ಸವಿಜ್ಞಾನ

ಈ ಬ್ಲಾಗ್‌ಗೆ ಭೇಟಿ ನೀಡಿದ್ದಕ್ಕಾಗಿ ಧನ್ಯವಾದಗಳು. ನಿಮ್ಮ ಅನಿಸಿಕೆ ತಿಳಿಸಿ ಹಾಗೂ ಮತ್ತೊಮ್ಮೆ ಭೇಟಿ ಕೊಡಿ. ತಮ್ಮೆಲ್ಲರಲ್ಲಿ ಸವಿಜ್ಞಾನ ತಂಡದಿಂದ ಮನವಿ: ಸವಿಜ್ಞಾನದ ಲೇಖನಗಳನ್ನು ಓದಿ, ಅಭಿಪ್ರಾಯ ದಾಖಲಿಸಿ. ನಿಮ್ಮ ಪ್ರೋತ್ಸಾಹಗಳೇ ಲೇಖಕರಿಗೆ ಶ್ರೀರಕ್ಷೆ Science is a beautiful gift to humanity; we should not distort it. A. P. J. Abdul Kalam

Tuesday, January 4, 2022

ಒಗಟುಗಳು

ಜನವರಿ 2022ರ ಒಗಟುಗಳು

1. ಎಂಟು ನಿಮಿಷದಿ ಭಾನಿಂದ ತಿರೆಗಿಳಿದಿರುವೆ

ನಾನಿಲ್ಲದೆ ನಿಮಗೇನು ಕಂಡೀತು ? ನೀವೇನು ಉಣ್ಣುವಿರಿ ?

ಆದರೆ ಯಕಶ್ಚಿತ್ ನೀರ ಹನಿಗಳು ನನ್ನ ಸೀಳಿ ಬಿಟ್ಟವಲ್ಲ!!!!

ಗುರುತು ಹತ್ತಿತೇ?

ತಿಳಿದವರು ಬಿಡಿಸಿರೀ ಒಗಟ

2. ಹಸಿರಿಲ್ಲದೆ ನಾನಿರಲಾರೆ

ಜೀವಮಂಡಲದಿ ನನ್ನ ನಡುವಿನ ಸಿಕ್ಕುಗಳ ಸಂಕೀರ್ಣಜಾಲ

ಪ್ರತಿ ಸ್ತರದಲಿ ಮುಂದೆ ಚಲಿಸಿದಂತೆ ಶಕ್ತಿಯ ಹ್ರಾಸ

ಆದರೆ ವಿಷವೇರುವುದು ಕ್ರಮೇಣ

ಈ ಅರಿವು ಇಲ್ಲದಿದ್ದರೆ ವಸುಂಧರೆಯೊಡಲೇ ಬರಿದು

ಜಾಣ ಜಾಣೆಯರೇ ಗುರುತು ಹತ್ತಿತೇ ಈಗ?

3. ನನ್ನ ತಯಾರಿಕೆಗೆ ಗಾಜು ಬಿಟ್ಟು ಬೇರೆ ಉಪಕರಣಗಳು ಸಲ್ಲ

ಪ್ರಬಲ ಉತ್ಕರ್ಷಕ ಗುಣವಿದೆ

ಹಲವು ಸ್ಫೋ ಟಕಗಳ ಹಿಂದಿರುವೆ ನಾ

ರಾಜ ದ್ರವದಲೂ ನನ್ನ ಪಾಲುಂಟು

ಸತುವಿನೊಂದಿಗೆ ವರ್ತಿಸಿ ನಗೆಗಡಲಲ್ಲಿ ಮುಳುಗಿಸುವೆ ನಿಮ್ಮ

ತಿಳಿದವರು ಹೇಳಿ ಎಳೆಎಳೆಯಾಗಿ ನನ್ನ ಕಥೆಯ

4. ಏಳು ಮಜಲುಗಳಂತೆ ನನ್ನಲೂ 7 ಮೆಟ್ಟಿಲುಗಳು

18 ಕಂಬಗಳ ಆಸರೆ ನನಗೆ

ನನ್ನ ಅರಿತಿರೋ ದಿವ್ಯ ರಸಾಯನ ಭೋಜ್ಯ

118 ಧಾತುಗಳಿಂದ ಆಗಿರುವೆ ನಾ

ಪರಮಾಣು ರಚನೆ ಅಡಗಿದೆ ನನ್ನಲಿ

ಜಾಣ ಜಾಣೆಯರೇ ಈ ಒಗಟ ಬಿಡಿಸಿ ಗುರುತಿಸುವಿರೇ ನನ್ನ?‌

5. ಘರ್ಷಣೆಯ ತಡೆದು ಚಲನೆಯ ಸರಾಗಗೊಳಿಸುವೆ

ಹರಿಯುವುದು ನನ್ನ ಸಹಜ ಧರ್ಮ

ಅನಿಲ ದ್ರವಗಳಲಿ ನಾ ಸರ್ವೇ ಸಾಮಾನ್ಯ

ತರಲೆ ಮಾಡದೇ ಸುಳಿವ ಹಿಡಿದು ಹೇಳಿ ಓ ತರಳರೇ

ಉತ್ತರಗಳು : ಮುಂದಿನ ಸಂಚಿಕೆಯಲ್ಲಿ

****

ರಚನೆ: ರಾಮಚಂದ್ರ ಭಟ್‌ ಬಿ.ಜಿ.

ವಿಜ್ಞಾನ ಶಿಕ್ಷಕರು

ಸರ್ಕಾರಿ ಪ್ರೌಢಶಾಲೆ, ಬ್ಯಾಟರಾಯನಪುರ,

ಮೈಸೂರು ರಸ್ತೆ, ಬೆಂಗಳೂರು

ಜನವರಿ 2022 ರ ವ್ಯಂಗ್ಯಚಿತ್ರಗಳು

ರಚನೆ: ಶ್ರೀಮತಿ ಜಯಶ್ರೀ ಶರ್ಮ

Saturday, December 4, 2021

ಸವಿಜ್ಞಾನ - ಡಿಸೆಂಬರ್ ತಿಂಗಳ ಲೇಖನಗಳು

ಡಿಸೆಂಬರ್ ತಿಂಗಳ ಲೇಖನಗಳು :

ಸಂಪಾದಕರ ಡೈರಿಯಿಂದ

೧. ವಿಜ್ಞಾನ ಸಂಶೋಧನೆಯಲ್ಲಿ ಆಕಸ್ಮಿಕಗಳು - ಸೆರೆಂಡಿಪಿಟಿ - ಡಾ. ಎಂ. ಜೆ. ಸುಂದರ್ ರಾಮ್

೨. ಕ್ಯೂರಿಭ್ಯಾಂ ನಮಃ - ವಿಜ್ಞಾನ ನಾಟಕ - ವಿಜಯಕುಮಾರ್.‌ ಹೆಚ್‌.ಜಿ

೩. ಜಲವಾಸಿ ಹಕ್ಕಿಗಳು - ಡಿ. ಕೃಷ್ಣಚೈತನ್ಯ

4. ವಿಶ್ವ ಮಣ್ಣು ದಿನ: 5-ಡಿಸೆಂಬರ್-2021 - ತಾಂಡವಮೂರ್ತಿ.ಎ.ಎನ್

5. ಬನ್ನಿ, ಗಣಿತವನ್ನು ಸಂಭ್ರಮಿಸೋಣ... - ಅನಿಲ್ ಕುಮಾರ್ ಸಿ.ಎನ್.

6. ಬೆರಳು ಗೊಂಬೆಗಳು - ಸಿದ್ದು ಬಿರಾದಾರ

ವಿಜ್ಞಾನದ ಒಗಟುಗಳು : ಡಿಸೆಂಬರ್ 2021 - ರಚನೆ : ರಾಮಚಂದ್ರ ಭಟ್ ಬಿ.ಜಿ.

