗುವ ಘನ ಮಹಿಮ ನಾ

 ನನ್ನೊಬ್ಬ ಜ್ಞಾತಿ ಕೀಟ ವಿಕರ್ಷಕ ಗುಣದವರು

 ಮತ್ತೊಬ್ಬರು C10H16O ಸೂತ್ರದವರು 

 ವಿಜ್ಞಾನದ ಈ ಒಗಟ ಒಡೆದು 

ಗುರುತುಹಿಡಿಯಿರಿ ಓ ಜಾಣ ಜಾಣೆಯರೇ

 ವಿದ್ಯುತ್ತಿನ ಪ್ರಿಯ ಸುಖ ವಾಹಕ 

ನಾ ಸಿಹಿ ಬರ್ಫಿಯ ಹೊದಿಕೆಯಾಗಬಲ್ಲೆ 

ಎಚ್ಚರ ! ಗಾಳಿಗೆ ತೆರೆದಿಟ್ಟಿರೋ 

ಹೊಳೆವ ನನ್ನ ಮೈ ಕಪ್ಪುಗಟ್ಟೀತು

 ಆಭರಣ ತಯಾರಿಕೆಯಲ್ಲೂ ನನ್ನ ಪಾಲುಂಟು 

ವ್ಯಾಪಾರದಲ್ಲೂ ನನಗೆ ಬೆಲೆಯುಂಟು

ಇಷ್ಟು ಸುಳಿವು ಸಾಲದೇ ಜಾಣ?

 ಹೂಡು ನಿನ್ನ ತಿಳಿವಿನ ಹೂ ಬಾಣ

ಲೇಖಕರು : ಬಿ.ಜಿ.ರಾಮಚಂದ್ರ ಭಟ್ 

ವಿಜ್ಞಾನ ಶಿಕ್ಷಕರು
ಸರ್ಕಾರಿ ಪ್ರೌಢಶಾಲೆ, ಬ್ಯಾಟರಾಯನಪುರ,
ಮೈಸೂರು ರಸ್ತೆ, ಬೆಂಗಳೂರು

ವ್ಯಂಗ್ಯ ಚಿತ್ರಗಳು - ಸೆಪ್ಟೆಂಬರ್ 2022

 ವ್ಯಂಗ್ಯ ಚಿತ್ರಗಳು - ಸೆಪ್ಟೆಂಬರ್ 2022 

ರಚನೆ : ಶ್ರೀಮತಿ ಜಯಶ್ರೀ ಬಿ ಶರ್ಮ

ರಚನೆ : ಶ್ರೀ ವಿಜಯ್ ಕುಮಾರ್ ಹೆಚ್.ಜಿ.

ಸೆಪ್ಟೆಂಬರ್ ತಿಂಗಳಿನ ಪ್ರಮುಖ ದಿನಾಚರಣೆಗಳು

 ಸೆಪ್ಟೆಂಬರ್ ತಿಂಗಳಿನ ಪ್ರಮುಖ ದಿನಾಚರಣೆಗಳು

ಸೆಪ್ಟೆಂಬರ್ 1 - ರಾಷ್ಟ್ರೀಯ ಪೌಷ್ಟಿಕಾಂಶ ಸಪ್ತಾಹ

ಪೌಷ್ಠಿಕಾಂಶದ ಪ್ರಾಮುಖ್ಯತೆ ಮತ್ತು ಮಾನವ ದೇಹಕ್ಕೆ ಅದರ ಪ್ರಾಮುಖ್ಯತೆ, ಉತ್ತಮ ಆರೋಗ್ಯಕ್ಕಾಗಿ ಜನರಲ್ಲಿ ಅರಿವು ಮೂಡಿಸಲು ಸೆಪ್ಟೆಂಬರ್ 1 ರಿಂದ ಸೆಪ್ಟೆಂಬರ್ 7 ರವರೆಗೆ ರಾಷ್ಟ್ರೀಯ ಪೌಷ್ಟಿಕಾಂಶ ಸಪ್ತಾಹವನ್ನು ಆಚರಿಸಲಾಗುತ್ತದೆ.

ಸೆಪ್ಟೆಂಬರ್ 2 - ವಿಶ್ವ ತೆಂಗಿನಕಾಯಿ ದಿನ

ಬಡತನ ನಿವಾರಣೆಯಲ್ಲಿ ಈ ಬೆಳೆಯ ಮಹತ್ವವನ್ನು ಜನರಿಗೆ ತಿಳಿಸಲು ಪ್ರತಿ ವರ್ಷ ಸೆಪ್ಟೆಂಬರ್ 2 ರಂದು ವಿಶ್ವ ತೆಂಗಿನಕಾಯಿ ದಿನವನ್ನು ಆಚರಿಸಲಾಗುತ್ತದೆ. ಈ ದಿನವು ಏಷ್ಯನ್ ಪೆಸಿಫಿಕ್ ತೆಂಗಿನಕಾಯಿ ಸಮುದಾಯ ರಚನಾ ದಿನ - Asian Pacific Coconut Community (APCC)ವಾಗಿದೆ.

ಸೆಪ್ಟೆಂಬರ್ 5 - ರಾಷ್ಟ್ರೀಯ ಶಿಕ್ಷಕರ ದಿನ

ಭಾರತದ ಎರಡನೇ ರಾಷ್ಟ್ರಪತಿ ಡಾ. ಸರ್ವಪಲ್ಲಿ ರಾಧಾಕೃಷ್ಣನ್ ಅವರ ಜನ್ಮದಿನದಂದು ಪ್ರತಿ ವರ್ಷ ಸೆಪ್ಟೆಂಬರ್ 5 ರಂದು ಭಾರತದಲ್ಲಿ ಶಿಕ್ಷಕರ ದಿನವನ್ನು ಆಚರಿಸಲಾಗುತ್ತದೆ. ಈ ದಿನದಂದು ಜವಾಬ್ದಾರಿಯುತ ವ್ಯಕ್ತಿಗಳನ್ನು ಮಾಡುವಲ್ಲಿ ಶಿಕ್ಷಕರ ಪ್ರಯತ್ನವನ್ನು  ಪ್ರಶಂಸಿಸಲಾಗುತ್ತದೆ.

ಸೆಪ್ಟೆಂಬರ್ 8 - ಅಂತರಾಷ್ಟ್ರೀಯ ಸಾಕ್ಷರತಾ ದಿನ

ಸಾಕ್ಷರತೆಯ ಮಹತ್ವದ ಬಗ್ಗೆ ಜನರಿಗೆ ಅರಿವು ಮೂಡಿಸಲು ಪ್ರತಿ ವರ್ಷ ಸೆಪ್ಟೆಂಬರ್ 8 ರಂದು ಅಂತರಾಷ್ಟ್ರೀಯ ಸಾಕ್ಷರತಾ ದಿನವನ್ನು ಆಚರಿಸಲಾಗುತ್ತದೆ. ಇದು ಯುಎನ್‌ಗಳ ಸುಸ್ಥಿರ ಅಭಿವೃದ್ಧಿ ಗುರಿಗಳ ಪ್ರಮುಖ ಅಂಶವಾಗಿದೆ

ಸೆಪ್ಟೆಂಬರ್ 8 - ವಿಶ್ವ ಭೌತಿಕ ಚಿಕಿತ್ಸಾ ದಿನ

ಪ್ರಪಂಚದಾದ್ಯಂತದ ದೈಹಿಕ ಚಿಕಿತ್ಸಕರಿಗೆ ವೃತ್ತಿಯ ಪ್ರಮುಖ ಕೊಡುಗೆಯ ಬಗ್ಗೆ ಜನ ಜಾಗೃತಿ ಮೂಡಿಸಲು ಮತ್ತು ಜನರ ಯೋಗಕ್ಷೇಮ ಮತ್ತು ಆರೋಗ್ಯವನ್ನು ಸುಧಾರಿಸಲು ಅವಕಾಶವನ್ನು ಒದಗಿಸಲು ಪ್ರತಿ ವರ್ಷ ಸೆಪ್ಟೆಂಬರ್ 8 ರಂದು ವಿಶ್ವ ವಿಶ್ವ ಭೌತಿಕ ಚಿಕಿತ್ಸಾ  ದಿನವನ್ನು ಆಚರಿಸಲಾಗುತ್ತದೆ.

10 ಸೆಪ್ಟೆಂಬರ್ - ವಿಶ್ವ ಆತ್ಮಹತ್ಯೆ ತಡೆ/ ನಿವಾರಣಾ ದಿನ (WSPD)

ಹೆಚ್ಚುತ್ತಿರುವ ಆತ್ಮಹತ್ಯೆ ಪ್ರಕರಣಗಳನ್ನು ತಡೆಗಟ್ಟಲು ಜಾಗೃತಿ ಮೂಡಿಸಲು ಪ್ರತಿ ವರ್ಷ ಸೆಪ್ಟೆಂಬರ್ 10 ರಂದು ವಿಶ್ವ ಆತ್ಮಹತ್ಯೆ ತಡೆಗಟ್ಟುವ ದಿನವನ್ನು (WSPD) ಆಚರಿಸಲಾಗುತ್ತದೆ. ಈ ದಿನವನ್ನು WHO ಮತ್ತು ಇಂಟರ್ನ್ಯಾಷನಲ್ ಅಸೋಸಿಯೇಷನ್ ​​ಫಾರ್ ಸುಸೈಡ್ ಪ್ರಿವೆನ್ಷನ್ (IASP) ಸಂಸ್ಥೆಗಳು ಆಯೋಜಿಸುತ್ತವೆ.

ಸೆಪ್ಟೆಂಬರ್ 11 - ರಾಷ್ಟ್ರೀಯ ಅರಣ್ಯ ಹುತಾತ್ಮರ ದಿನ

ಸೆಪ್ಟೆಂಬರ್ 11 ಐತಿಹಾಸಿಕ ಮಹತ್ವವನ್ನು ಹೊಂದಿದೆ ಮತ್ತು ಈ ಕಾರಣದಿಂದಾಗಿ ದಿನಾಂಕವನ್ನು ರಾಷ್ಟ್ರೀಯ ಅರಣ್ಯ ಹುತಾತ್ಮರ ದಿನವನ್ನಾಗಿ ಆಯ್ಕೆ ಮಾಡಲಾಗಿದೆ.

1730 ರಲ್ಲಿ, ಈ ದಿನ, ಅಮೃತಾ ದೇವಿ ನೇತೃತ್ವದ ಬಿಷ್ಣೋಯ್ ಬುಡಕಟ್ಟಿನ 360 ಕ್ಕೂ ಹೆಚ್ಚು ಜನರು ಮರಗಳನ್ನು ಕಡಿಯುವುದನ್ನು ವಿರೋಧಿಸಿದರು. ಮರಗಳನ್ನು ಉಳಿಸುವ ಅವರ ಪ್ರತಿಭಟನೆ ನಡೆಸಿ ಆತ್ಮಾರ್ಪಣೆಗೈದರು. ಮುಂದೆ ಅಪ್ಪಿಕೋ ಚಳುವಳಿಗೆ ಇದೇ ಸ್ಫೂರ್ತಿಯಾಯಿತು.

ಸೆಪ್ಟೆಂಬರ್ ಎರಡನೇ ಶನಿವಾರ  - ವಿಶ್ವ ಪ್ರಥಮ ಚಿಕಿತ್ಸಾ ದಿನ

ವಿಶ್ವ ಪ್ರಥಮ ಚಿಕಿತ್ಸಾ ದಿನವನ್ನು ಸೆಪ್ಟೆಂಬರ್ ಎರಡನೇ ಶನಿವಾರದಂದು ಆಚರಿಸಲಾಗುತ್ತದೆ. ಬಿಕ್ಕಟ್ಟಿನ ಸಂದರ್ಭದಲ್ಲಿ ಪ್ರಥಮ ಚಿಕಿತ್ಸೆ ಹೇಗೆ ಜೀವಗಳನ್ನು ಉಳಿಸುತ್ತದೆ ಎಂಬುದರ ಕುರಿತು ಈ ದಿನ ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸಲಾಗುತ್ತದೆ. ಪ್ರಥಮ ಚಿಕಿತ್ಸೆಯು ಎಲ್ಲಾ ಜನರಿಗೆ ಲಭ್ಯವಾಗಬೇಕು ಮತ್ತು ಅಭಿವೃದ್ಧಿಶೀಲ ಸಮಾಜಗಳ ಪ್ರಮುಖ ಭಾಗವಾಗಿರಬೇಕು.

15 ಸೆಪ್ಟೆಂಬರ್ - ಇಂಜಿನಿಯರ್ಸ್ ಡೇ

ವಿಶ್ವವಿಖ್ಯಾತ ಭಾರತೀಯ ಇಂಜಿನಿಯರ್ ಭಾರತ ರತ್ನ ಮೋಕ್ಷಗುಂಡಂ ವಿಶ್ವೇಶ್ವರಯ್ಯ ಅವರಿಗೆ ಗೌರವ ಸಲ್ಲಿಸಲು ಪ್ರತಿ ವರ್ಷ ಸೆಪ್ಟೆಂಬರ್ 15 ರಂದು ಭಾರತದಲ್ಲಿ ಎಂಜಿನಿಯರ್ ದಿನವನ್ನು ಆಚರಿಸಲಾಗುತ್ತದೆ.

ಸೆಪ್ಟೆಂಬರ್ 16 - ವಿಶ್ವ ಓಝೋನ್ ದಿನ

ವಿಶ್ವ ಓಝೋನ್ ದಿನವನ್ನು ವಾರ್ಷಿಕವಾಗಿ ಸೆಪ್ಟೆಂಬರ್ 16 ರಂದು ಆಚರಿಸಲಾಗುತ್ತದೆ. 1987 ರಲ್ಲಿ ಈ ದಿನದಂದು, ಮಾಂಟ್ರಿಯಲ್ ಪ್ರೋಟೋಕಾಲ್‌ಗೆ ಸಹಿ ಹಾಕಲಾಯಿತು. 1994 ರಿಂದ, ವಿಶ್ವ ಓಝೋನ್ ದಿನವನ್ನು ಆಚರಿಸಲಾಗುತ್ತದೆ ಇದನ್ನು ವಿಶ್ವಸಂಸ್ಥೆಯ ಜನರಲ್ ಅಸೆಂಬ್ಲಿ ಆರಂಭಿಸಿತು. ಈ ದಿನವು ಓಝೋನ್ ಪದರದ ಸವಕಳಿಯ ಬಗ್ಗೆ ಮತ್ತು ಅದನ್ನು ಸಂರಕ್ಷಿಸಲು ಪರಿಹಾರಗಳನ್ನು ಹುಡುಕುವ ಬಗ್ಗೆ ಜನರಲ್ಲಿ ಅರಿವು ಮೂಡಿಸುತ್ತದೆ.

ಸೆಪ್ಟೆಂಬರ್ 18 - ವಿಶ್ವ ಬಿದಿರು ದಿನ

ಜಾಗತಿಕವಾಗಿ ಬಿದಿರಿನ ಬಗ್ಗೆ ಜಾಗೃತಿಯನ್ನು ಹೆಚ್ಚಿಸಲು ಸೆಪ್ಟೆಂಬರ್ 18 ರಂದು ದಿನವನ್ನು ಆಚರಿಸಲಾಗುತ್ತದೆ.

ಸೆಪ್ಟೆಂಬರ್ (ಮೂರನೇ ಶನಿವಾರ) - ಅಂತರಾಷ್ಟ್ರೀಯ ರೆಡ್ ಪಾಂಡಾ ದಿನ

ಇದನ್ನು ಸೆಪ್ಟೆಂಬರ್ ತಿಂಗಳ ಮೂರನೇ ಶನಿವಾರದಂದು ಆಚರಿಸಲಾಗುತ್ತದೆ. ಸಂರಕ್ಷಣೆಗಾಗಿ ಅವರ ತುರ್ತು ಅಗತ್ಯದ ಬಗ್ಗೆ ದಿನವು ಜಾಗೃತಿ ಮೂಡಿಸುತ್ತದೆ.

ಸೆಪ್ಟೆಂಬರ್ 21 - ವಿಶ್ವ ಆಲ್ಝೈಮರ್‌ ದಿನ

ಬುದ್ಧಿಮಾಂದ್ಯತೆಯಿಂದ ರೋಗಿಯು ಎದುರಿಸುವ ಸವಾಲುಗಳ ಬಗ್ಗೆ ಜನರಲ್ಲಿ ಜಾಗೃತಿ ಮೂಡಿಸಲು ಸೆಪ್ಟೆಂಬರ್ 21 ರಂದು ವಿಶ್ವ ಆಲ್ಝೈಮರ್ಸ್ ದಿನವನ್ನು ಆಚರಿಸಲಾಗುತ್ತದೆ. 2012 ರಲ್ಲಿ, ವಿಶ್ವ ಆಲ್ಝೈಮರ್ನ ದಿನಾಚರಣೆಯನ್ನು  ಪ್ರಾರಂಭಿಸಲಾಯಿತು.

ಸೆಪ್ಟೆಂಬರ್ 22 – ಕ್ಯಾನ್ಸರ್ ರೋಗಿಗಳ ಕಲ್ಯಾಣದಿನ- ರೋಸ್‌ ದಿನ

ಕ್ಯಾನ್ಸರ್ ರೋಗಿಗಳ ಕಲ್ಯಾಣಕ್ಕಾಗಿ, ಕ್ಯಾನ್ಸರ್ ರೋಗಿಗಳಿಗೆ ಕ್ಯಾನ್ಸರ್ ಗುಣಪಡಿಸುವ ಭರವಸೆಯನ್ನು ನೀಡುವ ಸಲುವಾಗಿ ಸೆಪ್ಟೆಂಬರ್ 22 ರಂದು ಈ ದಿನವನ್ನು ಆಚರಿಸಲಾಗುತ್ತದೆ. ಅಪರೂಪದ ರಕ್ತದ ಕ್ಯಾನ್ಸರ್ ಅನ್ನು ಮೊದಲಿಗೆ ಪತ್ತೆ ಹಚ್ಚಿದಾಗ ಕೆನಡಾದ 12 ವರ್ಷದ ಮೆಲಿಂಡಾ ರೋಸ್ ಭರವಸೆಯನ್ನು ಕಳೆದುಕೊಳ್ಳಲಿಲ್ಲ. ಮೆಲಿಂಡಾ ರೋಸ್ ಅವರ ನೆನಪಿಗಾಗಿ ಈ ದಿನವನ್ನು ಆಚರಿಸಲಾಗುತ್ತದೆ.

ಸೆಪ್ಟೆಂಬರ್ 22 - ವಿಶ್ವ ಘೇಂಡಾಮೃಗ ದಿನ

ಇದನ್ನು ಪ್ರತಿ ವರ್ಷ ಸೆಪ್ಟೆಂಬರ್ 22 ರಂದು ಆಚರಿಸಲಾಗುತ್ತದೆ. ಘೇಂಡಾಮೃಗಗಳ ಕುರಿತು ಜಾಗೃತಿ ಮೂಡಿಸಲು ಅವುಗಳಿಗೆ ಸುರಕ್ಷಿತ ನೈಸರ್ಗಿಕ ಆವಾಸಸ್ಥಾನವನ್ನು ನಿರ್ಮಿಸುವ ಸಲುವಾಗಿ ಈ ದಿನವನ್ನು ಆಚರಿಸಲಾಗುತ್ತದೆ.