ವ್ಯಂಗ್ಯಚಿತ್ರಗಳು - ಡಿಸೆಂಬರ್ 2021 - ರಚನೆ: ಶ್ರೀಮತಿ ಜಯಶ್ರೀ ಶರ್ಮ

ಸಂಪಾದಕರ ಡೈರಿಯಿಂದ

ಇದು ‘ಸವಿಜ್ಞಾನ’ ಇ-ಪತ್ರಿಕೆಯ ಹನ್ನೆರಡನೆಯ ಸಂಚಿಕೆ. ಒಂದು ವರ್ಷ ಪೂರೈಸುತ್ತಿರುವ ಹಿನ್ನೆಲೆಯಲ್ಲಿ, ನಮ್ಮನ್ನು ಹೃತ್ಪೂರ್ವಕವಾಗಿ ಪ್ರೋತ್ಸಾಹಿಸುತ್ತಿರುವ ನಮ್ಮ ಎಲ್ಲ ಓದುಗ ವಿಜ್ಞಾನ ಶಿಕ್ಷಕರಿಗೆ ಮತ್ತು ವಿಜ್ಞಾನಾಸಕ್ತರಿಗೆ ಹಾಗೂ ಲೇಖಕ ಬಂಧುಗಳಿಗೆ ನನ್ನ ಅನಂತ ವಂದನೆಗಳು.

ಈ ಬಾರಿಯ ಡಿಸೆಂಬರ್ ತಿಂಗಳ ಸಂಚಿಕೆಯೂ ಹಲವು ಉಪಯುಕ್ತ ಹಾಗೂ ಮಾಹಿತಿಪೂರ್ಣ ಲೇಖನಗಳನ್ನು ನಿಮಗಾಗಿ ಹೊತ್ತು ತಂದಿದೆ. ವಿಜ್ಞಾನಿಗಳು ನಡೆಸುವ ಸಂಶೋಧನೆಯ ಹಾದಿಯಲ್ಲಿ ಕೆಲವೊಮ್ಮೆ ನಿರೀಕ್ಷೆಗೆ ಮೀರಿ ಸಿಕ್ಕ ಆಕಸ್ಮಿಕ ಫಲಿತಾಂಶಗಳು ಹೇಗೆ ಹೊಸ ಅವಿಷ್ಕಾರಗಳಿಗೆ ಕಾರಣವಾದುವು ಎಂಬುದನ್ನು ತಿಳಿಸುವ ಡಾ. ಎಂ.ಜೆ ಸುಂದರರಾಂ ಅವರ ಕುತೂಹಲಕರ ಲೇಖನದ ಮೊದಲ ಭಾಗ ಈ ಸಂಚಿಕೆಯಲ್ಲಿದೆ. ಜಲವಾಸಿ ಹಕ್ಕಿಗಳ ಬಗ್ಗೆ ಮಾಹಿತಿ ನೀಡುವ ಕೃಷ್ಣ ಚೈತನ್ಯ ಅವರ ಲೇಖನವಿದೆ. ಗಣಿತ ಮಾಂತ್ರಿಕ ರಾಮಾನುಜಮ್ ಅವರ ಜನ್ಮ ದಿನದ ಸಂದರ್ಭದಲ್ಲಿ ಅನಿಲ್ ಕುಮಾರ್ ಬರೆದ ಲೇಖವಿದೆ. ಗೊಂಬೆಗಳ ಮೂಲಕ ವಿಜ್ಞಾನ ಕಲಿಸುವ ಶಿಕ್ಷಕ ಬಿರಾದಾರ್ ಅವರು ಈ ಬಾರಿ ಬೆರಳಿನ ಗೊಂಬೆಗಳನ್ನು ನಿಮಗೆ ಪರಿಚಯಿಸಿದ್ದಾರೆ. ವಿಶ್ವ ಮಣ್ಣು ದಿನಕ್ಕೆ ಸಂಬಂಧಿಸಿದಂತೆ ತಾಂಡವಮೂರ್ತಿ ಬರೆದ ಸಾಂದರ್ಭಿಕ ಲೇಖನವಿದೆ. ನಿಮ್ಮಲ್ಲಿ ಬಹು ಮಂದಿ ಬಯಸಿದಂತೆ ವಿಜ್ಞಾನ ನಾಟಕವೊಂದನ್ನು ನಿಮಗಾಗಿ ಬರೆದಿದ್ದಾರೆ, ವಿಜಯಕುಮಾರ್ ಅವರು. ಇವೆಲ್ಲದರ ಜೊತೆಗೆ, ಎಂದಿನಂತೆ ನಿಮ್ಮ ಮೆಚ್ಚುಗೆಗೆ ಪಾತ್ರವಾಗಿರುವ ವಿಜ್ಞಾನದ ಒಗಟುಗಳು ಹಾಗೂ ವ್ಯಂಗ್ಯ ಚಿತ್ರಗಳೂ ಇವೆ.

ಬರುವ ಜನವರಿ 2022ರ ಸಂಚಿಕೆ ನಮ್ಮ ಮೊದಲ ವಾರ್ಷಿಕ ಸಂಚಿಕೆಯಾಗಿ ಪ್ರಕಟವಾಗಲಿದೆ. ನಿಮ್ಮ ಕುತೂಹಲ ತಣಿಸುವ ಹಲವು ಲೇಖನಗಳೊಂದಿಗೆ ಈ ಸಂಚಿಕೆ ಹೊರಬರಲಿದೆ. ಅದಕ್ಕೆ ಸಂಬಂಧಿಸಿದಂತೆ ನಿಮ್ಮ ಸಲಹೆಗಳಿಗೆ ಮುಕ್ತ ಸ್ವಾಗತವಿದೆ. ಮಿಂಚಂಚೆಯ ಮೂಲಕ ತಿಳಿಸಿ.

ಡಾ. ಟಿ. ಎ. ಬಾಲಕೃಷ್ಣ ಅಡಿಗ

ಪ್ರಧಾನ ಸಂಪಾದಕರು

ವಿಜ್ಞಾನ ಸಂಶೋಧನೆಯಲ್ಲಿ ಆಕಸ್ಮಿಕಗಳು - ಸೆರೆಂಡಿಪಿಟಿ

ಡಾ. ಎಂ. ಜೆ. ಸುಂದರ್ ರಾಮ್

ಪ್ರಾಣಿಶಾಸ್ತ್ರ ಪ್ರಾಧ್ಯಾಪಕರು ಮತ್ತು ವಿಜ್ಞಾನ ಸಂವಹನಕಾರರು

ವಿಜ್ಞಾನದ ಮುನ್ನಡೆಯಲ್ಲಿ ಆಕಸ್ಮಿಕ ಆವಿಷ್ಕಾರಗಳು ಬಹುದೊಡ್ಡ ಪಾತ್ರವನ್ನು ವಹಿಸಿವೆ. ಈ ರೀತಿಯ ಆಕಸ್ಮಿಕ ಆವಿಷ್ಕಾರ ಅನ್ವೇಷಣೆಗಳಿಗೆ ಆಂಗ್ಲಭಾಷೆಯಲ್ಲಿ ಸೆರೆಂಡಿಪಿಟಿ (serendipity) ಎಂದು ಕರೆಯುತ್ತಾರೆ. ಸೆರೆಂಡಿಪಿಟಿ ಎಂದರೆ ಆಕಸ್ಮಿಕವಾಗಿ ಅದೃಷ್ಟದ ಮತ್ತು ಅನಿರೀಕ್ಷಿತ ಆವಿಷ್ಕಾರಗಳನ್ನು ಮಾಡಬಲ್ಲ ಸಾಮರ್ಥ್ಯ ಎಂದರ್ಥ. ಮೀನು ಹಿಡಿಯಲು ನಿಮಗೆ ಎರೆಹುಳಗಳು ಬೇಕು. ಅದಕ್ಕಾಗಿ ನೀವು ಭೂಮಿಯನ್ನು ಅಗಿಯುತ್ತಿದ್ದಾಗ ಎರೆಹುಳಗಳ ಬದಲು ತೈಲವೇ ಉಕ್ಕಿ ಹರಿಯಲಾರಂಭಿಸಿತು ಎಂದುಕೊಳ್ಳಿ. ಅದೇ ಸೆರೆಂಡಿಪಿಟಿ.

ಕ್ಯೂರಿಭ್ಯಾಂ ನಮಃ - ವಿಜ್ಞಾನ ನಾಟಕ

ವಿಜಯಕುಮಾರ್.‌ ಹೆಚ್‌.ಜಿ
ಸಹಶಿಕ್ಷಕರು
ಸ.ಪ್ರೌ.ಶಾಲೆ, ಕಾವಲ್‌ ಭೈರಸಂದ್ರ,
ಬೆಂಗಳೂರು ಉತ್ತರ ವಲಯ - 03

“ಕಾವ್ಯೇಷು ನಾಟಕಂ ರಮ್ಯಂ” , ಕಾವ್ಯಗಳಲ್ಲಿ ನಾಟಕವು ಅತ್ಯಂತ ರಮಣೀಯವಾದುದು ಎಂಬ ಮಾತು ತುಂಬಾ ಪ್ರಸಿದ್ಧ ಏಕೆಂದರೆ, “ ನಾಟಕಂ ಭಿನ್ನರುಚೇರ್ಜನಸ್ಯ ಬಹುದಾಪ್ಯೇಕಂ ಸಮಾರಾಧನಂ” ನಾಟಕ ಭಿನ್ನ ರುಚಿಯ ಜನರಿಗೆ ಒಂದೇ ಕಡೆ ವಿವಿಧ ಪ್ರಕಾರಗಳಲ್ಲಿ ರಂಜನೆ ಸಿಗುತ್ತದೆ. ಇಂತಹ ಬಲಿಷ್ಠವಾದ ಮಾಧ್ಯಮವನ್ನು ಬೋಧನೆಗೆ ಪರಿಣಾಮಕಾರಿಯಾಗಿ ಬಳಸಬಹುದು. NEP 2020 ಕೂಡ ಇದನ್ನೇ ಅನುಮೋದಿಸುತ್ತದೆ. ಅನೇಕ ನಾಟಕಗಳನ್ನು ರಚಿಸಿ ವಿಜ್ಞಾನ ವಿಷಯವನ್ನು ಬೋಧಿಸಬಹುದು. ವಿಜ್ಞಾನಿಗಳ ಜೀವನ ಸಾಧನೆ ಪ್ರಸ್ತುತ ಪಡಿಸಲು ಇದು ತುಂಬಾ ಸಹಕಾರಿ. ಈ ಎಲ್ಲಾ ಅಂಶಗಳನ್ನು ಮನಗಂಡ ಸಾರ್ವಜನಿಕ ಶಿಕ್ಷಣ ಇಲಾಖೆ, ವಿಶ್ವೇಶ್ವರಯ್ಯ ಕೈಗಾರಿಕಾ ಮತ್ತು ತಾಂತ್ರಿಕ ಮ್ಯೂಸಿಯಂ ಸಹಯೋಗದೊಂದಿಗೆ ವಿಜ್ಞಾನ ನಾಟಕ ಸ್ಪರ್ಧೆಗಳನ್ನು ಪ್ರತಿವರ್ಷ ಏರ್ಪಡಿಸುತ್ತದೆ.

ಜಲವಾಸಿ ಹಕ್ಕಿಗಳು

ಡಿ. ಕೃಷ್ಣಚೈತನ್ಯ
ವಿಜ್ಞಾನ ಮಾರ್ಗದರ್ಶಕರು ಹಾಗು ವನ್ಯಜೀವಿ ತಜ್ಞರು.

ಗೋಣಿಕೊಪ್ಪಲು ಪ್ರೌಢಶಾಲೆ. ಗೋಣಿಕೊಪ್ಪಲು.

ಕೊಡಗು ಜಿಲ್ಲೆ.

ಬಾನಾಡಿಗಳ ಕುರಿತ ಕೆಲವು ಲೇಖನಗಳನ್ನು ಹಿಂದಿನ ಸಂಚಿಕೆಗಳಲಲ್ಲಿ ಆಸ್ವಾದಿಸಿದಿರಲ್ಲವೇ? ಈಗ ನಮ್ಮ ಬಾನಾಡಿಗಳನ್ನು ಬೆನ್ನಟ್ಟುವ ಕಾರ್ಯವನ್ನು ಮುಂದುವರೆಸೋಣ. ಈ ಪ್ರಕೃತಿ ಹಲವು ಅಚ್ಚರಿಗಳ ಒಡಲು. ಆದರೆ ಅಚ್ಚರಿಗಳನ್ನು ವಿಕೃತಿಗಳಾಗಿಸಿ ಆನುವಂಶೀಯ ವಿಕೃತಿಗಳಾಗಿಸುವ ತನಕ ಈ ಮನುಷ್ಯ ಸುಮ್ಮನಿರಲಾರನೇನೋ? ಇರಲಿ ಸಾಧ್ಯವಾದಷ್ಟು ಮಟ್ಟಿನ ಅರಿವನ್ನು ಜನರಲ್ಲಿ ಮೂಡಿಸಲೆತ್ನಿಸೋಣ.

ವಿಶ್ವ ಮಣ್ಣು ದಿನ: 5-ಡಿಸೆಂಬರ್-2021

ಮಣ್ಣಿನ ಲವಣೀಕರಣ ತಡೆಗಟ್ಟಿ, ಮಣ್ಣಿನ ಉತ್ಪಾದಕತೆ ಹೆಚ್ಚಿಸಿ

Halt salinization, boost soil productivity

ತಾಂಡವಮೂರ್ತಿ.ಎ.ಎನ್

ಸರ್ಕಾರಿ ಪ್ರೌಢಶಾಲೆ

ಕಾರಮಂಗಲ,

ಬಂಗಾರಪೇಟೆ (ತಾ.), ಕೋಲಾರ(ಜಿಲ್ಲೆ)

ಭೂಮಿಯ ಮೇಲೆ ಜೀವ ಸಂಕುಲವನ್ನು ಪೊರೆವ ಅಮೂಲ್ಯ ಸಂಪನ್ಮೂಲವಾದ ಮಣ್ಣು ನಿರವಯವ ಸಸ್ಯ ಪೋಷಕಗಳನ್ನು ಒದಗಿಸುವ ಅಕ್ಷಯ ಪಾತ್ರೆ. ವಿಘಟಕ ಸೂಕ್ಷ್ಮ ಜೀವಿಗಳನ್ನು ಪೋಷಿಸುವ ಅಪೂರ್ವ ಭಂಡಾರ. ಇದು ಜೀವಿಗಳ ವಿಕಾಸಕ್ಕೆ ಕಾರಣವಾದ ಸಾವಯವ-ನಿರವಯವ ವಸ್ತುಗಳ ಅಪೂರ್ವ ಸಂಗಮ. ಇಂತಿಪ್ಪ ಮಣ್ಣು ಮಾನವನೆಂಬ ವಿಲಕ್ಷಣ ಜೀವಿಯ ಉಪದ್ರವದಿಂದ ಇತರ ಅಮೂಲ್ಯ ನೈಸರ್ಗಿಕ ಸಂಪನ್ಮೂಲಗಳಾದ ಗಾಳಿ ಮತ್ತು ನೀರುಗಳಂತೆ ನಲುಗಿದೆ. ಪಾತಾಳದಿಂದ ಬಾಹ್ಯಾಕಾಶದವರೆಗೂ ಚಾಚಿರುವ ತನ್ನ ಕಬಂಧ ಬಾಹುಗಳಿಂದ ಮಣ್ಣಿನ ಸಂರಚನೆಯನ್ನು ಹಾಳುಮಾಡಿದ ಮಾನವ ಅದರ ಫಲವತ್ತತೆ ನಿರಂತರವಾಗಿ ಕ್ಷೀಣಿಸಲು ಕಾರಣವಾಗಿದ್ದು ಸರ್ವವೇದ್ಯ.

ಬನ್ನಿ, ಗಣಿತವನ್ನು ಸಂಭ್ರಮಿಸೋಣ...