ಸೆಪ್ಟೆಂಬರ್ 23 - ಅಂತರಾಷ್ಟ್ರೀಯ ಸಂಕೇತ ಭಾಷೆಗಳ ದಿನ

ಸೆಪ್ಟೆಂಬರ್ 23 ರಂದು, ಯುಎನ್ ಜನರಲ್ ಅಸೆಂಬ್ಲಿ ಈ ದಿನವನ್ನು ಅಂತರಾಷ್ಟ್ರೀಯ ಸಂಕೇತ ಭಾಷೆಗಳ ದಿನವೆಂದು ಘೋಷಿಸಿತು. ಎಲ್ಲಾ ಕಿವುಡರು ಮತ್ತು ಇತರ ಸಂಕೇತ ಭಾಷೆಯ ಬಳಕೆದಾರರ ಭಾಷಾ ಗುರುತನ್ನು ಮತ್ತು ಸಾಂಸ್ಕೃತಿಕ ವೈವಿಧ್ಯತೆಯನ್ನು ಬೆಂಬಲಿಸಲು ಮತ್ತು ರಕ್ಷಿಸಲು ದಿನವು ಒಂದು ಅನನ್ಯ ಅವಕಾಶವನ್ನು ಒದಗಿಸುತ್ತದೆ.

ಸೆಪ್ಟೆಂಬರ್ 25 - ವಿಶ್ವ ಫಾರ್ಮಾಸಿಸ್ಟ್ ಡೇ 

ಇದನ್ನು ಸೆಪ್ಟೆಂಬರ್ 25 ರಂದು ಆಚರಿಸಲಾಗುತ್ತದೆ. 2009 ರಲ್ಲಿ, ಟರ್ಕಿಯ ಇಸ್ತಾನ್‌ಬುಲ್‌ನಲ್ಲಿನ ಇಂಟರ್ನ್ಯಾಷನಲ್ ಫಾರ್ಮಾಸ್ಯುಟಿಕಲ್ ಫೆಡರೇಶನ್ (ಎಫ್‌ಐಪಿ) ಕಾಂಗ್ರೆಸ್ 25 ನೇ ಸೆಪ್ಟೆಂಬರ್ ಅನ್ನು ವಾರ್ಷಿಕ ವಿಶ್ವ ಫಾರ್ಮಾಸಿಸ್ಟ್ ಡೇ (ಡಬ್ಲ್ಯೂಪಿಡಿ) ಎಂದು ಗೊತ್ತುಪಡಿಸಿತು.

ಸೆಪ್ಟೆಂಬರ್ 26 - ವಿಶ್ವ ಗರ್ಭನಿರೋಧಕ ದಿನ

ವಿಶ್ವ ಗರ್ಭನಿರೋಧಕ ದಿನವನ್ನು ವಾರ್ಷಿಕವಾಗಿ ಸೆಪ್ಟೆಂಬರ್ 26 ರಂದು ಆಚರಿಸಲಾಗುತ್ತದೆ. ಲಭ್ಯವಿರುವ ಗರ್ಭನಿರೋಧಕ ವಿಧಾನಗಳ ಬಗ್ಗೆ ಜಾಗೃತಿಯನ್ನು ಸುಧಾರಿಸಲು ಮತ್ತು ಯುವಜನರು ತಮ್ಮ ಲೈಂಗಿಕ ಮತ್ತು ಸಂತಾನೋತ್ಪತ್ತಿ ಆರೋಗ್ಯದ ಬಗ್ಗೆ ತಿಳುವಳಿಕೆಯುಳ್ಳ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಅನುವು ಮಾಡಿಕೊಡುವ ಜಾಗತಿಕ ಅಭಿಯಾನವಾಗಿದೆ.

ಸೆಪ್ಟೆಂಬರ್ 26 - ವಿಶ್ವ ಪರಿಸರ ಆರೋಗ್ಯ ದಿನ

ಇಂಟರ್ನ್ಯಾಷನಲ್ ಫೆಡರೇಶನ್ ಆಫ್ ಎನ್ವಿರಾನ್ಮೆಂಟಲ್ ಹೆಲ್ತ್ ಈ ದಿನವನ್ನು ಘೋಷಿಸಿದೆ.

ಸೆಪ್ಟೆಂಬರ್ ನಾಲ್ಕನೇ ಭಾನುವಾರ - ವಿಶ್ವ ನದಿಗಳ ದಿನ

ವಿಶ್ವ ನದಿಗಳ ದಿನವನ್ನು ಸೆಪ್ಟೆಂಬರ್ ಕೊನೆಯ ಭಾನುವಾರದಂದು ಆಚರಿಸಲಾಗುತ್ತದೆ. ದಿನವು ನದಿಗಳ ಪ್ರಾಮುಖ್ಯತೆಯನ್ನು ಎತ್ತಿ ತೋರಿಸುತ್ತದೆ ಮತ್ತು ಜಾಗೃತಿ ಮೂಡಿಸುತ್ತದೆ ಮತ್ತು ಪ್ರಪಂಚದಾದ್ಯಂತ ನೀರು, ನದಿಗಳನ್ನು ಸುಧಾರಿಸಲು ಮತ್ತು ಉಳಿಸಲು ಜನರನ್ನು ಉತ್ತೇಜಿಸುತ್ತದೆ. ನಮ್ಮ ಜಲಮೂಲಗಳ ಬಗ್ಗೆ ಕಾಳಜಿ ವಹಿಸುವುದು ಅವಶ್ಯಕ.

ಸೆಪ್ಟೆಂಬರ್ 28 - ವಿಶ್ವ ರೇಬೀಸ್ ದಿನ

ರೇಬೀಸ್ ತಡೆಗಟ್ಟುವಿಕೆಯ ಬಗ್ಗೆ ಜನರಿಗೆ ಅರಿವು ಮೂಡಿಸಲು ಮತ್ತು ಈ ಭಯಾನಕ ರೋಗವನ್ನು ಸೋಲಿಸುವಲ್ಲಿ ಪ್ರಗತಿಯನ್ನು ಎತ್ತಿ ತೋರಿಸಲು ಪ್ರತಿ ವರ್ಷ ಸೆಪ್ಟೆಂಬರ್ 28 ರಂದು ವಿಶ್ವ ರೇಬೀಸ್ ದಿನವನ್ನು ಆಚರಿಸಲಾಗುತ್ತದೆ.

ಸೆಪ್ಟೆಂಬರ್ 29 - ವಿಶ್ವ ಹೃದಯ ದಿನ

ವಿಶ್ವ ಹೃದಯ ದಿನವನ್ನು ವಾರ್ಷಿಕವಾಗಿ ಸೆಪ್ಟೆಂಬರ್ 29 ರಂದು ಆಚರಿಸಲಾಗುತ್ತದೆ. ಈ ದಿನವು ಹೃದಯ ಕಾಯಿಲೆ ಮತ್ತು ಪಾರ್ಶ್ವವಾಯು ಬಗ್ಗೆ ಜನರಿಗೆ ತಿಳಿಸುತ್ತದೆ.

ಸೆಪ್ಟೆಂಬರ್ 30 - ಅಂತರಾಷ್ಟ್ರೀಯ ಅನುವಾದ ದಿನ

ಪ್ರತಿ ವರ್ಷ ಸೆಪ್ಟೆಂಬರ್ 30 ರಂದು ಅಂತರರಾಷ್ಟ್ರೀಯ ಅನುವಾದ ದಿನವನ್ನು ಆಚರಿಸಲಾಗುತ್ತದೆ. ಈ ದಿನವು ಭಾಷಾ ವೃತ್ತಿಪರರ ಕೆಲಸಕ್ಕೆ ಗೌರವ ಸಲ್ಲಿಸಲು ಅವಕಾಶವನ್ನು ಒದಗಿಸುತ್ತದೆ. ರಾಷ್ಟ್ರಗಳನ್ನು ಒಟ್ಟಾಗಿ ಮಾಡುವಲ್ಲಿ ಮತ್ತು ವಿಶ್ವ ಶಾಂತಿ ಮತ್ತು ಭದ್ರತೆಯನ್ನು ಬಲಪಡಿಸುವಲ್ಲಿ ಇದು ಪ್ರಮುಖ ಪಾತ್ರ ವಹಿಸುತ್ತದೆ.

- ಶ್ರೀ ಬಿ.ಜಿ.ರಾಮಚಂದ್ರ ಭಟ್

ಸವಿಜ್ಞಾನ ಆಗಸ್ಟ್ - 2022 ರ ಲೇಖನಗಳು

ಸವಿಜ್ಞಾನ ಆಗಸ್ಟ್ - 2022 ರ ಲೇಖನಗಳು

• ಸಂಪಾದಕರ ಡೈರಿಯಿಂದ . . . . . - ಡಾ. ಟಿ.ಎ.ಬಾಲಕೃಷ್ಣ ಅಡಿಗ
• ಗಣಿತಾನಂದ ಡಿ ಆರ್ ಕಾಪ್ರೆಕರ್ - ಲೇಖಕರು : ಶ್ರೀ ಸುರೇಶ ಸಂಕೃತಿ, 
• ವಿದ್ಯುತ್ ಎಂಬ ಮಹದುಪಕಾರಿ ಯಾಮಾರಿದರೆ ಬಲು ಅಪಾಯಕಾರಿ ! - ಲೇಖನ: ರೋಹಿತ್ ವಿ ಸಾಗರ್
• ರಣಹದ್ದು : ಕಾಣದಾಗುತ್ತಿದೆ, ಸದ್ದು ! - ಲೇಖಕರು : ಶ್ರೀ ಡಿ. ಕೃಷ್ಣಚೈತನ್ಯ
• ನಾವು ವಿಷವಾಯು ಉಸಿರಾಡುತ್ತಿದ್ದೇವೆಯೆ? - ಲೇಖಕರು : ಶ್ರೀ ಗಜಾನನ ಎನ್. ಭಟ್ 
• ಶಿಕ್ಷಣ ಕ್ಷೇತ್ರದಲ್ಲಿ ತಂತ್ರಜ್ಞಾನದ ಸವಿಬೆಲ್ಲ ಉಣಿಸುತ್ತಿರುವ ಭೀಮಪ್ಪ ಬೆಲ್ಲದ - ಲೇಖಕರು : ರಾಮಚಂದ್ರಭಟ್‌ ಬಿ.ಜಿ.
• ಮೈಕೊಡವಿಯೆದ್ದಳು ಕ್ಷಮಯಾ ಧರಿತ್ರಿ ಭೀಭತ್ಸ ರೌದ್ರ ಕಾಲ ರಾತ್ರಿ……             - ಡಾ. ಸಂಧ್ಯಾ ಡಿ.ಎನ್.
• ಸವಿಜ್ಞಾನ ಪದಬಂಧ-8 ಲೇಖಕರು : ವಿಜಯಕುಮಾರ್‌.ಹೆಚ್.ಜಿ.
• ವ್ಯಂಗ್ಯ ಚಿತ್ರಗಳು - ಆಗಸ್ಟ್ 2022 ರಚನೆ : ಶ್ರೀಮತಿ ಜಯಶ್ರೀ ಬಿ ಶರ್ಮ ಮತ್ತು ಶ್ರೀ ವಿಜಯ್ ಕುಮಾರ್ ಹೆಚ್.ಜಿ.
• ಒಗಟುಗಳು : ಆಗಸ್ಟ್ 2022 ರಚನೆ: ಶ್ರೀಮತಿ ನಾಗವೇಣಿ ಬಿ
• ಆಗಸ್ಟ್ ತಿಂಗಳಿನ ಪ್ರಮುಖ ದಿನಾಚರಣೆಗಳು : ಶ್ರೀ ರಾಮಚಂದ್ರಭಟ್‌ ಬಿ.ಜಿ.