ಲೇಖಕರು: ಅನಿಲ್ ಕುಮಾರ್ ಸಿ.ಎನ್.
ಸರ್ಕಾರಿ ಪ್ರೌಢಶಾಲೆ

ರಾಮನಗರ ತಾ
ರಾಮನಗರ ಜಿಲ್ಲೆ

ಡಿಸೆಂಬರ್ 22 ಬಂತೆಂದರೆ ನಮ್ಮ ಗಣಿತ ವಿಷಯ ಶಿಕ್ಷಕರ ಸಂಭ್ರಮಕ್ಕೆ ಎಣೆಯೇ ಇಲ್ಲ. ಅಂದು, ಎಲ್ಲ ಗಣಿತ ಶಿಕ್ಷಕರ ಮನದಲ್ಲಿ ಹಬ್ಬದ ಸಡಗರ ಮನೆ ಮಾಡಿರುತ್ತದೆ. ಆ ದಿನ ಇಷ್ಟೊಂದು ಸಂಭ್ರಮವೇಕೆ? ಅಂದ್ರಾ.... ಈ ಲೇಖನವನ್ನು ಓದಿ, ಸಂಭ್ರಮದ ಹಿಂದಿನ ಗುಟ್ಟನ್ನು ತಿಳಿಯಿರಿ.

ಬೆರಳು ಗೊಂಬೆಗಳು

ಸಿದ್ದು ಬಿರಾದಾರ, ವಿಜ್ಞಾನ ಶಿಕ್ಷಕ

ಸರಕಾರಿ ಪ್ರೌಢ ಶಾಲೆ ಚಿಬ್ಬಲಗೇರಿ

ತಾ: ಹಳಿಯಾಳ, ಶಿರಿಸಿ ಶೈಕ್ಷಣಿಕ ಜಿಲ್ಲೆ

ಉತ್ತರ ಕನ್ನಡ

ಆತ್ಮೀಯರೇ, ಹಿಂದಿನ ತಿಂಗಳಲ್ಲಿ ಪ್ರಕಟವಾದ “ಬೊಂಬೆಯಾಟದ ಮೂಲಕ ವಿಜ್ಞಾನ ಕಲಿಕೆಯ” ಬೋಧನಾ ಅನುಭವದ ಲೇಖನವನ್ನು ತಾವೆಲ್ಲರೂ ಓದಿದ್ದೀರಿ, ತಮ್ಮ ಅನಿಸಿಕೆ ಹಾಗೂ ಅಭಿಪ್ರಾಯಗಳನ್ನು ಬರೆದು ತಿಳಿಸಿದ್ದೀರಿ. ಜೊತೆಗೆ ನನಗೆ ಸೂಕ್ತ ಮಾರ್ಗದರ್ಶನವನ್ನೂ ಕೂಡಾ ನೀಡಿದ್ದೀರಿ. ತಮಗೆ ಅಭಿನಂದನೆಗಳು. ಲೇಖನ ಓದಿದ ಅನೇಕ ಜನರ ಅಪೇಕ್ಷೆಯ ಮೇರೆಗೆ ವಿಜ್ಞಾನ ಕಲಿಕೆಯಲ್ಲಿ ಯಾವ ಸಾಮಥ್ರ್ಯಗಳಿಗೆ ಯಾವ ಯಾವ ಬೊಂಬೆಗಳನ್ನು ಬಳಸುತ್ತೀರಿ ಮತ್ತು ಅವುಗಳನ್ನು ಹೇಗೆ ತಯಾರಿಸುತ್ತೀರಿ ಮತ್ತು ತಯಾರಿಸುವ ವಿಧಾನದ ಕುರಿತು ಅನುಭವವನ್ನು ಹಂಚಿಕೊಳ್ಳಲು ಕೇಳಿರುತ್ತೀರಿ. ತಮ್ಮ ನಿರೀಕ್ಷೆಯಂತೆ ಗೊಂಬೆಗಳಲ್ಲಿ ಅನೇಕ ಪ್ರಕಾರಗಳಿರುವುದು ನಿಮಗೆ ತಿಳಿದಿದೆ. ಅದರಲ್ಲಿ ಕಡಿಮೆ ಖರ್ಚಿನಲ್ಲಿ ಸುಲಭವಾಗಿ ತಯಾರಿಸಬಹುದಾದ ಬೆರಳು ಬೊಂಬೆಗಳ ಮೂಲಕ ವಿಜ್ಞಾನ ಕಲಿಕೆಯನ್ನು ಹೇಗೆ ಮಾಡಬಹುದು ಎಂಬ ಅನುಭವಗಳನ್ನು ಹಂಚಿಕೊಳ್ಳುತ್ತೇನೆ.

ವಿಜ್ಞಾನದ ಒಗಟುಗಳು : ಡಿಸೆಂಬರ್ 2021

ವಿಜ್ಞಾನದ ಒಗಟುಗಳು : ಡಿಸೆಂಬರ್ 2021

ನೈಜ ನ್ಯೂಕ್ಲಿಯಸ್ ನನ್ನೊಳಿಲ್ಲ

ಹೆಸರು ಕಾಳ ಜಾತಿಯ ಸಸ್ಯಗಳೇ ನನ್ನ ಆವಾಸ

ಪ್ರೋಟೀನ್ ಗಳಿಗೆ ಬೇಕಾದ ಧಾತು ರೂಪದಲ್ಲಿ

ನಾ ನೀಡುವ ಮನೆ ಬಾಡಿಗೆಯ !!!

ಜಾಣರೇ ಸುಳಿವ ಬಳಸಿ ಪತ್ತೆಹಚ್ಚುವಿರೇ ನನ್ನ?

ರಾಸಾಯನಿಕಗಳಿಗೆ ನಾ ರಾಜ ಆದರೆ ಕಬ್ಬಿಣವಲ್ಲ

ನನಗೋ ತೀರಾ ನೀರಡಿಕೆ ಶುಷ್ಕನಗೊಳಿಸುವೆ ನಾ

ನಾನೇ ಕೈಗಾರಿಕೆಗಳ ಗುಣಮಟ್ಟ ನಿರ್ಧಾರಕ

ಉಪ್ಪಿನೊಡನೆ ಸೇರಲು ಕೊಡುವೆ ಪ್ರಬಲಾಮ್ಲ

ಸತುವಿನೊಂದಿಗೆ ವರ್ತಿಸಿ ಬಿಡುಗಡೆ ಮಾಡುವೆ ಅತಿಹಗುರ ಧಾತು

ಬಿಡಿಸಿ ಹೇಳುವೆಯೋ ಒಗಟಿನ ಈ ಸಿಕ್ಕು?

ದೇಹವೇನೋ ಮೃದು ಆದರೆ ಮೃದ್ವಂಗಿಯಲ್ಲ

ದುಂಡಗಿನ ದೇಹವಿದೆ ದುಂಡುಹುಳುವಲ್ಲ

ಕಾಲುಗಳೇನೂ ಕಾಣವು ಆದರೆ ನಾ ಹಾವಲ್ಲ.

ದೇಹದಲ್ಲಿವೆ ಉಂಗುರದ ರಚನೆಗಳು ಆದರೆ ಜಿಗಣೆಯಲ್ಲಾ

ಮಣ್ಣ ಫಲವತ್ತತೆ ಹೆಚ್ಚಿಸುವ ನನಗೆ ಕಾಸು ಕೊಡಬೇಕಿಲ್ಲ

ಜಾಣ ಜಾಣೆಯರೇ ನನ್ನ ಗುರುತು ಹಿಡಿಯಬಲ್ಲಿರೇ ?

ನೆಲದ ಮೇಲೆ ನೀ ಚಲಿಸುವುದು ನನ್ನ ಬಲದಿಂದ

ನಾನಿಲ್ಲದೆ ನೀ ಜಾರಿ ಬೀಳುವೆಯಲ್ಲ

ನನ್ನ ಬಲ ಹೆಚ್ಚಿದರೂ ನೀ ಚಲಿಸಲಾರೆ

ಸ್ನೇಹಕಗಳ ಬಳಸಿ ನನ್ನ ಹಿಡಿತದಲ್ಲಿ ಇಡಬಲ್ಲೆ

ಒಲವಿಂದ ಹೇಳಬಲ್ಲೆಯಾ ಈ ಬಲವ?