ಸಂಪಾದಕರ ಡೈರಿಯಿಂದ . . . . . . . . .

 ಸಂಪಾದಕರ ಡೈರಿಯಿಂದ . . . . . . . . .

ಈ ತಿಂಗಳು ದೇಶದಾದ್ಯಂತ ಸ್ವಾತಂತ್ರ್ಯೋತ್ಸವದ ಅಮೃತ ಮಹೋತ್ಸವದ ಸಂಭ್ರಮ. ತಾಯಿ ಭಾರತಿಗೆ ಅಮೃತದಾರತಿಯ ಸಡಗರ ಎಲ್ಲೆಲ್ಲೂ ಕಾಣುತ್ತಿದೆ. ಜೊತೆಗೆ, ಹಬ್ಬಗಳ ಸಾಲು ಸಾಲು. ಈ ಸಡಗರದ ಮಧ್ಯೆ ‘ಸವಿಜ್ಞಾನ’ದ ಆಗಸ್ಟ್ ತಿಂಗಳ ಸಂಚಿಕೆ ಬಿಡುಗಡೆಯಾಗುತ್ತಿದೆ. ನಮ್ಮ ಎಲ್ಲ ಓದುಗರಿಗೆ ಈ ಸಂದರ್ಭದಲ್ಲಿ ‘ಸವಿಜ್ಞಾನ’ ತಂಡದ ಶುಭ ಹಾರೈಕೆಗಳು. 

ಈ ಬಾರಿಯ ಸಂಚಿಕೆಯಲ್ಲಿ ವೈಶಿಷ್ಟ್ಯದ ಹಲವು ಲೇಖನಗಳಿವೆ. ಭಾರತೀಯ ಗಣಿತಲೋಕಕ್ಕೆ ಗಣನೀಯ ಕೊಡುಗೆ ನೀಡಿಯೂ ಹೆಚ್ಚು ಪ್ರಸಿದ್ಧಿ ಪಡೆಯದ ಡಿ.ಆರ. ಕಾಪ್ರೆಕರ್ ಅವರ ಸಾಧನೆಯ ಬಗ್ಗೆ ಪರಿಚಯಾತ್ಮಕ ಲೇಖನವೊಂದನ್ನು ಬರೆದಿದ್ದಾರೆ, ಸುರೇಶ್ ಸಂಕೃತಿ ಅವರು. ವಿದ್ಯುತ್‌ನ ಉಪಯೋಗಗಳ ಹಾಗೂ ಅಪಾಯಗಳ ಬಗ್ಗೆ ಜಾಗೃತಿ ಮೂಡಿಸುವ  ಪ್ರಯತ್ನ ಮಾಡಿದ್ದಾರೆ, ರೋಹಿತ್ ಸಾಗರ್ ಅವರು. ವನ್ಯಜೀವಿ ತಜ್ಞ, ಕೃಷ್ಣ ಚೈತನ್ಯ ಅವರಿಂದ ಈ ಬಾರಿ ರಣಹದ್ದುಗಳ ಜೀವನ ಶೈಲಿಯನ್ನು ಪರಿಚಯಿಸುವ ಲೇಖನವಿದೆ. ನಾವು ಉಸಿರಾಡುತ್ತಿರುವ ಗಾಳಿ ಹೇಗೆ ವಿಷಪೂರಿತವಾಗುತ್ತಿದೆ ಎಂಬುದನ್ನು ವಿವರಿಸಿದ್ದಾರೆ ಗಜಾನನ ಭಟ್ ತಮ್ಮ ಲೇಖನದಲ್ಲಿ. ಸಾಧಕ ಶಿಕ್ಷಕರಾಗಿ ೨೦೨೧ರ ಸಾಲಿನ ಸಿ..ಎನ್ ಆರ್. ರಾವ್ ಪ್ರಶಸ್ತಿ ಪಡೆದ ಶ್ರೀ ಭೀಮಪ್ಪ ಬೆಲ್ಲದ್   ಅವರನ್ನು ಪರಿಚಯಿಸಿದ್ದಾರೆ, ರಾಮಚಂದ್ರ ಭಟ್ ಅವರು. ಈ ಬಾರಿಯ ವಿಶೇಷವೆಂದರೆ, ಕರೋನ ಭೂಮಿಗೆ ತಂದಿತ್ತ ಸಂಕಟವನ್ನು ಭಾವಪೂರ್ಣವಾಗಿ ತಮ್ಮ ಕವಿತೆಯಲ್ಲಿ ವಿವರಿಸಿದ್ದಾರೆ, ಶಿಕ್ಷಕಿ ಡಾ. ಡಿ.ಎನ್, ಸಂಧ್ಯಾ ಅವರು.

ಇವೆಲ್ಲದರ ಜೊತೆಗೆ, ವಿಜ್ಞಾನಕ್ಕೆ ಸಂಬಂಧಿಸಿದ ನಮ್ಮ ಸ್ಥಿರ ಅಂಕಣಗಳಾದ, ಪದಬಂಧ, ಒಗಟುಗಳು ಹಾಗೂ ವ್ಯಂಗ್ಯ ಚಿತ್ರಗಳು ನಿಮ್ಮನ್ನು ರಂಜಿಸಲಿವೆ. ಸಂಚಿಕೆಯ ಎಲ್ಲ ಲೇಖನಗಳನ್ನು ಹಾಗೂ ಅಂಕಣಗಳನ್ನು ಓದಿ ನಿಮ್ಮ ಪ್ರತಿಕ್ರಿಯೆಯನ್ನು ದಾಖಲಿಸಿ

                                                                                                                     ಪ್ರಧಾನ ಸಂಪಾದಕರು

ಗಣಿತಾನಂದ ಡಿ ಆರ್ ಕಾಪ್ರೆಕರ್

ಗಣಿತಾನಂದ ಡಿ ಆರ್ ಕಾಪ್ರೆಕರ್

ಲೇಖಕರು : ಸುರೇಶ ಸಂಕೃತಿ

ಗಣಿತ, ವಿಜ್ಞಾನ ಬೋಧಕರು,

ನಂದಾಶ್ರೀ ಹತ್ತಿರ, ಹೊಸಕೋಟೆ

ಬೆಂಗಳೂರು ಗ್ರಾಮಾಂತರ ಜಿಲ್ಲೆ

ಗಣಿತ ಲೋಕಕ್ಕೆ ಪ್ರಮುಖ ಕೊಡುಗೆಗಳನ್ನು ನೀಡಿದವರಲ್ಲಿ ಅನೇಕ ಭಾರತೀಯರೂ ಇದ್ದಾರೆ. ಅಂಥ ಬಹಳಷ್ಟು ಮಂದಿ ಯಾವುದೇ ಪ್ರಸಿದ್ಧಿ, ಗೌರವ  ಪಡೆಯದೆ ತೆರೆ ಮರೆಯಲ್ಲೇ ಉಳಿದು ಹೋಗಿದ್ದಾರೆ. ಅಂಥ ಮೇಧಾವಿಗಳಲ್ಲಿ ಒಬ್ಬರಾಗಿದ್ದ ಡಿ.ಆರ್.ಕಾಪ್ರೆಕರ್‌ ಅವರ ಪರಿಚಯವನ್ನು ಈ ಲೇಖನದಲ್ಲಿ ಕಟ್ಟಿಕೊಟ್ಟಿದ್ದಾರೆ, ಶಿಕ್ಷಕ ಶ್ರೀ ಸುರೇಶ್‌ ಸಂಕೃತಿ ಅವರು.

ವಿದ್ಯುತ್ ಎಂಬ ಮಹದುಪಕಾರಿ ಯಾಮಾರಿದರೆ ಬಲು ಅಪಾಯಕಾರಿ !

ವಿದ್ಯುತ್ ಎಂಬ ಮಹದುಪಕಾರಿ ಯಾಮಾರಿದರೆ ಬಲು ಅಪಾಯಕಾರಿ !

ಲೇಖನ: ರೋಹಿತ್ ವಿ ಸಾಗರ್ 

ಪ್ರಾಂಶುಪಾಲರು,

ಹೊಂಗಿರಣ ಸ್ವತಂತ್ರ ಪದವಿಪೂರ್ವ ಕಾಲೇಜು

ಸಾಗರ

ಇಂದು ವಿದ್ಯುತ್‌ಅನ್ನು ಅವಲಂಬಿಸದೇ ನಮ್ಮ ಜೀವನವೇ ಸಾಗುವುದಿಲ್ಲ ಎಂಬ ಸ್ಥಿತಿಗೆ ನಾವು ತಲುಪಿದ್ದೇವೆ. ವಿದ್ಯುತ್ನ ಉಪಯುಕ್ತತೆ ಮತ್ತು ಅಪಾಯಗಳ ಬಗ್ಗೆ ಸೂಕ್ತ ಮಾಹಿತಿ ನೀಡುವ ಈ ಲೇಖನವನ್ನು ಬರೆದವರು ʼಸವಿಜ್ಞಾನʼ ತಂಡದ ಶಿಕ್ಷಕ ರೋಹಿತ್‌ ಸಾಗರ್‌ ಅವರು.