ಆಮ್ಲದ ಜೊತೆಯೂ ವರ್ತಿಸಬಲ್ಲೆ

ಕ್ಷಾರದ ಜೊತೆಯೂ ವರ್ತಿಸಬಲ್ಲೆ

ನನ್ನಿರುವಲ್ಲಿ ಕಬ್ಬಿಣ ತುಕ್ಕು ಹಿಡಿಯದು

ಕಬ್ಬಿಣದಂತಹ ವಸ್ತುಗಳ ಆಕರ್ಷಣೆಯ ಹೆಚ್ಚಿಸಬಲ್ಲೆ

ವಿದ್ಯುತ್ ಕೋಶದ ಕವಚವಾಗಿರುವೆ

ಜಾಣ ಜಾಣೆಯರೇ ಸುಳಿವ ಹಿಡಿದು ಹೇಳಿರಿ ಕ್ಷಣದಲ್ಲಿ

ರಚನೆ : ರಾಮಚಂದ್ರ ಭಟ್ ಬಿ.ಜಿ.

ಉತ್ತರಗಳು : ಮುಂದಿನ ಸಂಚಿಕೆಯಲ್ಲಿ

ವ್ಯಂಗ್ಯಚಿತ್ರಗಳು - ಡಿಸೆಂಬರ್ 2021

ವ್ಯಂಗ್ಯಚಿತ್ರಗಳು - ಡಿಸೆಂಬರ್ 2021

ರಚನೆ: ಶ್ರೀ ವಿಜಯ್‌ಕುಮಾರ್ ಹುತ್ತನಹಳ್ಳಿ

ರಚನೆ: ಶ್ರೀಮತಿ ಜಯಶ್ರೀ ಶರ್ಮ

Thursday, November 4, 2021

ನವೆಂಬರ್ ತಿಂಗಳ ಲೇಖನಗಳು

ಸಂಪಾದಕರ ಡೈರಿಯಿಂದ

ಜೀವ ಹೇಗೆ ಹುಟ್ಟಿದರೇನಂತೆ? - ಭಾಗ 2 - ಸೂಕ್ಷ್ಮಜೀವಿಗಳ ಆವಿಷ್ಕಾರ - ಡಾ. ಎಂ. ಜೆ. ಸುಂದರ್ ರಾಮ್

ಮನಸೂರೆಗೊಳ್ಳುವ ನೀಲಕುರಿಂಜಿ ಲೋಕ - ಕೃಷ್ಣ ಚೈತನ್ಯ

ಪೋಷಕಾಂಶಗಳೇ ನಿಜವಾದ ಗೇಮ್‌ಚೆಂಜರ್ /ಪೋಷಕಾಂಶಗಳಲ್ಲಿದೆ ಆರೋಗ್ಯದ ಗುಟ್ಟು - ವೆಂಕಿ ರಾಘವೇಂದ್ರ ಮತ್ತು ಭಾರತಿ ಮಣೂರ್

ಬೊಂಬೆಯಾಟದ ಮೂಲಕ ವಿಜ್ಞಾನ ಕಲಿಕೆ - ಸಿದ್ದು ಬಿರಾದಾರ

ಭವಿಷ್ಯದಲ್ಲಿ ತೊಂದರೆಯಾಗಲಿರುವ ವ್ಯೋಮ ತ್ಯಾಜ್ಯಗಳು - ಗಜಾನನ ಎನ್. ಭಟ್

ಪುಸ್ತಕ ಪರಿಚಯ - ಕಲಿಕೆಗೊಂದು ಕೈಪಿಡಿ - ರಾಮಚಂದ್ರ ಭಟ್ ಬಿ. ಜಿ.

ವಿಜ್ಞಾನ ದೀವಿಗೆಯಲಿ ಲೋಕವ ಕಾಣುವ, ಕಾಣಿಸುವ ಉದಯ ಗಾಂವ್ಕರ್ - ಸಂತೋಷ ಗುಡ್ಡಿಯಂಗಡಿ

ಶಿಕ್ಷಣ ಕ್ಷೇತ್ರದ ಅನರ್ಘ್ಯ ರತ್ನ ಶ್ರೀ ರಾಮಚಂದ್ರ ಭಟ್ - ಶ್ರೀಧರಮಯ್ಯ ಎಂ.ಎನ್.

ಗುರು ಪದದ ಅನ್ವರ್ಥ ಈ ಗುರುದತ್ತ - ಶಿಕ್ಷಕ ರತ್ನ - ಗೋಪಾಲ ರಾವ್ ಸಿ.ಕೆ.

ವಿಜ್ಞಾನದ ಒಗಟುಗಳು - ವಿಜಯಕುಮಾರ್‌ ಹುತ್ತನಹಳ್ಳಿ, ಶ್ರೀಮತಿ ನಾಗವೇಣಿ.ಬಿ

ವ್ಯಂಗ್ಯಚಿತ್ರಗಳು - ಶ್ರೀ ವಿಜಯ್ ಕುಮಾರ್ ಹುತ್ತನಹಳ್ಳಿ, ಶ್ರೀಮತಿ ಜಯಶ್ರೀ ಶರ್ಮ

ಸಂಪಾದಕರ ಡೈರಿಯಿಂದ

‘ಸವಿಜ್ಞಾನ’ ಇ-ಪತ್ರಿಕೆಯ ಹನ್ನೊಂದನೆಯನೆ ಸಂಚಿಕೆಗೆ ವಿಜ್ಞಾನ ಶಿಕ್ಷಕರಿಗೆ ಮತ್ತು ವಿಜ್ಞಾನಾಸಕ್ತರಿಗೆ ಸ್ವಾಗತ ಹಾಗೂ ನಮ್ಮ ಎಲ್ಲ ಓದುಗ, ಲೇಖಕ ಬಂಧುಗಳಿಗೆ ಕನ್ನಡ ರಾಜ್ಯೋತ್ಸವ ಮತ್ತು ದೀಪಾವಳಿಯ ಹಾರ್ದಿಕ ಶುಭಾಶಯಗಳು

ಈ ಬಾರಿಯ ನವೆಂಬರ್ ತಿಂಗಳ ಸಂಚಿಕೆಯೂ ಹಲವು ಮಾಹಿತಿಪೂರ್ಣ ಲೇಖನಗಳನ್ನು ನಿಮಗಾಗಿ ಹೊತ್ತು ತಂದಿದೆ. ಭೂಮಿಯ ಮೇಲೆ ಜೀವದ ಉಗಮದ ಬಗ್ಗೆ ಹಿಂದೆ ಇದ್ದ ಕಲ್ಪನೆಗಳನ್ನು ಹಾಗೂ ವಾಸ್ತವವನ್ನು ಸೊಗಸಾಗಿ ನಿರೂಪಿಸುವ, ಡಾ. ಎಂ.ಜೆ. ಸುಂದರರಾಂ ಬರೆದಿರುವ ‘ಜೀವ ಹೇಗೆ ಹುಟ್ಟಿದರೇನಂತೆ?’ ಎಂಬ ಲೇಖನದ ಮುಂದುವರೆದ ಭಾಗ ಈ ತಿಂಗಳು ಪ್ರಕಟವಾಗಿದೆ. ಪ್ರಸ್ತುತ ಸುದ್ದಿಯಲ್ಲಿರುವ ನೀಲ ಕುರಿಂಜಿ ಸಸ್ಯಗಳ ಬಗ್ಗೆ ಕೃಷ್ಣ ಚೈತನ್ಯ ಅವರ ಲೇಖನವಿದೆ. ಗಜಾನನ ಭಟ್ ಬರೆದಿರುವ, ವ್ಯೋಮ ತ್ಯಾಜ್ಯಗಳ ಸಮಸ್ಯೆಯ ಬಗ್ಗೆ ಬೆಳಕು ಚೆಲ್ಲುವ ಒಂದು ಲೇಖನವಿದೆ. ಕರ್ನಾಟಕದಲ್ಲಿ ಚಿರಪರಿಚಿತವಿರುವ ಬೊಂಬೆಯಾಟವನ್ನು ವಿಜ್ಞಾನ ಬೋಧನೆಗೆ ಯಶಸ್ವಿಯಾಗಿ ಅಳವಡಿಸಿಕೊಂಡಿರುವ ಶಿಕ್ಷಕ ಸಿದ್ದು ಬಿರಾದಾರ್ ಅವರ ವಿಶೇಷ ಲೇಖನವಿದೆ. ವೆಂಕಿ ರಾಘವೇಂದ್ರ ಮತ್ತು ಭಾರತಿ ಮಣೂರ್ ರವರ ಪೋಷಕಾಂಶಗಳೇ ನಿಜವಾದ ಗೇಮ್‌ಚೆಂಜರ್ ಆರೋಗ್ಯದ ಗುಟ್ಟು ಹೇಳುತ್ತವೆ. ತಿಂಗಳ ತೆರೆಮರೆಯ ಸಾಧಕ ಶಿಕ್ಷಕ ಉದಯ ಗಾಂವ್ಕರ್ ರವರ ವ್ಯಕ್ತಿ ಚಿತ್ರಣವಿದೆ. ‘ಸವಿಜ್ಞಾನ’ ತಂಡದ ಪ್ರಶಸ್ತಿ ವಿಜೇತ ಶಿಕ್ಷಕರಿಬ್ಬರ ಪರಿಚಯ ಮಾಡಿಕೊಡಲಾಗಿದೆ. ಇತ್ತೀಚೆಗೆ ಶಿಕ್ಷಣ ಸಚಿವರಿಂದ ಲೋಕಾರ್ಪಣೆಗೊಂಡ ನನ್ನ ಅಂಕಣ ಬರಹಗಳ ಸಂಕಲನ, ‘ಕಲಿಕೆಗೊಂದು ಕೈಪಿಡಿ’ ಪುಸ್ತಕದ ಪರಿಚಯವೂ ಇದೆ. ನಿಮ್ಮ ಮೆಚ್ಚುಗೆಗೆ ಪಾತ್ರವಾಗಿರುವ ವಿಜ್ಞಾನದ ಒಗಟುಗಳು ಹಾಗೂ ಮುದ ನೀಡುವ ವ್ಯಂಗ್ಯ ಚಿತ್ರಗಳೂ ಇವೆ.

ಈ ಸಂಚಿಕೆಯ ಸಿದ್ಧತೆಯ ಹಂತದಲ್ಲಿರುವಾಗ, ಕನ್ನಡ ಚಿತ್ರರಂಗದ ಜನಪ್ರಿಯ ನಾಯಕ ನಟ ಪುನೀತ್ ರಾಜ್‍ಕುಮಾರ್ ಹೃದಯಸ್ತಂಭನದಿಂದ ನಮ್ಮನ್ನಗಲಿದ ಸುದ್ದಿ ಬರಸಿಡಿಲಿನಂತೆ ಬಂದೆರಗಿತು. ನಮ್ಮ ಸರ್ಕಾರಿ ಶಾಲೆಗಳ ರಾಯಭಾರಿಯಾಗಿದ್ದ, ಹಲವಾರು ಶಾಲೆಗಳನ್ನು ದತ್ತು ಪಡೆದಿದ್ದ ಹಾಗೂ ಹೆಣ್ಣು ಮಕ್ಕಳ ಶಿಕ್ಷಣದ ಬಗ್ಗೆ ಅಪಾರ ಕಾಳಜಿ ಹೊಂದಿದ್ದ ಪುನೀತ್ ಅವರಿಗೆ ‘ಸವಿಜ್ಞಾನ’ ತಂಡದ ಪರವಾಗಿ ಭಾವಪೂರ್ಣ ಶ್ರದ್ಧಾಂಜಲಿಯನ್ನು ಅರ್ಪಿಸುತ್ತೇನೆ.

ಡಾ. ಟಿ. ಎ. ಬಾಲಕೃಷ್ಣ ಅಡಿಗ

ಪ್ರಧಾನ ಸಂಪಾದಕರು

ಜೀವ ಹೇಗೆ ಹುಟ್ಟಿದರೇನಂತೆ? - ಭಾಗ 2 - ಸೂಕ್ಷ್ಮಜೀವಿಗಳ ಆವಿಷ್ಕಾರ

ಜೀವ ಹೇಗೆ ಹುಟ್ಟಿದರೇನಂತೆ?

ಭಾಗ 1: ಜೀವ ಹೇಗೆ ಹುಟ್ಟಿದರೇನಂತೆ?

ಭಾಗ 2 - ಸೂಕ್ಷ್ಮಜೀವಿಗಳ ಆವಿಷ್ಕಾರ

ಡಾ. ಎಂ. ಜೆ. ಸುಂದರ್ ರಾಮ್

ಪ್ರಾಣಿಶಾಸ್ತ್ರ ಪ್ರಾಧ್ಯಾಪಕರು ಮತ್ತು ವಿಜ್ಞಾನ ಸಂವಹನಕಾರರು

ಹದಿನೇಳನೇ ಶತಮಾನದಲ್ಲಿ ಫ್ರಾನ್ಸ್, ಇಂಗ್ಲೆಂಡ್, ಇಟಲಿಗಳಲ್ಲಿ ಅರಿಸ್ಟಾಟಲ್‍ರ ವಿಜ್ಞಾನವನ್ನು ಧಿಕ್ಕರಿಸುವ ಕೆಲವು ಮೇಧಾವಿ ವಿಜ್ಞಾನಿಗಳು ಒಗ್ಗೂಡಿ, ಕಣ್ಣಾರೆ ಕಂಡ ಹಾಗೂ ಪ್ರಯೋಗಗಳಿಂದ ದೊರೆತ ಫಲಿತಾಂಶವಲ್ಲದೆ ಮತ್ಯಾವುದನ್ನೂ ಒಪ್ಪಲು ಸಿದ್ಧರಿಲ್ಲವೆಂದು ಘೋಷಿಸಿದರು.

ಇದೇ ಸಮಯದಲ್ಲಿ ಸ್ವಯಂಜನನ ವಾದದ ಬಿರುಗಾಳಿ ಮತ್ತೊಂದೆಡೆ ಹೆಚ್ಚು ರಭಸದಿಂದ ಬೀಸತೊಡಗಿತು. ಈ ಸಲ ಅದು ಹಾಲೆಂಡಿನ ಡೆಲ್ಫ್ಟ್ ನಗರದಲ್ಲಿ ಪ್ರಾರಂಭವಾಯಿತು. ವಿಜ್ಞಾನ ಇನ್ನೂ ಶೈಶವಾಸ್ಥೆಯಲ್ಲಿದ್ದ ಕಾಲವದು. ಮನುಷ್ಯನ ದೇಹದೊಳಗೆ ಏನಿದೆ ಎಂಬ ಕುತೂಹಲದಿಂದ ಹೆಣವನ್ನು ಕತ್ತರಿಸುವ ದುಸ್ಸಾಹಸ ಮಾಡಿದ ಸರ್ವೆಟಿಸ್ (Servete) ಎಂಬ ವಿಜ್ಞಾನಿಯನ್ನು ಜೀವಂತ ಸುಟ್ಟು ದಹನಮಾಡಿದ ಕಾಲವದು. ಭೂಮಿ ಸೂರ್ಯನ ಸುತ್ತ ಸುತ್ತುತ್ತದೆ ಎಂದು ಗುಡುಗಿದ ಗೆಲಿಲಿಯೋನನ್ನು ಸೆರೆಹಿಡಿದು ಕಾರಾಗೃಹದಲ್ಲಿಟ್ಟಿದ್ದ ಕಾಲವದು. ಇಂತಹ ಕಾಲದಲ್ಲಿ ಸೂಕ್ಷದರ್ಶಕ ಬಳಕೆಗೆ ಬಂದಿತು.