ರಣಹದ್ದು : ಕಾಣದಾಗುತ್ತಿದೆ, ಸದ್ದು!

ರಣಹದ್ದು : ಕಾಣದಾಗುತ್ತಿದೆ, ಸದ್ದು!

ಲೇಖಕರು : ಶ್ರೀ ಕೃಷ್ಣ ಚೈತನ್ಯ

ವಿಜ್ಞಾನ ಮಾರ್ಗದರ್ಶಕರು ಹಾಗು ವನ್ಯಜೀವಿ ತಜ್ಞರು.

ಗೋಣಿಕೊಪ್ಪಲು ಪ್ರೌಢಶಾಲೆ. ಗೋಣಿಕೊಪ್ಪಲು.

ಕೊಡಗು ಜಿಲ್ಲೆ.

ಇತ್ತೀಚಿನ ವರ್ಷಗಳಲ್ಲಿ ರಣಹದ್ದುಗಳು ನೋಡಲು ಸಿಗುವುದು ಬಹು ಅಪರೂಪವಾಗಿದೆ. ಇದರ ಹಿನ್ನೆಲೆಯನ್ನು ವಿಶ್ಲೇಷಿಸುವುದರ  ಜೊತೆಗೆ, ರಣಹದ್ದುಗಳ ಜೀವನ ಶೈಲಿಯ ಮೇಲೆ ಬೆಳಕು ಚೆಲ್ಲುವ ಈ ಲೇಖನ ಬರೆದವರು, ವನ್ಯಜೀವಿ ತಜ್ಞ ಹಾಗೂ ಶಿಕ್ಷಕ ಶ್ರೀ ಕೃಷ್ಣ ಚೈತನ್ಯ ಅವರು.

ನಾವು ವಿಷವಾಯು ಉಸಿರಾಡುತ್ತಿದ್ದೇವೆಯೆ?

ನಾವು ವಿಷವಾಯು ಉಸಿರಾಡುತ್ತಿದ್ದೇವೆಯೆ?

ಗಜಾನನ ಎನ್. ಭಟ್ (ಹವ್ಯಾಸಿ ಲೇಖಕರು, ಪ್ರೌಢಶಾಲಾ ವಿಜ್ಞಾನ ಶಿಕ್ಷಕರು,) 

ಸರಕಾರಿ ಪ್ರೌಢಶಾಲೆ, ಉಮ್ಮಚಗಿ,

ಯಲ್ಲಾಪುರ ತಾ., ಶಿರಸಿ ಶೈಕ್ಷಣಿಕ ಜಿಲ್ಲೆ 

ಉತ್ತರ ಕನ್ನಡ

 

ಮಾನವನೂ ಸೇರಿದಂತೆ ಎಲ್ಲ ಜೀವಿಗಳ ಉಸಿರಾಟಕ್ಕೆ ಅತ್ಯವಶ್ಯವಾದ ಅಕ್ಸಿಜನ್‌ ಇಂದು ಶುದ್ಧವಾಗಿ ಉಳಿದಿಲ್ಲ. ನಮ್ಮದೇ ದುಷ್ಕೃತ್ಯಗಳ ಫಲವಾಗಿ ಕೆಲವು ವಿಷಾನಿಲಗಳು ವಾತಾವರಣವನ್ನು ಸೇರುತ್ತಿವೆ. ಈ ಸಮಸ್ಯೆಯ ಬಗ್ಗೆ ಬೆಳಕು ಚೆಲ್ಲುವ ಪ್ರಯತ್ನವನ್ನು  ʼಸವಿಜ್ಞಾನʼ ತಂಡದ ಶಿಕ್ಷಕರಾದ ಶ್ರೀ ಗಜಾನನ ಭಟ್‌, ತಮ್ಮ ಈ ಲೇಖನದಲ್ಲಿ ಮಾಡಿದ್ದಾರೆ.

ಶಿಕ್ಷಣ ಕ್ಷೇತ್ರದಲ್ಲಿ ತಂತ್ರಜ್ಞಾನದ ಸವಿಬೆಲ್ಲ ಉಣಿಸುತ್ತಿರುವ ಭೀಮಪ್ಪ ಬೆಲ್ಲದ

ಶಿಕ್ಷಣ ಕ್ಷೇತ್ರದಲ್ಲಿ ತಂತ್ರಜ್ಞಾನದ ಸವಿಬೆಲ್ಲ ಉಣಿಸುತ್ತಿರುವ ಭೀಮಪ್ಪ ಬೆಲ್ಲದ

ಲೇಖನ : ರಾಮಚಂದ್ರಭಟ್‌ ಬಿ.ಜಿ.

 

ತಂತ್ರಜ್ಞಾನ ಇಂದಿನ ಮೂಲಭೂತ ಶೈಕ್ಷಣಿಕ ಅವಶ್ಯಕತೆ ಎಂದರೆ ತಪ್ಪಾಗಲಾರದು. ಗುಣಮಟ್ಟದ ಶಿಕ್ಷಣದಲ್ಲಿ ತಂತ್ರಜ್ಞಾನದ್ದು ಸಿಂಹಪಾಲು. ವಿಜ್ಞಾನದ ಹಲವಾರು ಅಮೂರ್ತ ಕಲ್ಪನೆಗಳನ್ನು ಅರ್ಥೈಸುವ ದೊಡ್ಡ ಸವಾಲು ಶಿಕ್ಷಕರನ್ನು ಕಾಡುತ್ತಿದೆ.  ಇಂತಹ ಸನ್ನಿವೇಶದಲ್ಲಿ ವಿಜ್ಞಾನದಲ್ಲಿ ತಂತ್ರಜ್ಞಾನವನ್ನು ಕಲಿಕೆಯನ್ನು ಬೆಲ್ಲದಂತೆ ಸವಿಯಾಗಿಸಿ ಮಕ್ಕಳಲ್ಲಿ ವಿಜ್ಞಾನದಲ್ಲಿ ಆಸಕ್ತಿ ಮೂಡುವ ಕೈಂಕ್ರರ್ಯದಲ್ಲಿ ತೊಡಗಿ ಯಶಸ್ಸನ್ನು ಕಂಡ ಈ ಬಾರಿಯ Jawaharlal Nehru Centre for Advanced Scientific Research (JNCASR), Bengaluru  ಹಾಗೂ ಪ್ರೊ|| ಸಿ.ಎನ್‌ ಆರ್‌ ರಾವ್‌ ಎಜುಕೇಷನ್‌  ಫೌಂಡೇಷನ್‌ ನೀಡುವ ರಾಷ್ಟ್ರ ಮಟ್ಟದ  Outstanding Science Teacher Prize ಪುರಸ್ಕಾರಕ್ಕೆ ಭಾಜನರಾದ ಸಾಧಕ ಶಿಕ್ಷಕರೇ ಶೀ ಭೀಮಪ್ಪ ಬೆಲ್ಲದ. ಆತ್ಮೀಯ ಸ್ನೇಹಿತರಾದ ಭೀಮಪ್ಪರವರನ್ನು  ಸವಿಜ್ಞಾನದ ತಿಂಗಳ ಶಿಕ್ಷಕರೆಂದು ಪರಿಚಯಿಸಲು ಹೆಮ್ಮೆ ಎನಿಸುತ್ತದೆ .

ಗ್ರಾಮೀಣ ಪ್ರದೇಶದ ಬಡ ವಿದ್ಯಾರ್ಥಿಗಳು ಇಂತಹ ಆಧುನಿಕ ತಂತ್ರಜ್ಞಾನದಿಂದ ವಂಚಿತರಾಗುತ್ತಿದ್ದಾರೆ. ಈ ನಿಟ್ಟಿನಲ್ಲಿ ತಂತ್ರಜ್ಞಾನವನ್ನು ಸರ್ಕಾರಿ ಶಾಲೆಯ ಕನ್ನಡ ಮಾಧ್ಯಮದ ಬಡ ವಿದ್ಯಾರ್ಥಿಗಳಿಗೆ ತಲುಪಿಸುವ ನಿಟ್ಟಿನಲ್ಲಿ ಇಲ್ಲೊಬ್ಬ ಶಿಕ್ಷಕರು ವಿನೂತನ ರೀತಿಯಲ್ಲಿ ಪ್ರಯತ್ನಿಸಿ ರಾಜ್ಯದ ವಿದ್ಯಾರ್ಥಿ ಹಾಗೂ ಶಿಕ್ಷಕರ ಮನೆ ಮಾತಾಗಿದ್ದಾರೆ. ಕೋಳಬಾಳ ಪ್ರೌಢ ಶಾಲೆಯಲ್ಲಿ ತಮ್ಮ ವೃತ್ತಿಜೀವನವನ್ನು ಆರಂಭಿಸಿದ ಭೀಮಪ್ಪನವರು ಪ್ರಸ್ತುತ  ರಾಯಚೂರು ಜಿಲ್ಲೆಯ ಮಸ್ಕಿ ಬಾಲಕಿಯರ ಸರ್ಕಾರಿ ಪ್ರೌಢ ಶಾಲೆಯಲ್ಲಿ ವಿಜ್ಞಾನ ಶಿಕ್ಷಕರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. 

ವಿಜ್ಞಾನವು ಗ್ರಾಮೀಣ ಭಾಗದ ಮಕ್ಕಳಿಗೆ ಕಬ್ಬಿಣದ ಕಡಲೆಯಾಗಿರುವ ಈ ಕಾಲದಲ್ಲಿ ವಿಜ್ಞಾನ ಬೋಧನೆಯಲ್ಲಿ ಭೀಮಪ್ಪನವರು  ಶಾಲೆಯಲ್ಲಿ ಲಭ್ಯವಿರುವ ಸಲಕರಣೆಗಳನ್ನು ಬಳಸಿ ಹೆಚ್ಚು ಹೆಚ್ಚು ಪ್ರಾಯೋಗಿಕ ಚಟುವಟಿಕೆಗಳ ಮೂಲಕ ವಿಜ್ಞಾದ ಪರಿಕಲ್ಪನೆಗಳನ್ನು ಸುಲಭವಾಗಿ ಅನುಕೂಲಿಸುತ್ತಾ ಜ್ಞಾನಕಟ್ಟಿಕೊಳ್ಳುವ ಕಾರ್ಯದಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡು ಶಿಕ್ಷಕರಿಗೆ ಸ್ಫೂರ್ತಿಯ ಸೆಲೆಯಾಗಿದ್ದಾರೆ.