ಮನಸೂರೆಗೊಳ್ಳುವ ನೀಲಕುರಿಂಜಿ ಲೋಕ

ಡಿ. ಕೃಷ್ಣಚೈತನ್ಯ

ವಿಜ್ಞಾನ ಮಾರ್ಗದರ್ಶಕರು ಹಾಗು ವನ್ಯಜೀವಿ ತಜ್ಞರು.

ಗೋಣಿಕೊಪ್ಪಲು ಪ್ರೌಢಶಾಲೆ. ಗೋಣಿಕೊಪ್ಪಲು.

ಕೊಡಗು ಜಿಲ್ಲೆ.

ಪ್ರತಿಯೊಬ್ಬ ನಿಸರ್ಗಾಸಕ್ತ, ಜೀವವಿಜ್ಞಾನಿ, ಸಸ್ಯಶಾಸ್ತ್ರಜ್ಞ ಅಷ್ಟೇ ಏಕೆ ಪ್ರತಿಯೊಬ್ಬ ಪ್ರವಾಸಿಯನ್ನು ಸೂಜಿಯಂತೆ ತನ್ನತ್ತ ಸೆಳೆಯುವ ಪುಷ್ಪಲೋಕ ಎಂದರೆ, ಅದುವೇ ಕುರಿಂಜಿ ಲೋಕ! ಮೊಗೆದಷ್ಟೂ ಸಿಗುವ ಜ್ಞಾನದ ಭಂಡಾರವನ್ನು ತನ್ನ ಅಂತರಾಳದಲ್ಲಿ ಹುದುಗಿಸಿಕೊಂಡಿರುವ ಗಿಡ ಎಂದರೆ, ಅದೇ ನೀಲಕುರಿಂಜಿ. ನೀಲಗಿರಿ ಎಂಬ ಅದ್ಭುತ ಹೆಸರನ್ನೇ ಗಿರಿಶ್ರೇಣಿಗೆ ಬರುವಂತೆ ಮಾಡಿದ ಸುಮ ಇದು. ಲೇಖನವನ್ನು ಓದಿದ ಅಥವಾ ಚಿತ್ರಗಳನ್ನು ನೋಡಿದ ಪ್ರತಿಯೊಬ್ಬರನ್ನು ಮುಂದಿನ ಋತುವಿನವರೆಗೆ ಚಡಪಡಿಕೆಯಿಂದ ಕೂರುವಂತೆ ಸಂಮೋಹನಗೊಳಿಸುವ, ಅರಳಿದಾಗ ತನ್ನ ಜಾಗಕ್ಕೆ ಕೈಬೀಸಿ ಕರೆಯುವ ಅಮೋಘ ಗಿಡದ ಗಣಿಗೆ ನೀವೊಮ್ಮೆ ಭೇಟಿ ನೀಡಲು ಸಿದ್ಧರಿದ್ದೀರಾ? ಬನ್ನಿ, ಸ್ನೇಹಿತರೆ!

ಪೋಷಕಾಂಶಗಳೇ ನಿಜವಾದ ಗೇಮ್‌ಚೆಂಜರ್ /ಪೋಷಕಾಂಶಗಳಲ್ಲಿದೆ ಆರೋಗ್ಯದ ಗುಟ್ಟು

ಲೇಖಕರು:

ವೆಂಕಿ ರಾಘವೇಂದ್ರ

ಭಾರತಿ ಮಣೂರ್

ಪೋಷಕಾಂಶಗಳ ಮೂಲಕ ಆರೋಗ್ಯದ ಬಾಗಿಲನ್ನು ತೆರೆಯುವ ಪ್ರದೇಶಗಳಿಗಾಗಿ ಪ್ರಪಂಚದ ನಕ್ಷೆಯನ್ನು ಹುಡುಕಿದರೆ ಮೊದಲ ಸ್ಥಾನದಲ್ಲಿ ನಮಗೆ ಸಿಗುವುದು “ಇಕಿಗಾಯ್” ಜೀವನ ಶೈಲಿಯನ್ನು ಅನುಸರಿಸುವ ಒಕಿನಾವಾ ದ್ವೀಪ. ಜಪಾನಿನ ನಡುಗಡ್ಡೆಯಲ್ಲಿ ವಾಸವಾಗಿರುವ ಜನ ಶತಾಯುಷಿಗಳಾಗಿ ವಿಶ್ವ ಗಿನ್ನಿಸ್ ದಾಖಲೆಯನ್ನು ಸೇರಿಕೊಂಡಿದ್ದಾರೆ. ಇವರ ಆರೋಗ್ಯಕರ ಜೀವನ ಶೈಲಿಯಲ್ಲಿ ಪೋಷಕಾಂಶಗಳಿಂದ ಕೂಡಿದ ಆಹಾರ ಮಹತ್ವದ ಪಾತ್ರ ವಹಿಸಿದೆ. ಹಾಗಾದರೆ ಈ ಜನ ಯಾವ ಅಹಾರವನ್ನು ಸೇವಿಸುತ್ತಾರೆ? ಎಷ್ಟು ಪ್ರಮಾಣದಲ್ಲಿ ಸೇವಿಸುತ್ತಾರೆ? ಯಾವಾಗ ಸೇವಿಸುತ್ತಾರೆ ? - ಎಂಬುದು ಪ್ರತಿಯೊಬ್ಬರ ಕುತೂಹಲದ ಪ್ರಶ್ನೆ. ಒಕಿನಾವಾದ ಒಬ್ಬ ಶತಾಯುಷಿ ಹೇಳುವ ಪ್ರಕಾರ ವೈವಿದ್ಯಮಯ ಮತ್ತು ಸ್ವಾದಿಷ್ಟವಾದ ಆಹಾರ ಯಾವಾಗಲೂ ನನ್ನ ಆಯ್ಕೆ ಹಾಗೂ ಆಹಾರದ ಅಯ್ಕೆಯಲ್ಲಿ ನಾನು ಯಾವಾಗಲೂ ನನ್ನ ಪೂರ್ವಜರ ದಾರಿಯನ್ನೇ ಅನುಸರಿಸುತ್ತೇನೆ ಎಂದು. ಇಲ್ಲಿ ವೈವಿಧ್ಯಮಯ ಎಂಬುದು ತಯಾರಿಸಿದ ಆಹಾರವಾಗಿರದೇ ಪೋಷಕಾಂಶಗಳ ಸಂತೃಪ್ತತೆ ಎಂಬುದು ಮುಖ್ಯವಾಗಿರುತ್ತದೆ. ಶತಾಯುಷಿಗಳು ಮುಖ್ಯವಾಗಿ ಸ್ಥಳಿಯವಾಗಿ ಬೆಳೆಯುವ ಹಣ್ಣು ಮತ್ತು ತರಕಾರಿಗಳನ್ನು ಯಥೇಚ್ಛವಾಗಿ ಸೇವಿಸುತ್ತಾರೆ. ಅವರ ಊಟದ ತಟ್ಟೆಗಳಲ್ಲಿ ನಾರಿನಾಂಶಗಳಿಂದ ಕೂಡಿದ ಬೀನ್ಸಗಳಿಗೆ ವಿಶೇಷ ಸ್ಥಾನವಿದೆ. ಸೋಯಾ ಬೀನ್ಗಳಿಂದ ತಯಾರಿಸಿದ ಹಾಲು ಮುಂತಾದವು ಪೋಷಕಾಂಶಗಳ ಖಜಾನೆ ಎಂದರೆ ತಪ್ಪಾಗಲಾರದು. ಕ್ಯಾಲ್ಸಿಯಂ, ನಾರಿನಾಂಶ, ಪ್ರೋಟೀನ್‌ಗಳಿಂದ ಸಮೃದ್ಧವಾದ ಎಳ್ಳು ಕಾಳುಗಳನ್ನು ದೀರ್ಘಾಯುಷ್ಯಕ್ಕಾಗಿ ಬಳಸುತ್ತಾರೆ.‌ ಅಣಬೆ, ಮೀನು, ಸಮುದ್ರಕಳೆ, ಮುಂತಾದವು ಜಪಾನಿನ ಆಹಾರ ತಟ್ಟೆಯ ಅಲಂಕಾರಗಳು.