ಬಾಲ್ಯದಿಂದಲೇ ಕಂಪ್ಯೂಟರ್‌ ಕುರಿತ ಅದೇನೋ ಆಸಕ್ತಿ. ಶಿಕ್ಷಕನಾದ ನಂತರ ಕಂಡ ಹೊಸ ಹೊಳಹು ಹಲವಾರು ಡಿಜಿಟಲ್‌ ಸಂಪನ್ಮೂಲಗಳನ್ನು ತಯಾರಿಸಲು ಕಾರಣವಾಯಿತು. ಶಾಲೆಯಲ್ಲಿ ವಿಜ್ಞಾನದ ಕಠಿಣ ಪರಿಕಲ್ಪನೆಗಳನ್ನು ಮಕ್ಕಳಿಗೆ ಅರ್ಥೈಸಲು ತಂತ್ರಜ್ಞಾನಾಧಾರಿತ ಶಿಕ್ಷಣದ ಜೊತೆ ಪ್ರಾಯೋಗಿಕ ತರಗತಿಗಳನ್ನು ಮಿಳಿತಗೊಳಿಸಿದ ಪರಿಣಾಮವಾಗಿ ಪ್ರತಿವರ್ಷವೂ SSLC ವಾರ್ಷಿಕ ಪರೀಕ್ಷೆಯಲ್ಲಿ ಉತ್ತಮ ಫಲಿತಾಂಶದೊಂದಿಗೆ ವಿಜ್ಞಾನ ವಿಷಯದಲ್ಲಿ ಅನೇಕ ಬಾರಿ 100% ಫಲಿತಾಂಶವನ್ನು ಪಡೆಯುತ್ತಿದ್ದಾರೆ.

ಫೆಟ್ ಸಿಮ್ಯುಲೇಷನ್‌, ವರ್ಚುವಲ್‌ ಲ್ಯಾಬ್‌, ಅನಿಮೇಷನ್‌ಗಳು, ಅವೋಗಾಡ್ರೊ ಮುಂತಾದವುಗಳನ್ನು ಬಳಸಿಕೊಂಡು ವಿಜ್ಞಾನದ ಕಠಿಣ ಅಂಶಗಳನ್ನು ಸುಲಭವಾಗಿ ಬೋಧಿಸುತ್ತಿದ್ದಾರೆ. ಇದರೊಂದಿಗೆ ತಮ್ಮ ಬ್ಲಾಗ್‌ ಹಾಗೂ ಆಂಡ್ರಾಯಿಡ್‌ ಆಪ್‌ ಮೂಲಕ ವಿದ್ಯಾರ್ಥಿಗಳಿಗೆ ಕನ್ನಡದಲ್ಲೇ ಸಂಪನ್ಮೂಲಗಳನ್ನು ತಯಾರಿಸಿ, ಅವುಗಳನ್ನು ಉಚಿತವಾಗಿ ನೀಡಿದ್ದಾರೆ. ಇವರು 2016 ರಲ್ಲಿ https://bnbellad.blogspot.com/ ಹೆಸರಿನ ವಿಜ್ಙಾನ ಬ್ಲಾಗ್‌ ಅನ್ನು ರಚಿಸಿ, ಇದರ ಮೂಲಕ ಇವರೇ ಸ್ವತ: ತಯಾರಿದ ನೋಟ್ಸ್‌, ಅಧ್ಯಾಯವಾರು PPT ಗಳು, ಅಧ್ಯಾಯವಾರು ಕ್ವಿಜ್‌ಗಳು, ವೀಡಿಯೋಗಳು, ಅನಿಮೇಷನ್‌ಗಳು ಇನ್ನೂ ಹಲವಾರು ಡಿಜಿಟಲ್‌ ಸಂಪನ್ಮೂಲಗಳನ್ನು ಉಚಿತವಾಗಿ ಬ್ಲಾಗ್‌ನಲ್ಲಿ ನೀಡಿ ರಾಜ್ಯದ ಗ್ರಾಮೀಣ ಬಡ ಪ್ರತಿಭೆಗಳ ಆಶಾಕಿರಣವಾಗಿದ್ದಾರೆ. ರಾಜ್ಯದ ಯಾವುದೇ ವಿದ್ಯಾರ್ಥಿ/ ಶಿಕ್ಷಕರು ಯಾವುದಾದರೂ ವಿಜ್ಞಾನ ಸಂಪನ್ಮೂಲ ಬೇಕಾದರೆ ಮೊದಲು ನೆನಪಾಗುವುದೇ ಇವರ ಬ್ಲಾಗ್‌ ಎಂದರೆ ನಿಜಕ್ಕೂ ಹೆಮ್ಮೆಯ ವಿಚಾರ. ಅವರ ಬಾಗ್‌ ವೀಕ್ಷಣೆಯು ೩೦ ಲಕ್ಷ ಸಂಖ್ಯೆಯನ್ನು ದಾಟಿರುವುದು ಅವರ ಬ್ಲಾಗ್‌ನ ಜನಪ್ರಿಯತೆಗೆ ಸಾಕ್ಷಿಯಾಗಿದೆ.

·       ಬ್ಲಾಗ್‌ಗೆ ಭೇಟಿ ನೀಡಲು ಈ ಕೆಳಗಿನ ಲಿಂಕ್‌ ಅನ್ನು ಕ್ಲಿಕ್‌ ಮಾಡಿ:

https://bnbellad.blogspot.com/

ಆಂಡ್ರಾಯಿಡ್‌ ಆಪ್‌ ರಚನೆ:

ಇವರು Bheemappa_Bellad.apk ಹೆಸರಿನ ಆಂಡ್ರಾಯಿಡ್‌ ಆಪ್‌ ಅನ್ನು 2020 ರಲ್ಲಿ ಸಹ ರಚಿಸಿದ್ದಾರೆ. ಇದು ಆಫ್‌ಲೈನ್‌ ಹಾಗೂ ಆನ್ಲೈನ್‌ ಎರಡೂ ವಿಧದಲ್ಲೂ ಕಾರ್ಯನಿರ್ವಹಿಸುವ ಸಾಮರ್ಥ್ಯ ಹೊಂದಿದ್ದು, ಗ್ರಾಮೀಣ ಭಾಗದ, ಕನ್ನಡ ಮಾಧ್ಯಮದ ವಿದ್ಯಾರ್ಥಿಗಳಿಗಾಗಿ ವರವಾಗಿ ಪರಿಣಮಿಸಿದೆ ಇವರು ತಮ್ಮ ಎಲ್ಲಾ ಡಿಜಿಟಲ್‌ ಸಂಪನ್ಮೂಲಗಳನ್ನು ಈ ಆಪ್‌ ಮೂಲಕ ರಾಜ್ಯದ ವಿದ್ಯಾರ್ಥಿ ಹಾಗೂ ಶಿಕ್ಷಕರಿಗೆ ಉಚಿತವಾಗಿ ನೀಡಿದಾರೆ. ರಾಜ್ಯಾದ್ಯಾಂತ ಇಲ್ಲಿಯವರೆಗೆ 2 ಲಕ್ಷಕ್ಕೂ ಅಧಿಕ ವಿದ್ಯಾರ್ಥಿಗಳು ಹಾಗೂ ಶಿಕ್ಷಕರು ಈ ಆಪ್‌ ಅನ್ನು ಬಳಸುತ್ತಿದ್ದಾರೆ.

ಆಪ್‌ನ ಕುರಿತು ಮಾಹಿತಿ:

·       ಆಪ್‌ನ ಹೆಸರು: Bheemappa_Bellad.apk

·       ಆಪ್‌ನ ಗಾತ್ರ: 16 MB

·       OS: ಆಂಡ್ರಾಯಿಡ್‌

·       ಆಪ್‌ ಡೌನ್ಲೋಡ್‌ ಲಿಂಕ್‌: https://drive.google.com/file/d/1syoOBr27yvUus1LGI79vKL__uiaQ6kPl/view?usp=sharing

ಪುಸ್ತಕಗಳು

• SSLC ವಿದ್ಯಾರ್ಥಿಗಳು ಉತ್ತಮ ಅಂಕ ಗಳಿಸಲು ಸಹಾಯಕವಾಗಲು ಸ್ಕೋರಿಂಗ್‌ ಪ್ಯಾಕೇಜ್‌ ಎಂಬ 110 ಪುಟಗಳ ಪುಸ್ತಕ
• SSLC ವಿದ್ಯಾರ್ಥಿಗಳಿಗಾಗಿ ವಿಜ್ಞಾನ ವಿಷಯದ ಅಧ್ಯಾಯವಾರು ಕಿರುಪರೀಕ್ಷೆಗಳು ಹಾಗೂ ಕೀ-ಉತ್ತರಗಳನ್ನು ಒಳಗೊಂಡಿರುವ ಕಿರು ಪರೀಕ್ಷಾ ಕೈಪಿಡಿʼ ಎಂಬ 94 ಪುಟಗಳ ಪುಸ್ತಕ
• SSLC ವಿದ್ಯಾರ್ಥಿಗಳಿಗಾಗಿ ವಿಜ್ಞಾನ ವಿಷಯದ ಅಧ್ಯಾಯವಾರು ವ್ಯತ್ಯಾಸಗಳ ಪಟ್ಟಿಗಳನ್ನು ಒಳಗೊಂಡಿರುವ ವ್ಯತ್ಯಾಸ ಕೈಪಿಡಿ ಎಂಬ ಪುಸ್ತಕ
• SSLC ವಿದ್ಯಾರ್ಥಿಗಳಿಗಾಗಿ ವಿಜ್ಞಾನ ವಿಷಯದ ಅಧ್ಯಾಯವಾರು ಸಂಖ್ಯಾ ರೂಪದ ಸಮಸ್ಯೆಗಳಿಗೆ ಸರಳ ಪರಿಹಾರಗಳನ್ನು ಒಳಗೊಂಡಿರುವ ಸಮಸ್ಯೆ ಸರಾಗ ಎಂಬ 26 ಪುಟಗಳ ಪುಸ್ತಕ
• SSLC ವಿದ್ಯಾರ್ಥಿಗಳಿಗಾಗಿ ವಿಜ್ಞಾನ ವಿಷಯದ ಅಧ್ಯಾಯವಾರು ಬಹು ಆಯ್ಕೆ ಪ್ರಶ್ನೆಗಳು ಹಾಗೂ ಕೀ-ಉತ್ತರಗಳನ್ನು ಒಳಗೊಂಡಿರುವ MCQ ಕೈಪಿಡಿ ಎಂಬ 85 ಪುಟಗಳ ಪುಸ್ತಕ
• SSLC ವಿದ್ಯಾರ್ಥಿಗಳಿಗಾಗಿ ವಿಜ್ಞಾನ ವಿಷಯದ ವಾರ್ಷಿಕ ಪರೀಕ್ಞಾ ದೃಷ್ಟಿಯಿಂದ ತಯಾರಿಸಲಾದ ಅಧ್ಯಾಯವಾರು ಬಹು ಆಯ್ಕೆ ಪ್ರಶ್ನೆಗಳು ಹಾಗೂ ಕೀ-ಉತ್ತರಗಳನ್ನು ಒಳಗೊಂಡಿರುವ ಪರೀಕ್ಷಾ ಪಯಣ ಎಂಬ ಪುಸ್ತಕ

ವಿದ್ಯಾರ್ಥಿಗಳಿಗೆ ಕಂಪ್ಯೂಟರ್‌ ತರಬೇತಿ:

2019-20ನೇ ಸಾಲಿನಲ್ಲಿ TALP ಯೋಜನೆಯಡಿಯಲ್ಲಿ ಪೂರೈಕೆಯಾದ ಕಂಪ್ಯೂಟರ್‌ ಗಳನ್ನು ಬಳಸಿಕೊಂಡು ವಿದ್ಯಾರ್ಥಿಗಳಿಗೆ ಶಾಲೆಯಲ್ಲಿ ಕಂಪ್ಯೂಟರ್‌ ತರಬೇತಿಯನ್ನು ನೀಡುತ್ತಿದ್ದಾರೆ. ವಿಜ್ಞಾನದ ಡಿಜಿಟಲ್ ಪಾಠಗಳು, ವೀಡಿಯೋಗಳು,‌ ಆನ್ಲೈನ್ ಆವರ್ತಕೋಷ್ಠಕ, ಅನಿಮೇಷನ್‌ಗಳು, ಚಿತ್ರಗಳು, ಸಿಮ್ಯುಲೇಷನ್‌ಗಳು ಹೀಗೆ ಅತ್ಯಾಧುನಿಕ ತಂತ್ರಜ್ಞಾನದ ಅನುಭವವನ್ನು ವಿದ್ಯಾರ್ಥಿಗಳಿಗೆ ನೀಡಿ ಅವರ ಮುಂದಿನ ಭವಿಷ್ಯಕ್ಕೆ ಭದ್ರ ಬುನಾದಿ ಹಾಕುತ್ತಿದ್ದಾರೆ.

ವಿದ್ಯಾರ್ಥಿಗಳ ಸಾಧನೆ:

ಸದರಿ ಶಿಕ್ಷಕರ ಮಾರ್ಗದರ್ಶನದಲ್ಲಿ ನಮ್ಮ ಶಾಲೆಯ ವಿದ್ಯಾರ್ಥಿಗಳು ಇನ್ಸ್ಪೈರ್‌ ಅವಾರ್ಡ್ ವಿಜ್ಞಾನ ವಸ್ತು ಪ್ರದರ್ಶನ ಹಾಗೂ ಗ್ರಾಮೀಣ ಐ.ಟಿ. ರಸಪ್ರಶ್ನೆ ಕಾರ್ಯಕ್ರಮದಲ್ಲಿ ರಾಜ್ಯ ಮಟ್ಟದಲ್ಲಿ ಭಾಗವಹಿದ್ದಾರೆ.‌ ರಾಯಲ್‌ ಸೊಸೈಟಿ ಆಫ್‌ ಕೆಮಿಸ್ಟ್ರಿ ವತಿಯಿಂದ ರಾಜ್ಯದ ವಿದ್ಯಾರ್ಥಿಗಳಿಗಾಗಿ ಏರ್ಪಡಿಸಲಾದ ಶಿಬಿರಕ್ಕೆ ನಮ್ಮ ವಿದ್ಯಾರ್ಥಿಗಳು ರಾಯಚೂರು ಜಿಲ್ಲೆಯಿಂದ ಆಯ್ಕೆಯಾಗಿ ಭಾರತ ರತ್ನ ಪ್ರೊ. ಸಿ.ಎನ್.‌ಆರ್.‌ ರಾವ್‌ ಅವರನ್ನು ಭೇಟಿ ಮಾಡಿ ಅವರ ಮಾರ್ಗದರ್ಶನ ವಿದ್ಯಾರ್ಥಿಗಳಿಗೆ ದೊರೆತಿರುವುದು ಅವಿಸ್ಮರಣೀಯ.

ಸಂಪನ್ಮೂಲ ವ್ಯಕ್ತಿಯಾಗಿ ಕಾರ್ಯನಿರ್ವಹಣೆ:

ಪ್ರೌಢ ಶಾಲಾ ಶಿಕ್ಷಕರಿಗೆ ನೀಡಲ್ಪಡುವ TALP ತರಬೇತಿಗಳಲ್ಲಿ ಹಾಗೂ ವಿಜ್ಞಾನ ವಿಷಯದಲ್ಲೂ ಸಂಪನ್ಮೂಲ ವ್ಯಕ್ತಿಯಾಗಿ ಹಲವಾರು ವರ್ಷಗಳಿಂದ ಕಾರ್ಯನಿರ್ವಹಿಸುತ್ತಾ ಬಂದಿದ್ದಾರೆ. ಕರೋನಾದಂತಹ ವಿಷಮ ಪರಿಸ್ಥಿತಿಯಲ್ಲಿ ರಾಜ್ಯದ ಹಲವು ಜಿಲ್ಲೆಯ ವಿಜ್ಞಾನ ಶಿಕ್ಷಕರ ವೆಬಿನಾರ್‌ಗಳಲ್ಲಿ ಭಾಗಿಯಾಗಿ ವಿಜ್ಞಾನ ಹಾಗೂ ತಂತ್ರಜ್ಞಾನದ ಕುರಿತು ತರಬೇತಿ ನೀಡಿರುತ್ತಾರೆ.

2022 ರಲ್ಲಿ NTSE NMMS ಪರೀಕ್ಷೆಗಳಿಗೆ ಆನ್ಲೈನ್‌, ಆಫ್ಲೈನ್‌ ಸಂಪನ್ಮೂಲಗಳನ್ನು ಸಿದ್ಧಪಡಿಸುವ (ಪ್ರಶ್ನೆಕೋಠಿ) ಕಾರ್ಯದ ಸಂಪನ್ಮೂಲ ವ್ಯಕ್ತಿಯಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ.

ಶಿಕ್ಷಣ ಕ್ಷೇತ್ರದಲ್ಲಿನ ಅವರ ಕೊಡುಗೆ, ಆಧುನಿಕ ಬೋಧನಾ ಶೈಲಿ ಹಾಗೂ ತಂತ್ರಜ್ಞಾನದ ಬಳಕೆಯಿಂದಾಗಿ ಶ್ರೀ ಭೀಮಪ್ಪ ಅವರಿಗೆ 2007 ರಲ್ಲಿ ರಾಜ್ಯ ಮಟ್ಟದ ಜ್ಞಾನ ಮಾಸ ಪತ್ರಿಕೆ ಚಿಕ್ಕಮಗಳೂರು ವತಿಯಿಂದ ನೀಡಲ್ಪಡುವ “ಜ್ಞಾನ ಸಿಂಧು” ಪ್ರಶಸ್ತಿಯನ್ನು ನೀಡಲಾಗಿದೆ. 2021 ರಲ್ಲಿ ಸಾರ್ವಜನಿಕ ಶಿಕ್ಷಣ ಇಲಾಖೆ ರಾಯಚೂರು ವತಿಯಿಂದ ಇವರಿಗೆ ರಾಯಚೂರು “ಜಿಲ್ಲಾ ಮಟ್ಟದ ಉತ್ತಮ ಶಿಕ್ಷಕ” ಪ್ರಶಸ್ತಿಯನ್ನು ನೀಡಿ ಗೌರವಿಸಲಾಗಿದೆ.

ಸದರಿಯವರ ಶೈಕ್ಷಣಿಕ ಸಾಧನೆಗಳನ್ನು ಗುರುತಿಸಿದ JNCASR ಸಂಸ್ಥೆಯು ಈ ವರ್ಷದ  ಜೂನ್‌ ತಿಂಗಳ ೩೦ನೇ ತಾರೀಖಿನಂದು ಭಾರತರತ್ನ ಪ್ರೊ|| ಸಿ.ಎನ್‌. ಆರ್‌ ರಾವ್‌ ರವರ ಜನ್ಮ ದಿನಾಚರಣೆಯಂದು ರಾಷ್ಟ್ರಮಟ್ಟದ “Outstanding Science Teacher” ಪ್ರಶಸ್ತಿ ನೀಡಿ ಗೌರವಿಸಿದ್ದಾರೆ. ಈ ಸಂದರ್ಭದಲ್ಲಿ ಅವರ ಸೇವೆ ಇದೆ ರೀತಿ ನಿರಂತರವಾಗಿ ಮುಂದುವರೆದು ಶಿಕ್ಷಕ ಸಮುದಾಯಕ್ಕೆ ಪ್ರೇರಣೆ ನೀಡಲಿ ಎಂದು ಸವಿಜ್ಞಾನ ತಂಡ ಶುಭಹಾರೈಸುತ್ತದೆ.