ಬೊಂಬೆಯಾಟದ ಮೂಲಕ ವಿಜ್ಞಾನ ಕಲಿಕೆ

ಸಿದ್ದು ಬಿರಾದಾರ, ವಿಜ್ಞಾನ ಶಿಕ್ಷಕ

ಸರಕಾರಿ ಪ್ರೌಢ ಶಾಲೆ ಚಿಬ್ಬಲಗೇರಿ

ತಾ: ಹಳಿಯಾಳ, ಶಿರಿಸಿ ಶೈಕ್ಷಣಿಕ ಜಿಲ್ಲೆ

ಉತ್ತರ ಕನ್ನಡ

ಕಲಿಕೆಯ ಪ್ರಕ್ರಿಯೆಯಲ್ಲಿ ತೊಡಗಿರುವ ಪ್ರತಿಯೊಂದು ಮಗು, ತನ್ನ ತರಗತಿಯ ವಿಷಯಗಳನ್ನು ಅರ್ಥೈಸಿಕೊಳ್ಳಬೇಕಾದರೆ, ಕ್ರಮಬದ್ಧವಾದ ಅಧ್ಯಯನ ಹಾಗೂ ಸೂಕ್ತ ಮಾರ್ಗದರ್ಶನ ಅತಿ ಅವಶ್ಯಕ. ಮಕ್ಕಳು ತಮ್ಮ ಪರಿಸರದಲ್ಲಿ ನಡೆಯುವ ವಿವಿಧ ಬದಲಾವಣೆಗಳನ್ನು ಗುರುತಿಸುತ್ತಾರೆ. ಅವರು ವಾತಾವರಣದಲ್ಲಿ ಆಗುವ ವೈವಿಧ್ಯಮಯ ಬದಲಾವಣೆಗಳನ್ನು ಅರಿಯುವ ಅದಮ್ಯ ಕುತೂಹಲಿಗಳಾಗಿರುತ್ತಾರೆ. ಪ್ರಕೃತಿಯಲ್ಲಿನ ಆಗು ಹೋಗುಗಳು ಏಕೆ? ಏನು? ಹೇಗೆ? ಎಲ್ಲಿ? ಯಾವಾಗ? ಮುಂತಾದ ನೂರಾರು ಪ್ರಶ್ನೆಗಳಿಗೆ ವಿದ್ಯಾರ್ಥಿಗಳು ಉತ್ತರವನ್ನು ತಿಳಿದುಕೊಳ್ಳುವ ಸಹಜ ಹಂಬಲ ಅವರದು.

ಭವಿಷ್ಯದಲ್ಲಿ ತೊಂದರೆಯಾಗಲಿರುವ ವ್ಯೋಮ ತ್ಯಾಜ್ಯಗಳು

ಗಜಾನನ ಎನ್. ಭಟ್. (ಹವ್ಯಾಸಿ ಲೇಖಕರು, ವಿಜ್ಞಾನ ಶಿಕ್ಷಕರು)

ಸರಕಾರಿ ಪ್ರೌಢಶಾಲೆ, ಉಮ್ಮಚಗಿ,

ಯಲ್ಲಾಪುರ ತಾ. ಶಿರಸಿ,

ಉತ್ತರ ಕನ್ನಡ

ಮಾನವ ಇಂದು ತಂತ್ರಜ್ಞಾನದ ಉತ್ತುಂಗದಲ್ಲಿದ್ದಾನೆ. ಪ್ರಪಂಚದ ಯಾವುದೇ ಮೂಲೆಯನ್ನಾದರೂ ಕ್ಷಣಾರ್ಧದಲ್ಲಿ ಸಂಪರ್ಕಿಸಿ ಅಲ್ಲಿನ ಯಥಾವತ್ತಾದ ಮಾಹಿತಿಯನ್ನು ಪಡೆಯುವ ಸೌಕರ್ಯವನ್ನು ವಿಜ್ಞಾನದ ಮೂಲಕ ತನ್ನದಾಗಿಸಿಕೊಂಡಿದ್ದಾನೆ. ಕುಳಿತಲ್ಲಿಂದಲೇ, ನಮ್ಮ ದಿನನಿತ್ಯದ ಹಲವಾರು ಕೆಲಸ ಕಾರ್ಯಗಳನ್ನು ನಿರ್ವಹಿಸುವುದು ಇಂದು ಅತ್ಯಂತ ಸುಲಲಿತ. ಇವಕ್ಕೆಲ್ಲ ಮೂಲವೇ ವ್ಯೋಮ ವಿಜ್ಞಾನಿಗಳ ನಿರಂತರ ಸಂಶೋಧನೆಯ ಫಲವಾದ ಉಪಗ್ರಹಗಳು. ಪ್ರತಿ ವರ್ಷ ಪ್ರಪಂಚದಾದ್ಯಂತ ನೂರಾರು ಉಪಗ್ರಹಗಳನ್ನು ವ್ಯೋಮದ ಬೇರೆ ಬೇರೆ ಕಕ್ಷೆಗಳಿಗೆ ಉಡಾವಣಾ ಕೇಂದ್ರದಿಂದ ಹಾರಿಬಿಡಲಾಗುತ್ತಿದೆ. ಈ ಉಪಗ್ರಹಗಳಿಮದ ದೊರೆತ ಮಾಹಿತಿಗಳು ವಿಜ್ಞಾನ ಲೋಕದಲ್ಲಿ ಮಹತ್ತರ ಹೆಜ್ಜೆಗುರುತು ಮೂಡಿಸಿ ಮನುಕುಲದ ಜೀವನ ಮಟ್ಟವನ್ನು ಮೇಲೆತ್ತುತ್ತಿವೆ.

ಪುಸ್ತಕ ಪರಿಚಯ

ಕಲಿಕೆಗೊಂದು ಕೈಪಿಡಿ

ರಾಮಚಂದ್ರ ಭಟ್‌ ಬಿ.ಜಿ.

ನಾಡಿನ ಖ್ಯಾತ ಶಿಕ್ಷಣ ತಜ್ಞರಾದ ಡಾ.ಟಿ.ಎ.ಬಾಲಕೃಷ್ಣ ಅಡಿಗರ ಕಲಿಕೆಗೊಂದು ಕೈಪಿಡಿ ಎಂಬ ಕಿರುಹೊತ್ತಗೆಯನ್ನು ಪರಿಚಯಿಸಲು ಸಂತೋಷವಾಗುತ್ತದೆ. ಪ್ರಜಾವಾಣಿಯಲ್ಲಿ ಪ್ರಕಟಗೊಂಡ ಜನಪ್ರಿಯ ಅಂಕಣಬರಹಗಳು ಜ್ಞಾನದೀಪಿಕಾ ಎಜ್ಯುಕೇಷನ್‌ ಟ್ರಸ್ಟ್‌ನ ಪರಿಶ್ರಮದಿಂದ ಪುಸ್ತಕರೂಪಕ್ಕೆ ಬಂದಿವೆ. ಆಯಾ ಸಂದರ್ಭಗಳಿಗೆ ತಕ್ಕಂತೆ ಶೈಕ್ಷಣಿಕ ದೃಷ್ಟಿಯಿಂದ ವಿಶೇಷವಾಗಿ ವಿದ್ಯಾರ್ಥಿಗಳಿಗಾಗಿ ಬರೆದ ಈ ಲೇಖನಗಳು ಶಿಕ್ಷಕರು ಹಾಗೂ ಪೋಷಕರಿಗೂ ಮಾರ್ಗದರ್ಶಿಯಾಗಿವೆ. ಅಷ್ಟೇ ಅಲ್ಲದೆ ಶೈಕ್ಷಣಿಕ ಅಧ್ಯಯನಾಸಕ್ತರ ಒಳಗಣ್ಣನ್ನೂ ಪ್ರಚೋದಿಸುವಂತಿವೆ.