ಮೈಕೊಡವಿಯೆದ್ದಳು ಕ್ಷಮಯಾ ಧರಿತ್ರಿ ಭೀಭತ್ಸ ರೌದ್ರ ಕಾಲ ರಾತ್ರಿ……

ಮೈಕೊಡವಿಯೆದ್ದಳು ಕ್ಷಮಯಾ ಧರಿತ್ರಿ ಭೀಭತ್ಸ ರೌದ್ರ ಕಾಲ ರಾತ್ರಿ……

ಡಾ. ಸಂಧ್ಯಾ ಡಿ.ಎನ್.

ಹಸಿರೇ ಹಸಿರಿತ್ತು ಒಂದೊಮ್ಮೆ
ವನಸಿರಿ, ಸವಿಝರಿ
ಪುಲಕಿತ, ಸಂತುಲಿತ
ವನ,
ಅಭಯದ ಸಂಕೇತ.

ಸುತ್ತೆಲ್ಲ ಜೀರುಂಡೆಗಳ ಝೇಂಕಾರ,
ಹಕ್ಕಿಗಳ ಕಲರವದ ಓಂಕಾರ
ಎಲೆ, ಹೂ, ಹಣ್ಣುಗಳ ಭಾರಕ್ಕೆ ಬಾಗಿದ ಮರ
ಕಣ್ಣೆರಡು ಸಾಲದು, ಎಲ್ಲವೂ ಸುಂದರ.

ಮನಕೆ ತಂಪಾಗಿತ್ತು, ಕಿವಿಗೆ ಇಂಪಾಗಿತ್ತು
ನಾಸಿಕಕೆ ಮಧುರ ಕಂಪು, ಹೃದಯವೇ ಮೇಳೈಸಿತ್ತು
ಕಣ್ಣಿಗೆ ಹಸಿರು, ಮೃಗ,ಖಗ, ಸೂಕ್ಷ್ಮಾಣು
ವಿಹಂಗಮ-ವಿಸ್ಮಯ ಪ್ರಕೃತಿಯ ಸೊಗಸು
ಸೊಬಗಿನಾಟ

ಆರಂಭವಾಯ್ತು ತೊಳಲಾಟ…………
ಓ ಮನುಜ
ನಿನ್ನ ಚೆಲ್ಲಾಟ, ನಿಸರ್ಗ ಮಾತೆಗೆ ಸಂಕಟ
ಬೂದಿಯನೆರಚುತ ಮಾಡಿಹೆ ಮಾಟ
ಜನ-ಜಂಗುಳಿ, ತಂತ್ರಜ್ಞಾನದ ಹೂಟ,
ದುಷ್ಟ, ದಾರ್ಷ್ಟ್ಯ ಮನ ಪಳಗಿದ ಕೂಟ
ಆಯಿತು ಪ್ರತಿ ಕ್ಷಣ, ಸಂಕಟದೂಟ
ಬಿರು ಬಿಸಿಲು-ಚಳಿ-ಅತಿ ಮಳೆ ಹೊಯ್ದಾಟ.

ಅವಗೆಂಪು, ಅತಿ ನೇರಳೆ ಪ್ರಸರಣ,
ಭುವಿಯನು ಸುಡುವ ಉರಿ ಕಿರಣ,
ಹೊತ್ತಿ ಉರಿಯಿತು ಭೂರಮೆ ಚರಣ
ಬರಡಾಯಿತು ಇಳೆ, ಮಣ ಮಣ, ಭಣ ಭಣ.

ಕಣ್ಣಿಗೆ ಕಾಣದ ಅಣು, ಪರಮಾಣು-ಸೂಕ್ಷ್ಮಾಣು ಕರೋನಾ
ಭುಗಿಲೆದ್ದ ಕ್ಷಣ
ರುದ್ರನ ರೌದ್ರ ತಾಂಡವ ಕಣಾ
ಗಿಡ ಮರಗಳ ತರಗೆಲೆಗಳ ಹಾಗೆ
ಉದುರುದುರುದುರಿದವು
ಇಳೆಯ ಮೇಲೆ ರಾಶಿ,ರಾಶಿ ಹೆಣ
ಎಂದುದಯಿಸುವುದೋ ಆಶಾ ಕಿರಣ ?

ಧರೆಯ ಮೇಲೆ ಇದೆಂತಹ ಛಾಯೆ?
ಬರಿಗಣ್ಣಿಗೆ ಕಾಣದ ಮಾಯೆ
ಉಳಿ-ಸುಳಿಯಾಗಿ ಶಸ್ತ್ರವ ಬೀಸಿ
ಸಂಕಟ ಸೂಸಿ,
ಗಾಳಿ, ನೀರು, ಮಣ್ಣಲೂ ಹಾಸಿ
ತನ್ನದೇ ನಿಜ ಬಣ್ಣವ ಮೆರೆಸಿ, ಮರೆಸಿ
ಜನರೆದೆ ನಡುಗಿಸಿ, ವಿಶ್ವವ ವ್ಯಾಪಿಸಿ……….

ಪ್ರಕೃತಿಯ ಮಡಿಲಲಿ ಸುಂದರ ಬದುಕು
ಧಿಕ್ಕರಿಸಿದೊಡೆ ನಿಲ್ಲದು ಬದುಕು
ಸೂಕ್ಷ್ಮಾತಿಸೂಕ್ಷ್ಮ ಜೀವದ ಬದುಕೂ
ಮನುಜನ ಬದುಕೂ
ಅದಕೂ ಇದಕೂ ಎಲ್ಲದಕೂ
ಒಂದಕ್ಕೊಂದು ಬೆಸೆದಿದೆ
ಕಾಣೋ.

ಸವಿಜ್ಞಾನ ಪದಬಂಧ - 8 ಆಗಸ್ಟ್‌ 2022.

 ಪದಬಂಧ - 8 

1												2
					3.			4
										4
				5		6.
7												8
					6.
			7						8

********ಸುಳಿವುಗಳು********

ಎಡದಿಂದ ಬಲಕ್ಕೆ :

1.     ಶಬ್ದ ತರಂಗಗಳನ್ನು ಬಳಸಿ ಹಾರುವ ಸಸ್ತನಿ       (3)

2.   ಶಬ್ದ ಉಂಟಾಗುವುದು ಇದರಿಂದಲೇ ಕಣಣ್ಣ   (3)

4    ಘಂಟಾಪಾತ್ರೆ ಪ್ರಯೋಗದಲ್ಲಿ ಗಾಳಿಯನ್ನು ಹೊರಗೆಳೆಯುವುದು ಬಲಗಡೆಯಿಂದ ಎಳೆದರೂ ಅಷ್ಟೇ (6)

5    ನೀರಿನ ಅಲೆ ಈ ಬಗೆಯದು (5)

6    ಗರಿಷ್ಟ ಕ್ಷೋಭೆ (2)

7    ಮರು ನುಡಿಯು ಕಡಿಮೆ ಪಾರದ್ದಾಗಿದ್ದು ಮೃದುವಾಗಿದ್ದರೆ ಅದನ್ನು ಹೀಗೆನ್ನುವರು ಬಲದಿಂದ ಎಡಕ್ಕಾದರೂ ಅದೇ (4)

8    ಶಬ್ದಪ್ರಸಾರದಲ್ಲಿ ಮಾಧ್ಯಮದ ಕಣಗಳು ಒತ್ತಾಗಿದ್ದರೆ ಅದು (4)

 ಮೇಲಿನಿಂದ ಕೆಳಕ್ಕೆ :

1.     ಬಾನಿಂದ ಬರುವ ತರಂಗಗಳ ಹಿಡಿದು ಉಲಿಯುವ ಸಮೂಹ ಮಾಧ್ಯಮ    (3)

2.   ಉಯ್ಯಾಲೆ ಜೀಕಿದಾಗ ಕೆಳಗಿನಿಂದ ಮೇಲಕ್ಕೆ ಹೋಗುವುದು ಅಂದರೆ ಇದೇನ ? (4)

3.   ಪ್ರಯೋಗಾಲದಲ್ಲಿ ನಿರ್ದಿಷ್ಟ ಆವೃತ್ತಿಯ ಶಬ್ದ ಉತ್ಪತ್ತಿ ಮಾಡಲು ಬಳಸುವ ಈ ಸಾಧನವನ್ನು ಸಂಗೀತಗಾರರು ತಮ್ಮ ವಾದ್ಯಗಳನ್ನು ಶೃತಿಮಾಡಿಕೊಳ್ಳಲೂ ಬಳಸುವರು    (4)

4.   ಶಬ್ದದ ತರಂಗವು ಈ ಬಗೆಯದು (5)

5.   ತರಂಗಕ್ಕೆ ಒಂದು ಪರ್ಯಾಯ ಪದ (2)

6.   ಗ್ರೀಕ್‌ ಅಕ್ಷರ ಲ್ಯಾಬ್ಡ λ ವನ್ನು ಇದಕ್ಕೆ ಸಂಕೇತಿಸುತ್ತಾರೆ (5)

7.   ಕತ್ತೆಯ ಕಿರುಚಾಟದಲ್ಲಿ ಶಬ್ದವು ಈ ಸ್ಥಿತಿಯಲ್ಲಿರುತ್ತದೆ (4)

8.   ಕಡಿಮೆ ಸಾಂದ್ರತೆಯ ಪ್ರದೇಶ (4)

ರಚನೆ : ವಿಜಯಕುಮಾರ್‌ ಹೆಚ್.‌ ಜಿ, 

ಪ್ರೌ.ಶಾ.ಶಿ. 

ಸ.ಪ್ರೌ,ಶಾಲೆ, ಕಾವಲ್‌ ಭೈರಸಂದ್ರ, 

ಬೆಂಗಳೂರು ಉತ್ತರ ವಲಯ-3.

(9739766840)